ਬਠਿੰਡਾ 'ਚ ਮੋਰ ਪ੍ਰਜਣਨ ਦੀ ਯੋਜਨਾ ਨੂੰ ਸੈਂਟ੍ਰਲ ਜ਼ੂ ਅਥਾਰਟੀ ਨੇ ਕੀਤਾ ਨਾਮਨਜ਼ੂਰ
ਚੰਡੀਗੜ੍ਹ, (ਅਸ਼ਵਨੀ) - ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਡ੍ਰੀਮ ਪ੍ਰਾਜੈਕਟ ਠੁੱਸ ਹੋ ਗਿਆ ਹੈ। ਇਹ ਪ੍ਰਾਜੈਕਟ ਸੀ ਪੰਜਾਬ ਵਿਚ ਮੋਰਾਂ ਦੇ ਪ੍ਰਜਣਨ ਕੇਂਦਰ ਦਾ। ਸੈਂਟ੍ਰਲ ਜ਼ੂ ਅਥਾਰਟੀ ਨੇ ਇਸ ਯੋਜਨਾ ਨੂੰ ਨਾਮਨਜ਼ੂਰ ਕਰ ਦਿੱਤਾ ਹੈ। ਨਤੀਜਾ ਇਹ ਰਿਹਾ ਕਿ ਬਠਿੰਡਾ ਵਿਚ ਕੀਤੀ ਜਾ ਰਹੀ ਮੋਰਾਂ ਦੇ ਪ੍ਰਜਣਨ ਦੀ ਅਸਥਾਈ ਪਹਿਲ 'ਤੇ ਵੀ ਰੋਕ ਲੱਗ ਗਈ ਹੈ।
ਪੰਜਾਬ ਸਰਕਾਰ ਨੇ ਕਰੀਬ ਤਿੰਨ ਸਾਲ ਪਹਿਲਾਂ ਬਠਿੰਡਾ ਵਿਚ ਪ੍ਰਸਤਾਵਿਤ ਮੋਰ ਪ੍ਰਜਣਨ ਕੇਂਦਰ ਨੂੰ ਲੈ ਕੇ ਵਾਹ-ਵਾਹ ਲੁੱਟੀ ਸੀ। ਬਾਕਾਇਦਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਸਾਬਕਾ ਕੇਂਦਰੀ ਵਾਤਾਵਰਣ ਤੇ ਵਣ ਮੰਤਰੀ ਜੈ ਰਾਮ ਰਮੇਸ਼ ਨੂੰ ਮੋਰ ਪ੍ਰਜਣਨ ਕੇਂਦਰ ਸਥਾਪਿਤ ਕਰਨ ਦੀ ਬੇਨਤੀ ਕੀਤੀ ਸੀ। ਇਸੇ ਲੜੀ ਵਿਚ ਬਠਿੰਡਾ ਦੇ ਬੀੜ ਤਲਾਅ ਵਿਚ ਅਸਥਾਈ ਤੌਰ 'ਤੇ ਆਰਟੀਫੀਸ਼ੀਅਲ ਪੀਕਾਕ ਬ੍ਰੀਡਿੰਗ ਦਾ ਆਗਾਜ਼ ਕੀਤਾ ਗਿਆ ਸੀ।
ਪੰਜਾਬ ਦਾ ਤਰਕ ਸੀ ਲੁਪਤ ਹੋ ਰਹੇ ਹਨ ਮੋਰ : ਮੋਰ ਪ੍ਰਜਣਨ ਕੇਂਦਰ ਨੂੰ ਲੈ ਕੇ ਪੰਜਾਬ ਦਾ ਤਰਕ ਸੀ ਕਿ ਮਾਲਵਾ ਵਿਚ ਮੋਰ ਲੁਪਤ ਹੋ ਰਹੇ ਹਨ। ਖਾਸ ਤੌਰ 'ਤੇ ਮਾਨਸਾ, ਮੁਕਤਸਰ, ਫਰੀਦਕੋਟ ਤੇ ਬਠਿੰਡਾ ਵਿਚ ਇਨ੍ਹਾਂ ਦੀ ਗਿਣਤੀ ਵਿਚ ਕਾਫ਼ੀ ਕਮੀ ਆਈ ਹੈ। ਵਾਈਲਡ ਲਾਈਫ਼ ਡਿਪਾਰਟਮੈਂਟ ਦੀ ਟੀਮ ਨੇ ਇਕ ਸਰਵੇ ਵੀ ਕੀਤਾ, ਜਿਸ ਵਿਚ ਪੰਜਾਬ ਦੇ ਕਈ ਇਲਾਕਿਆਂ ਵਿਚ ਮੋਰ ਪੂਰੀ ਤਰ੍ਹਾਂ ਲੁਪਤ ਪਾਏ ਗਏ। ਇਸ ਲਈ ਸਰਕਾਰ ਨੇ ਇਸ ਯੋਜਨਾ ਦਾ ਖਾਕਾ ਤਿਆਰ ਕੀਤਾ ਕਿ ਮੋਰਾਂ ਦੀ ਗਿਣਤੀ ਵਿਚ ਵਾਧਾ ਕੀਤਾ ਜਾ ਸਕੇ। ਬਾਕਾਇਦਾ ਬ੍ਰੀਡਿੰਗ ਸੈਂਟਰ ਲਈ 7 ਕਰੋੜ ਰੁਪਏ ਦੇ ਖਰਚ ਦਾ ਖਾਕਾ ਵੀ ਤਿਆਰ ਕੀਤਾ ਗਿਆ।
...ਜਦੋਂ ਸੁਖਬੀਰ ਮੀਡੀਆ ਤੋਂ ਬਚ ਕੇ ਖਿਸਕੇ
NEXT STORY 
