ਗੁਰਦਾਸਪੁਰ, (ਹਰਮਨਪ੍ਰੀਤ)- ਪੰਜਾਬ ਸਰਕਾਰ ਵੱਲੋਂ ਵਿਕਾਸ ਸਬੰਧੀ ਕੀਤੇ ਜਾ ਰਹੇ ਕਈ ਦਾਅਵਿਆਂ ਦੇ ਉਲਟ ਜ਼ਿਲਾ ਗੁਰਦਾਸਪੁਰ ਦੀਆਂ ਕਈ ਸਡ਼ਕਾਂ ਆਪਣੀ ਹਾਲਤ ’ਤੇ ਅੱਥਰੂ ਵਹਾ ਰਹੀਆਂ ਹਨ। ਇਨ੍ਹਾਂ ਸਡ਼ਕਾਂ ਦੀ ਹਾਲਤ ਏਨੀ ਤਰਸਯੋਗ ਬਣ ਚੁੱਕੀ ਹੈ ਕਿ ਇਥੋਂ ਲੰਘਣ ਵਾਲੇ ਹਜ਼ਾਰਾਂ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸਿਤਮ ਦੀ ਗੱਲ ਇਹ ਹੈ ਕਿ ਕਈ ਸਡ਼ਕਾਂ ਅਜਿਹੀਆਂ ਹਨ ਜਿਨ੍ਹਾਂ ਦੀ ਮੁਰੰਮਤ ਹੋਣ ਉਪਰੰਤ 7 ਸਾਲਾਂ ਦਾ ਸਮਾਂ ਬੀਤ ਚੁੱਕਾ ਹੈ, ਮੁਡ਼ ਨਾ ਤਾਂ ਕਿਸੇ ਅਧਿਕਾਰੀ ਦੀ ਸਵੱਲੀ ਨਜ਼ਰ ਇਨ੍ਹਾਂ ਸਡ਼ਕਾਂ ’ਤੇ ਪਈ ਹੈ ਅਤੇ ਨਾ ਹੀ ਸਰਕਾਰ ਨੇ ਸਡ਼ਕਾਂ ’ਚ ਫੈਲੇ ਇਸ ਨਰਕ ਨੂੰ ਖਤਮ ਕਰਾਉਣ ਲਈ ਚਾਰਾਜੋਈ ਕੀਤੀ ਹੈ। ਹੋਰ ਤਾਂ ਹੋਰ ਜ਼ਿਲਾ ਹੈੱਡਕੁਆਰਟਰ ’ਤੇ ਸ਼ਹਿਰ ਗੁਰਦਾਸਪੁਰ ਅੰਦਰ ਵੀ ਸਡ਼ਕਾਂ ’ਤੇ ਪਏ ਕਈ ਟੋਏ ਲੋਕਾਂ ਲਈ ਸਿਰਦਰਦੀ ਬਣੇ ਹੋਏ ਹਨ।
7 ਸਾਲਾਂ ਤੋਂ ਨਹੀਂ ਸੁਣੀ ਗਈ ਗੁਰਦਾਸਪੁਰ-ਸ੍ਰੀ ਹਰਗੋਬਿੰਦਪੁਰ ਸਡ਼ਕ ਦੀ
ਜਾਣਕਾਰੀ ਅਨੁਸਾਰ ਗੁਰਦਾਸਪੁਰ ਤੋਂ ਸ੍ਰੀ ਹਰਗੋਬਿੰਦਪੁਰ ਨੂੰ ਜਾਣ ਵਾਲੀ ਕਰੀਬ 40 ਕਿਲੋਮੀਟਰ ਸਡ਼ਕ ਦੀ ਕਰੀਬ 7 ਸਾਲ ਪਹਿਲਾਂ ਮੁਰੰਮਤ ਕੀਤੀ ਗਈ ਸੀ। ਨਿਯਮਾਂ ਅਨੁਸਾਰ ਹਰੇਕ 5 ਸਾਲ ਬਾਅਦ ਇਸ ਸਡ਼ਕ ਦੀ ਮੁਰੰਮਤ ਹੋਣੀ ਸੀ ਪਰ ਹੈਰਾਨੀ ਦੀ ਗੱਲ ਹੈ ਕਿ 7 ਸਾਲ ਬੀਤਣ ਦੇ ਬਾਵਜੂਦ ਇਹ ਸਡ਼ਕ ਫੰਡਾਂ ਦੀ ਘਾਟ ਕਾਰਣ ਨਰਕ ਦਾ ਰੂਪ ਧਾਰਨ ਕਰ ਚੁੱਕੀ ਹੈ। ਸਥਿਤੀ ਇਹ ਬਣੀ ਹੋਈ ਹੈ ਕਿ ਸਡ਼ਕ ਵਿਚ ਪਏ ਟੋਏ ਲੋਕਾਂ ਦੀ ਜਾਨ-ਮਾਲ ਦਾ ਖੌਅ ਬਣੇ ਹੋਏ ਹਨ ਅਤੇ ਇਥੋਂ ਲੰਘਣ ਵਾਲੇ ਲੋਕ ਰੋਜ਼ਾਨਾ ਸਰਕਾਰ ਨੂੰ ਕੋਸਦੇ ਨਜ਼ਰ ਆਉਂਦੇ ਹਨ। ਇਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਸਡ਼ਕ ਜਿਥੇ ਗੁਰਦਾਸਪੁਰ ਜ਼ਿਲੇ ਦੇ ਕਈ ਪਿੰਡਾਂ ਅਤੇ ਕਸਬਿਆਂ ਨੂੰ ਆਪਸ ਵਿਚ ਜੋਡ਼ਦੀ ਹੈ, ਉਥੇ ਜਲੰਧਰ ਅਤੇ ਕਪੂਰਥਲੇ ਜਾਣ ਵਾਲੀ ਟ੍ਰੈਫਿਕ ਵੀ ਇਸੇ ਸਡ਼ਕ ਰਾਹੀਂ ਜਾਂਦੀ ਹੈ ਪਰ ਇਸ ਦੇ ਬਾਵਜੂਦ ਇਸ ਸਡ਼ਕ ਦੀ ਮੁਰੰਮਤ ਲਈ ਕੋਈ ਧਿਆਨ ਨਹੀਂ ਦਿੱਤਾ ਜਾ ਰਿਹਾ। ਜਾਣਕਾਰੀ ਅਨੁਸਾਰ ਇਸ ਸਡ਼ਕ ਦੀ ਮੁਰੰਮਤ ਲਈ ਕਰੀਬ 18 ਕਰੋਡ਼ ਰੁਪਏ ਦੀ ਜ਼ਰੂਰਤ ਹੈ ਪਰ ਅਜੇ ਤੱਕ ਸਰਕਾਰ ਵੱਲੋਂ ਇਹ ਰਾਸ਼ੀ ਮਨਜ਼ੂਰ ਨਹੀਂ ਕੀਤੀ ਜਾ ਰਹੀ।
ਨਰਕ ਦਾ ਦੂਜਾ ਰੂਪ ਹੈ ਤ੍ਰਿਮੋ ਰੋਡ
