ਜਲੰਧਰ(ਖੁਰਾਣਾ)— ਕਈ ਸਾਲ ਪਹਿਲਾਂ ਮਹਿਲਾ ਸਟਾਫ ਦੇ ਸੈਕਸ ਸ਼ੋਸ਼ਣ ਅਤੇ ਉਸ ਤੋਂ ਬਾਅਦ ਡਿਸਟੈਂਸ ਐਜੂਕੇਸ਼ਨ ਘਪਲੇ ਕਾਰਨ ਚਰਚਾ ਵਿਚ ਰਹੀ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ (ਪੀ. ਟੀ. ਯੂ.) ਇਸ ਵਾਰ ਉੱਤਰ ਕਾਪੀਆਂ ਦੀ ਟੈਂਡਰ ਪ੍ਰਕਿਰਿਆ ਨੂੰ ਲੈ ਕੇ ਵਿਵਾਦਾਂ ਅਤੇ ਚਰਚਿਆਂ ਵਿਚ ਘਿਰੀ ਹੋਈ ਹੈ। ਸ਼ਹਿਰ ਦੀ ਇਕ ਪ੍ਰਮੁੱਖ ਪ੍ਰਿੰਟਰ ਕੰਪਨੀ ਨੇ ਇਸ ਸਾਰੇ ਕਥਿਤ ਘਪਲੇ ਦੀ ਸ਼ਿਕਾਇਤ ਪੰਜਾਬ ਵਿਜੀਲੈਂਸ ਬਿਊਰੋ ਕੋਲ ਕੀਤੀ ਹੈ। ਮਾਮਲੇ ਸਬੰਧੀ ਬਿਊਰੋ ਦੇ ਅਧਿਕਾਰੀਆਂ ਨੂੰ ਕਈ ਦਸਤਾਵੇਜ਼ ਵੀ ਸੌਂਪੇ ਗਏ ਹਨ। ਵਿਜੀਲੈਂਸ ਨੂੰ ਦਿੱਤੀ ਗਈ ਸ਼ਿਕਾਇਤ ਭਾਵੇਂ ਉੱਤਰ ਕਾਪੀਆਂ ਦੇ ਪ੍ਰਕਾਸ਼ਨ ਬਾਰੇ ਇਸ ਸਾਲ 15 ਅਕਤੂਬਰ ਨੂੰ ਜਾਰੀ ਹੋਏ ਟੈਂਡਰਾਂ ਨੂੰ ਲੈ ਕੇ ਹੈ ਪਰ ਸ਼ਿਕਾਇਤਕਰਤਾ ਨੇ ਪਿਛਲੇ ਸਾਲ ਦੀ ਟੈਂਡਰ ਪ੍ਰਕਿਰਿਆ 'ਤੇ ਵੀ ਢੇਰ ਸਾਰੇ ਸਵਾਲ ਉਠਾਏ ਹਨ। ਇਸ ਕਾਰਨ ਪਿਛਲੀ ਅਤੇ ਇਸ ਵਾਰ ਦੀ ਟੈਂਡਰ ਪ੍ਰਕਿਰਿਆ ਸ਼ੱਕ ਦੇ ਘੇਰੇ ਵਿਚ ਹੈ। ਸ਼ਿਕਾਇਤਕਰਤਾ ਦਾ ਸਪੱਸ਼ਟ ਦੋਸ਼ ਹੈ ਕਿ ਉਸ ਨੂੰ ਟੈਂਡਰ ਪ੍ਰਕਿਰਿਆ ਤੋਂ ਬਾਹਰ ਰੱਖਣ ਦੇ ਇਰਾਦੇ ਨਾਲ ਪੁਰਾਣੀ ਉੱਤਰ ਕਾਪੀ ਦਾ ਸੈਂਪਲ ਨਹੀਂ ਦਿੱਤਾ ਜਾ ਰਿਹਾ। ਨਾਲ ਹੀ ਜਾਣਬੁੱਝ ਕੇ ਪ੍ਰੇਸ਼ਾਨ ਕਰਨ ਦੇ ਇਰਾਦੇ ਨਾਲ ਪੁਰਾਣੀ ਰਕਮ ਬਿਆਨਾ ਵੀ ਵਾਪਸ ਨਹੀਂ ਕੀਤੀ ਜਾ ਰਹੀ।
ਕਿਤੇ ਜਾਅਲੀ ਉੱਤਰ ਕਾਪੀਆਂ ਦੀ ਖੇਡ ਤਾਂ ਨਹੀਂ ਚੱਲ ਰਹੀ? :-
ਪੀ. ਟੀ. ਯੂ. ਦੇ ਖਰਾਬ ਅਕਸ ਦੇ ਦੌਰ ਵਿਚ ਅਕਸਰ ਦੋਸ਼ ਲੱਗਦੇ ਰਹਿੰਦੇ ਸਨ ਕਿ ਉੱਤਰ ਕਾਪੀਆਂ 'ਚ ਫੇਰਬਦਲ ਅਤੇ ਫੇਲ ਨੂੰ ਪਾਸ ਕਰਨ ਦੀ ਖੇਡ ਅਕਸਰ ਇਥੇ ਖੇਡੀ ਜਾਂਦੀ ਹੈ। ਇਸ ਵਾਰ ਵੀ ਜਗ ਬਾਣੀ ਕੋਲ ਪਿਛਲੇ ਸਾਲ ਪੀ. ਟੀ. ਯੂ. ਵਲੋਂ ਛਪਵਾਈ ਗਈ ਉੱਤਰ ਕਾਪੀ ਦਾ ਜਿਹੜਾ ਸੈਂਪਲ ਮੌਜੂਦ ਹੈ, ਨੂੰ ਵੇਖ ਕੇ ਪਤਾ ਲੱਗਦਾ ਹੈ ਕਿ ਪਿਛਲੇ ਸਾਲ ਜਿਸ ਟੈਂਡਰ ਦੇ ਆਧਾਰ 'ਤੇ ਇਨ੍ਹਾਂ ਨੂੰ ਲੱਖਾਂ ਦੀ ਗਿਣਤੀ ਵਿਚ ਛਪਵਾਇਆ ਗਿਆ ਸੀ, ਉਸ ਟੈਂਡਰ ਦੀਆਂ ਕਈ ਸ਼ਰਤਾਂ ਵੀ ਇਹ ਉੱਤਰ ਕਾਪੀ ਪੂਰਾ ਨਹੀਂ ਕਰ ਰਹੀ।
ਉਦਾਹਰਣ ਵਜੋਂ ਪਿਛਲੇ ਸਾਲ ਅਕਤੂਬਰ ਵਿਚ ਹੋਏ ਟੈਂਡਰਾਂ ਵਿਚ ਸਪੱਸ਼ਟ ਲਿਖਿਆ ਸੀ ਕਿ ਉੱਤਰ ਕਾਪੀਆਂ ਵਿਚ 'ਮੈਪਲਿਥੋ' ਕਾਗਜ਼ ਦੀ ਵਰਤੋਂ ਕੀਤੀ ਜਾਏਗੀ। ਸੈਂਪਲ ਉੱਤਰ ਕਾਪੀ ਵਿਚ ਇਸ ਕੁਆਲਿਟੀ ਦਾ ਕਾਗਜ਼ ਨਹੀਂ ਹੈ। ਪਿਛਲੇ ਟੈਂਡਰ ਦਸਤਾਵੇਜ਼ ਵਿਚ ਲਿਖਿਆ ਸੀ ਕਿ 'ਇਨਵਿਜ਼ੀਬਲ ਇੰਕ' ਨਾਲ ਹਰ ਪੰਨੇ 'ਤੇ ਪੀ. ਟੀ. ਯੂ. ਮਾਰਕਾ ਹੋਣਾ ਚਾਹੀਦਾ ਹੈ ਪਰ ਸੈਂਪਲ ਉੱਤਰ ਕਾਪੀ ਦੇ ਕਈ ਪੰਨਿਆਂ 'ਤੇ ਇੰਝ ਨਹੀਂ ਹੈ। ਸਿਰਫ ਪਹਿਲੇ ਪੰਨੇ ਨੂੰ ਛੱਡ ਦੇਈਏ ਤਾਂ ਬਾਕੀ ਦੇ ਪੰਨਿਆਂ 'ਤੇ ਪੀ. ਟੀ. ਯੂ. ਦਾ ਜਿਹੜਾ ਲੋਗੋ ਲੱਗਾ ਹੈ, ਉਸ 'ਤੇ ਆਈ. ਕੇ. ਜੀ. ਸ਼ਬਦ ਨਹੀਂ ਲਿਖਿਆ ਹੋਇਆ, ਜਦਕਿ ਪੀ. ਟੀ. ਯੂ. ਤੋਂ ਪਹਿਲਾਂ ਇਹ ਸ਼ਬਦ ਲਿਖਿਆ ਜਾਣਾ ਜ਼ਰੂਰੀ ਹੈ। ਟੈਂਡਰ ਪ੍ਰਕਿਰਿਆ ਵਿਚ ਲੇਬਰਬਾਡ ਕੋਡ ਨੂੰ ਜ਼ਰੂਰੀ ਕਰਾਰ ਦਿੱਤਾ ਗਿਆ ਸੀ ਪਰ ਸੈਂਪਲ ਉੱਤਰ ਕਾਪੀ ਵਿਚ 'ਇੰਕ ਜੈੱਟ' ਬਾਰ ਕੋਡ ਦੀ ਵਰਤੋਂ ਹੋਈ ਹੈ। ਵਿਵਾਦ ਇਸ ਗੱਲ ਨੂੰ ਲੈ ਕੇ ਵੀ ਹੈ ਕਿ ਬਾਰ ਕੋਡ ਲਾਉਣ ਬਾਰੇ ਜਦੋਂ ਇਕ ਪ੍ਰਿੰਟਰ ਕੰਪਨੀ ਨੇ ਪੀ. ਟੀ. ਯੂ. ਦੇ ਅਧਿਕਾਰੀਆਂ ਕੋਲੋਂ ਸਪੱਸ਼ਟੀਕਰਨ ਮੰਗਿਆ ਤਾਂ ਉਸ ਨੂੰ ਜਾਣਬੁੱਝ ਕੇ ਕੋਈ ਜਵਾਬ ਨਹੀਂ ਦਿੱਤਾ ਗਿਆ ਅਤੇ ਲਟਕਾਇਆ ਗਿਆ। ਪਿਛਲੇ ਸਾਲ ਛਪੀਆਂ ਉੱਤਰ ਕਾਪੀਆਂ 'ਚ ਪਾਈਆਂ ਜਾ ਰਹੀਆਂ ਅਜਿਹੀਆਂ ਕਮੀਆਂ ਬਾਰੇ ਸ਼ਿਕਾਇਤ ਵਿਜੀਲੈਂਸ ਬਿਊਰੋ ਨੂੰ ਭਾਵੇਂ ਭੇਜ ਦਿੱਤੀ ਗਈ ਹੈ ਪਰ ਕਿਤੇ ਨਾ ਕਿਤੇ ਇਹ ਸ਼ੱਕ ਪ੍ਰਗਟ ਕੀਤੇ ਜਾ ਰਹੇ ਹਨ ਕਿ ਜਿਸ ਉੱਤਰ ਕਾਪੀ ਵਾਲੇ ਸੈਂਪਲ ਵਿਚ ਇਹ ਕਮੀਆਂ ਹਨ, ਕਿਤੇ ਉਹ ਜਾਅਲੀ ਤਾਂ ਨਹੀਂ।
ਟੈਂਡਰ ਡਰਾਫਟ ਕਮੇਟੀ ਤੋਂ ਲੈ ਕੇ ਵੀ. ਸੀ. ਦਫਤਰ ਤੱਕ ਦੇ ਨਾਂ ਸ਼ਿਕਾਇਤ 'ਚ :-
ਵਿਜੀਲੈਂਸ ਬਿਊਰੋ ਨੂੰ ਦਿੱਤੀ ਗਈ ਸ਼ਿਕਾਇਤ ਵਿਚ ਟੈਂਡਰ ਡਰਾਫਟ ਕਮੇਟੀ ਤੋਂ ਲੈ ਕੇ ਵੀ. ਸੀ. ਦਫਤਰ ਤੱਕ ਨੂੰ ਘੇਰਿਆ ਗਿਆ ਹੈ। ਇਸ ਵਿਚ ਟੈਂਡਰ ਅਪਰੂਵਲ ਕਮੇਟੀ, ਟੈਂਡਰ ਓਪਨਿੰਗ ਕਮੇਟੀ, ਟੈਕਨੀਕਲ ਬੋਲੀ ਨੂੰ ਜਾਂਚਣ ਵਾਲੀ ਕਮੇਟੀ, ਫਾਈਨਾਂਸ਼ੀਅਲ ਬਿੱਡ ਓਪਨਿੰਗ ਕਮੇਟੀ, ਰਜਿਸਟਰਾਰ ਆਫਿਸ (ਸਟੋਰ ਐਂਡ ਪਰਚੇਜ਼ ਡਿਪਾਰਟਮੈਂਟ), ਐਗਜ਼ਾਮੀਨੇਸ਼ਨ ਡਿਪਾਰਟਮੈਂਟ ਅਤੇ ਅਕਾਊਂਟਸ ਡਿਪਾਰਟਮੈਂਟ ਦੇ ਅਧਿਕਾਰੀਆਂ 