ਨਵੀਂ ਦਿੱਲੀ (ਭਾਸ਼ਾ)- ਭਾਰਤੀ ਹਵਾਈ ਸੈਨਾ ਨੇ 25 ਸਾਲ ਪਹਿਲਾਂ ਹੋਏ ਕਾਰਗਿਲ ਯੁੱਧ ਵਿਚ ਆਪਣੀ ਭੂਮਿਕਾ ਨੂੰ ਐਤਵਾਰ ਨੂੰ ਯਾਦ ਕੀਤਾ। ਇਸ ਨੇ ਦੁਸ਼ਮਣ ਖ਼ਿਲਾਫ਼ ਲੜਾਈ 'ਚ ਫੌਜ ਦੇ ਯਤਨਾਂ ਨੂੰ ਮਜ਼ਬੂਤ ਕਰਨ ਲਈ ਹਜ਼ਾਰਾਂ ਲੜਾਕੂ ਮਿਸ਼ਨ ਅਤੇ ਹੈਲੀਕਾਪਟਰ ਉਡਾਣਾਂ ਨੂੰ ਅੰਜਾਮ ਦਿੱਤਾ ਸੀ। ਰੱਖਿਆ ਮੰਤਰਾਲਾ ਨੇ ਇਕ ਬਿਆਨ 'ਚ ਕਿਹਾ ਕਿ ਹਵਾਈ ਸੈਨਾ ਦੇਸ਼ ਲਈ ਸਰਵਉੱਚ ਬਲੀਦਾਨ ਦੇਣ ਵਾਲੇ ਨਾਇਕਾਂ ਦੇ ਸਨਮਾਨ 'ਚ 12 ਤੋਂ 26 ਜੁਲਾਈ ਤੱਕ ਏਅਰ ਫੋਰਸ ਸਟੇਸ਼ਨ ਸਰਸਾਵਾ ਵਿਖੇ ‘ਕਾਰਗਿਲ ਵਿਜੇ ਦਿਵਸ ਸਿਲਵਰ ਜੁਬਲੀ’ ਮਨਾ ਰਹੀ ਹੈ। 1999 'ਚ ਦੁਨੀਆ ਦੇ ਸਭ ਤੋਂ ਉੱਚੇ ਜੰਗੀ ਮੈਦਾਨ 'ਤੇ ਲੜੀ ਗਈ ਇਸ ਲੜਾਈ 'ਚ ਭਾਰਤ ਨੇ ਪਾਕਿਸਤਾਨ ਨੂੰ ਹਰਾਇਆ ਸੀ। ਏਅਰ ਚੀਫ ਮਾਰਸ਼ਲ ਵੀ.ਆਰ.ਚੌਧਰੀ ਨੇ ਸ਼ਨੀਵਾਰ ਨੂੰ ਦੇਸ਼ ਦੀ ਸੇਵਾ 'ਚ ਆਪਣੀਆਂ ਜਾਨਾਂ ਨਿਛਾਵਰ ਕਰਨ ਵਾਲੇ ਸਾਰੇ ਹਵਾਈ ਯੋਧਿਆਂ ਨੂੰ ਸ਼ਰਧਾਂਜਲੀ ਵਜੋਂ ਏਅਰ ਫੋਰਸ ਸਟੇਸ਼ਨ ਵਿਖੇ ਜੰਗੀ ਯਾਦਗਾਰ 'ਤੇ ਫੁੱਲ ਮਾਲਾਵਾਂ ਭੇਟ ਕੀਤੀਆਂ। ਪ੍ਰੋਗਰਾਮ ਦੌਰਾਨ ਉਨ੍ਹਾਂ ਸ਼ਹੀਦਾਂ ਦੇ ਪਰਿਵਾਰਾਂ ਨੂੰ ਸਨਮਾਨਿਤ ਕੀਤਾ ਅਤੇ ਉਨ੍ਹਾਂ ਨਾਲ ਗੱਲਬਾਤ ਕੀਤੀ। ਬਿਆਨ 'ਚ ਕਿਹਾ ਗਿਆ ਹੈ ਕਿ ਇਸ ਦੌਰਾਨ ਇਕ ਸ਼ਾਨਦਾਰ ਏਅਰ ਸ਼ੋਅ ਆਯੋਜਿਤ ਕੀਤਾ ਗਿਆ ਜਿਸ 'ਚ ਆਕਾਸ਼ ਗੰਗਾ ਟੀਮ, ਜੈਗੁਆਰ, ਐੱਸਯੂ-30 ਐੱਮਕੇਐੱਲ ਅਤੇ ਰਾਫੇਲ ਲੜਾਕੂ ਜਹਾਜ਼ਾਂ ਨੇ ਹਿੱਸਾ ਲਿਆ।
