ਗੁਰਦਾਸਪੁਰ (ਹਰਮਨਪ੍ਰੀਤ) : ਅੱਜ ਬਾਅਦ ਦੁਪਹਿਰ 12.15 ਵਜੇ ਦੇ ਕਰੀਬ ਗੁਰਦਾਸਪੁਰ ਸ਼ਹਿਰ ਸਰਕਾਰੀ ਕਾਲਜ ਦੇ ਨਾਲ ਲੱਗਦੀ ਕਲੋਨੀ ਗਰੇਟਰ ਕੈਲਾਸ਼ 'ਚੋਂ ਲੰਘਦੀ 132 ਕੇ. ਵੀ. ਬਿਜਲੀ ਲਾਈਨ ਦੇ ਕੇਬਲ ਨਾਲ ਜੁੜ ਜਾਣ ਕਾਰਨ ਜਿਥੇ ਕਈ ਘਰਾਂ 'ਚ ਵੱਡਾ ਨੁਕਸਾਨ ਹੋਇਆ ਹੈ, ਉਸ ਦੇ ਨਾਲ ਹੀ ਸਰਨੇ ਤੋਂ ਨਿਕਲਦੀ ਇਹ ਹਾਈਵੋਲਟੇਜ਼ ਲਾਈਨ ਦੀ ਸਪਲਾਈ ਖਰਾਬ ਹੋਣ ਕਾਰਨ ਦੀਨਾਨਗਰ, ਗੁਰਦਾਸਪੁਰ, ਧਾਰੀਵਾਲ ਅਤੇ ਬਟਾਲਾ ਬਿਜਲੀ ਘਰਾਂ ਅਧੀਨ 4 ਸ਼ਹਿਰਾਂ ਅਤੇ ਸੈਂਕੜੇ ਪਿੰਡਾਂ ਦੀ ਬਿਜਲੀ ਗੁੱਲ ਹੋ ਗਈ। ਇਸ ਕਾਰਨ ਕਈ ਘਰਾਂ 'ਚ ਟਿਊਬਲਾਂ ਅਤੇ ਬਲੱਬਾਂ ਤੋਂ ਇਲਾਵਾ ਹੋਰ ਕਈ ਯੰਤਰ ਸੜ ਗਏ। ਇਥੋਂ ਤੱਕ ਕਿ ਕਈ ਘਰਾਂ 'ਚ ਬਿਜਲੀ ਦੀ ਸਪਲਾਈ ਜ਼ਿਆਦਾ ਹੋਣ ਕਾਰਨ ਧਮਾਕੇ ਹੋ ਗਏ ਤੇ ਘਰਾਂ ਦਾ ਸਾਰਾ ਸਾਮਾਨ ਸੜ ਗਿਆ ਤੇ ਘਰਾਂ ਵਿਚ ਲੱਗੇ ਸਵਿੱਚ ਤੱਕ ਵੀ ਟੁੱਟ ਗਏ।
ਇਸ ਸਬੰਧੀ ਜਾਣਕਾਰੀ ਇਲਾਕਾ ਵਾਸੀਆਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਘਰਾਂ 'ਚ ਏ. ਸੀ., ਐੱਲ. ਈ. ਡੀ., ਫਰਿੱਜ, ਪੱਖੇ, ਟਿਊਬਾਂ ਸਮੇਤ ਹੋਰ ਕਈ ਸਾਮਾਨ ਸੜ ਗਿਆ। ਉਨ੍ਹਾਂ ਦੱਸਿਆ ਕਿ ਅਚਾਨਕ ਆਈ ਬਿਜਲੀ ਨਾਲ ਜਦੋਂ ਧਮਾਕੇ ਹੋਣੇ ਸ਼ੁਰੂ ਹੋਏ ਤਾਂ ਘਰ 'ਚ ਧੂੰਆਂ ਫੈਲ ਗਿਆ, ਜਿਸ ਕਾਰਨ ਘਰ ਦੇ ਮੈਂਬਰ ਘਬਰਾ ਕੇ ਬਾਹਰ ਆ ਗਏ। ਕਈ ਘਰਾਂ ਵਿਚ ਕੱਪੜਿਆਂ ਨੂੰ ਅੱਗ ਲੱਗ ਗਈ, ਜਿਸ ਨੂੰ ਬੜੀ ਮੁਸ਼ਕਲ ਨਾਲ ਬੁਝਾਇਆ ਗਿਆ। ਇਸ ਘਟਨਾ ਦੇ ਬਾਅਦ ਪਾਵਰਕਾਮ ਦੇ ਅਧਿਕਾਰੀ ਤੁਰੰਤ ਮੌਕੇ 'ਤੇ ਪਹੁੰਚ ਗਏ ਜਿਨ੍ਹਾਂ ਨੇ ਸਾਰੀ ਸਥਿਤੀ ਦਾ ਜਾਇਜ਼ਾ ਲਿਆ।
