ਜਲੰਧਰ (ਧਵਨ) - ਦੱਖਣੀ ਏਸ਼ੀਆਈ ਦੇਸ਼ਾਂ 'ਚ ਰੁਜ਼ਗਾਰ ਵਾਧੇ ਨੂੰ ਲੈ ਕੇ ਵਿਸ਼ਵ ਰੁਜ਼ਗਾਰ ਅਤੇ ਸਮਾਜਿਕ ਮਾਹੌਲ ਬਾਰੇ ਕਿਹਾ ਗਿਆ ਹੈ ਕਿ ਭਾਵੇਂ 2017 ਤੋਂ 2019 ਤਕ ਏਸ਼ੀਆ ਪੈਸੀਫਿਕ ਇਲਾਕੇ 'ਚ 23 ਮਿਲੀਅਨ ਨੌਕਰੀਆਂ ਪੈਦਾ ਹੋਣਗੀਆਂ ਪਰ 2019 ਤਕ ਭਾਰਤ 'ਚ ਕੰਮ ਕਰ ਰਹੇ 77 ਫੀਸਦੀ ਮਜ਼ਦੂਰਾਂ ਦੀਆਂ ਨੌਕਰੀਆਂ ਦੀ ਹਾਲਤ ਕਾਫੀ ਤਰਸਯੋਗ ਹੋ ਜਾਵੇਗੀ। ਭਾਰਤ 'ਚ ਰੁਜ਼ਗਾਰ ਦੇ ਨਵੇਂ ਮੌਕੇ ਤਾਂ ਪੈਦਾ ਹੋਣਗੇ ਪਰ ਨਵੀਆਂ ਨੌਕਰੀਆਂ ਦੀ ਹਾਲਤ ਚੰਗੀ ਨਹੀਂ ਹੋਵੇਗੀ, ਜਿਸ ਨਾਲ ਮਜ਼ਦੂਰਾਂ 'ਤੇ ਉਲਟ ਅਸਰ ਪਵੇਗਾ। ਸੰਭਾਵਨਾਵਾਂ 'ਚ ਕਿਹਾ ਗਿਆ ਹੈ ਕਿ ਭਾਰਤ 'ਚ ਭਾਵੇਂ ਦੱਖਣੀ ਏਸ਼ੀਆਈ ਇਲਾਕੇ 'ਚ ਰੁਜ਼ਗਾਰ ਦਾ ਪੱਧਰ ਉੱਚਾ ਰਹੇਗਾ ਪਰ ਭਾਰਤੀ ਮਜ਼ਦੂਰਾਂ ਦੀ ਹਾਲਤ 'ਚ ਸੁਧਾਰ ਨਹੀਂ ਆ ਰਿਹਾ ਹੈ।
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ 2019 ਤਕ ਭਾਰਤ 'ਚ 535 ਮਿਲੀਅਨ ਮਜ਼ਦੂਰ ਸ਼ਕਤੀ ਹੋਵੇਗੀ, ਜਿਸ 'ਚੋਂ 398.6 ਮਿਲੀਅਨ ਮਜ਼ਦੂਰਾਂ ਦੀ ਨੌਕਰੀ ਦੀ ਹਾਲਤ ਤਰਸਯੋਗ ਰਹੇਗੀ। ਭਾਰਤ ਨੂੰ ਲੈ ਕੇ ਸਭ ਤੋਂ ਵੱਡੀ ਚਿੰਤਾ ਇਹ ਹੈ ਕਿ 2017 ਤੋਂ 2019 ਦਰਮਿਆਨ ਭਾਰਤ 'ਚ ਬੇਰੁਜ਼ਗਾਰੀ ਦਰ 3.4 ਤੋਂ 3.5 ਫੀਸਦੀ ਦਰਮਿਆਨ ਘੁੰਮੇਗੀ। 2017 'ਚ 15 ਤੋਂ 24 ਉਮਰ ਵਰਗ 'ਚ ਬੇਰੁਜ਼ਗਾਰੀ ਦਰ 10.5 ਫੀਸਦੀ ਰਹੇਗੀ। ਰਿਪੋਰਟ 'ਚ ਇਹ ਵੀ ਕਿਹਾ ਗਿਆ ਹੈ ਕਿ ਭਾਰਤ 'ਚ ਭਾਵੇਂ ਹਰ ਸਾਲ 12 ਮਿਲੀਅਨ ਲੋਕਾਂ ਨੂੰ ਰੋਜ਼ਗਾਰ ਮਿਲ ਰਿਹਾ ਹੈ ਪਰ ਇਨ੍ਹਾਂ ਨੌਕਰੀਆਂ ਦੀ ਹਾਲਤ ਚੰਗੀ ਨਹੀਂ ਹੈ। ਇਲਾਕੇ 'ਚ ਮਜ਼ਦੂਰ ਸ਼ਕਤੀ ਦਾ ਸ਼ੋਸ਼ਣ ਹੋ ਰਿਹਾ ਹੈ ਅਤੇ ਕੇਂਦਰ ਸਰਕਾਰ ਦੇ ਯਤਨਾਂ ਦੇ ਬਾਵਜੂਦ ਭਾਰਤੀ ਮਜ਼ਦੂਰਾਂ ਦੀ ਹਾਲਤ 'ਚ ਸੁਧਾਰ ਹੁੰਦਾ ਹੋਇਆ ਦਿਖਾਈ ਨਹੀਂ ਦੇ ਰਿਹਾ ਹੈ।
