ਅਸੀਂ ਆਮ ਤੌਰ 'ਤੇ ਘਰਾਂ 'ਚ ਸਰੋਂ ਦਾ ਤੇਲ ਵਰਤਦੇ ਹਾਂ। ਇਸ ਨੂੰ ਖਾਣੇ ਲਈ, ਮਾਲਸ਼ ਲਈ ਅਤੇ ਹੋਰ ਵੀ ਕਈ ਕੰਮਾਂ ਲਈ ਵਰਤਿਆ ਜਾਂਦਾ ਹੈ। ਇਸ ਦੀ ਮਾਲਸ਼ ਨਾਲ ਸਿਰ 'ਚ ਖੂਨ ਦਾ ਸੰਚਾਰ ਵਧਦਾ ਹੈ, ਮਾਸਪੇਸ਼ੀਆਂ ਵਿਕਸਿਤ ਅਤੇ ਮਜ਼ਬੂਤ ਹੁੰਦੀਆਂ ਹਨ, ਚਮੜੀ ਦੀ ਬਨਾਵਟ 'ਚ ਸੁਧਾਰ ਹੁੰਦਾ ਹੈ। ਅੱਜਕਲ ਬਾਜ਼ਾਰ 'ਚ ਬਹੁਤ ਸਾਰੇ ਬੇਬੀ ਆਇਲ ਆ ਗਏ ਹਨ ਪਰ ਇਨ੍ਹਾਂ ਦੀ ਬਜਾਏ ਜੇਕਰ ਬੱਚਿਆਂ ਦੀ ਸਰੋਂ ਦੇ ਤੇਲ ਨਾਲ ਮਾਲਸ਼ ਕੀਤੀ ਜਾਵੇ ਤਾਂ ਚੰਗਾ ਹੁੰਦਾ ਹੈ। ਸਰੋਂ ਦੇ ਤੇਲ 'ਚ ਜੀਵਾਣੂਰੋਧਕ ਤੱਤ ਹੁੰਦੇ ਹਨ। ਖਾਣੇ 'ਚ ਪੌਸ਼ਟਿਕ ਅਤੇ ਔਸ਼ਧੀ ਗੁਣਾਂ ਨਾਲ ਭਰਪੂਰ ਸਰੋਂ ਦੇ ਤੇਲ 'ਚ ਹੋਰ ਵੀ ਬਹੁਤ ਸਾਰੇ ਫਾਇਦੇ ਹਨ, ਜੋ ਤੁਸੀਂ ਨਹੀਂ ਜਾਣਦੇ ਹੋਵੋਗੇ।
♦ ਸਰੋਂ ਦੇ ਤੇਲ 'ਚ ਓਲਿਕ ਐਸਿਡ ਅਤੇ ਲੀਨੋਲਿਕ ਐਸਿਡ ਪਾਇਆ ਜਾਂਦਾ ਹੈ, ਇਹ ਫੈਟੀ ਐਸਿਡ ਹੁੰਦਾ ਹੈ, ਜੋ ਵਾਲਾਂ ਲਈ ਫਾਇਦੇਮੰਦ ਹੈ। ਇਨ੍ਹਾਂ ਨਾਲ ਵਾਲਾਂ ਦੀਆਂ ਜੜ੍ਹਾਂ ਨੂੰ ਪੋਸ਼ਣ ਮਿਲਦਾ ਹੈ। ਹਫਤੇ 'ਚ ਦੋ ਵਾਰ ਇਸ ਦੀ ਵਰਤੋਂ ਨਾਲ ਵਾਲ ਝੜਨੇ ਬੰਦ ਹੋ ਜਾਂਦੇ ਹਨ।
♦ ਦੰਦਾਂ ਅਤੇ ਮਸੂੜਿਆਂ 'ਤੇ ਵੀ ਸਰੋਂ ਦਾ ਤੇਲ ਰਗੜਨ ਨਾਲ ਇਹ ਮਜ਼ਬੂਤ ਹੁੰਦੇ ਹਨ। ਪਾਇਰੀਆ ਦੇ ਮਰੀਜ਼ਾਂ ਲਈ ਵੀ ਇਹ ਫਾਇਦੇਮੰਦ ਹੈ।
♦ ਸਰਦੀ-ਜ਼ੁਕਾਮ, ਸਿਰਦਰਦ ਜਾਂ ਸਰੀਰ ਦਰਦ ਹੈ ਤਾਂ ਸਰੋਂ ਦਾ ਤੇਲ ਕਾਫੀ ਫਾਇਦਾ ਦਿੰਦਾ ਹੈ।
♦ ਸਰੋਂ ਦੇ ਤੇਲ 'ਚ ਏਲਿਲ ਆਈਸੋਥਿਓਸਾਈਨੇਟ ਦੇ ਗੁਣ ਮੌਜੂਦ ਹਨ। ਚਮੜੀ ਦੇ ਵਿਕਾਰਾਂ ਲਈ ਸਭ ਤੋਂ ਚੰਗੇ ਇਲਾਜ ਦੇ ਰੂਪ 'ਚ ਇਹ ਕੰਮ ਕਰਦਾ ਹੈ। ਨਾਲ ਹੀ ਇਹ ਸਰੀਰ ਦੇ ਕਿਸੇ ਵੀ ਹਿੱਸੇ 'ਚ ਫੰਗਸ ਨੂੰ ਵਧਣ ਤੋਂ ਰੋਕਦਾ ਹੈ।
