ਜਲੰਧਰ (ਪੁਨੀਤ) : ਸ਼ਰਾਬ ਠੇਕਿਆਂ ਦੇ ਗਰੁੱਪਾਂ ਦੀ ਰਿਜ਼ਰਵ ਪ੍ਰਾਈਸ 'ਚ ਹੋਈ 2.50 ਫੀਸਦੀ ਦੀ ਕਟੌਤੀ ਦੇ ਨਾਲ ਮੰਗੇ ਗਏ ਈ-ਟੈਡਰ ਪ੍ਰਕਿਰਿਆ ਦੇ ਅੰਤਿਮ ਦਿਨ ਜਲੰਧਰ ਜ਼ੋਨ ਦੇ 17 ਵਿਚੋਂ 7 ਗਰੁੱਪਾਂ ਦਾ ਟੈਂਡਰ ਸਫਲ ਕਰਾਰ ਦਿੱਤਾ ਗਿਆ ਹੈ। ਲੰਮੇ ਅਰਸੇ ਤੋਂ ਬਾਅਦ ਮਹਾਨਗਰ ਵਿਚ ਨਵੇਂ ਸ਼ਰਾਬ ਠੇਕੇਦਾਰਾਂ ਦੀ ਐਂਟਰੀ ਹੋਈ ਹੈ, ਜਿਸ ਨਾਲ ਸ਼ਰਾਬ ਸਸਤੀ ਹੋਣ ਦੀਆਂ ਉਮੀਦਾਂ ਜਾਗ ਪਈਆਂ ਹਨ। ਇਸ ਤੋਂ ਪਹਿਲਾਂ ਮਹਾਨਗਰ ਵਿਚ ਪੁਰਾਣੇ ਠੇਕੇਦਾਰ ਆਪਸ ਵਿਚ ਪੂਲ ਕਰ ਲੈਂਦੇ ਸਨ ਅਤੇ ਮਨਮਾਨੇ ਰੇਟ ’ਤੇ ਸ਼ਰਾਬ ਦੀ ਵਿਕਰੀ ਹੁੰਦੀ ਸੀ। ਹੁਣ ਨਵੇਂ ਚਿਹਰੇ ਆਉਣ ਨਾਲ ਵਿਕਰੀ ਵਧਾਉਣ ਲਈ ਪ੍ਰਾਈਸ ਵਾਰ ਦੇਖਣ ਨੂੰ ਮਿਲੇਗੀ, ਇਸ ਨਾਲ ਸ਼ਰਾਬ ਸਸਤੀ ਉਪਲੱਬਧ ਹੋਵੇਗੀ।
ਇਹ ਵੀ ਪੜ੍ਹੋ : ਪੰਜਾਬ ਸਿੱਖਿਆ ਵਿਭਾਗ ਵੱਲੋਂ ਸਕੂਲ ਮੁਖੀਆਂ ਨੂੰ ਨਵੀਆਂ ਹਦਾਇਤਾਂ ਜਾਰੀ
ਜਲੰਧਰ ਜ਼ੋਨ ਦੇ ਸਫ਼ਲ ਹੋਏ 7 ਗਰੁੱਪਾਂ ਦੇ ਟੈਂਡਰ ਤੋਂ ਵਿਭਾਗ ਨੂੰ 255.13 ਕਰੋੜ ਦਾ ਮਾਲੀਆ ਪ੍ਰਾਪਤ ਹੋਇਆ ਹੈ, ਇਨ੍ਹਾਂ ਵਿੱਚ ਜਲੰਧਰ ਵੈਸਟ 'ਚ ਆਉਂਦਾ ਬੱਸ ਸਟੈਂਡ ਗਰੁੱਪ ਐੱਨ. ਆਈ. ਆਰ. ਪਾਰਟੀ, ਦਿ ਲਿਕਰ ਗ੍ਰੈਂਡਜ਼ ਟਰੇਡਰਜ਼ ਨੇ 35.35 ਕਰੋੜ ਵਿਚ ਖਰੀਦਿਆ ਹੈ। ਉਥੇ ਹੀ ਪਟਿਆਲਾ ਦੀ ਪ੍ਰਸਿੱਧ ਫਰਮ ਗੁਰਫ਼ਤਿਹ ਇੰਟਰਪ੍ਰਾਈਜ਼ਿਜ਼ ਨੇ ਮਾਡਲ ਟਾਊਨ ਗਰੁੱਪ ਨੂੰ 37.21 ਕਰੋੜ ਰੁਪਏ ਦੀ ਸਫ਼ਲ ਬੋਲੀ ਦੇ ਕੇ ਹਾਸਲ ਕੀਤਾ ਹੈ। ਜਲੰਧਰ ਈਸਟ ਦੀ ਗੱਲ ਕਰੀਏ ਤਾਂ ਇਸ ਜ਼ੋਨ ਵਿਚ ਆਉਂਦੇ ਮਹੱਤਵਪੂਰਨ ਲੰਮਾ ਪਿੰਡ ਗਰੁੱਪ ਨੂੰ ਨਿਹਾਲ ਵਾਈਨ ਨੇ 40.67 ਕਰੋੜ ਰੁਪਏ ਵਿਚ ਹਾਸਲ ਕੀਤਾ ਹੈ, ਜਦਕਿ ਗੁਰਾਇਆ ਗਰੁੱਪ ’ਤੇ ਕ੍ਰਿਸ਼ਨ ਦੇਵ ਐਂਡ ਗਰੁੱਪ ਨੇ 35.32 ਕਰੋੜ ਵਿਚ ਕਬਜ਼ਾ ਜਮਾਇਆ ਹੈ।
ਇਹ ਵੀ ਪੜ੍ਹੋ : ਬਾਈਕ ਚੋਰ ਗਿਰੋਹ ਦਾ ਪਰਦਾਫਾਸ਼, ਚੋਰੀ ਦੇ ਮੋਟਰਸਾਈਕਲਾਂ ਸਮੇਤ ਤਿੰਨ ਮੈਂਬਰ ਚੜ੍ਹੇ ਪੁਲਸ ਅੜਿੱਕੇ
ਨਵੀਂ ਐਕਸਾਈਜ਼ ਪਾਲਿਸੀ ਅਨੁਸਾਰ ਵਿਭਾਗ ਵੱਲੋਂ 12 ਫੀਸਦੀ ਵਾਧੇ ਨਾਲ ਮੌਜੂਦਾ ਗਰੁੱਪ ਰੀਨਿਊ ਕਰਵਾਉਣ ਦਾ ਆਫਰ ਦਿੱਤਾ ਗਿਆ ਹੈ, ਜਿਸ ਤਹਿਤ ਸ਼ੁਰੂਆਤ ਵਿਚ ਪੰਜਾਬ ਦੇ 171 ਗਰੁੱਪਾਂ ਵਿਚੋਂ 119 ਗਰੁੱਪ ਤੁਰੰਤ ਪ੍ਰਭਾਵ ਨਾਲ ਰੀਨਿਊ ਹੋ ਗਏ ਹਨ ਅਤੇ 52 ਗਰੁੱਪ ਪੈਂਡਿੰਗ ਹਨ। ਬਾਕੀ ਬਚੇ 49 ਗਰੁੱਪਾਂ ਲਈ ਵਿਭਾਗ ਵੱਲੋਂ ਸੋਮਵਾਰ ਨੂੰ 2.50 ਫੀਸਦੀ ਕਟੌਤੀ ਨਾਲ ਟੈਂਡਰ ਸੱਦੇ ਗਏ ਸਨ, ਜਿਸ ਤਹਿਤ ਜਲੰਧਰ ਜ਼ੋਨ ਦੇ 17 ਵਿਚੋਂ 7 ਗਰੁੱਪ ਵਿਕ ਗਏ ਹਨ। ਜ਼ੋਨ ਦੇ 17 ਗਰੁੱਪਾਂ ਦੀ ਕੀਮਤ 726 ਕਰੋੜ ਦੇ ਲਗਭਗ ਬਣਦੀ ਹੈ ਅਤੇ ਇਨ੍ਹਾਂ ਵਿਚੋਂ 255 ਕਰੋੜ ਦੇ ਗਰੁੱਪ ਵਿਕਣ ਤੋਂ ਬਾਅਦ ਬਾਕੀ 471 ਕਰੋੜ ਦੇ ਗਰੁੱਪ ਬਚੇ ਹਨ। ਪੰਜਾਬ ਭਰ ਦੇ ਬਾਕੀ ਬਚੇ ਗਰੁੱਪਾਂ ਲਈ ਵਿਭਾਗ ਵੱਲੋਂ ਕੀਮਤਾਂ ਵਿਚ 2 ਫੀਸਦੀ ਦੀ ਕਟੌਤੀ ਕੀਤੀ ਗਈ ਹੈ। ਪਹਿਲਾਂ ਕੀਤੀ ਗਈ 2.50 ਫੀਸਦੀ ਅਤੇ ਹੁਣ 2 ਫੀਸਦੀ ਕੀਮਤ ਹੋਰ ਘੱਟ ਕੀਤੇ ਜਾਣ ਨਾਲ ਮਹਾਨਗਰ ਦੇ ਬਾਕੀ ਬਚੇ ਜੋਤੀ ਚੌਕ, ਰੇਲਵੇ ਸਟੇਸ਼ਨ ਦੇ ਗਰੁੱਪਾਂ ਵਿਚ ਕੁੱਲ 4.50 ਫੀਸਦੀ ਦੀ ਕਟੌਤੀ ਹੋ ਚੁੱਕੀ ਹੈ।
ਇਹ ਵੀ ਪੜ੍ਹੋ : ਐਂਟੀ ਨਾਰਕੋਟਿਕਸ ਸੈੱਲ ਦੀ ਕਾਰਵਾਈ : ਹੈਰੋਇਨ, ਅਫੀਮ ਤੇ ਡਰੱਗ ਮਨੀ ਸਮੇਤ 2 ਕੀਤੇ ਕਾਬੂ
ਟੈਂਡਰ ਕਰਨ ਲਈ ਹਾਲੇ ਕਾਫੀ ਸਮਾਂ ਬਾਕੀ ਰਹਿੰਦਾ ਹੈ, ਜਿਸ ਕਾਰਨ ਠੇਕੇਦਾਰ ਆਪਣੇ ਗਰੁੱਪ ਅੱਗੇ ਚਲਾਉਣ ’ਤੇ ਵਿਚਾਰ ਕਰ ਰਹੇ ਹਨ। ਇਸ ਕਾਰਨ ਅਜੇ ਤੱਕ ਮਹਾਨਗਰ ਦੇ ਕਿਸੇ ਵੀ ਗਰੁੱਪ ਵੱਲੋਂ ਸ਼ਰਾਬ ਦੀਆਂ ਕੀਮਤਾਂ ਵਿਚ ਗਿਰਾਵਟ ਨਹੀਂ ਕੀਤੀ ਗਈ। ਕੀਮਤ ਨਾ ਘਟਣ ਕਾਰਨ ਠੇਕਿਆਂ ਤੋਂ ਰੌਣਕ ਗਾਇਬ ਹੈ।
ਅੰਮ੍ਰਿਤਪਾਲ ਸਿੰਘ ਨੂੰ ਮੋਟਰਸਾਈਕਲ ਮੁਹੱਈਆ ਕਰਨ ਵਾਲੇ ਨੌਜਵਾਨ 5 ਦਿਨ ਦੇ ਰਿਮਾਂਡ 'ਤੇ
NEXT STORY 
