ਅਬੂ ਧਾਬੀ - ਸੰਯੁਕਤ ਅਰਬ ਅਮੀਰਾਤ (ਯੂ. ਏ. ਈ.) ਵਿਚ ਸਿਕਿਓਰਿਟੀ ਗਾਰਡ ਵਜੋਂ ਕੰਮ ਕਰ ਰਹੇ ਨੇਪਾਲ ਦੇ ਇਕ ਪ੍ਰਵਾਸੀ ਨੌਜਵਾਨ ਦੀ ਕਿਸਮਤ ਉਸ ਸਮੇਂ ਚਮਕ ਗਈ, ਜਦੋਂ ਉਸ ਨੇ ਆਪਣੇ ਚਾਰ ਦੋਸਤਾਂ ਨਾਲ ਮਿਲ ਕੇ ਖਰੀਦੀ ਲਾਟਰੀ ਵਿਚ 3 ਕਰੋੜ ਦਿਰਹਾਮ (ਲਗਭਗ 78 ਕਰੋੜ ਰੁਪਏ) ਦਾ ਜੈਕਪਾਟ ਜਿੱਤ ਲਿਆ। ਇਸ ਜਿੱਤ ਤੋਂ ਬਾਅਦ ਪੰਜਾਂ ਦੋਸਤਾਂ ਦੀ ਜ਼ਿੰਦਗੀ ਪੂਰੀ ਤਰ੍ਹਾਂ ਬਦਲਣ ਜਾ ਰਹੀ ਹੈ। ਹਰ ਜੇਤੂ ਦੇ ਹਿੱਸੇ ’ਚ ਲਗਭਗ 60 ਲੱਖ ਦਿਰਹਾਮ (ਲਗਭਗ 13 ਕਰੋੜ ਰੁਪਏ) ਆਏ ਹਨ।
4 ਸਾਲ ਬਾਅਦ ਮਿਲਿਆ ਵੱਡਾ ਇਨਾਮ
ਨੇਪਾਲ ਦੇ ਰਹਿਣ ਵਾਲੇ ਤੈਯਬ ਖਾਨ ਪਿਛਲੇ ਕਰੀਬ 4 ਸਾਲਾਂ ਤੋਂ ਅਬੂ ਧਾਬੀ ਵਿਚ ਸੁਰੱਖਿਆ ਗਾਰਡ ਵਜੋਂ ਕੰਮ ਕਰ ਰਹੇ ਹਨ। ਬਿਹਤਰ ਭਵਿੱਖ ਦੀ ਉਮੀਦ ਵਿਚ ਉਹ ਆਪਣੇ ਚਾਰ ਦੋਸਤਾਂ ਨਾਲ ਨਿਯਮਿਤ ਤੌਰ ’ਤੇ ਪੈਸੇ ਮਿਲਾ ਕੇ ਯੂ. ਏ. ਈ. ਲਾਟਰੀ ਦੀਆਂ ਟਿਕਟਾਂ ਖਰੀਦਦੇ ਸਨ। ਦੋਸਤਾਂ ਦੀ ਇਹ ਸਾਂਝੀ ਕੋਸ਼ਿਸ਼ ਆਖਿਰਕਾਰ ਰੰਗ ਲਿਆਈ ਅਤੇ ਉਨ੍ਹਾਂ ਦੀ ਟਿਕਟ ਨੇ ਕਰੋੜਾਂ ਦਾ ਜੈਕਪਾਟ ਜਿੱਤ ਲਿਆ।
ਈਮੇਲ ਰਾਹੀਂ ਮਿਲੀ ਖੁਸ਼ਖਬਰੀ, ਪਹਿਲਾਂ ਨਹੀਂ ਹੋਇਆ ਯਕੀਨ