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਭਾਰਤ 'ਚ ਕੰਮ ਕਰਨ ਵਾਲੇ ਮਜ਼ਦੂਰਾਂ ਦੀ ਔਸਤ ਆਮਦਨੀ 198 ਰੋਜ਼ਾਨਾ ਤੋਂ ਘੱਟ ਹੈ। ਰਿਪੋਰਟ 'ਚ ਦੱਸਿਆ ਗਿਆ ਹੈ ਕਿ 2019 ਤਕ ਭਾਰਤ 'ਚ 18.9 ਮਿਲੀਅਨ ਬੇਰੋਜ਼ਗਾਰ ਲੋਕ ਹੋਣਗੇ। 2017 'ਚ ਬੇਰੁਜ਼ਗਾਰਾਂ ਦੀ ਗਿਣਤੀ 18.3 ਮਿਲੀਅਨ ਸੀ ਇਸ ਲਈ ਹਰ ਸਾਲ ਭਾਰਤ 'ਚ ਬੇਰੁਜ਼ਗਾਰੀ ਦੇ ਅੰਕੜਿਆਂ 'ਚ ਵਾਧਾ ਹੁੰਦਾ ਹੋਇਆ ਦਿਖਾਈ ਦੇ ਰਿਹਾ ਹੈ। ਭਾਰਤ ਨੂੰ ਲੈ ਕੇ ਕੌਮਾਂਤਰੀ ਮਾਹਿਰਾਂ ਨੇ ਚਿੰਤਾ ਇਹ ਜਤਾਈ ਹੈ ਕਿ ਨੌਜਵਾਨਾਂ 'ਚ ਬੇਰੋਜ਼ਗਾਰੀ ਦਾ ਪ੍ਰਤੀਸ਼ਤ ਲਗਾਤਾਰ ਹਰ ਸਾਲ ਵਧਦਾ ਜਾ ਰਿਹਾ ਹੈ। ਸਰਕਾਰ ਨੇ ਸਿੱਖਿਅਤ ਬੇਰੋਜ਼ਗਾਰੀ 'ਤੇ ਰੋਕ ਲਾਉਣ ਲਈ ਪ੍ਰਭਾਵੀ ਕਦਮ ਨਹੀਂ ਚੁੱਕੇ ਹਨ। 2014 ਦੇ ਅੰਕੜਿਆਂ ਨੂੰ ਜੇਕਰ ਦੇਖਿਆ ਜਾਵੇ ਤਾਂ ਬੇਰੋਜ਼ਗਾਰ ਨੌਜਵਾਨਾਂ ਦਾ ਫੀਸਦੀ 10 ਤੋਂ ਹੇਠਾਂ ਸੀ। 2018 'ਚ ਇਹ 10.5 ਫੀਸਦੀ ਅਤੇ 2019 'ਚ ਇਹ 10.7 ਫੀਸਦੀ ਤਕ ਪਹੁੰਚ ਜਾਵੇਗਾ। ਵਿਸ਼ਵ 'ਚ ਬੇਰੋਜ਼ਗਾਰਾਂ ਦੀ ਜੇਕਰ ਚਰਚਾ ਕੀਤੀ ਜਾਵੇ ਤਾਂ 2019 ਤਕ ਭਾਰਤ 'ਚ ਵਿਸ਼ਵ ਆਬਾਦੀ ਦੇ ਹਿਸਾਬ ਨਾਲ 9.76 ਫੀਸਦੀ ਲੋਕ ਬੇਰੋਜ਼ਗਾਰ ਹੋਣਗੇ। ਭਾਵ ਇਹ ਗਿਣਤੀ 18.9 ਮਿਲੀਅਨ ਦੇ ਅੰਕੜੇ ਨੂੰ ਛੂਹ ਲਵੇਗੀ। ਇਸ ਲਈ ਕੇਂਦਰ ਸਰਕਾਰ ਲਈ ਆਉਣ ਵਾਲਾ ਸਮਾਂ ਰੁਜ਼ਗਾਰ ਪ੍ਰਦਾਨ ਕਰਨ ਦੀ ਦ੍ਰਿਸ਼ਟੀ ਨਾਲ ਚੁਣੌਤੀਪੂਰਨ ਰਹਿਣ ਵਾਲਾ ਹੈ।
ਨੌਜਵਾਨ ਨੂੰ ਜ਼ਖ਼ਮੀ ਕਰਨ 'ਤੇ 4 ਵਿਰੁੱਧ ਪਰਚਾ ਦਰਜ
NEXT STORY 