'ਤੇ ਵੀ ਉਂਗਲੀ ਉਠਾਈ ਗਈ ਹੈ। ਮੰਗ ਕੀਤੀ ਗਈ ਹੈ ਕਿ ਪੰਜਾਬ ਅਤੇ ਹਜ਼ਾਰਾਂ ਲੱਖਾਂ ਵਿਦਿਆਰਥੀਆਂ ਦੇ ਹਿੱਤਾਂ ਵਿਚ ਅਜਿਹੇ ਅਧਿਕਾਰੀਆਂ ਅਤੇ ਮੁਲਾਜ਼ਮਾਂ ਨੂੰ ਟੈਂਡਰ ਪ੍ਰਕਿਰਿਆ ਤੋਂ ਦੂਰ ਰੱਖਿਆ ਜਾਏ, ਜੋ ਪਿਛਲੀ ਟੈਂਡਰ ਪ੍ਰਕਿਰਿਆ ਨੂੰ ਲੈ ਕੇ ਸ਼ੱਕ ਦੇ ਘੇਰੇ ਵਿਚ ਆਏ ਹੋਏ ਹਨ।
ਇਥੇ ਇਹ ਗੱਲ ਵੀ ਦੱਸਣਯੋਗ ਹੈ ਕਿ ਪਿਛਲੇ ਸਾਲ ਦੀ ਸੈਂਪਲ ਉੱਤਰ ਕਾਪੀ ਵਿਚ ਕਈ ਅਹਿਮ ਕਮੀਆਂ ਸਪੱਸ਼ਟ ਨਜ਼ਰ ਆ ਰਹੀਆਂ ਹਨ ਪਰ ਕੁਝ ਸਾਲ ਪਹਿਲਾਂ ਪ੍ਰਕਾਸ਼ ਕਮਿਊਨੀਕੇਸ਼ਨ ਨਾਮੀ ਪ੍ਰਿੰਟਰ ਨੂੰ ਸਿਰਫ ਇਸ ਕਾਰਨ ਬਲੈਕਲਿਸਟ ਕਰ ਦਿੱਤਾ ਗਿਆ ਸੀ ਕਿਉਂਕਿ ਉਸ ਨੇ ਯੂਨੀਵਰਸਿਟੀ ਦਾ ਅਸਲ ਲੋਗੋ ਨਹੀਂ ਵਰਤਿਆ ਸੀ ਅਤੇ ਉਸ ਪ੍ਰਿੰਟਰ ਦੀ ਪੇਮੈਂਟ ਅੱਜ ਤੱਕ ਯੂਨੀਵਰਸਿਟੀ ਨੇ ਨਹੀਂ ਕੀਤੀ ਜਦਕਿ 10 ਸਾਲ ਤੋਂ ਵੱਧ ਦਾ ਸਮਾਂ ਬੀਤ ਚੁੱਕਾ ਹੈ। ਦੂਜੇ ਪਾਸੇ ਇਹ ਜਾਣਦੇ ਹੋਏ ਵੀ ਕਿ ਪੇਪਰ ਦੀ ਕੁਆਲਿਟੀ, ਇਨਵਿਜ਼ੀਬਲ ਇੰਕ, ਬਾਰ ਕੋਡ ਅਤੇ ਲੋਗੋ ਪ੍ਰਿੰਟਿੰਗ ਵਿਚ ਕਈ ਤਰੁੱਟੀਆਂ ਹਨ, ਉਕਤ ਪ੍ਰਿੰਟਰ ਨੂੰ ਪੂਰਾ ਭੁਗਤਾਨ ਕੀਤਾ ਜਾਣਾ ਕਈ ਸਵਾਲ ਖੜ੍ਹੇ ਕਰਦਾ ਹੈ। ਫਿਲਹਾਲ ਮਾਮਲਾ ਵਿਜੀਲੈਂਸ ਬਿਊਰੋ ਕੋਲ ਚਲੇ ਜਾਣ ਕਾਰਨ ਪੀ. ਟੀ. ਯੂ. ਦੀ ਅਫਸਰਸ਼ਾਹੀ ਵਿਚ ਭੜਥੂ ਮਚਿਆ ਹੋਇਆ ਹੈ।
ਸ਼੍ਰੀਲੰਕਾ ਦੇ ਪ੍ਰਧਾਨ ਮੰਤਰੀ ਅੱਜ ਆਉਣਗੇ ਭਾਰਤ ਦੌਰੇ 'ਤੇ (ਪੜ੍ਹੋ 18 ਅਕਤੂਬਰ ਦੀਆਂ ਖਾਸ ਖਬਰਾਂ)
NEXT STORY 
