ਬਠਿੰਡਾ(ਵੈੱਬ ਡੈਸਕ) : ਜਦੋਂ ਤੱਕ ਦਮ ਹੈ, ਉਦੋਂ ਤੱਕ ਤੂੰਬੀ ਨਹੀਂ ਰੁਕੇਗੀ। ਇਹ ਕਹਿਣਾ ਹੈ ਫਰੀਦਕੋਟ ਤੋਂ ਸੰਸਦ ਮੈਂਬਰ ਮੁਹੰਮਦ ਸਦੀਕ ਦਾ। ਮੁਹੰਮਦ ਸਦੀਕ ਲਈ ਤੂੰਬੀ ਇਕੱਲੀ ਰੂਹ ਦੀ ਖੁਰਾਕ ਨਹੀਂ, ਰੋਜ਼ੀ ਰੋਟੀ ਦਾ ਵਸੀਲਾ ਵੀ ਹੈ। ਸਦੀਕ ਸੰਸਦ ਦੀ ਪੌੜੀ ਜ਼ਰੂਰ ਚੜ੍ਹੇ ਹਨ। ਉਹ ਹਾਲੇ ਅਖਾੜਿਆਂ ਦੀ ਸਟੇਜ ਤੋਂ ਨਹੀਂ ਉਤਰਨਗੇ। ਮੁਹੰਮਦ ਸਦੀਕ ਆਖਦੇ ਹਨ ਕਿ ਜਦੋਂ ਤੱਕ ਦਮ ਹੈ, ਉਦੋਂ ਤੱਕ ਤੂੰਬੀ ਨਹੀਂ ਰੁਕੇਗੀ। ਉਦੋਂ ਕੋਈ ਅਖਾੜਾ ਨਹੀਂ ਲੱਗੇਗਾ ਜਦੋਂ ਸੰਸਦ ਦਾ ਸੈਸ਼ਨ ਚੱਲਦਾ ਹੋਵੇਗਾ। ਸਦੀਕ ਨੇ ਕਿਹਾ ਸੰਸਦ ਵਿਚ ਲੋਕ ਮੁੱਦਿਆਂ ਦੀ ਗੂੰਜ ਪਾਵਾਂਗਾ ਅਤੇ ਲੋਕ ਫਰਜ਼ਾਂ 'ਤੇ ਪਹਿਰਾ ਦਿਆਂਗਾ।
ਦਰਅਸਲ ਮੁਹੰਮਦ ਸਦੀਕ ਦੇ ਐਮ.ਪੀ. ਬਣਣ ਤੋਂ ਬਾਅਦ ਚਰਚਾਵਾਂ ਚੱਲ ਰਹੀਆਂ ਹਨ ਕਿ ਉਨ੍ਹਾਂ ਦੇ ਹੁਣ ਅਖਾੜੇ ਨਹੀਂ ਸਜਣਗੇ, ਜਿਸ 'ਤੇ ਮੁਹੰਮਦ ਸਦੀਕ ਨੇ ਕਿਹਾ ਹੈ ਕਿ ਗਾਹਿਕੀ ਉਨ੍ਹਾਂ ਦੀ ਰੋਜ਼ੀ ਰੋਟੀ ਹੈ ਅਤੇ ਕਮਾਈ ਦਾ ਹੋਰ ਕੋਈ ਸਾਧਨ ਨਹੀਂ। ਤੂੰਬੀ ਨਾਲ ਹੀ ਘਰ ਬਾਰ ਚੱਲਦਾ ਹੈ। ਐਮ.ਪੀ. ਬਣਨ ਮਗਰੋਂ ਮੁਹੰਮਦ ਸਦੀਕ 2-3 ਅਖਾੜੇ ਲਾ ਚੁੱਕੇ ਹਨ। ਦੱਸ ਦੇਈਏ ਕਿ ਮੁਹੰਮਦ ਸਦੀਕ ਨੇ 1960 ਤੋਂ ਸਟੇਜੀ ਪ੍ਰੋਗਰਾਮ ਸ਼ੁਰੂ ਕਰ ਦਿੱਤੇ ਸਨ।
ਜ਼ਿਕਰਯੋਗ ਹੈ ਕਿ ਮੁਹੰਮਦ ਸਦੀਕ ਜਦੋਂ ਪਹਿਲੀ ਵਾਰ ਭਦੌੜ ਤੋਂ ਵਿਧਾਇਕ ਬਣ ਕੇ ਵਿਧਾਨ ਸਭਾ ਵਿਚ ਗਏ ਸਨ ਤਾਂ ਉਦੋਂ ਉਹ ਸਿਆਸੀ ਭਲਵਾਨਾਂ ਵਿਚ ਘਿਰ ਗਏ ਸਨ। ਜਦੋਂ ਵੱਡੇ ਬਾਦਲ ਦੀ ਸਿਫਾਰਸ਼ 'ਤੇ ਸਦੀਕ ਨੇ ਸੈਸ਼ਨ ਵਿਚ ਪ੍ਰੋ. ਮੋਹਨ ਸਿੰਘ ਦੀ ਕਵਿਤਾ ਸੁਣਾ ਦਿੱਤੀ ਤਾਂ ਉਦੋਂ ਚੱਲਦੇ ਸੈਸ਼ਨ ਵਿਚ ਸਦੀਕ ਦਾ ਮਜ਼ਾਕ ਉਡਾਇਆ ਗਿਆ ਸੀ। ਮੁਹੰਮਦ ਸਦੀਕ ਆਖਦੇ ਹਨ ਕਿ ਉਦੋਂ ਉਹ ਸ਼ਰਾਫਤ ਕਾਰਨ ਫਸ ਗਏ ਸਨ ਅਤੇ ਸਿਆਸੀ ਲੋਕਾਂ ਦੇ ਦਾਅ ਪੇਚਾਂ ਤੋਂ ਅਣਜਾਣ ਸਨ। ਮੁਹੰਮਦ ਸਦੀਕ ਨੇ ਸੰਸਦ ਵਿਚ ਆਪਣੇ ਪਹਿਲੇ ਤਜਰਬੇ ਬਾਰੇ ਕਿਹਾ ਕਿ ਸੰਸਦ ਵਿਚ ਹਕੂਮਤ ਵਾਲੇ ਸ਼ੁਗਲੀ ਲੋਕ ਬੈਠੇ ਹਨ ਜਿਨ੍ਹਾਂ ਦੇ ਜਾਲ ਵਿਚ ਉਹ ਹੁਣ ਨਹੀਂ ਫਸਣਗੇ। ਜੋ ਭੁੱਲ ਵਿਧਾਨ ਸਭਾ ਵਿਚ ਹੋਈ, ਉਹ ਸੰਸਦ ਵਿਚ ਕਦੇ ਨਹੀਂ ਹੋਵੇਗੀ।
ਜਗਦੀਸ਼ ਭੋਲਾ ਦੀ ਜ਼ਮਾਨਤ ਅਰਜ਼ੀ ਅਦਾਲਤ ਵਲੋਂ ਰੱਦ
NEXT STORY 