♦ ਇਸ ਨਾਲ ਸਰੀਰ ਦੀ ਰੋਗ-ਪ੍ਰਤੀਰੋਧਕ ਸਮਰੱਥਾ ਮਜ਼ਬੂਤ ਹੁੰਦੀ ਹੈ। ਇਹ ਸਰੀਰ ਨੂੰ ਗਰਮਾਹਟ ਵੀ ਦਿੰਦਾ ਹੈ ਅਤੇ ਜੇਕਰ ਇਸ ਨੂੰ ਸਰਦੀਆਂ 'ਚ ਵਰਤਿਆ ਜਾਏ ਤਾਂ ਠੰਡ ਨਹੀਂ ਲੱਗੇਗੀ।
♦ ਇਸ ਦੀ ਇਕ ਖਾਸੀਅਤ ਇਹ ਹੈ ਕਿ ਇਸ ਨਾਲ ਭੁੱਖ ਬਹੁਤ ਵਧਦੀ ਹੈ। ਇਹ ਉਨ੍ਹਾਂ ਲੋਕਾਂ ਲਈ ਫਾਇਦੇਮੰਦ ਹੈ, ਜਿਨ੍ਹਾਂ ਨੂੰ ਭੁੱਖ ਨਹੀਂ ਲੱਗਦੀ। ਇਸ ਲਈ ਆਪਣੇ ਭੋਜਨ ਲਈ ਸਰੋਂ ਦਾ ਤੇਲ ਵਰਤਣਾ ਸ਼ੁਰੂ ਕਰ ਦਿਓ। ਇਸ ਨਾਲ ਪਾਚਨ ਸਮਰੱਥਾ ਵੀ ਵਧਦੀ ਹੈ।
♦ ਇਹ ਵਿਟਾਮਿਨ-ਈ ਦਾ ਸਰੋਤ ਹੈ। ਇਸ ਨੂੰ ਜੇਕਰ ਸਰੀਰ 'ਤੇ ਲਗਾਇਆ ਜਾਵੇ ਤਾਂ ਸੂਰਜ ਦੀਆਂ ਅਲਟਰਾਵਾਇਲੈੱਟ ਕਿਰਨਾਂ ਤੋਂ ਬਚਾਅ ਹੁੰਦਾ ਹੈ।
♦ ਸਰੋਂ ਦੇ ਤੇਲ ਨਾਲ ਮਾਲਸ਼ ਕਰਨ ਨਾਲ ਗਠੀਆ ਅਤੇ ਜੋੜਾਂ ਦਾ ਦਰਦ ਵੀ ਠੀਕ ਹੋ ਜਾਂਦਾ ਹੈ। ਗਠੀਏ ਦੇ ਮਰੀਜ਼ ਸਰੋਂ ਦੇ ਤੇਲ 'ਚ ਕਪੂਰ ਮਿਲਾ ਕੇ ਮਾਲਸ਼ ਕਰਨ ਤਾਂ ਫਾਇਦਾ ਵਧੇਰੇ ਹੋਵੇਗਾ।
♦ ਸਰੋਂ ਦੇ ਤੇਲ ਨੂੰ ਖਾਣੇ 'ਚ ਵਰਤਣ ਨਾਲ ਕੋਰੋਨਰੀ ਹਾਰਟ ਡਿਜ਼ੀਜ਼ ਦਾ ਖਤਰਾ ਵੀ ਘਟਦਾ ਹੈ।
♦ ਜਿਨ੍ਹਾਂ ਦੀ ਚਮੜੀ ਖੁਸ਼ਕ ਹੈ, ਉਨ੍ਹਾਂ ਨੂੰ ਆਪਣੇ ਹੱਥਾਂ-ਪੈਰਾਂ 'ਤੇ ਤੇਲ ਲਗਾਉਣ ਤੋਂ ਬਾਅਦ ਸਾਬਣ ਤੋਂ ਬਿਨਾਂ ਨਹਾਉਣਾ ਚਾਹੀਦੈ। ਇਸ ਨਾਲ ਚਮੜੀ ਨੂੰ ਪੋਸ਼ਣ ਮਿਲਦਾ ਹੈ ਅਤੇ ਚਮੜੀ ਨਮ ਹੋ ਜਾਂਦੀ ਹੈ।
♦ ਸਰੀਰ 'ਚ ਕਿਸੇ ਵੀ ਤਰ੍ਹਾਂ ਦੀ ਸੋਜ ਹੋਵੇ ਤਾਂ ਸਰੋਂ ਦੇ ਬੀਜ ਪੀਸ ਕੇ ਇਸ ਦਾ ਲੇਪ ਲਗਾਉਣ ਨਾਲ ਸੋਜ ਠੀਕ ਹੋ ਜਾਂਦੀ ਹੈ।
♦ ਸਰੋਂ ਦੇ ਦਾਣਿਆਂ ਨੂੰ ਪੀਸ ਕੇ ਸ਼ਹਿਦ ਨਾਲ ਚੱਟਣ 'ਤੇ ਕਫ ਅਤੇ ਖਾਂਸੀ ਠੀਕ ਹੋ ਜਾਂਦੀ ਹੈ।
♦ ਇਸ ਨੂੰ ਇਕ ਟਾਨਿਕ ਦੇ ਤੌਰ 'ਤੇ ਵਰਤਿਆ ਜਾਂਦਾ ਹੈ। ਇਸ ਦੀ ਵਰਤੋਂ ਕਰਨ ਨਾਲ ਸਰੀਰ ਦੀ ਕਾਰਜ ਸਮਰੱਥਾ ਵਧਦੀ ਹੈ ਅਤੇ ਸਰੀਰ ਦੀ ਕਮਜ਼ੋਰੀ ਦੂਰ ਹੁੰਦੀ ਹੈ।
ਸਿਹਤ ਸੰਬੰਧੀ ਅਦਰਕ ਦੇ ਵਿਲੱਖਣ ਲਾਭ
NEXT STORY