ਗੁਰਦਾਸਪੁਰ (ਵਿਨੋਦ)- ਪੰਜਾਬ 'ਚ ਗੰਨਾ ਇਕ ਮਹੱਤਵਪੂਰਨ ਨਕਦੀ ਫਸਲ ਹੈ। ਹਜ਼ਾਰਾਂ ਕਿਸਾਨਾਂ ਦੀ ਆਮਦਨ ਗੰਨੇ ਦੀ ਫਸਲ ਨਾਲ ਜੁੜੀ ਹੋਈ ਹੈ ਅਤੇ ਇਸ ਨਾਲ ਖੰਡ ਮਿੱਲਾਂ ਦੇ ਨਾਲ-ਨਾਲ ਖੇਤੀ ਮਜ਼ਦੂਰਾਂ ਨੂੰ ਵੀ ਰੁਜ਼ਗਾਰ ਮਿਲਦਾ ਹੈ। ਪੰਜਾਬ ਵਿੱਚ ਗੰਨੇ ਦੀ ਬਿਜਾਈ ਮੁੱਖ ਤੌਰ ’ਤੇ ਦੋ ਰੁੱਤਾਂ ਪਤਝੜ (ਅੱਸੂ) ਅਤੇ ਬਹਾਰਵਿੱਚ ਕੀਤੀ ਜਾਂਦੀ ਹੈ। ਪਰ ਇਸ ਸਮੇਂ ਗੰਨੇ ਹੇਠਲੇ ਕੁੱਲ ਰਕਬੇ ਦਾ ਬਹੁਤ ਵੱਡਾ ਹਿੱਸਾ ਬਹਾਰ ਰੁੱਤੇ ਬੀਜਿਆ ਜਾਂਦਾ ਹੈ, ਜਦਕਿ ਪਤਝੜ ਰੁੱਤੇ ਬਿਜਾਈ ਦਾ ਰਕਬਾ ਕਾਫ਼ੀ ਘੱਟ ਹੈ।
ਇਹ ਵੀ ਪੜ੍ਹੋ-ਫੈਸਲਾਬਾਦ ਏਅਰਪੋਰਟ 'ਤੇ ਰੋਕੇ ਗਏ 104 ਸ਼ਰਧਾਲੂ, ਪਾਕਿ ਤੋਂ ਗੁਰਧਾਮਾਂ ਦੇ ਦਰਸ਼ਨਾਂ ਲਈ ਆ ਰਹੇ ਸਨ ਭਾਰਤ
ਦੱਸਣਯੋਗ ਹੈ ਕਿ ਆਮ ਤੌਰ ’ਤੇ ਪੰਜਾਬ ਵਿੱਚ ਸਤੰਬਰ-ਅਕਤੂਬਰ ਦੌਰਾਨ ਕੇਵਲ 8-10 ਫੀਸਦੀ ਰਕਬੇ 'ਚ ਹੀ ਗੰਨੇ ਦੀ ਬਿਜਾਈ ਕੀਤੀ ਜਾਂਦੀ ਹੈ, ਜਦਕਿ ਲਗਭਗ 90 ਫੀਸਦੀ ਰਕਬਾ ਮੂਢੀ ਅਤੇ ਬਹਾਰ ਰੁੱਤ ਦੀ ਫਸਲ ਹੇਠ ਹੁੰਦਾ ਹੈ। ਇਸ ਅਨੁਪਾਤ ਨੂੰ ਬਦਲਣ ਦੀ ਲੋੜ ਹੈ। ਹਰੇਕ ਗੰਨਾ ਕਾਸ਼ਤਕਾਰ ਨੂੰ ਆਪਣੇ ਕੁੱਲ ਗੰਨੇ ਹੇਠਲੇ ਰਕਬੇ ਦਾ ਘੱਟੋ-ਘੱਟ 20-25 ਫੀਸਦੀ ਹਿੱਸਾ ਪਤਝੜ ਰੁੱਤੇ ਗੰਨੇ ਦੀ ਬਿਜਾਈ ਹੇਠ ਲਿਆਉਣ ਬਾਰੇ ਸੋਚਣਾ ਚਾਹੀਦਾ ਹੈ।
ਇਹ ਵੀ ਪੜ੍ਹੋ-ਅੱਜ ਅੰਮ੍ਰਿਤਸਰ ਦੇ ਭੰਡਾਰੀ ਪੁਲ 'ਤੇ 3 ਘੰਟੇ ਰਹੇਗਾ ਚੱਕਾ ਜਾਮ
ਬਹਾਰ ਰੁੱਤੇ ਬੀਜੇ ਗੰਨੇ ਦੀ ਮੁੱਖ ਸਮੱਸਿਆ ਕੀ ਹੈ?
