ਗੈਜੇਟ ਡੈਸਕ - ਗਰਮੀਆਂ ਦੇ ਮੌਸਮ 'ਚ ਜਿੱਥੇ ਆਮ ਲੋਕ ਗਰਮੀ ਤੋਂ ਪ੍ਰੇਸ਼ਾਨ ਹਨ, ਉੱਥੇ ਹੀ ਤੁਹਾਡੀ ਕਾਰ ਦਾ ਇੰਜਣ ਵੀ ਇਸ ਦਾ ਸ਼ਿਕਾਰ ਹੋ ਸਕਦਾ ਹੈ। ਜੇਕਰ ਤੁਹਾਡੀ ਕਾਰ ਦਾ ਇੰਜਣ ਵਾਰ-ਵਾਰ ਗਰਮ ਹੋ ਰਿਹਾ ਹੈ, ਤਾਂ ਇਸ ਨੂੰ ਸਿਰਫ਼ ਗਰਮੀਆਂ ਦੀ ਇਕ ਆਮ ਸਮੱਸਿਆ ਸਮਝ ਕੇ ਨਜ਼ਰਅੰਦਾਜ਼ ਨਾ ਕਰੋ। ਮਾਹਿਰਾਂ ਅਨੁਸਾਰ, ਇਸ ਦੇ ਪਿੱਛੇ ਕਈ ਗੰਭੀਰ ਕਾਰਨ ਹੋ ਸਕਦੇ ਹਨ ਜੋ ਤੁਹਾਡੇ ਇੰਜਣ ਨੂੰ ਸਥਾਈ ਤੌਰ 'ਤੇ ਨੁਕਸਾਨ ਪਹੁੰਚਾ ਸਕਦੇ ਹਨ ਅਤੇ ਤੁਹਾਡੀ ਜੇਬ 'ਤੇ ਹਜ਼ਾਰਾਂ ਰੁਪਏ ਦਾ ਖਰਚਾ ਪਾ ਸਕਦੇ ਹਨ।
ਇੰਜਣ ਓਵਰਹੀਟ ਹੋਣ ਦੇ ਮੁੱਖ ਕਾਰਨ :-
ਕੂਲੈਂਟ ਦੀ ਲੀਕੇਜ ਅਤੇ ਘਾਟ
- ਇੰਜਣ ਦੇ ਤਾਪਮਾਨ ਨੂੰ ਕੰਟਰੋਲ ਕਰਨ ਲਈ ਕੂਲਿੰਗ ਸਿਸਟਮ ਕੰਮ ਕਰਦਾ ਹੈ। ਜੇਕਰ ਪਾਈਪ, ਰੇਡੀਏਟਰ ਜਾਂ ਕਨੈਕਸ਼ਨ ਤੋਂ ਕੂਲੈਂਟ ਲੀਕ ਹੋ ਰਿਹਾ ਹੋਵੇ ਜਾਂ ਇਸ ਦਾ ਪੱਧਰ ਘੱਟ ਜਾਵੇ, ਤਾਂ ਇੰਜਣ ਤੇਜ਼ੀ ਨਾਲ ਗਰਮ ਹੋਣ ਲੱਗਦਾ ਹੈ।
ਵਾਟਰ ਪੰਪ 'ਚ ਨੁਕਸ
- ਵਾਟਰ ਪੰਪ ਪੂਰੇ ਸਿਸਟਮ ਵਿੱਚ ਕੂਲੈਂਟ ਨੂੰ ਘੁਮਾਉਣ ਦਾ ਕੰਮ ਕਰਦਾ ਹੈ। ਜੇਕਰ ਇਹ ਖ਼ਰਾਬ ਹੋ ਜਾਵੇ, ਤਾਂ ਕੂਲੈਂਟ ਦਾ ਪ੍ਰਵਾਹ ਰੁਕ ਜਾਂਦਾ ਹੈ ਅਤੇ ਇੰਜਣ ਗਰਮ ਹੋ ਜਾਂਦਾ ਹੈ।
ਇੰਜਣ ਆਇਲ ਦੀ ਗੁਣਵੱਤਾ