ਖਾਨ ਉਸ ਸਮੇਂ ਲਾਟਰੀ ਡਰਾਅ ਨਹੀਂ ਦੇਖ ਰਹੇ ਸਨ। ਉਨ੍ਹਾਂ ਨੂੰ ਜਿੱਤ ਦੀ ਜਾਣਕਾਰੀ ਈਮੇਲ ਰਾਹੀਂ ਮਿਲੀ। ਸ਼ੁਰੂਆਤ ਵਿਚ ਉਨ੍ਹਾਂ ਨੇ ਇਸ ਨੂੰ ਇਕ ਆਮ ਸੂਚਨਾ ਸਮਝਿਆ ਪਰ ਜਦੋਂ ਉਨ੍ਹਾਂ ਨੇ ਪੂਰੀ ਜਾਣਕਾਰੀ ਦੇਖੀ ਤਾਂ ਉਨ੍ਹਾਂ ਦੀ ਖੁਸ਼ੀ ਦੀ ਕੋਈ ਟਿਕਾਣਾ ਨਾ ਰਿਹਾ। ਖਾਨ ਨੇ ਕਿਹਾ, ‘‘ਮੇਰੇ ਹੱਥ-ਪੈਰ ਕੰਬਣ ਲੱਗ ਪਏ ਸਨ। ਮੈਨੂੰ ਇੰਜ ਲੱਗਿਆ ਜਿਵੇਂ ਮੈਂ ਕੋਈ ਸੁਪਨਾ ਦੇਖ ਰਿਹਾ ਹੋਵਾਂ।’’
ਸੰਘਰਸ਼ ਤੋਂ ਸਫਲਤਾ ਤੱਕ ਦੀ ਕਹਾਣੀ ਬਣੀ ਚਰਚਾ ਦਾ ਵਿਸ਼ਾ
ਪੰਜਾਂ ਦੋਸਤਾਂ ’ਚੋਂ ਕੋਈ ਸਾਲਾਂ ਤੋਂ ਪਰਿਵਾਰ ਤੋਂ ਦੂਰ ਰਹਿ ਕੇ ਕੰਮ ਕਰ ਰਿਹਾ ਸੀ, ਤਾਂ ਕੋਈ ਹਾਲ ਹੀ ਵਿਚ ਪਿਤਾ ਬਣਿਆ ਸੀ। ਅਜਿਹੇ ਵਿਚ ਇਹ ਜਿੱਤ ਉਨ੍ਹਾਂ ਲਈ ਸਿਰਫ਼ ਪੈਸਾ ਨਹੀਂ, ਸਗੋਂ ਸਾਲਾਂ ਦੇ ਸੰਘਰਸ਼ ਤੋਂ ਰਾਹਤ ਦਾ ਪ੍ਰਤੀਕ ਬਣ ਗਈ ਹੈ। ਇਕ ਸਾਧਾਰਨ ਸੁਰੱਖਿਆ ਗਾਰਡ ਦਾ ਰਾਤੋ-ਰਾਤ ਕਰੋੜਪਤੀ ਬਣ ਜਾਣਾ ਅਤੇ ਫਿਰ ਉਸ ਖੁਸ਼ੀ ਨੂੰ ਦੋਸਤਾਂ ਨਾਲ ਸਾਂਝਾ ਕਰਨਾ ਲੋਕਾਂ ਨੂੰ ਬਹੁਤ ਪ੍ਰੇਰਿਤ ਕਰ ਰਿਹਾ ਹੈ। ਇਹੀ ਕਾਰਨ ਹੈ ਕਿ ਇਹ ਕਹਾਣੀ ਸੋਸ਼ਲ ਮੀਡੀਆ ’ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।
ਪਰਿਵਾਰ ਲਈ ਘਰ ਬਣਾਉਣਾ ਪਹਿਲੀ ਤਰਜੀਹ
