ਲਾਲੜੂ (ਗੁਰਪ੍ਰੀਤ) : ਮੋਹਾਲੀ ਦੇ ਨੇੜੇਲੇ ਕਸਬਾ ਲਾਲੜੂ 'ਚ ਸਥਿਤ ਨਾਹਰ ਇੰਡਸਟਰੀ 'ਚ ਇਕ ਬੁਆਇਲਰ ਦੀ ਟਿਊਬ ਦਾ ਹੈਂਡਲ ਫਟਣ ਕਾਰਨ ਜ਼ਬਰਦਸਤ ਧਮਾਕਾ ਹੋਇਆ। ਇਸ ਧਮਾਕੇ ਤੋਂ ਬਾਅਦ ਨਿਕਲੇ ਗਰਮ ਤਰਲ ਪਦਾਰਥ ਦੀ ਲਪੇਟ 'ਚ ਆਉਣ ਕਾਰਨ 3 ਮਜ਼ਦੂਰਾਂ ਦੀ ਮੌਤ ਹੋ ਗਈ, ਜਦੋਂ ਕਿ ਇਕ ਗੰਭੀਰ ਜ਼ਖਮੀਂ ਹੋ ਗਿਆ। ਇਸ ਘਟਨਾ ਤੋਂ ਬਾਅਦ ਹਫੜਾ-ਦਫੜੀ ਮਚ ਗਈ ਅਤੇ ਸੂਚਨਾ ਮਿਲਦੇ ਹੀ ਪੁਲਸ ਮੌਕੇ 'ਤੇ ਪੁੱਜੀ।
ਪ੍ਰਾਪਤ ਜਾਣਕਾਰੀ ਮੁਤਾਬਕ 7-8 ਜਨਵਰੀ ਦੀ ਦਰਮਿਆਨੀ ਰਾਤ ਨੂੰ ਨਾਹਰ ਫੈਕਟਰੀ ਦੇ ਉਕਤ ਬਿਜਲੀ ਘਰ ਵਿਚ ਪੰਜ ਮੁਲਾਜ਼ਮ ਡਿਊਟੀ 'ਤੇ ਤਾਇਨਾਤ ਸਨ। ਇਸ ਦੌਰਾਨ ਬੁਆਇਲਰ ਦੀ ਟਿਉੂਬ ਦਾ ਹੈਂਡਲ ਫੱਟ ਗਿਆ ਅਤੇ ਇਕ ਜ਼ਬਰਦਸਤ ਧਮਾਕਾ ਹੋਇਆ, ਜਿਸ ਦੇ ਕਾਰਨ ਬੁਆਇਲਰ 'ਚੋਂ ਗਰਮ ਮੀਟੀਰੀਅਲ ਬਾਹਰ ਖੜ੍ਹੇ ਮਜ਼ਦੂਰਾਂ 'ਤੇ ਡਿੱਗ ਪਿਆ ਅਤੇ ਉਹ ਗੰਭੀਰ ਜ਼ਖਮੀ ਹੋ ਗਏ, ਜਿਨ੍ਹਾਂ ਨੂੰ ਫੈਕਟਰੀ ਦੀ ਐਂਬੂਲੈਂਸ ਦੇ ਰਾਹੀਂ ਤੁਰੰਤ ਸੈਕਟਰ-32 ਚੰਡੀਗੜ੍ਹ ਦੇ ਸਰਕਾਰੀ ਹਸਪਤਾਲ ਵਿਚ ਲਿਜਾਇਆ ਗਿਆ। ਇੱਥੇ ਤਿੰਨ ਮਜ਼ਦੂਰਾਂ ਦੀ ਮੌਤ ਹੋ ਗਈ, ਜਿਨ੍ਹਾਂ ਦੀ ਸ਼ਨਾਖਤ ਹੇਮੰਤ ਕੁਮਾਰ (20) ਮਨੀਸ਼ ਕੁਮਾਰ (20) ਸੰਜੇ ਯਾਦਵ (35) ਸਾਰੇ ਵਾਸੀ ਬਿਹਾਰ ਵਜੋਂ ਹੋਈ ਹੈ, ਜਦੋਂ ਕਿ ਜ਼ਖਮੀ ਸੋਨੂੰ (20) ਗੰਭੀਰ ਰੂਪ 'ਚ ਫੱਟੜ ਹੈ, ਜੋ ਚੰਡੀਗੜ੍ਹ ਦੇ 32 ਸੈਕਟਰ ਹਸਪਤਾਲ ਜੇਰੇ ਇਲਾਜ ਹੈ।
