ਟੋਰਾਂਟੋ, (ਵੈਬ ਡੈਸਕ)- ਐੱਨ. ਡੀ. ਪੀ. ਦੇ ਦੋ ਉਮੀਦਵਾਰਾਂ ਵਲੋਂ ਅਸਤੀਫਾ ਦੇ ਦਿੱਤੇ ਜਾਣ ਤੋਂ ਬਾਅਦ ਫੈਡਰਲ ਕੰਜ਼ਰਵੇਟਿਵ ਉਮੀਦਵਾਰ ਨੂੰ ਵੀ ਆਪਣੀ ਦਾਅਵੇਦਾਰੀ ਛੱਡਣ ਲਈ ਮਜ਼ਬੂਰ ਹੋਣਾ ਪੈ ਗਿਆ ਹੈ। ਦਰਅਸਲ ਮੈਨੀਟੋਬਾ ਤੋਂ ਫੈਡਰਲ ਕੰਜ਼ਰਵੇਟਿਵ ਉਮੀਦਵਾਰ ਵਲੋਂ ਕੀਤੀਆਂ ਗਈਆਂ ਕਥਿਤ ਪੱਖਪਾਤੀ ਪੋਸਟਸ ਸੋਸ਼ਲ ਮੀਡੀਆ ‘ਤੇ ਪਾਏ ਜਾਣ ਦਾ ਖੁਲਾਸਾ ਹੋਇਆ ਹੈ। ਪਾਰਟੀ ਨੇ ਵੀਰਵਾਰ ਨੂੰ ਆਖਿਆ ਕਿ ਕੈਮਰੌਨ ਓਗਿਲਵੀ, ਜੋ ਕਿ ਨਾਰਥ ਵਿਨੀਪੈਗ ਤੋਂ ਕੰਜ਼ਰਵੇਟਿਵ ਪਾਰਟੀ ਲਈ ਉਮੀਦਵਾਰ ਸੀ, ਨੇ ਉਸੇ ਵੇਲੇ ਦਾਅਵੇਦਾਰੀ ਛੱਡ ਦਿੱਤੀ ਜਦੋਂ ਉਸ ਨੂੰ ਪਤਾ ਲੱਗਿਆ ਕਿ ਉਸ ਵੱਲੋਂ ਪਾਈਆਂ ਤੇ ਫਿਰ ਹਟਾਈਆਂ ਗਈਆਂ ਪੱਖਪਾਤੀ ਪੋਸਟਸ ਬਾਰੇ ਪਾਰਟੀ ਨੂੰ ਪਤਾ ਲੱਗ ਗਿਆ ਹੈ।
ਕੰਜ਼ਰਵੇਟਿਵ ਕੈਂਪੇਨ ਦੇ ਬੁਲਾਰੇ ਬਰੌਕ ਹੈਰੀਸਨ ਨੇ ਆਖਿਆ ਕਿ ਓਗਿਲਵੀ ਦੀਆਂ ਆਨਲਾਈਨ ਕੀਤੀਆਂ ਗਈਆਂ ਟਿੱਪਣੀਆਂ ਕੈਨੇਡਾ ਦੀ ਕੰਜ਼ਰਵੇਟਿਵ ਪਾਰਟੀ ਦੀਆਂ ਕਦਰਾਂ ਕੀਮਤਾਂ ਨਾਲ ਮੇਲ ਨਹੀਂ ਖਾਂਦੀਆਂ। ਉਨ੍ਹਾਂ ਆਖਿਆ ਕਿ ਐਂਡਰਿਊ ਸ਼ੀਅਰ ਇਸ ਗੱਲ ਨੂੰ ਲੈ ਕੇ ਬਹੁਤ ਸਪੱਸ਼ਟ ਹਨ ਕਿ ਕਿਸੇ ਨੂੰ ਇਹ ਗਲਤਫਹਿਮੀ ਨਹੀਂ ਹੋਣੀ ਚਾਹੀਦੀ ਕਿ ਕਿਸੇ ਦੀ ਨਸਲ ਜਾਂ ਜਿਨਸੀ ਝੁਕਾਅ ਉਸ ਨੂੰ ਕਿਸੇ ਹੋਰ ਨਾਲੋਂ ਉੱਚਾ ਬਣਾਉਂਦਾ ਹੈ। ਜਿਹੜਾ ਕੋਈ ਇਸ ਸੋਚ ਨਾਲ ਇਤਫਾਕ ਨਹੀਂ ਰੱਖਦਾ ਤਾਂ ਉਸ ਲਈ ਕੰਜ਼ਰਵੇਟਿਵ ਪਾਰਟੀ ਵਿਚ ਕੋਈ ਥਾਂ ਨਹੀਂ ਹੈ। ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਪੋਸਟਸ ਵਿਚ ਅਸਲ ਵਿਚ ਕੀ ਆਖਿਆ ਗਿਆ ਹੈ। ਪਾਰਟੀ ਨੇ ਆਖਿਆ ਕਿ ਇਸ ਸਾਲ ਦੇ ਸ਼ੁਰੂ ਵਿਚ ਓਗਿਲਵੀ ਨੇ ਅਜਿਹੀਆਂ ਪੋਸਟਸ ਹਟਾ ਵੀ ਦਿੱਤੀਆਂ ਸਨ। ਇਸ ਸਬੰਧੀ ਹਾਲੇ ਓਗਿਲਵੀ ਨਾਲ ਸੰਪਰਕ ਨਹੀਂ ਹੋ ਸਕਿਆ। ਪਾਰਟੀ ਨੇ ਆਖਿਆ ਕਿ ਇੱਥੋਂ ਨਵੇਂ ਉਮੀਦਵਾਰ ਦਾ ਨਾਂ ਬਾਅਦ ‘ਚ ਐਲਾਨਿਆ ਜਾਵੇਗਾ।
ਰੋਜ਼ਾਨਾ ਚਾਹ ਪੀਣ ਨਾਲ ਦਿਮਾਗ ਰਹਿੰਦੈ ਦਰੁਸਤ
NEXT STORY