ਬਹਾਰ ਰੁੱਤੇ ਬੀਜੀ ਗੰਨੇ ਦੀ ਫਸਲ ਆਮ ਤੌਰ ’ਤੇ ਦਸੰਬਰ ਮਹੀਨੇ ਤੱਕ ਲਗਭਗ 7-8 ਮਹੀਨੇ ਦੀ ਹੀ ਹੁੰਦੀ ਹੈ। ਇਸ ਸਮੇਂ ਤੱਕ ਗੰਨਾ ਪੂਰੀ ਤਰ੍ਹਾਂ ਪੱਕਿਆ ਨਹੀਂ ਹੁੰਦਾ। ਗੰਨੇ ਦੇ ਪੂਰੀ ਤਰ੍ਹਾਂ ਪੱਕਣ ਤੋਂ ਪਹਿਲਾਂ ਪਿੜਾਈ ਕਰਨ ਨਾਲ ਗੰਨੇ ਵਿੱਚ ਖੰਡ ਦੀ ਮਾਤਰਾ ਅਤੇ ਖੰਡ ਦੀ ਰਿਕਵਰੀ ਘੱਟ ਰਹਿ ਸਕਦੀ ਹੈ। ਇਸ ਦੇ ਨਾਲ-ਨਾਲ ਫ਼ਸਲ ਦੀ ਪੈਦਾਵਾਰ ਵੀ ਪਤਝੜ ਰੁੱਤੇ ਬੀਜੀ ਫ਼ਸਲ ਦੇ ਮੁਕਾਬਲੇ ਘੱਟ ਰਹਿਣ ਦੀ ਸੰਭਾਵਨਾ ਹੁੰਦੀ ਹੈ।
ਇਹ ਵੀ ਪੜ੍ਹੋ-ਅੰਮ੍ਰਿਤਸਰ ਦੇ ਗੁਰਦੁਆਰਿਆਂ 'ਚ ਹੋ ਗਈ ਅਨਾਊਂਸਮੈਂਟ, ਪੁਲਸ ਨੇ ਕੀਤਾ ਅਲਰਟ
ਇਸ ਦਾ ਸਿੱਧਾ ਪ੍ਰਭਾਵ ਕਿਸਾਨ ਅਤੇ ਖੰਡ ਮਿੱਲ ਦੋਵਾਂ ’ਤੇ ਪੈਂਦਾ ਹੈ। ਕਿਸਾਨ ਨੂੰ ਘੱਟ ਪੈਦਾਵਾਰ ਅਤੇ ਘੱਟ ਆਮਦਨ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ, ਜਦਕਿ ਮਿੱਲ ਨੂੰ ਘੱਟ ਖੰਡ ਰਿਕਵਰੀ ਮਿਲਦੀ ਹੈ। ਬਿਆਸ ਦਰਿਆ ਅਤੇ ਇਸ ਦੇ ਨਾਲ ਲੱਗਦੇ ਇਲਾਕਿਆਂ ਵਿੱਚ ਬਹਾਰ ਰੁੱਤੇ ਬੀਜੇ ਗੰਨੇ ਦਾ ਰਕਬਾ ਕਾਫ਼ੀ ਜ਼ਿਆਦਾ ਹੈ। ਇਨ੍ਹਾਂ ਖੇਤਰਾਂ ਵਿੱਚ ਕੁੱਲ ਗੰਨੇ ਹੇਠਲੇ ਰਕਬੇ ਦਾ ਲਗਭਗ 60 ਫੀਸਦੀ ਹਿੱਸਾ ਬਹਾਰ ਰੁੱਤੇ ਬੀਜੀ ਫਸਲ ਹੇਠ ਹੋਣ ਕਾਰਨ ਖੰਡ ਮਿੱਲਾਂ ਦੀ ਔਸਤ ਰਿਕਵਰੀ ’ਤੇ ਵੀ ਇਸ ਦਾ ਪ੍ਰਭਾਵ ਪੈਂਦਾ ਹੈ।
ਮੋਰਿੰਡਾ ਮਿੱਲ ਤੋਂ ਮਿਲਦੀ ਹੈ ਇੱਕ ਮਹੱਤਵਪੂਰਨ ਸਿੱਖਿਆ
ਪਤਝੜ ਰੁੱਤੇ ਗੰਨੇ ਦੀ ਬਿਜਾਈ ਦੇ ਲਾਭਾਂ ਨੂੰ ਸਮਝਣ ਲਈ ਮੋਰਿੰਡਾ ਖੰਡ ਮਿੱਲ ਦੀ ਉਦਾਹਰਨ ਮਹੱਤਵਪੂਰਨ ਹੈ। ਮਿੱਲ ਦੇ ਅਧਿਕਾਰਤ ਖੇਤਰ ਵਿੱਚ ਗੰਨੇ ਦਾ ਵਧੇਰੇ ਰਕਬਾ ਪਤਝੜ ਰੁੱਤੇ ਬੀਜਿਆ ਜਾਂਦਾ ਹੈ। ਇਸ ਕਰਕੇ ਇਸ ਖੇਤਰ ਵਿੱਚ ਗੰਨੇ ਦੀ ਫ਼ਸਲ ਨੂੰ ਪੱਕਣ ਲਈ ਵਧੇਰੇ ਸਮਾਂ ਮਿਲਦਾ ਹੈ ਅਤੇ ਮਿੱਲ ਦੀ ਖੰਡ ਰਿਕਵਰੀ ਵੀ ਬਾਕੀ ਸਹਿਕਾਰੀ ਖੰਡ ਮਿੱਲਾਂ ਦੇ ਮੁਕਾਬਲੇ ਵਧੇਰੇ ਰਹਿੰਦੀ ਹੈ। ਇਸ ਤੋਂ ਸਪੱਸ਼ਟ ਹੈ ਕਿ ਗੰਨੇ ਦੀ ਬਿਜਾਈ ਦਾ ਸਮਾਂ ਕੇਵਲ ਬਿਜਾਈ ਦੀ ਤਾਰੀਖ਼ ਨਹੀਂ, ਸਗੋਂ ਫ਼ਸਲ ਦੀ ਪੈਦਾਵਾਰ, ਗੁਣਵੱਤਾ ਅਤੇ ਖੰਡ ਰਿਕਵਰੀ ਨਾਲ ਜੁੜਿਆ ਇੱਕ ਮਹੱਤਵਪੂਰਨ ਫੈਸਲਾ ਹੈ।
ਪਤਝੜ ਰੁੱਤੇ ਗੰਨਾ,ਕਿਸਾਨ ਲਈ ਕਈ ਫਾਇਦੇ
ਪਤਝੜ ਰੁੱਤੇ ਬੀਜੀ ਗੰਨੇ ਦੀ ਫਸਲ ਨੂੰ ਪੱਕਣ ਲਈ ਲਗਭਗ 13-14 ਮਹੀਨੇ ਮਿਲ ਜਾਂਦੇ ਹਨ। ਲੰਬੀ ਮਿਆਦ ਮਿਲਣ ਕਾਰਨ ਫਸਲ ਨੂੰ ਵਧੀਆ ਢੰਗ ਨਾਲ ਵਿਕਸਤ ਹੋਣ ਅਤੇ ਪੱਕਣ ਦਾ ਮੌਕਾ ਮਿਲਦਾ ਹੈ। ਇਸ ਤੋਂ ਇਲਾਵਾ ਪਤਝੜ ਰੁੱਤੇ ਗੰਨੇ ਵਿੱਚ ਸਹਿ-ਫਸਲਾਂ ਦੀ ਕਾਸ਼ਤ ਕਰਕੇ ਕਿਸਾਨ ਵਾਧੂ ਆਮਦਨ ਪ੍ਰਾਪਤ ਕਰ ਸਕਦਾ ਹੈ। ਸਹਿ-ਫਸਲ ਤੋਂ ਮਿਲਣ ਵਾਲੀ ਆਮਦਨ ਗੰਨੇ ਦੀ ਫ਼ਸਲ ਦੇ ਖਰਚੇ ਨੂੰ ਘਟਾਉਣ ਵਿੱਚ ਵੀ ਮਦਦ ਕਰ ਸਕਦੀ ਹੈ। ਪਤਝੜ ਰੁੱਤੇ ਬਿਜਾਈ ਦਾ ਇੱਕ ਹੋਰ ਵੱਡਾ ਲਾਭ ਇਹ ਹੈ ਕਿ ਕਿਸਾਨ ਆਪਣੇ ਗੰਨੇ ਦੀ ਬਿਜਾਈ ਨੂੰ ਵੱਖ-ਵੱਖ ਸਮਿਆਂ ਵਿੱਚ ਵੰਡ ਸਕਦਾ ਹੈ। ਇਸ ਨਾਲ ਫਸਲ ਦੀ ਦੇਖਭਾਲ ਅਤੇ ਪ੍ਰਬੰਧਨ ਸੌਖਾ ਹੁੰਦਾ ਹੈ ਅਤੇ ਪਿੜਾਈ ਦੇ ਸਮੇਂ ਗੰਨੇ ਦੀ ਪਰਚੀ ਮਿਲਣ ਸਬੰਧੀ ਵੀ ਬਿਹਤਰ ਪ੍ਰਬੰਧਨ ਕੀਤਾ ਜਾ ਸਕਦਾ ਹੈ।
