ਲੁਧਿਆਣਾ (ਰਾਜ): ਤਿਉਹਾਰਾਂ ਦੇ ਖੁਸ਼ੀ ਵਿਚਾਲੇ ਮਹਾਨਗਰ ਵਿਚ ਹੋਈ ਫ਼ਾਇਰਿੰਗ ਬੇਗੁਨਾਹ ਲੋਕਾਂ ਦੀ ਜਾਨ 'ਤੇ ਭਾਰੀ ਪੈ ਰਹੀ ਹੈ। ਖੁਸ਼ੀਆਂ ਦੇ ਨਾਂ 'ਤੇ ਹਵਾ ਵਿਚ ਚਲਾਈਆਂ ਜਾਣ ਵਾਲੀਆਂ ਗੋਲੀਆਂ ਮਾਸੂਮਾਂ ਦੇ ਸਿਰ ਅਤੇ ਛਾਤੀ ਨੂੰ ਛੱਲਣੀ ਕਰ ਰਹੀਆਂ ਹਨ, ਪਰ ਕਮਿਸ਼ਨਰੇਟ ਪੁਲਸ ਦੀ ਸੁਸਤ ਕਾਰਜਪ੍ਰਣਾਲੀ ਦਾ ਆਲਮ ਇਹ ਹੈ ਕਿ ਉਹ ਅੱਜ ਤੱਕ ਇਕ ਵੀ ਦੋਸ਼ੀ ਤੱਕ ਨਹੀਂ ਪਹੁੰਚ ਸਕੀ।
ਬੀਤੇ ਤਿੰਨ ਸਾਲਾਂ ਦੇ ਅੰਕੜਿਆਂ 'ਤੇ ਨਜ਼ਰ ਮਾਰੀਏ ਤਾਂ ਦੀਵਾਲੀ, ਲੋਹੜੀ ਅਤੇ ਨਵੇਂ ਸਾਲ ਦੌਰਾਨ ਮਹਾਨਗਰ ਵਿਚ ਹਵਾਈ ਫਾਇਰਿੰਗ ਦੀਆਂ 11 ਮੁੱਖ ਵਾਰਦਾਤਾਂ ਸਾਹਮਣੇ ਆ ਚੁੱਕੀਆਂ ਹਨ। ਇਨ੍ਹਾਂ ਦਰਦਨਾਕ ਘਟਨਾਵਾਂ ਵਿਚ ਹੁਣ ਤੱਕ 3 ਬੇਕਸੂਰ ਨਾਗਰਿਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 8 ਲੋਕ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਕੇ ਜ਼ਿੰਦਗੀ ਅਤੇ ਮੌਤ ਵਿਚਕਾਰ ਜੂਝ ਚੁੱਕੇ ਹਨ। ਪੁਲਸ ਨੇ ਹਰ ਘਟਨਾ ਤੋਂ ਬਾਅਦ ਰਸਮੀ ਕਾਰਵਾਈ ਕਰਦਿਆਂ ਅਣਪਛਾਤਿਆਂ ਖਿਲਾਫ਼ ਐੱਫ.ਆਈ.ਆਰ. ਦਰਜ ਕੀਤੀ, ਪਰ ਕਿਸੇ ਵੀ ਮਾਮਲੇ ਦਾ ਤਰਕਪੂਰਨ ਨਤੀਜਾ ਨਹੀਂ ਨਿਕਲ ਸਕਿਆ।
ਐੱਫ.ਐੱਸ.ਐੱਲ. ਰਿਪੋਰਟਾਂ ਫਾਈਲਾਂ ਵਿਚ ਦੱਬੀਆਂ
ਹਵਾਈ ਫਾਇਰਿੰਗ ਦੇ ਮਾਮਲਿਆਂ ਵਿਚ ਪੁਲਸ ਜਾਂਚ ਦੀ ਨਾਕਾਮੀ ਦਾ ਸਭ ਤੋਂ ਵੱਡਾ ਕਾਰਨ ਤਕਨੀਕੀ ਸਬੂਤਾਂ ਦੀ ਅਣਦੇਖੀ ਰਿਹਾ ਹੈ। ਘਟਨਾ ਸਥਾਨਾਂ ਅਤੇ ਪੀੜਤਾਂ ਦੇ ਸਰੀਰਾਂ ਵਿੱਚੋਂ ਕੱਢੀਆਂ ਗਈਆਂ ਗੋਲ਼ੀਆਂ ਦੇ ਲੈੱਡ ਅਤੇ ਖੋਲਾਂ ਨੂੰ ਫੋਰੈਂਸਿਕ ਸਾਇੰਸ ਲੈਬਾਰਟਰੀ (FSL) ਤਾਂ ਭੇਜਿਆ ਗਿਆ, ਪਰ ਕਈ ਮਾਮਲਿਆਂ ਵਿਚ ਰਿਪੋਰਟ ਤਿਆਰ ਹੋ ਕੇ ਆਉਣ ਦੇ ਬਾਵਜੂਦ ਉਸ ਨੂੰ ਜਾਂਚ ਦਾ ਹਿੱਸਾ ਨਹੀਂ ਬਣਾਇਆ ਗਿਆ। ਪੁਲਸ ਨੇ ਵਾਰਦਾਤ ਵਾਲੀ ਥਾਂ ਦੇ ਆਸ-ਪਾਸ ਦੇ ਇਲਾਕਿਆਂ ਵਿਚ ਰਹਿਣ ਵਾਲੇ ਲਾਇਸੈਂਸੀ ਅਸਲਾ ਧਾਰਕਾਂ ਦੇ ਹਥਿਆਰਾਂ ਦੀ ਨਾ ਤਾਂ ਕੋਈ ਵਿਆਪਕ ਸੂਚੀ ਤਿਆਰ ਕੀਤੀ ਅਤੇ ਨਾ ਹੀ ਉਨ੍ਹਾਂ ਦੇ ਹਥਿਆਰਾਂ ਦਾ ਬਰਾਮਦ ਗੋਲੀਆਂ ਨਾਲ ਬੈਲਿਸਟਿਕ ਮਿਲਾਨ ਕਰਵਾਉਣ ਦੀ ਖੇਚੱਲ ਕੀਤੀ। ਮਾਹਰਾਂ ਦਾ ਮੰਨਣਾ ਹੈ ਕਿ ਜੇਕਰ ਸਬੰਧਤ ਵਾਰਡਾਂ ਅਤੇ ਕਾਲੋਨੀਆਂ ਦੇ ਅਸਲਾਧਾਰਕਾਂ ਦੇ ਹਥਿਆਰਾਂ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾਂਦੀ, ਤਾਂ ਫਾਇਰਿੰਗ ਵਿਚ ਵਰਤੇ ਗਏ ਹਥਿਆਰ ਅਤੇ ਉਸ ਨੂੰ ਚਲਾਉਣ ਵਾਲੇ ਰਸੂਖਦਾਰ ਦੋਸ਼ੀ ਦਾ ਆਸਾਨੀ ਨਾਲ ਪਤਾ ਲਗਾਇਆ ਜਾ ਸਕਦਾ ਸੀ।
ਤਿੰਨ ਸਾਲਾਂ ਦੀਆਂ ਮੁੱਖ ਵਾਰਦਾਤਾਂ, ਜਿਨ੍ਹਾਂ ਵਿਚ ਦੋਸ਼ੀ ਅੱਜ ਵੀ 'ਅਣਪਛਾਤੇ':
- 8 ਨਵੰਬਰ 2026 (ਗਿੱਲ ਰੋਡ ਦਾਣਾ ਮੰਡੀ): ਗਿੱਲ ਰੋਡ ਸਥਿਤ ਦਾਣਾ ਮੰਡੀ ਦੇ ਨੇੜੇ ਝੁੱਗੀ ਵਿਚ ਸੌਂ ਰਹੇ ਇਕ ਮਾਸੂਮ ਬੱਚੇ ਨੂੰ ਅਚਾਨਕ ਡਿੱਗੀ ਗੋਲੀ ਆ ਲੱਗੀ, ਜਿਸ ਨਾਲ ਉਹ ਗੰਭੀਰ ਜ਼ਖਮੀ ਹੋ ਗਿਆ। ਪੁਲਸ ਨੇ ਅਣਪਛਾਤੇ ਖਿਲਾਫ਼ ਕੇਸ ਦਰਜ ਕੀਤਾ, ਪਰ ਗੋਲੀ ਕਿਸ ਨੇ ਚਲਾਈ, ਇਸ ਦਾ ਅੱਜ ਤੱਕ ਕੋਈ ਸੁਰਾਗ ਨਹੀਂ ਮਿਲਿਆ।
- 8 ਨਵੰਬਰ 2026 (ਸ਼ਿਮਲਾਪੁਰੀ): ਸ਼ਿਮਲਾਪੁਰੀ ਇਲਾਕੇ ਵਿਚ ਇਕ ਗੋਲੀ ਸਾਬਕਾ ਕੌਂਸਲਰ ਦੀ ਗੱਡੀ ਦੀ ਛੱਤ ਨੂੰ ਚੀਰ ਗਈ। ਬਚਾਅ ਰਿਹਾ ਕਿ ਉਸ ਸਮੇਂ ਗੱਡੀ ਵਿਚ ਕੋਈ ਸਵਾਰ ਨਹੀਂ ਸੀ।
