ਵਲਟੋਹਾ, (ਜ. ਬ.)- ਸਬ ਡਵੀਜ਼ਨ ਭਿੱਖੀਵਿੰਡ ਦੇ ਅਧੀਨ ਆਉਂਦੇ ਪਿੰਡ ਨਾਰਲਾ ਨਿਵਾਸੀ ਵਿਧਵਾ ਸੁਖਵਿੰਦਰ ਕੌਰ ਦੇ ਘਰ ’ਚ ਖਡ਼੍ਹੀ ਐਕਟਿਵਾ ਨੂੰ ਥਾਣਾ ਭਿੱਖੀਵਿੰਡ ਦੀ ਪੁਲਸ ਨੇ ਚੋਰੀ ਦੀ ਐਕਟਿਵਾ ਹੋਣ ਦਾ ਦਾਅਵਾ ਕਰਦਿਆਂ ਥਾਣੇ ਲਿਆ ਕੇ ਉਸ ਐਕਟਿਵਾ ਨੂੰ ਨਸ਼ਾ ਸਮੱਗਲਰ ਦੇ ਖਾਤੇ ’ਚ ਪਾ ਕੇ ਐਕਟਿਵਾ ਨੂੰ ਗੋਲ ਮੋਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਸਬੰਧੀ ਪੀੜਤ ਵਿਧਵਾ ਸੁਖਵਿੰਦਰ ਕੌਰ ਨੇ ਪੁਲਸ ਦੇ ਉੱਚ ਅਧਿਕਾਰੀਆਂ ਤੋਂ ਇਨਸਾਫ ਦੀ ਗੁਹਾਰ ਲਗਾਉਂਦਿਆਂ ਦੱਸਿਆ ਕਿ ਕਰੀਬ ਇਕ ਮਹੀਨਾ ਪਹਿਲਾਂ ਥਾਣਾ ਭਿੱਖੀਵਿੰਡ ਦੇ ਐੱਸ. ਐੱਚ. ਓ. ਦੇ ਗੰਨਮੈਨ ਸਮੇਤ ਕੁਝ ਮੁਲਾਜ਼ਮ ਉਨ੍ਹਾਂ ਦੇ ਘਰ ਪਿੰਡ ਨਾਰਲਾ ਵਿਖੇ ਆਏ ਪਰ ਉਸ ਸਮੇਂ ਉਹ ਦਵਾਈ ਲੈਣ ਲਈ ਡਾਕਟਰ ਕੋਲ ਗਈ ਹੋਈ ਸੀ ਜਦ ਘਰ ਵਾਪਸ ਆਈ ਤਾਂ ਗੁਆਂਢੀਆਂ ਨੇ ਦੱਸਿਆ ਕਿ ਉਕਤ ਪੁਲਸ ਮੁਲਾਜ਼ਮ ਉਸ ਦੀ ਐਕਟਿਵਾ ਨੂੰ ਚੋਰੀ ਦੀ ਹੋਣ ਦਾ ਦਾਅਵਾ ਕਰ ਕੇ ਥਾਣੇ ਲੈ ਗਏ ਹਨ। ਜਦ ਅਗਲੇ ਦਿਨ ਉਹ ਪਿੰਡ ਦੇ ਮੋਹਤਬਰਾਂ ਨੂੰ ਨਾਲ ਲੈ ਕੇ ਥਾਣੇ ਗਈ ਤਾਂ ਥਾਣਾ ਮੁਖੀ ਨੇ ਕਿਹਾ ਕਿ ਉਸ ਦਾ ਲਡ਼ਕਾ ਅਮਰਦੀਪ ਸਿੰਘ ਨਸ਼ਾ ਵੇਚਦਾ ਹੈ ਜਿਸ ਨੂੰ ਥਾਣੇ ਪੇਸ਼ ਕਰਵਾਉਣ ’ਤੇ ਹੀ ਐਕਟਿਵਾ ਵਾਪਸ ਮਿਲੇਗੀ। ਉਸ ਨੇ ਦੱਸਿਆ ਕਿ ਅਮਰਦੀਪ ਨਸ਼ਾ ਨਹੀਂ ਵੇਚਦਾ ਸਗੋਂ ਉਸ ਨੂੰ ਕਾਲਾ ਪੀਲੀਆ ਹੈ ਤੇ ਉਹ ਆਪਣੀ ਭੈਣ ਕੋਲੋਂ ਲੋਪੋਕੇ ਵਿਖੇ ਇਲਾਜ ਕਰਵਾ ਰਿਹਾ ਹੈ ਫਿਰ ਵੀ ਉਹ ਅਮਰਦੀਪ ਨੂੰ ਸਵੇਰੇ ਪੇਸ਼ ਕਰਵਾ ਦਿਆਂਗੇ। ਪਰ ਉਸੇ ਰਾਤ ਹੀ ਕਰੀਬ 12 ਵਜੇ ਭਿੱਖੀਵਿੰਡ ਪੁਲਸ ਦੇ ਮੁਲਾਜ਼ਮ ਕੰਧਾਂ ਟੱਪ ਕੇ ਘਰ ਵਿਚ ਦਾਖਲ ਹੋਏ ਤੇ ਸਾਡੇ ਘਰ ਦੀ ਤਲਾਸ਼ੀ ਲਈ ਤੇ ਉਸ ਨੂੰ ਬੇਇੱਜ਼ਤ ਵੀ ਕੀਤਾ। ਸੁਖਵਿੰਦਰ ਕੌਰ ਨੇ ਦੱਸਿਆ ਕਿ ਇਹ ਐਕਟਿਵਾ ਉਨ੍ਹਾਂ ਨੇ ਕਿਸ਼ਤਾਂ ’ਤੇ ਲਈ ਹੈ ਪਰ ਪੁਲਸ ਜਾਣ ਬੁੱਝ ਕੇ ਉਨ੍ਹਾਂ ਨਾਲ ਧੱਕੇਸ਼ਾਹੀ ਕਰ ਰਹੀ ਹੈ।
ਇਸ ਸਬੰਧੀ ਥਾਣਾ ਮੁਖੀ ਮਨਜਿੰਦਰ ਸਿੰਘ ਨੇ ਕਿਹਾ ਕਿ ਐਕਟਿਵਾ ਉਨ੍ਹਾਂ ਕੋਲ ਨਹੀਂ ਹੈ ਅਤੇ ਨਾ ਹੀ ਉਸ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਹੈ। ਉਧਰ ਥਾਣਾ ਮੁਖੀ ਦੇ ਗੰਨਮੈਨ ਤੋਂ ਜਦੋਂ ਪੱਖ ਜਾਣਿਆ ਤਾਂ ਉਸ ਨੇ ਉਲਟਾ ਪੱਤਰਕਾਰਾਂ ਨਾਲ ਹੀ ਦੁਰਵਿਵਹਾਰ ਕੀਤਾ। ਪੀੜਤ ਵਿਧਵਾ ਸੁਖਵਿੰਦਰ ਕੌਰ ਨੇ ਆਈ. ਜੀ. ਬਾਰਡਰ ਰੇਂਜ ਤੇ ਐੱਸ. ਐੱਸ. ਪੀ. ਤਰਨਤਾਰਨ ਤੋਂ ਮੰਗ ਕੀਤੀ ਕਿ ਉਨ੍ਹਾਂ ਨੂੰ ਇਨਸਾਫ ਦਿਵਾਇਆ ਜਾਵੇ ਤੇ ਧੱਕੇਸ਼ਾਹੀ ਕਰਨ ਵਾਲਿਆਂ ਖਿਲਾਫ ਸਖ਼ਤ ਕਾਰਵਾਈ ਕੀਤੀ ਜਾਵੇ।
ਸਿਹਤ ਵਿਭਾਗ ਦੀ ਟੀਮ ਨੇ ਬਿਨਾਂ ਲਾਇਸੈਂਸ ਕਾਰੋਬਾਰ ਕਰਨ ਵਾਲੇ ਮੈਡੀਕਲ ਸਟੋਰ ’ਤੇ ਮਾਰਿਆ ਛਾਪਾ
NEXT STORY 