ਪੁਲਸ ਨੇ ਹਸਪਤਾਲ ਪੁੱਜ ਕੇ ਸਾਰੀ ਸਥਿਤੀ ਦਾ ਜਾਇਜ਼ਾ ਲਿਆ ਅਤੇ ਮ੍ਰਿਤਕ ਹੇਮੰਤ ਦੇ ਸਾਲੇ ਸੰਦੀਪ ਕੁਮਾਰ ਅਤੇ ਮਨੀਸ਼ ਕੁਮਾਰ ਦੇ ਭਰਾ ਮਨਤੋਸ ਕੁਮਾਰ ਦੇ ਬਿਆਨ ਦਰਜ ਕੀਤੇ ਅਤੇ ਦੋਹਾਂ ਲਾਸ਼ਾਂ ਦਾ ਪੋਸਟਮਾਰਟਮ ਕਰ ਵਾਰਸਾਂ ਦੇ ਹਵਾਲੇ ਕਰ ਦਿੱਤੀਆਂ। ਲੈਹਲੀ ਪੁਲਸ ਚੌਂਕੀ ਦੇ ਇੰਚਾਰਜ ਫੂਲ ਚੰਦ ਨੇ ਦੱਸਿਆ ਕਿ ਹਾਦਸੇ ਵੇਲੇ ਡਿਊਟੀ 'ਤੇ ਤਾਇਨਾਤ ਫਾਇਰਮੈਨ ਪਰਮੋਦ ਕੁਮਾਰ ਦੇ ਬਿਆਨ ਤੋਂ ਬਾਅਦ ਪੁਲਸ ਨੇ ਧਾਰਾ-174 ਦੇ ਤਹਿਤ ਕਾਰਵਾਈ ਕਰ ਮਾਮਲੇ ਦੀ ਅਗਲੀ ਜਾਂਚ ਸੁਰੂ ਕਰ ਦਿੱਤੀ ਹੈ। ਇਸ ਮੌਕੇ ਲਾਲੜੂ ਥਾਣਾ ਮੁਖੀ ਇੰਸਪੈਕਟਰ ਦਲਵੀਰ ਸਿੰਘ ਨੇ ਵੀ ਮੌਕੇ ਦਾ ਦੌਰਾ ਕੀਤਾ। ਓਧਰ ਘਟਨਾ ਤੋਂ ਬਾਅਦ ਫੈਕਟਰੀ ਪ੍ਰੰਬਧਕਾਂ ਨੇ ਗੇਟ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤੇ ਅਤੇ ਕਿਸੇ ਵੀ ਮੀਡੀਆਂ ਕਰਮੀ ਨੂੰ ਘਟਨਾ ਵਾਲੀ ਥਾਂ 'ਤੇ ਨਹੀਂ ਜਾਣ ਦਿੱਤਾ। ਇਸ ਮੌਕੇ ਨਾਹਰ ਫੈਕਟਰੀ ਦੇ ਮਾਲਕ ਕਮਲ ਓਸਵਾਲ, ਮੁੱਖ ਪ੍ਰਬੰਧਕ ਆਰ. ਐੱਨ. ਸਿੰਗਲ, ਵਾਈਸ ਪ੍ਰੈਜੀਡੈਂਟ ਕਾਰਪੋਰੇਟ ਮਿਸਟਰ ਨੀਤਨ, ਜਨਰਲ ਮੈਨੇਜਰ ਵੀ. ਆਰ. ਸਿਨਹਾ, ਏ. ਜੀ. ਐੱਮ. ਆਰ. ਕੇ. ਸਿੰਘ ਨੇ ਵੀ ਉਕਤ ਘਟਨਾ ਤੇ ਗਹਿਰਾ ਦੁੱਖ ਪ੍ਰਗਟ ਕੀਤਾ ਅਤੇ ਪਰਿਵਾਰਾਂ ਨਾਲ ਡੂੰਘੀ ਹਮਦਰਦੀ ਪ੍ਰਗਟ ਕੀਤੀ।
ਅੰਮ੍ਰਿਤਸਰ ਦੇ ਹੋਟਲ 'ਚੋਂ ਵਿਅਕਤੀ ਅਗਵਾ (ਵੀਡੀਓ)
NEXT STORY 