ਸ਼ਹੀਦ ਨਾਇਕਾਂ ਦੀ ਯਾਦ 'ਚ ਐੱਮ.ਆਈ.-17 ਵੀ5 ਹੈਲੀਕਾਪਟਰ ਨੇ ‘ਮਿਸਿੰਗ ਮੈਨ ਫਾਰਮੇਸ਼ਨ’ ਉਡਾਣ ਭਰੀ। ਇਸ ਮੌਕੇ ਚੀਤਾ ਅਤੇ ਚਿਨੂਕ ਵਰਗੇ ਹੈਲੀਕਾਪਟਰਾਂ ਨੇ ਵੀ ਪ੍ਰਦਰਸ਼ਨ ਕੀਤਾ। ਇਸ ਦੌਰਾਨ ‘ਏਅਰ ਵਾਰੀਅਰ ਡਰਿੱਲ ਟੀਮ’ ਅਤੇ ਏਅਰ ਫੋਰਸ ਬੈਂਡ ਨੇ ਵੀ ਆਪਣੀ ਪੇਸ਼ਕਾਰੀ ਦਿੱਤੀ। ਇਸ ਸਮਾਗਮ ਨੂੰ 5 ਹਜ਼ਾਰ ਤੋਂ ਵੱਧ ਦਰਸ਼ਕਾਂ ਨੇ ਦੇਖਿਆ, ਜਿਸ 'ਚ ਸਕੂਲੀ ਬੱਚੇ, ਸਹਾਰਨਪੁਰ ਖੇਤਰ ਦੇ ਸਥਾਨਕ ਨਿਵਾਸੀ, ਸਾਬਕਾ ਸੈਨਿਕ, ਪਤਵੰਤੇ ਅਤੇ ਰੁੜਕੀ, ਦੇਹਰਾਦੂਨ ਅਤੇ ਅੰਬਾਲਾ ਸਥਿਤ ਰੱਖਿਆ ਅਦਾਰਿਆਂ ਦੇ ਕਰਮਚਾਰੀ ਸ਼ਾਮਲ ਸਨ। ਬਿਆਨ ਮੁਤਾਬਕ ਭਾਰਤੀ ਹਵਾਈ ਸੈਨਾ ਕੋਲ 1999 ਦੀ ਕਾਰਗਿਲ ਜੰਗ 'ਚ ਬਹਾਦਰੀ ਨਾਲ ਲੜਨ ਵਾਲੇ ਆਪਣੇ ਬਹਾਦਰ ਹਵਾਈ ਯੋਧਿਆਂ ਦੀ ਬਹਾਦਰੀ ਅਤੇ ਕੁਰਬਾਨੀ ਦੀ ਮਾਣਮੱਤੀ ਵਿਰਾਸਤ ਹੈ। ਅਸਲ 'ਚ ਇਹ ਫੌਜੀ ਹਵਾਬਾਜ਼ੀ ਦੇ ਇਤਿਹਾਸ 'ਚ ਇੱਕ ਮੀਲ ਪੱਥਰ ਸੀ। ਬਿਆਨ 'ਚ ਕਿਹਾ ਗਿਆ ਹੈ ਕਿ ਕਾਰਗਿਲ ਯੁੱਧ (ਅਪਰੇਸ਼ਨ ਸਫੇਦ ਸਾਗਰ) 16 ਹਜ਼ਾਰ ਫੁੱਟ ਤੋਂ ਜ਼ਿਆਦਾ ਉੱਚੀਆਂ ਢਲਾਣਾਂ ਅਤੇ ਚਕਰਾਉਣ ਵਾਲੀਆਂ ਉੱਚਾਈਆਂ ਦੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਭਾਰਤੀ ਹਵਾਈ ਸੈਨਾ ਦੀ ਫੌਜੀ ਸਮਰੱਥਾ ਦਾ ਪ੍ਰਮਾਣ ਹੈ। ਇਸ ਵਿਚ ਕਿਹਾ ਗਿਆ ਹੈ ਕਿ ਕੁੱਲ ਮਿਲਾ ਕੇ ਹਵਾਈ ਸੈਨਾ ਨੇ ਲਗਭਗ ਪੰਜ ਹਜ਼ਾਰ ਲੜਾਕੂ ਮਿਸ਼ਨ, 350 ਪੁਨਰ ਖੋਜ/ਏਲਿੰਟ ਮਿਸ਼ਨ ਅਤੇ ਲਗਭਗ 800 ਐਸਕਾਰਟ ਉਡਾਣਾਂ ਭਰੀਆਂ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
ਸਨਾਤਨੀਆਂ ਦੀ ਧਮਕੀ - ਮਸਜਿਦ ’ਚੋਂ ਆਵਾਜ਼ ਆਈ ਤਾਂ ਲਾਸ਼ਾਂ ਗਿਣਨ ਲਈ ਤਿਆਰ ਰਹਿਣਾ
NEXT STORY 