- ਇੰਜਣ ਆਇਲ ਨਾ ਸਿਰਫ਼ ਪੁਰਜ਼ਿਆਂ ਨੂੰ ਚਿਕਨਾ ਰੱਖਦਾ ਹੈ, ਬਲਕਿ ਗਰਮੀ ਘਟਾਉਣ 'ਚ ਵੀ ਮਦਦ ਕਰਦਾ ਹੈ। ਪੁਰਾਣਾ ਜਾਂ ਘੱਟ ਆਇਲ ਹੋਣ 'ਤੇ ਇੰਜਣ ਦੇ ਪੁਰਜ਼ਿਆਂ ਵਿਚਕਾਰ ਰਗੜ ਵਧ ਜਾਂਦੀ ਹੈ, ਜਿਸ ਨਾਲ ਤਾਪਮਾਨ ਵਧਦਾ ਹੈ।
ਥਰਮੋਸਟੈਟ ਅਤੇ ਰੇਡੀਏਟਰ ਦੀ ਸਫ਼ਾਈ
- ਜੇਕਰ ਥਰਮੋਸਟੈਟ ਜਾਮ ਹੋ ਜਾਵੇ, ਤਾਂ ਕੂਲੈਂਟ ਰੇਡੀਏਟਰ ਤੱਕ ਨਹੀਂ ਪਹੁੰਚ ਪਾਉਂਦਾ। ਇਸ ਤੋਂ ਇਲਾਵਾ, ਰੇਡੀਏਟਰ 'ਚ ਧੂੜ-ਮਿੱਟੀ ਜਮ੍ਹਾਂ ਹੋਣ ਕਾਰਨ ਹਵਾ ਦਾ ਪ੍ਰਵਾਹ ਰੁਕ ਜਾਂਦਾ ਹੈ, ਜਿਸ ਨਾਲ ਗਰਮੀ ਬਾਹਰ ਨਹੀਂ ਨਿਕਲ ਸਕਦੀ।
ਹੋਰ ਛੋਟੀਆਂ ਗਲਤੀਆਂ
ਤੇਲ ਵਾਲੇ ਕੈਪ ਦਾ ਢਿੱਲਾ ਹੋਣਾ, ਰੇਡੀਏਟਰ ਕੈਪ 'ਚ ਖ਼ਰਾਬੀ, ਟੈਂਪਰੇਚਰ ਸੈਂਸਰ ਦਾ ਕੰਮ ਨਾ ਕਰਨਾ ਜਾਂ ਕੂਲਿੰਗ ਫੈਨ ਦਾ ਖ਼ਰਾਬ ਹੋਣਾ ਵੀ ਓਵਰਹੀਟਿੰਗ ਦੇ ਮੁੱਖ ਕਾਰਨ ਹਨ।
ਕਿਵੇਂ ਕਰੀਏ ਬਚਾਅ?
ਮਾਹਿਰਾਂ ਦਾ ਕਹਿਣਾ ਹੈ ਕਿ ਮੇਨਟੇਨੈਂਸ 'ਚ ਛੋਟੀ ਜਿਹੀ ਲਾਪਰਵਾਹੀ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦੀ ਹੈ। ਡਰਾਈਵਰਾਂ ਨੂੰ ਚਾਹੀਦਾ ਹੈ ਕਿ ਉਹ ਸਮੇਂ-ਸਮੇਂ 'ਤੇ ਕੂਲੈਂਟ ਦਾ ਪੱਧਰ ਚੈੱਕ ਕਰਦੇ ਰਹਿਣ, ਰੇਡੀਏਟਰ ਦੀ ਸਫ਼ਾਈ ਕਰਵਾਉਣ ਅਤੇ ਇੰਜਣ ਆਇਲ ਨੂੰ ਸਮੇਂ ਸਿਰ ਬਦਲਾਉਣ। ਇਨ੍ਹਾਂ ਛੋਟੀਆਂ ਗੱਲਾਂ ਦਾ ਧਿਆਨ ਰੱਖ ਕੇ ਤੁਸੀਂ ਆਪਣੀ ਕਾਰ ਦੇ ਇੰਜਣ ਨੂੰ ਸੁਰੱਖਿਅਤ ਰੱਖ ਸਕਦੇ ਹੋ।
ਘਰ 'ਚ ਆਸਾਨ ਤਰੀਕੇ ਨਾਲ ਬਣਾਓ ਚੌਲਾਂ ਦਾ ਚੀਲਾ
NEXT STORY 