ਬਿਜਾਈ ਦਾ ਸਹੀ ਸਮਾਂ ਨਾ ਖੁੰਝਾਓ
ਪਤਝੜ ਰੁੱਤੇ ਗੰਨੇ ਦੀ ਬਿਜਾਈ ਲਈ 20 ਸਤੰਬਰ ਤੋਂ 20 ਅਕਤੂਬਰ ਦਾ ਸਮਾਂ ਵਧੇਰੇ ਢੁਕਵਾਂ ਹੈ। ਕਿਸਾਨਾਂ ਨੂੰ ਇਸ ਸਮੇਂ ਦੌਰਾਨ ਹੀ ਬਿਜਾਈ ਮੁਕੰਮਲ ਕਰਨ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਬਿਜਾਈ ਵਿੱਚ ਬੇਲੋੜੀ ਦੇਰੀ ਕਰਨ ਨਾਲ ਨਵੀਂ ਫਸਲ ਦੇ ਸ਼ੁਰੂਆਤੀ ਵਾਧੇ ’ਤੇ ਠੰਡ ਦਾ ਅਸਰ ਪੈ ਸਕਦਾ ਹੈ। ਇਸ ਲਈ ਕਿਸਾਨਾਂ ਨੂੰ ਚਾਹੀਦਾ ਹੈ ਕਿ ਖੇਤ ਦੀ ਤਿਆਰੀ, ਬੀਜ ਦੀ ਚੋਣ ਅਤੇ ਹੋਰ ਲੋੜੀਂਦੇ ਪ੍ਰਬੰਧ ਪਹਿਲਾਂ ਹੀ ਕਰ ਲੈਣ, ਤਾਂ ਜੋ ਢੁਕਵੇਂ ਸਮੇਂ ’ਤੇ ਬਿਜਾਈ ਕੀਤੀ ਜਾ ਸਕੇ।
ਗੰਨੇ ਦੀ ਕਿਸਮ ਦੀ ਚੋਣ ਸਭ ਤੋਂ ਮਹੱਤਵਪੂਰਨ ਫ਼ੈਸਲਿਆਂ ਵਿੱਚੋਂ ਇੱਕ
ਇਨ੍ਹੀਂ ਦਿਨੀਂ ਕਿਸਾਨਾਂ ਵੱਲੋਂ ਲਗਾਤਾਰ ਪੁੱਛਿਆ ਜਾ ਰਿਹਾ ਹੈ ਕਿ ਪਤਝੜ ਰੁੱਤੇ ਕਿਹੜੀ ਕਿਸਮ ਦਾ ਗੰਨਾ ਬੀਜਿਆ ਜਾਵੇ। ਇਸ ਸਬੰਧੀ ਕਿਸਾਨਾਂ ਨੂੰ ਕਿਸੇ ਵੀ ਅਣਜਾਣ ਵਿਅਕਤੀ, ਸੋਸ਼ਲ ਮੀਡੀਆ ਜਾਂ ਗੈਰ-ਭਰੋਸੇਯੋਗ ਸਰੋਤ ਤੋਂ ਪ੍ਰਭਾਵਿਤ ਹੋ ਕੇ ਬੀਜ ਖਰੀਦਣ ਤੋਂ ਬਚਣਾ ਚਾਹੀਦਾ ਹੈ। ਪੰਜਾਬ ਵਿੱਚ ਗੰਨੇ ਦੀਆਂ ਵੱਖ-ਵੱਖ ਕਿਸਮਾਂ ਦੀ ਕਾਸ਼ਤ ਲਈ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (ਪੀ.ਏ.