ਇਕ ਸ਼ਹਿਰ ਅਜਿਹਾ ਵੀ..; 4 ਡਿਗਰੀ ਤੱਕ ਡਿਗਿਆ ਤਾਪਮਾਨ, ਇੰਝ ਦਿੱਤੀ ਗਰਮੀ ਨੂੰ ਮਾਤ

Edited By Harpreet Singh,
Updated: 27 Jul, 2026 04:48 PM

ਇੰਟਰਨੈਸ਼ਨਲ ਡੈਸਕ- ਦੁਨੀਆ ’ਚ ਇਕ ਅਜਿਹਾ ਸ਼ਹਿਰ ਵੀ ਹੈ, ਜਿੱਥੇ ਬੂਟੇ ਲਾਉਣ ਦੀ ਪਹਿਲਕਦਮੀ ਨੇ ਤਾਪਮਾਨ ਨੂੰ ਕਈ ਡਿਗਰੀ ਤੱਕ ਘਟਾ ਦਿੱਤਾ। ਅਜਿਹਾ ਕੋਲੰਬੀਆ ਦੇ ਮੇਡੇਲਿਨ ਸ਼ਹਿਰ ਵਿਚ ਹੋਇਆ ਹੈ। 2013 ’ਚ ਇੱਥੇ ਕੰਕਰੀਟ ਦੀਆਂ ਸੜਕਾਂ ਦੇ ਦੋਵੇਂ ਪਾਸੇ ਬਸ ਉੱਚੀਆਂ-ਉੱਚੀਆਂ ਕੱਚ ਦੀਆਂ ਇਮਾਰਤਾਂ ਹੀ ਨਜ਼ਰ ਆਉਂਦੀਆਂ ਸਨ। ਇੱਥੇ ਗ੍ਰੀਨ ਕਾਰੀਡੋਰ ਪ੍ਰਾਜੈਕਟ ਲਾਂਚ ਹੋਇਆ ਅਤੇ 10 ਸਾਲਾਂ ਵਿਚ ਤਾਪਮਾਨ ’ਚ ਵੱਡੀ ਗਿਰਾਵਟ ਦਰਜ ਕੀਤੀ ਗਈ।

ਮੇਡੇਲਿਨ ਦੀ ਕ੍ਰਾਂਤੀ ਨੇ ਦੁਨੀਆ ਦਾ ਧਿਆਨ ਖਿੱਚਿਆ
ਮੇਡੇਲਿਨ ਸਿਟੀ ਗਵਰਨਮੈਂਟ ਦੇ ਅਨੁਸਾਰ ਸ਼ਹਿਰ ਦਾ ਤਾਪਮਾਨ ਗ੍ਰੀਨ ਕਾਰੀਡੋਰ ਪ੍ਰਾਜੈਕਟ ਨਾਲ ਲੱਗਭਗ 4 ਡਿਗਰੀ ਸੈਲਸੀਅਸ ਤੱਕ ਘਟਿਆ ਹੈ। ਪਹਿਲਾਂ ਇੱਥੋਂ ਦਾ ਔਸਤ ਹਵਾ ਦਾ ਤਾਪਮਾਨ 31 ਡਿਗਰੀ ਸੈਲਸੀਅਸ ਰਹਿੰਦਾ ਸੀ, ਜੋ ਹੁਣ 27 ਡਿਗਰੀ ਸੈਲਸੀਅਸ ਹੈ। ਉੱਥੇ ਹੀ ਸਤ੍ਹਾ ਦਾ ਤਾਪਮਾਨ 40.5 ਡਿਗਰੀ ਸੈਲਸੀਅਸ ਤੋਂ ਘਟ ਕੇ 30.2 ਡਿਗਰੀ ਸੈਲਸੀਅਸ ਤੱਕ ਆ ਗਿਆ ਹੈ। ਖ਼ੁਦ ਯੂਨਾਈਟਿਡ ਨੇਸ਼ਨਜ਼ ਐਨਵਾਇਰਮੈਂਟ ਪ੍ਰੋਗਰਾਮ ਨੇ ਵੀ ਇਸ ਦੀ ਸ਼ਲਾਘਾ ਕੀਤੀ ਹੈ।