ਅਚਾਨਕ ਮਿਲੀ ਇਸ ਵੱਡੀ ਰਕਮ ਦੇ ਬਾਵਜੂਦ ਤੈਯਬ ਖਾਨ ਦੀ ਪਹਿਲੀ ਤਰਜੀਹ ਆਪਣੇ ਪਰਿਵਾਰ ਲਈ ਨੇਪਾਲ ਵਿਚ ਇਕ ਚੰਗਾ ਘਰ ਬਣਾਉਣਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਾਲਾਂ ਤੱਕ ਵਿਦੇਸ਼ ਵਿਚ ਰਹਿ ਕੇ ਮਿਹਨਤ ਕਰਨ ਤੋਂ ਬਾਅਦ ਹੁਣ ਉਹ ਆਪਣੇ ਮਾਤਾ-ਪਿਤਾ ਅਤੇ ਪਰਿਵਾਰ ਨੂੰ ਇਕ ਸੁਰੱਖਿਅਤ ਅਤੇ ਬਿਹਤਰ ਜ਼ਿੰਦਗੀ ਦੇਣਾ ਚਾਹੁੰਦੇ ਹਨ।
ਮਹਿੰਦਰਾ ਥਾਰ ਖਰੀਦਣ ਦਾ ਵੀ ਹੈ ਸੁਪਨਾ
ਘਰ ਤੋਂ ਇਲਾਵਾ ਖਾਨ ਦੀਆਂ ਨਿੱਜੀ ਇੱਛਾਵਾਂ ’ਚ ਪ੍ਰਸਿੱਧ ਐੱਸ. ਯੂ. ਵੀ. ਮਹਿੰਦਰਾ ਥਾਰ ਖਰੀਦਣਾ ਵੀ ਸ਼ਾਮਲ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਉਨ੍ਹਾਂ ਦੇ ਲੰਬੇ ਸੰਘਰਸ਼ ਅਤੇ ਅਨੁਸ਼ਾਸਿਤ ਜੀਵਨ ਦਾ ਇਕ ਤਰ੍ਹਾਂ ਦਾ ਇਨਾਮ ਹੋਵੇਗਾ। ਇਸ ਦੇ ਨਾਲ ਹੀ ਉਹ ਇਕ ਲਗਜ਼ਰੀ ਘੜੀ ਖਰੀਦਣ ਅਤੇ ਆਪਣੇ ਜੀਵਨ ਪੱਧਰ ਵਿਚ ਸੁਧਾਰ ਕਰਨ ਦੀ ਵੀ ਯੋਜਨਾ ਬਣਾ ਰਹੇ ਹਨ। ਰਿਪੋਰਟਾਂ ਅਨੁਸਾਰ, ਉਹ ਨੌਕਰੀ ਛੱਡ ਕੇ ਕਾਰੋਬਾਰ (ਉੱਦਮਤਾ) ਅਤੇ ਨਿਵੇਸ਼ ਦੇ ਖੇਤਰ ਵਿਚ ਕਦਮ ਰੱਖਣ ਬਾਰੇ ਵਿਚਾਰ ਕਰ ਰਹੇ ਹਨ। ਹਾਲਾਂਕਿ, ਉਨ੍ਹਾਂ ਨੇ ਫਿਲਹਾਲ ਕੋਈ ਕਾਹਲੀ ਨਹੀਂ ਦਿਖਾਈ ਹੈ ਅਤੇ ਪਹਿਲਾਂ ਪਰਿਵਾਰਕ ਜ਼ਿੰਮੇਵਾਰੀਆਂ ਨੂੰ ਪੂਰਾ ਕਰਨ ’ਤੇ ਧਿਆਨ ਕੇਂਦਰਿਤ ਕੀਤਾ ਹੈ।
ਪੈਂਟਾਗਨ 'ਚ ਕੈਮੀਕਲ ਅਲਰਟ: ਕਈ ਫਲੋਰ ਕੀਤੇ ਗਏ ਸੀਲ, ਕਰਮਚਾਰੀਆਂ 'ਚ ਮਚੀ ਭਾਜੜ
NEXT STORY 