- 20 ਅਕਤੂਬਰ 2025 (ਪੰਜਪੀਰ ਰੋਡ): ਦੀਵਾਲੀ ਦੀ ਰਾਤ ਪੰਜਪੀਰ ਰੋਡ 'ਤੇ ਆਪਣੇ ਘਰ ਦੇ ਬਾਹਰ ਖੜ੍ਹੇ ਇਕ ਨੌਜਵਾਨ ਦੇ ਸਿਰ ਵਿਚ ਅਚਾਨਕ ਆਸਮਾਨ ਤੋਂ ਆਈ ਗੋਲੀ ਜਾ ਲੱਗੀ, ਜਿਸ ਨਾਲ ਮੌਕੇ 'ਤੇ ਹੀ ਉਸ ਦੀ ਦਰਦਨਾਕ ਮੌਤ ਹੋ ਗਈ।
- 13 ਜਨਵਰੀ 2025 (ਫੀਲਡਗੰਜ): ਲੋਹੜੀ ਵਾਲੇ ਦਿਨ ਫੀਲਡਗੰਜ ਇਲਾਕੇ ਵਿਚ ਆਪਣੇ ਘਰ ਦੀ ਛੱਤ 'ਤੇ ਪਤੰਗ ਉਡਾ ਰਹੀ ਇਕ ਮਾਸੂਮ ਬੱਚੀ ਦੇ ਸਿਰ ਵਿਚ ਸਿੱਧੀ ਗੋਲੀ ਲੱਗੀ, ਜਿਸ ਨਾਲ ਉਹ ਲਹੂ-ਲੁਹਾਨ ਹੋ ਗਈ।
- ਨਵੰਬਰ 2024 (ਚੰਡੀਗੜ੍ਹ ਰੋਡ): ਚੰਡੀਗੜ੍ਹ ਰੋਡ 'ਤੇ ਆਪਣੀ ਸਾਈਕਲ 'ਤੇ ਜਾ ਰਹੇ ਇਕ ਰਾਹਗੀਰ ਦੇ ਸਿਰ ਵਿਚ ਅਚਾਨਕ ਹਵਾਈ ਫਾਇਰਿੰਗ ਦੀ ਗੋਲੀ ਆ ਲੱਗੀ, ਜਿਸ ਨੇ ਹਸਪਤਾਲ ਪਹੁੰਚਣ ਤੋਂ ਪਹਿਲਾਂ ਹੀ ਦਮ ਤੋੜ ਦਿੱਤਾ।
ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਪੁਲਸ ਕਮਿਸ਼ਨਰ ਵੱਲੋਂ ਹਰ ਤਿਉਹਾਰ ਤੋਂ ਪਹਿਲਾਂ ਧਾਰਾ 144 ਤਹਿਤ ਲਾਇਸੈਂਸੀ ਹਥਿਆਰ ਲੈ ਕੇ ਚੱਲਣ ਅਤੇ ਹਵਾਈ ਫਾਇਰਿੰਗ ਕਰਨ 'ਤੇ ਪਾਬੰਦੀ ਦੇ ਹੁਕਮ ਤਾਂ ਜਾਰੀ ਕੀਤੇ ਜਾਂਦੇ ਹਨ, ਪਰ ਜ਼ਮੀਨੀ ਪੱਧਰ 'ਤੇ ਇਨ੍ਹਾਂ ਦੀਆਂ ਧੱਜੀਆਂ ਉੱਡਦੀਆਂ ਹਨ। ਰਿਹਾਇਸ਼ੀ ਕਾਲੋਨੀਆਂ ਅਤੇ ਮੈਰਿਜ ਪੈਲੇਸਾਂ ਵਿਚ ਸ਼ਰੇਆਮ ਹਥਿਆਰ ਲਹਿਰਾਏ ਜਾਂਦੇ ਹਨ ਅਤੇ ਜਸ਼ਨ ਦੇ ਨਾਂ 'ਤੇ ਗੋਲੀਆਂ ਚਲਾਈਆਂ ਜਾਂਦੀਆਂ ਹਨ। ਪੁਲਸ ਵੱਲੋਂ ਠੋਸ ਪੜਤਾਲ ਅਤੇ ਜਵਾਬਦੇਹੀ ਤੈਅ ਨਾ ਹੋਣ ਕਾਰਨ ਇਹ ਗੈਰ-ਕਾਨੂੰਨੀ ਅਤੇ ਜਾਨਲੇਵਾ ਰੁਝਾਨ ਲਗਾਤਾਰ ਵਧਦਾ ਜਾ ਰਹਾ ਹੈ, ਜਿਸ ਦਾ ਖਾਮਿਆਜ਼ਾ ਸ਼ਹਿਰ ਦੀ ਨਿਰਦੋਸ਼ ਜਨਤਾ ਨੂੰ ਭੁਗਤਣਾ ਪੈ ਰਿਹਾ ਹੈ।
ਪੰਜਾਬ: ਕਮਰੇ 'ਚ ਕੁੜੀ ਨਾਲ ਰੰਗਰਲੀਆਂ ਮਨਾ ਰਿਹਾ ਸੀ ਪਤੀ, ਉਪਰੋਂ ਪਹੁੰਚੀ ਪਤਨੀ, ਫਿਰ ਹੋਇਆ...
NEXT STORY 