ਕੋਲੰਬੀਆ ਦਾ ਦਿਲ ਹੈ ਮੇਡੇਲਿਨ
ਮੇਡੇਲਿਨ ਸ਼ਹਿਰ ਕੋਲੰਬੀਆ ਦੇ ਉੱਤਰ-ਪੱਛਮ ’ਚ ਸਥਿਤ ਹੈ। ਇਸ ਸ਼ਹਿਰ ਨੂੰ ਸਦਾਬਹਾਰ ਬਸੰਤ ਦਾ ਸ਼ਹਿਰ ਵੀ ਕਹਿੰਦੇ ਹਨ, ਕਿਉਂਕਿ ਹੁਣ ਇੱਥੋਂ ਦਾ ਮੌਸਮ ਸਾਲ ਭਰ ਸੁਹਾਵਣਾ ਰਹਿੰਦਾ ਹੈ। ਸ਼ਹਿਰ ਵਿਚ 40 ਲੱਖ ਤੋਂ ਵੱਧ ਲੋਕ ਰਹਿੰਦੇ ਹਨ ਅਤੇ ਜੀ.ਡੀ.ਪੀ. ਲੱਗਭਗ 35 ਅਰਬ ਡਾਲਰ ਹੈ। ਕਦੇ ਇਹ ਸ਼ਹਿਰ ਡਰੱਗ ਕਾਰਟੇਲ ਲਈ ਬਦਨਾਮ ਸੀ। 21ਵੀਂ ਸਦੀ ਵਿਚ ਸ਼ਹਿਰ ਨੇ ਖ਼ੁਦ ਨੂੰ ਬਦਲਿਆ ਅਤੇ ਹੁਣ ਇਹ ਸ਼ਹਿਰੀ ਯੋਜਨਾਬੰਦੀ ਕਾਰਨ ਦੁਨੀਆ ਭਰ ਵਿਚ ਪਛਾਣਿਆ ਜਾ ਰਿਹਾ ਹੈ। ਅਰਬਨ ਲੈਂਡ ਇੰਸਟੀਚਿਊਟ ਵੱਲੋਂ ਇਸ ਸ਼ਹਿਰ ਨੂੰ ਦੁਨੀਆ ਦਾ ਸਭ ਤੋਂ ਇਨੋਵੇਟਿਵ ਸ਼ਹਿਰ ਐਲਾਨਿਆ ਜਾ ਚੁੱਕਾ ਹੈ।

ਐਮਰਜੈਂਸੀ ਬਣ ਰਹੀ ਸੀ ਗਰਮੀ
ਮੇਡੇਲਿਨ ਵਿਚ ਗਰਮੀ ਇਕ ਸਮੱਸਿਆ ਨਹੀਂ ਬਲਕਿ ਐਮਰਜੈਂਸੀ ਬਣਦੀ ਜਾ ਰਹੀ ਸੀ। ਸ਼ਹਿਰ ਵਿਚ ਪੀ.ਐੱਮ. 2.5 ਦਾ ਪੱਧਰ ਵੱਧ ਰਿਹਾ ਸੀ। 2020 ’ਚ ਅੰਤੀਓਕੀਆ ਯੂਨੀਵਰਸਿਟੀ ਦੇ ਇਕ ਅਧਿਐਨ ਨੇ ਸਿੱਟਾ ਕੱਢਿਆ ਕਿ 2016 ਵਿਚ ਅਬੁਰਾ ਘਾਟੀ ਖੇਤਰ ਵਿਚ ਪ੍ਰਦੂਸ਼ਣ ਕਾਰਨ 1,971 ਮੌਤਾਂ ਹੋਈਆਂ ਸਨ। ਮੇਡੇਲਿਨ ਦੇ ਵਾਤਾਵਰਣ ਸਕੱਤਰ ਜੋਹਾਨ ਲੋਂਦੋਨੋ ਨੇ ਇਕ ਇੰਟਰਵਿਊ ਵਿਚ ਕਿਹਾ ਸੀ ਕਿ ਕਦੇ ਅਸੀਂ ਸਦਾਬਹਾਰ ਬਸੰਤ ਦਾ ਸ਼ਹਿਰ ਅਖਵਾਉਂਦੇ ਹਾਂ ਪਰ ਅਸੀਂ ਵਧਦੇ ਤਾਪਮਾਨ ਨੂੰ ਮਹਿਸੂਸ ਕਰ ਰਹੇ ਹਾਂ। ਹਰ ਸਾਲ ਗਰਮੀ ਵੱਧ ਰਹੀ ਹੈ। ਹਵਾ ਪ੍ਰਦੂਸ਼ਣ ਕਾਰਨ ਸਾਹ ਦੀਆਂ ਬੀਮਾਰੀਆਂ ਵੱਧ ਰਹੀਆਂ ਸਨ, ਬੱਚੇ ਅਤੇ ਬਜ਼ੁਰਗ ਸਭ ਤੋਂ ਵੱਧ ਪ੍ਰਭਾਵਿਤ ਹੋ ਰਹੇ ਸਨ।

PunjabKesari