ਇਸ ਸਬੰਧੀ ਜਾਇਜ਼ਾ ਲੈਣ ਲਈ ਮੌਕੇ 'ਤੇ ਪਹੁੰਚੇ ਪਾਵਰਕਾਮ ਦੇ ਅਡੀਸ਼ਨਲ ਐੱਸ. ਡੀ. ਓ. ਜਤਿੰਦਰ ਸ਼ਰਮਾ ਨੇ ਕਿਹਾ ਕਿ ਇਸ ਕਲੋਨੀ 'ਚੋਂ ਬਿਜਲੀ ਦੀ 1 ਲੱਖ 32 ਹਜ਼ਾਰ ਵੋਲਟੇਜ਼ ਵਾਲੀ ਲਾਈਨ ਲੰਘਦੀ ਹੈ, ਜੋ ਸਰਨੇ ਤੋਂ ਦੀਨਾਨਗਰ, ਗੁਰਦਾਸਪੁਰ, ਧਾਰੀਵਾਲ ਅਤੇ ਬਟਾਲਾ ਆਦਿ ਸ਼ਹਿਰਾਂ ਨੂੰ ਬਿਜਲੀ ਸਪਲਾਈ ਦਿੰਦੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਹਾਈਵੋਲਟੇਜ਼ ਲਾਈਨ ਦੇ ਹੇਠਾਂ ਕੇਬਲ ਉਪਰੇਟਰ ਨੇ ਕੇਬਲ ਤਾਰ ਕੱਢੀ ਹੋਈ ਸੀ, ਜਿਸ ਵਿਚੋਂ ਸਿਰਫ 12 ਵੋਲਟ ਦੇ ਕਰੀਬ ਸਪਲਾਈ ਲੰਘਦੀ ਹੈ। ਪਰ ਇਨ੍ਹਾਂ ਦੋਵਾਂ ਲਾਈਨਾਂ ਵਿਚਕਾਰ ਗੈਪ ਘੱਟ ਹੋਣ ਕਾਰਨ ਅੱਜ ਕੇਬਲਤਾਰ ਇਨ੍ਹਾਂ ਤਾਰਾਂ ਨਾਲ ਜੁੜ ਗਈ, ਜਿਸ ਕਾਰਨ ਇਹ ਹੈਵੀ ਵੋਲਟੇਜ਼ ਕੇਬਲ ਤਾਰ ਰਾਹੀਂ ਹੁੰਦੀ ਹੋਈ ਘਰਾਂ ਵਿਚ ਪਹੁੰਚ ਗਈ ਅਤੇ ਜਿਹੜੇ ਘਰਾਂ 'ਚ ਸਿਰਫ 220 ਵੋਲਟ ਸਪਲਾਈ ਜਾਂਦੀ ਹੈ, ਉਨ੍ਹਾਂ 'ਚ 1 ਲੱਖ 32 ਹਜ਼ਾਰ ਵੋਲਟੇਜ਼ ਪਹੁੰਚ ਜਾਣ ਕਾਰਨ ਵੱਡਾ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਉੱਚ ਅਧਿਕਾਰੀਆਂ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ, ਜਿਨ੍ਹਾਂ ਵਲੋਂ ਅਗਲੇਰੀ ਕਾਰਵਾਈ ਕੀਤੀ ਜਾਵੇਗੀ।
ਸਿੱਧੂ ਵਿਵਾਦ ਦੇ ਨਬੇੜੇ ਲਈ ਦਿੱਲੀ ਦਰਬਾਰ ਪਹੁੰਚੇ ਕੈਪਟਨ, ਜਲਦ ਆ ਸਕਦੈ ਵੱਡਾ ਫੈਸਲਾ
NEXT STORY 
