ਮੰਡੀ ਗੋਬਿੰਦਗੜ੍ਹ (ਮੱਗੋ)-ਅੰਬਾਲਾ ਦੇ ਡਵੀਜ਼ਨਲ ਸੁਪਰਵਾਈਜ਼ਰ ਪੰਕਜ ਗੁਪਤਾ ਅਤੇ ਸੀਨੀਅਰ ਡੀ. ਸੀ. ਐੱਮ. ਹਰੀਮੋਹਨ ਦੀ ਅਗਵਾਈ ਹੇਠ ਅਤੇ ਭਾਰੀ ਮਾਤਰਾ ਵਿਚ ਪੁਲਸ ਦੀ ਸੁਰੱਖਿਆ ਦੌਰਾਨ ਰੇਲਵੇ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੇ ਪੈਸੰਜਰ ਟ੍ਰੇਨਾਂ ਵਿਚ ਬਿਨਾਂ ਟਿਕਟ ਸਫਰ ਕਰਨ ਵਾਲਿਆਂ ਦੀ ਵੱਡੇ ਪੱਧਰ 'ਤੇ ਚੈਕਿੰਗ ਕੀਤੀ, ਜਿਸ ਦੌਰਾਨ ਬਿਨਾਂ ਟਿਕਟ ਯਾਤਰੀਆਂ ਤੋਂ ਵਿਭਾਗ ਦੇ ਅਧਿਕਾਰੀਆਂ ਨੇ ਲੱਖਾਂ ਰੁਪਏ ਜੁਰਮਾਨੇ ਵਸੂਲ ਕੀਤੇ ਜਾਣ ਦਾ ਦਾਅਵਾ ਕੀਤਾ। ਇਸ ਸਬੰਧੀ ਪੱਤਰਕਾਰਾਂ ਨੂੰ ਮਿਲੀ ਜਾਣਕਾਰੀ ਅਨੁਸਾਰ ਦੋ ਦਿਨ ਤੱਕ ਚੱਲੀ ਇਸ ਚੈਕਿੰਗ ਵਿਚ ਰੇਲਵੇ ਨੇ ਪਹਿਲੇ ਹੀ ਦਿਨ ਕਰੀਬ 20 ਯਾਤਰੂ ਰੇਲ ਗੱਡੀਆਂ ਵਿਚ ਜਾ ਕੇ ਯਾਤਰੀਆਂ ਦੀਆਂ ਟਿਕਟਾਂ ਦੀ ਜਾਂਚ ਕੀਤੀ ਅਤੇ ਬਿਨਾਂ ਟਿਕਟ ਪਾਏ ਗਏ ਯਾਤਰੀਆਂ ਕੋਲੋਂ ਨਿਯਮਾਂ ਮੁਤਾਬਕ ਕਿਰਾਏ ਤੋਂ ਇਲਾਵਾ ਜੁਰਮਾਨਾ ਵੀ ਵਸੂਲਿਆ।
ਪੰਕਜ ਗੁਪਤਾ ਅਤੇ ਹਰੀ ਮੋਹਨ ਨੇ ਦੱਸਿਆ ਕਿ ਇਹ ਚੈਕਿੰਗ ਸਹਾਰਨਪੁਰ ਤੋਂ ਅੰਬਾਲਾ ਅਤੇ ਅੰਬਾਲਾ ਤੋਂ ਲੁਧਿਆਣਾ ਦੇ ਵਿਚਕਾਰ ਚਲਦੀ ਯਾਤਰੀ ਗੱਡੀਆਂ ਵਿਚ ਕੀਤੀ ਗਈ। ਰੇਲਵੇ ਵਿਭਾਗ ਨੇ ਬਿਨਾਂ ਟਿਕਟ ਸਫਰ ਕਰਨ ਵਾਲੇ ਕਰੀਬ 242 ਯਾਤਰੀਆਂ ਦੇ ਚਲਾਨ ਕੱਟੇ ਅਤੇ ਉਨ੍ਹਾਂ ਕੋਲੋਂ 75 ਹਜ਼ਾਰ 40 ਰੁਪਏ ਵਸੂਲੇ। ਇਸ ਤੋਂ ਇਲਾਵਾ ਅਧਿਕਾਰੀਆਂ ਨੇ ਕਾਰਵਾਈ ਦੌਰਾਨ 1 ਲੱਖ 88 ਹਜ਼ਾਰ 190 ਰੁਪਏ ਦੀ ਵਸੂਲੀ 369 ਹੋਰ ਪਨੈਲਟੀ ਮਾਮਲਿਆਂ ਵਿਚ ਕੀਤੀ। ਦੋ ਦਿਨ ਚਲਾਈ ਗਈ ਇਸ ਚੈਕਿੰਗ ਵਿਚ ਵਿਭਾਗੀ ਅਧਿਕਾਰੀਆਂ ਨੇ ਪਹਿਲੇ ਦਿਨ ਕੁੱਲ 631 ਕੇਸ ਫੜੇ, ਜਿਨ੍ਹਾਂ ਵਿਚ ਵਿਭਾਗ ਨੇ ਕੁੱਲ 2 ਲੱਖ 67 ਹਜ਼ਾਰ 430 ਰੁਪਏ ਜੁਰਮਾਨਾ ਵਸੂਲਿਆ। ਰੇਲਵੇ ਵਿਭਾਗ ਦੇ ਸੀਨੀਅਰ ਡੀ. ਸੀ. ਐੱਮ. ਹਰੀਮੋਹਨ ਨੇ ਦੱਸਿਆ ਕਿ ਇਹ ਜਾਂਚ ਸਮੇਂ-ਸਮੇਂ 'ਤੇ ਕੀਤੀ ਜਾਂਦੀ ਹੈ ਜੋ ਕਿ ਭਵਿੱਖ ਵਿਚ ਵੀ ਜਾਰੀ ਰਹੇਗੀ।
ਕਰੰਟ ਲੱਗਣ ਨਾਲ ਔਰਤ ਦੀ ਮੌਤ
NEXT STORY 