ਯੂ) ਅਤੇ ਕੇਂਦਰੀ ਕਿਸਮ ਜਾਰੀ ਕਰਨ ਵਾਲੀ ਕਮੇਟੀ (ਸੀ.ਵੀ.ਆਰ.ਸੀ) ਵੱਲੋਂ ਸਿਫ਼ਾਰਸ਼ਾਂ ਕੀਤੀਆਂ ਗਈਆਂ ਹਨ। ਪੀ.ਏ.ਯੂ ਵੱਲੋਂ 13 ਅਤੇ ਸੀ.ਵੀ.ਆਰ.ਸੀ ਵੱਲੋਂ 57 ਗੰਨੇ ਦੀਆਂ ਕਿਸਮਾਂ ਦੀ ਕਾਸ਼ਤ ਲਈ ਸਿਫ਼ਾਰਸ਼ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਨਿੱਜੀ ਖੇਤਰ ਦੀਆਂ ਮਿੱਲਾਂ ਦੇ ਅਧਿਕਾਰਤ ਖੇਤਰਾਂ ਵਿੱਚ ਕੁਝ ਗੈਰ-ਸਿਫਾਰਸ਼ਸ਼ੁਦਾ ਕਿਸਮਾਂ ਵੀ ਪ੍ਰਚਲਿਤ ਹਨ। ਕਿਸਾਨਾਂ ਨੂੰ ਤਰਜੀਹ ਦੇਣੀ ਚਾਹੀਦੀ ਹੈ ਕਿ ਉਹ ਪੰਜਾਬ ਅਤੇ ਉੱਤਰ-ਪੱਛਮੀ ਖੇਤਰ ਲਈ ਪੀ.ਏ.ਯੂ ਅਤੇ ਸੀ.ਵੀ.ਆਰ.ਸੀ ਵੱਲੋਂ ਸਿਫ਼ਾਰਸ਼ ਕੀਤੀਆਂ ਕਿਸਮਾਂ ਹੀ ਲਗਾਉਣ। ਇਸ ਨਾਲ ਕਿਸਾਨਾਂ ਅਤੇ ਮਿੱਲ ਪ੍ਰਬੰਧਕਾਂ ਦੋਵਾਂ ਨੂੰ ਭਵਿੱਖ ਵਿੱਚ ਸੰਭਾਵਿਤ ਮੁਸ਼ਕਲਾਂ ਤੋਂ ਬਚਾਇਆ ਜਾ ਸਕਦਾ ਹੈ।
ਗੈਰ-ਸਿਫਾਰਸ਼ਸ਼ੁਦਾ ਕਿਸਮਾਂ ਤੋਂ ਸਾਵਧਾਨ
ਅੱਜਕੱਲ੍ਹ ਸੋਸ਼ਲ ਮੀਡੀਆ ਰਾਹੀਂ ਨਵੀਆਂ-ਨਵੀਆਂ ਗੰਨੇ ਦੀਆਂ ਕਿਸਮਾਂ ਬਾਰੇ ਦਾਅਵੇ ਕੀਤੇ ਜਾ ਰਹੇ ਹਨ। ਕਿਸਾਨਾਂ ਨੂੰ ਅਜਿਹੇ ਪ੍ਰਚਾਰ ਤੋਂ ਸਾਵਧਾਨ ਰਹਿਣਾ ਚਾਹੀਦਾ ਹੈ। ਸਿਰਫ਼ ਇਸ ਲਈ ਕਿ ਕੋਈ ਕਿਸਮ ਕਿਸੇ ਹੋਰ ਸੂਬੇ ਜਾਂ ਖੇਤਰ ਵਿੱਚ ਵਧੀਆ ਪ੍ਰਦਰਸ਼ਨ ਕਰ ਰਹੀ ਹੈ, ਇਹ ਜ਼ਰੂਰੀ ਨਹੀਂ ਕਿ ਉਹ ਪੰਜਾਬ ਦੀਆਂ ਹਾਲਤਾਂ ਲਈ ਵੀ ਢੁਕਵੀਂ ਹੋਵੇ। ਖਾਸ ਕਰਕੇ ਹੋਰਨਾਂ ਖੇਤਰਾਂ (ਜ਼ੋਨਾਂ) ਲਈ ਸਿਫਾਰਸ਼ ਕੀਤੀਆਂ ਕਿਸਮਾਂ ਦੀ ਬਿਜਾਈ ਕਰਨ ਤੋਂ ਪਹਿਲਾਂ ਕਿਸਾਨਾਂ ਨੂੰ ਸਬੰਧਤ ਖੇਤੀਬਾੜੀ ਮਾਹਿਰਾਂ ਤੋਂ ਸਲਾਹ ਜ਼ਰੂਰ ਲੈਣੀ ਚਾਹੀਦੀ ਹੈ। ਜੇਕਰ ਕਿਸੇ ਗੈਰ-ਸਿਫਾਰਸ਼ਸ਼ੁਦਾ ਕਿਸਮ ਸਬੰਧੀ ਸਰਕਾਰ ਵੱਲੋਂ ਸਬਸਿਡੀ ਜਾਂ ਹੋਰ ਸਹੂਲਤ ਬਾਰੇ ਕੋਈ ਵੱਖਰਾ ਫ਼ੈਸਲਾ ਲਿਆ ਜਾਂਦਾ ਹੈ, ਤਾਂ ਇਸ ਦੀ ਜ਼ਿੰਮੇਵਾਰੀ ਸਬੰਧਤ ਵਿਅਕਤੀ ਦੀ ਹੋਵੇਗੀ। ਪੰਜਾਬ ਸਰਕਾਰ ਵੱਲੋਂ ਨਿੱਜੀ ਖੰਡ ਮਿੱਲਾਂ ਦੇ ਬਿਹਾਫ਼ ’ਤੇ ਦਿੱਤੀ ਜਾਣ ਵਾਲੀ 68.50 ਰੁਪਏ ਪ੍ਰਤੀ ਕੁਇੰਟਲ ਗੰਨੇ ਦੀ ਸਬਸਿਡੀ ਪੀ.ਏ.ਯੂ ਅਤੇ ਸੀ.ਵੀ.ਆਰ.ਸੀ ਵੱਲੋਂ ਪੰਜਾਬ ਅਤੇ ਉੱਤਰ-ਪੱਛਮੀ ਖੇਤਰ ਲਈ ਸਿਫਾਰਸ਼ ਕੀਤੀਆਂ ਕਿਸਮਾਂ ਨਾਲ ਸਬੰਧਤ ਹੈ। ਇਸ ਲਈ ਕਿਸਾਨਾਂ ਨੂੰ ਕਿਸਮ ਦੀ ਚੋਣ ਬਹੁਤ ਸੋਚ-ਸਮਝ ਕੇ ਕਰਨੀ ਚਾਹੀਦੀ ਹੈ।
ਸਿਹਤਮੰਦ ਬੀਜ ਹੀ ਸਫਲ ਫਸਲ ਦੀ ਪਹਿਲੀ ਸ਼ਰਤ
ਚੰਗੀ ਫ਼ਸਲ ਲਈ ਚੰਗਾ ਬੀਜ ਸਭ ਤੋਂ ਪਹਿਲੀ ਲੋੜ ਹੈ। ਕਿਸਾਨ ਸਿਫਾਰਸ਼ ਕੀਤੀ ਕਿਸਮ ਦਾ ਸਿਹਤਮੰਦ ਅਤੇ ਗੁਣਵੱਤਾ ਵਾਲਾ ਬੀਜ ਕਿਸੇ ਭਰੋਸੇਯੋਗ ਸਰੋਤ ਤੋਂ ਹੀ ਪ੍ਰਾਪਤ ਕਰਨ। ਬੀਜ ਖਰੀਦਣ ਤੋਂ ਪਹਿਲਾਂ ਕਿਸਮ, ਸਰੋਤ ਅਤੇ ਉਸ ਦੀ ਸਿਫਾਰਸ਼ ਬਾਰੇ ਪੂਰੀ ਜਾਣਕਾਰੀ ਲੈਣੀ ਚਾਹੀਦੀ ਹੈ। ਕਿਸੇ ਵੀ ਕਿਸਮ ਦੀ ਚੋਣ ਕਰਨ ਤੋਂ ਪਹਿਲਾਂ ਕਿਸਾਨ ਆਪਣੇ ਇਲਾਕੇ ਦੇ ਸਹਾਇਕ ਗੰਨਾ ਵਿਕਾਸ ਅਫ਼ਸਰ , ਖੰਡ ਮਿੱਲ ਦੇ ਖੇਤਰੀ ਅਧਿਕਾਰੀ ਜਾਂ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਖੇਤਰੀ ਖੋਜ ਕੇਂਦਰ, ਕਪੂਰਥਲਾ ਅਤੇ ਫਰੀਦਕੋਟ ਦੇ ਮਾਹਿਰਾਂ ਨਾਲ ਸੰਪਰਕ ਕਰ ਸਕਦੇ ਹਨ।
