ਚੰਡੀਗੜ੍ਹ (ਲਲਨ) : ਚੰਡੀਗੜ੍ਹ ਰੇਲਵੇ ਸਟੇਸ਼ਨ ’ਤੇ ਚੱਲ ਰਹੇ ਵਿਸ਼ਵ ਪੱਧਰੀ ਪੁਨਰ ਨਿਰਮਾਣ ਕਾਰਜ ਤਹਿਤ ਕੰਸਟ੍ਰਕਸ਼ਨ ਕੰਪਨੀ ਵੱਲੋਂ ਸਤੰਬਰ ਦੇ ਤੀਜੇ ਹਫ਼ਤੇ ਤੋਂ 15 ਦਿਨਾਂ ਦਾ ਬਲਾਕ ਮੰਗਿਆ ਗਿਆ ਹੈ। ਇਸ ਦਾ ਪ੍ਰਸਤਾਵ ਤਿਆਰ ਕਰਕੇ ਰੇਲਵੇ ਮੰਡਲ ਨੂੰ ਭੇਜ ਦਿੱਤਾ ਗਿਆ। ਜਾਣਕਾਰੀ ਮੁਤਾਬਕ ਕੋਨਕੋਰਸ ਦੇ ਨਾਲ ਬਣੇ ਫੁੱਟ ਓਵਰਬ੍ਰਿਜ (ਐੱਫ. ਓ. ਬੀ.) ’ਤੇ ਹਰ ਪਲੇਟਫਾਰਮ ਦੇ ਉੱਪਰ ਕੰਮ ਕੀਤਾ ਜਾਵੇਗਾ। ਇਸ ਦੇ ਲਈ ਹਰੇਕ ਪਲੇਟਫਾਰਮ ’ਤੇ ਦੋ ਦਿਨਾਂ ਦਾ 24-24 ਘੰਟਿਆਂ ਦਾ ਬਲਾਕ ਲਿਆ ਜਾਵੇਗਾ। ਇਸ ਦੌਰਾਨ ਸਬੰਧਿਤ ਪਲੇਟਫਾਰਮ ’ਤੋਂ ਰੇਲ ਆਵਾਜਾਈ ਬੰਦ ਰਹੇਗੀ। ਰੇਲਵੇ ਅਧਿਕਾਰੀਆਂ ਵੱਲੋਂ ਬਲਾਕ ਦੌਰਾਨ ਰੇਲ ਸੰਚਾਲਨ ਸਬੰਧੀ ਖਰੜਾ ਤਿਆਰ ਕੀਤਾ ਜਾ ਰਿਹਾ ਹੈ, ਤਾਂ ਜੋ ਯਾਤਰੀਆਂ ਨੂੰ ਘੱਟ ਤੋਂ ਘੱਟ ਪਰੇਸ਼ਾਨੀ ਪੇਸ਼ ਆਏ। ਹਾਲਾਂਕਿ ਚੰਡੀਗੜ੍ਹ ਰੇਲਵੇ ਸਟੇਸ਼ਨ ਤੋਂ ਦੂਜੇ ਸੂਬਿਆਂ ਨੂੰ ਜਾਣ ਵਾਲੀਆਂ ਕੁੱਝ ਰੇਲਗੱਡੀਆਂ ਨੂੰ ਰੱਦ ਵੀ ਕੀਤਾ ਜਾ ਸਕਦਾ ਹੈ। ਚੰਡੀਗੜ੍ਹ ਅਤੇ ਪੰਚਕੂਲਾ ਵਾਲੇ ਪਾਸੇ ਬਣੀਆਂ ਦੋਵੇਂ ਨਵੀਆਂ ਇਮਾਰਤਾਂ ਦੇ ਵਿਚਕਾਰ ਕੋਨਕੋਰਸ ਬਣਾਇਆ ਗਿਆ ਹੈ। ਯਾਤਰੀਆਂ ਦੀ ਸਹੂਲਤ ਲਈ ਦੋਵੇਂ ਪਾਸਿਆਂ ਦੇ ਫੁੱਟ ਓਵਰਬ੍ਰਿਜਾਂ ਨੂੰ ਪਾਰਕਿੰਗ ਖੇਤਰ ਤੱਕ ਜੋੜਿਆ ਜਾ ਰਿਹਾ ਹੈ। ਪੰਚਕੂਲਾ ਵਾਲੇ ਪਾਸੇ ਕੰਮ ਲਗਭਗ ਪੂਰਾ ਹੋ ਗਿਆ ਹੈ, ਜਦੋਂ ਕਿ ਪਲੇਟਫਾਰਮ ਦੇ ਉੱਪਰ ਤੋਂ ਨਿਕਲਣ ਵਾਲੇ ਫੁੱਟ ਓਵਰਬ੍ਰਿਜ ਦਾ ਕੰਮ ਹਾਲੇ ਬਾਕੀ ਹੈ। ਕੰਪਨੀ ਵੱਲੋਂ ਪਹਿਲਾਂ ਪਲੇਟਫਾਰਮ ਨੰਬਰ-1 ਅਤੇ 2 ’ਤੇ ਦੋ ਦਿਨਾਂ ਦਾ 24-24 ਘੰਟੇ ਦਾ ਬਲਾਕ ਲਿਆ ਜਾਏਗਾ। ਇਸ ਦੇ ਬਾਅਦ ਪਲੇਟਫਾਰਮ ਨੰਬਰ-3, 4 ਅਤੇ 5 ਤੇ 6 ’ਤੇ ਵੀ ਦੋ ਦਿਨਾਂ ਦਾ ਬਲਾਕ ਲਿਆ ਜਾਏਗਾ। ਦੋਵੇਂ ਪਾਸੇ ਫੁੱਟ ਓਵਰਬ੍ਰਿਜਾਂ ਦੇ ਥੰਮ੍ਹ ਤਿਆਰ ਹੋ ਗਏ ਹਨ, ਜਦੋਂ ਕਿ ਇਨ੍ਹਾਂ ’ਤੇ ਗਰਡਰ ਅਤੇ ਛੱਤ ਪਾਉਣ ਦਾ ਕੰਮ ਬਾਕੀ ਹੈ।
ਕੁੱਝ ਰੇਲਗੱਡੀਆਂ ਅੰਬਾਲਾ ਅਤੇ ਘੱਗਰ ਰੇਲਵੇ ਸਟੇਸ਼ਨਾਂ ਤੋਂ ਚਲਾਈਆਂ ਜਾਣ
ਪੁਨਰ ਨਿਰਮਾਣ ਕਾਰਜ ਲਈ ਮੰਗੇ ਗਏ 15 ਦਿਨਾਂ ਦੇ ਬਲਾਕ ਦੌਰਾਨ ਰੇਲ ਸੰਚਾਲਨ ਪ੍ਰਭਾਵਿਤ ਹੋ ਸਕਦਾ ਹੈ। ਯਾਤਰੀਆਂ ਦੀ ਸਹੂਲਤ ਲਈ ਕੁੱਝ ਰੇਲਗੱਡੀਆਂ ਰੱਦ ਕਰਨ ਦੇ ਨਾਲ ਹੀ ਕੁਝ ਰੇਲਗੱਡੀਆਂ ਦੇ ਪਲੇਟਫਾਰਮਾਂ ’ਚ ਵੀ ਬਦਲਾਅ ਕੀਤਾ ਜਾ ਸਕਦਾ ਹੈ। ਅਧਿਕਾਰੀਆਂ ਮੁਤਾਬਿਕ ਪਹਿਲਾਂ ਪਲੇਟਫਾਰਮ ਨੰਬਰ-1 ਅਤੇ 2 ’ਤੇ ਫੁੱਟ ਓਵਰਬ੍ਰਿਜ ਦਾ ਕੰਮ ਕੀਤਾ ਜਾਵੇਗਾ। ਕੰਮ ਪੂਰਾ ਹੋਣ ਤੋਂ ਬਾਅਦ ਸਬੰਧਿਤ ਪਲੇਟਫਾਰਮ ਨੂੰ ਅਗਲੇ ਦਿਨ ਰੇਲ ਸੰਚਾਲਨ ਲਈ ਖੋਲ੍ਹ ਦਿੱਤਾ ਜਾਵੇਗਾ। ਚੰਡੀਗੜ੍ਹ ਰੇਲਵੇ ਸਟੇਸ਼ਨ ਸਭ ਤੋਂ ਵਿਅਸਤ ਸਟੇਸ਼ਨਾਂ ’ਚ ਸ਼ਾਮਲ ਹੈ, ਇਸ ਲਈ ਰੇਲਵੇ ਦੀ ਕੋਸ਼ਿਸ਼ ਹੈ ਕਿ ਕੁੱਝ ਰੇਲਗੱਡੀਆਂ ਦਾ ਸੰਚਾਲਨ ਅੰਬਾਲਾ ਅਤੇ ਘੱਗਰ ਰੇਲਵੇ ਸਟੇਸ਼ਨਾਂ ਤੋਂ ਕੀਤਾ ਜਾਏ। ਆਰ. ਐੱਲ. ਡੀ. ਏ. ਅਧਿਕਾਰੀ ਨੇ ਦੱਸਿਆ ਕਿ ਸਟੇਸ਼ਨ ’ਤੇ ਪੁਨਰ ਨਿਰਮਾਣ ਕਾਰਜ ਕਰ ਰਹੀ ਕੰਪਨੀ ਵੱਲੋਂ ਸਤੰਬਰ ’ਚ 15 ਦਿਨਾਂ ਦਾ ਬਲਾਕ ਮੰਗਿਆ ਹੈ। ਇਸ ਦਾ ਪ੍ਰਸਤਾਵ ਤਿਆਰ ਕਰਕੇ ਅੰਬਾਲਾ ਮੰਡਲ ਨੂੰ ਭੇਜ ਦਿੱਤਾ ਗਿਆ। ਇਜ਼ਾਜਤ ਮਿਲਦੇ ਹੀ ਇਸ ਦੀ ਜਾਣਕਾਰੀ ਦਿੱਤੀ ਜਾਵੇਗੀ।
ਖ਼ਤਰੇ ਦੇ ਨਿਸ਼ਾਨ ਨੇੜੇ ਪੁੱਜਾ ਰਣਜੀਤ ਸਾਗਰ ਡੈਮ ਦਾ ਵਾਟਰ ਲੈਵਲ ! ਅਲਰਟ 'ਤੇ ਪ੍ਰਸ਼ਾਸਨ
NEXT STORY 