ਗੁਰਦਾਸਪੁਰ ਤੋਂ ਗਾਹਲਡ਼੍ਹੀ ਨੂੰ ਜਾਣ ਵਾਲੀ ਤ੍ਰਿਮੋ ਰੋਡ ਵੀ ਇਕ ਤਰ੍ਹਾਂ ਨਾਲ ਨਰਕ ਦਾ ਦੂਜਾ ਰੂਪ ਬਣੀ ਹੋਈ ਹੈ। ਇਸ ਸਡ਼ਕ ਦੀ ਮੁਰੰਮਤ ਪਿਛਲੀ ਸਰਕਾਰ ਵੇਲੇ ਵੀ ਨਹੀਂ ਹੋਈ ਸੀ ਅਤੇ ਨਾ ਹੀ ਅਜੇ ਤੱਕ ਇਸ ਸਰਕਾਰ ਨੇ ਇਸ ਸਡ਼ਕ ਦੀ ਮੁਰੰਮਤ ਵੱਲ ਧਿਆਨ ਦਿੱਤਾ ਹੈ। ਇਹ ਸਡ਼ਕ ਵੀ ਸਰਹੱਦੀ ਪਿੰਡਾਂ ਨੂੰ ਜ਼ਿਲਾ ਹੈੱਡਕੁਆਰਟਰ ਨਾਲ ਜੋਡ਼ਦੀ ਹੈ, ਜਿਥੋਂ ਇਸ ਇਲਾਕੇ ਦੇ ਲੋਕ ਅਗਾਂਹ ਜਾਂਦੇ ਹਨ ਪਰ ਸਡ਼ਕ ਦੀ ਸਥਿਤੀ ਇਹ ਬਣ ਚੁੱਕੀ ਹੈ ਕਿ ਜਗ੍ਹਾ-ਜਗ੍ਹਾ ’ਤੇ ਪਏ ਟੋਇਆਂ ਕਾਰਣ ਇਹ ਸਮਝਣਾ ਔਖਾ ਹੋ ਜਾਂਦਾ ਹੈ ਕਿ ਟੋਇਆਂ ਵਿਚ ਸਡ਼ਕ ਹੈ ਕਿ ਸਡ਼ਕ ਵਿਚ ਟੋਏ ਪਏ ਹੋਏ ਹਨ। ਇਸ ਇਲਾਕੇ ਦੇ ਲੋਕ ਇੰਨੇ ਪ੍ਰੇਸ਼ਾਨ ਹਨ ਕਿ ਉਨ੍ਹਾਂ ਵੱਲੋਂ ਕਈ ਵਾਰ ਸਡ਼ਕ ਦੀ ਤਰਸਯੋਗ ਹਾਲਤ ਨੂੰ ਲੈ ਕੇ ਰੋਸ ਪ੍ਰਦਰਸ਼ਨ ਵੀ ਕੀਤੇ ਜਾ ਚੁੱਕੇ ਹਨ ਪਰ ਇਸ ਦੇ ਬਾਵਜੂਦ ਕੋਈ ਸੁਣਵਾਈ ਨਹੀਂ ਹੋ ਰਹੀ।
ਸ਼ਹਿਰ ’ਚ ਵੀ ਵਿਗਡ਼ ਰਹੀ ਹੈ ਸਡ਼ਕਾਂ ਦੀ ਸਥਿਤੀ
ਗੁਰਦਾਸਪੁਰ ਸ਼ਹਿਰ ਦੇ ਕਾਹਨੂੰਵਾਨ ਰੋਡ, ਡਾਕਖਾਨਾ ਚੌਕ ਅਤੇ ਜਹਾਜ਼ ਚੌਕ ਸਮੇਤ ਕਈ ਥਾਵਾਂ ’ਤੇ ਪਏ ਟੋਏ ਵਿਕਾਸ ਕਾਰਜਾਂ ਨੂੰ ਗ੍ਰਹਿਣ ਲਾ ਰਹੇ ਹਨ। ਸ਼ਹਿਰ ਦੀ ਤ੍ਰਾਸਦੀ ਇਹ ਹੈ ਕਿ ਵਿਧਾਇਕ ਪਾਹਡ਼ਾ ਵੱਲੋਂ ਵੱਡੀ ਜੱਦੋ-ਜਹਿਦ ਕਰ ਕੇ ਸਡ਼ਕਾਂ ’ਤੇ ਪ੍ਰੀਮਿਕਸ ਪਵਾਇਆ ਗਿਆ ਸੀ ਪਰ ਬਾਅਦ ਵਿਚ ਸੀਵਰੇਜ ਪਾਉਣ ਮੌਕੇ ਕਈ ਥਾਵਾਂ ’ਤੇ ਸਡ਼ਕ ਪੁੱਟ ਦਿੱਤੀ ਗਈ। ਇਸੇ ਤਰ੍ਹਾਂ ਕਈ ਥਾਵਾਂ ਅਜਿਹੀਆਂ ਹਨ, ਜਿਥੇ ਲੰਬੇ ਸਮੇਂ ਤੋਂ ਟੋਏ ਪਏ ਹੋਏ ਹਨ ਪਰ ਉਨ੍ਹਾਂ ਦੀ ਮੁਰੰਮਤ ਸਬੰਧੀ ਕੋਈ ਕਾਰਵਾਈ ਨਹੀਂ ਹੋਈ।
ਬਾਰਿਸ਼ ਦੇ ਦਿਨਾਂ ’ਚ ਹੋਰ ਬਦਤਰ ਬਣੀ ਸਥਿਤੀ
ਇਨ੍ਹਾਂ ਸਡ਼ਕਾਂ ਦੀ ਹਾਲਤ ਪਹਿਲਾਂ ਹੀ ਬਹੁਤ ਤਰਸਯੋਗ ਸੀ ਪਰ ਹੁਣ ਬਰਸਾਤ ਦੇ ਦਿਨਾਂ ’ਚ ਇਨ੍ਹਾਂ ਦੀ ਹਾਲਤ ਹੋਰ ਵੀ ਬਦਤਰ ਬਣ ਗਈ ਹੈ। ਕਈ ਥਾਈਂ ਸਡ਼ਕਾਂ ’ਚ ਪਏ ਟੋਏ ਏਨੇ ਡੂੰਘੇ ਹੋ ਗਏ ਹਨ ਕਿ ਦੋ-ਪਹੀਆ ਵਾਹਨ ਸਵਾਰ ਅਕਸਰ ਡਿੱਗ ਜਾਂਦੇ ਹਨ। ਇਸੇ ਤਰ੍ਹਾਂ ਹੋਰ ਵਾਹਨਾਂ ਦਾ ਵੀ ਸਡ਼ਕ ਦੀ ਮੰਦੀ ਹਾਲਤ ਕਾਰਣ ਭਾਰੀ ਨੁਕਸਾਨ ਹੁੰਦਾ ਹੈ।
‘ਸ੍ਰੀ ਹਰਗੋਬਿੰਦਪੁਰ ਨੂੰ ਜਾਣ ਵਾਲੀ ਸਡ਼ਕ ਦੀ ਮੁਰੰਮਤ ਲਈ 18 ਕਰੋਡ਼ ਅਤੇ ਗਾਹਲਡ਼੍ਹੀ ਨੂੰ ਜਾਣ ਵਾਲੀ ਸਡ਼ਕ ਲਈ 6 ਕਰੋਡ਼ ਰੁਪਏ ਦਾ ਐਸਟੀਮੇਟ ਲਾ ਕੇ ਸਰਕਾਰ ਨੂੰ ਭੇਜਿਆ ਗਿਆ, ਜੋ ਬਹੁਤ ਜਲਦੀ ਮਨਜ਼ੂਰ ਹੋਣ ਦੀ ਸੰਭਾਵਨਾ ਹੈ। ਜਦੋਂ ਵੀ ਪੈਸੇ ਮਿਲ ਗਏ, ਉਦੋਂ ਹੀ ਸਡ਼ਕਾਂ ਦੀ ਮੁਰੰਮਤ ਕਰਵਾ ਦਿੱਤੀ ਜਾਵੇਗੀ। ਸ਼ਹਿਰ ’ਚ ਵੈਸੇ ਤਾਂ ਸਾਰੀਆਂ ਸਡ਼ਕਾਂ ਦਾ ਨਿਰਮਾਣ ਕਰਵਾਇਆ ਜਾ ਚੁੱਕਾ ਹੈ ਪਰ ਸੀਵਰੇਜ ਕਾਰਣ ਜਿਥੇ ਕੁਝ ਸਡ਼ਕਾਂ ਨੁਕਸਾਨੀਆਂ ਗਈਆਂ ਹਨ, ਉਨ੍ਹਾਂ ਦੀ ਮੁਰੰਮਤ ਜਾਰੀ ਹੈ। ਜਦੋਂ ਇਨ੍ਹਾਂ ਥਾਵਾਂ ’ਤੇ ਮਿੱਟੀ ਬੈਠ ਜਾਂਦੀ ਹੈ ਤਾਂ ਮੁਡ਼ ਇਸ ਦੀ ਮੁਰੰਮਤ ਕਰਵਾ ਦਿੱਤੀ ਜਾਂਦੀ ਹੈ।’ -ਨਿਰਮਲਜੀਤ ਸਿੰਘ, ਐੱਸ. ਡੀ. ਓ. ਲੋਕ ਨਿਰਮਾਣ ਵਿਭਾਗ।
‘ਸਰਕਾਰ ਹਰੇਕ ਸਡ਼ਕ ਦੀ ਮੁਰੰਮਤ ਕਰਵਾ ਰਹੀ ਹੈ ਅਤੇ ਹਰੇਕ ਸਡ਼ਕ ਦੀ ਮੁਰੰਮਤ ਇਕ ਨਿਰਧਾਰਤ ਸਮੇਂ ’ਚ ਹੋਣੀ ਹੁੰਦੀ ਹੈ। ਇਸ ਲਈ ਹੁਣ ਸ੍ਰੀ ਹਰਗੋਬਿੰਦਪੁਰ ਅਤੇ ਗਾਹਲਡ਼੍ਹੀ ਨੂੰ ਜਾਣ ਵਾਲੀਆਂ ਸਡ਼ਕਾਂ ਦੀ ਮੁਰੰਮਤ ਲਈ ਵੀ ਕੇਸ ਤਿਆਰ ਕਰ ਕੇ ਪੈਸਿਆਂ ਦੀ ਮੰਗ ਕੀਤੀ ਗਈ ਹੈ। ਬਰਸਾਤਾਂ ਕਾਰਣ ਵੀ ਸਡ਼ਕਾਂ ਦੀ ਮੁਰੰਮਤ ਦੇ ਕੰਮ ਵਿਚ ਕੁਝ ਦੇਰੀ ਹੋ ਰਹੀ ਹੈ ਪਰ ਜਦੋਂ ਬਾਰਿਸ਼ਾਂ ਦਾ ਮੌਸਮ ਠੀਕ ਹੋਵੇਗਾ, ਉਦੋਂ ਹੀ ਸਡ਼ਕਾਂ ਦੀ ਮੁਰੰਮਤ ਕਰਵਾ ਦਿੱਤੀ ਜਾਵੇਗੀ। ਕੁਝ ਸਮਾਂ ਪਹਿਲਾਂ ਹੀ ਗੁਰਦਾਸਪੁਰ-ਮੁਕੇਰੀਆਂ ਸਡ਼ਕ ਨੂੰ ਕਰੋਡ਼ਾਂ ਰੁਪਏ ਖਰਚ ਕਰ ਕੇ ਬਣਾਇਆ ਗਿਆ ਹੈ, ਜਿਸ ਦੀ ਤਰਜ਼ ’ਤੇ ਬਾਕੀ ਸਡ਼ਕਾਂ ਵੀ ਬਣਾਈਆਂ ਜਾਣਗੀਆਂ।’ -ਬਰਿੰਦਰਮੀਤ ਸਿੰਘ ਪਾਹਡ਼ਾ, ਹਲਕਾ ਵਿਧਾਇਕ।
ਅੰਤਰਰਾਜ਼ੀ ਕਾਰ ਚੋਰ ਗਿਰੋਹ ਦੇ 2 ਮੈਂਬਰ ਸਵਿਫਟ ਅਤੇ ਨਕਦੀ ਸਮੇਤ ਗ੍ਰਿਫਤਾਰ
NEXT STORY