ਕੀ ਕਹਿਣਾ ਹੈ ਕੇਨ ਕਮਿਸ਼ਨਰ ਡਾ. ਅਮਰੀਕ ਸਿੰਘ
ਇਸ ਸਬੰਧੀ ਡਾ. ਅਮਰੀਕ ਸਿੰਘ ਕੇਨ ਕਮਿਸ਼ਨਰ ਗੰਨੇ ਦੀ ਸਫਲ ਕਾਸ਼ਤ ਸਿਰਫ਼ ਵਧੇਰੇ ਰਕਬੇ ਵਿੱਚ ਗੰਨਾ ਬੀਜਣ ਨਾਲ ਨਹੀਂ, ਸਗੋਂ ਸਹੀ ਸਮੇਂ ’ਤੇ ਬਿਜਾਈ, ਸਹੀ ਕਿਸਮ ਦੀ ਚੋਣ, ਸਿਹਤਮੰਦ ਬੀਜ ਅਤੇ ਆਧੁਨਿਕ ਤਕਨੀਕਾਂ ਦੀ ਵਰਤੋਂ ਨਾਲ ਸੰਭਵ ਹੈ। ਇਸ ਲਈ ਕਿਸਾਨ ਨੂੰ ਅਪੀਲ ਹੈ ਕਿ ਇਸ ਪਤਝੜ ਰੁੱਤੇ ਆਪਣੇ ਕੁੱਲ ਗੰਨੇ ਹੇਠਲੇ ਰਕਬੇ ਦਾ ਘੱਟੋ-ਘੱਟ 20-25 ਫੀਸਦੀ ਰਕਬਾ ਅੱਸੂ ਮਹੀਨੇ ਦੌਰਾਨ ਗੰਨੇ ਦੀ ਬਿਜਾਈ ਹੇਠ ਲਿਆਉਣ ਦੀ ਕੋਸ਼ਿਸ਼ ਕਰੋ। ਸਹੀ ਕਿਸਮ ਦਾ ਸਿਹਤਮੰਦ ਬੀਜ ਭਰੋਸੇਯੋਗ ਸਰੋਤ ਤੋਂ ਲਓ ਅਤੇ ਬਿਜਾਈ 20 ਸਤੰਬਰ ਤੋਂ 20 ਅਕਤੂਬਰ ਦੇ ਢੁਕਵੇਂ ਸਮੇਂ ਵਿੱਚ ਕਰੋ। ਪਤਝੜ ਰੁੱਤੇ ਗੰਨੇ ਦੀ ਬਿਜਾਈ ਵਧੇਰੇ ਸਮਾਂ, ਵਧੀਆ ਪਕਾਵਟ, ਵਧੀਆ ਪੈਦਾਵਾਰ, ਵਾਧੂ ਆਮਦਨ ਅਤੇ ਖੰਡ ਮਿੱਲ ਲਈ ਵਧੀਆ ਰਿਕਵਰੀ ਵੱਲ ਇੱਕ ਕਦਮ ਹੈ।ਆਓ, ਗੰਨੇ ਦੀ ਕਾਸ਼ਤ ਵਿੱਚ ਬਦਲਾਅ ਲਿਆਈਏ—ਪਤਝੜ ਰੁੱਤੇ ਬਿਜਾਈ ਵਧਾਈਏ ਅਤੇ ਗੰਨਾ ਕਾਸ਼ਤਕਾਰਾਂ ਦੀ ਆਮਦਨ ਵਿੱਚ ਵਾਧਾ ਕਰੀਏ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170
ਅਮਰੀਕਾ ਸਰਕਾਰ ਵੱਲੋਂ ਪੋਸਟਰ ’ਚ ਪੰਜਾਬੀ ਸਿੱਖਾਂ ਨੂੰ ਨਿਸ਼ਾਨਾ ਬਣਾਉਣਾ ਮੰਦਭਾਗਾ: ਐਡਵੋਕੇਟ ਧਾਮੀ
NEXT STORY 
