ਲੁਧਿਆਣਾ (ਜ.ਬ.) : ਮਹਾਨਗਰ ਦੇ ਹਲਕਾ ਪੂਰਬੀ ਇਲਾਕੇ 'ਚ ਅੰਤਰਜਾਤੀ ਵਿਆਹ ਤੋਂ ਦੁਖੀ ਕੁੜੀ ਦੇ ਪਰਿਵਾਰ ਵਾਲਿਆਂ ਨੇ ਉਸ ਨੂੰ ਅਗਵਾ ਕਰ ਲਿਆ, ਜਿਸ ਨੇ ਕੁਝ ਦਿਨ ਪਹਿਲਾਂ ਇਕ ਹਿੰਦੂ ਮੁੰਡੇ ਨਾਲ ਪ੍ਰੇਮ ਵਿਆਹ ਕੀਤਾ ਸੀ, ਜਦੋਂ ਕਿ ਕੁੜੀ ਮੁਹੰਮਦਨ ਭਾਈਚਾਰੇ ਨਾਲ ਸਬੰਧਿਤ ਸੀ। ਇੰਨਾ ਹੀ ਨਹੀਂ, ਅਗਵਾ ਤੋਂ ਪਹਿਲਾਂ ਉਸ ਦੇ ਪਤੀ ਨੂੰ ਵੀ ਬੇਰਹਿਮੀ ਨਾਲ ਕੁੱਟਿਆ ਗਿਆ। ਉਸ ਦਾ ਮੋਬਾਇਲ ਅਤੇ ਨਕਦੀ ਵੀ ਖੋਹ ਲਈ ਗਈ। ਪਤੀ ਦਾ ਦੋਸ਼ ਹੈ ਕਿ ਉਸ ਦੇ ਸਹੁਰੇ ਉਨ੍ਹਾਂ ਦੇ ਪ੍ਰੇਮ ਵਿਆਹ ਖ਼ਿਲਾਫ਼ ਸਨ, ਜਿਨ੍ਹਾਂ ਨੇ ਝੂਠੀ ਸ਼ਾਨ ਦੀ ਖਾਤਰ ਇਸ ਕਾਂਡ ਨੂੰ ਯੋਜਨਾਬੱਧ ਢੰਗ ਨਾਲ ਅੰਜਾਮ ਦਿੱਤਾ ਹੈ।
ਪਹਿਲਾਂ ਤਾਂ ਪੁਲਸ ਕੇਸ ਨੂੰ ਰਫਾ-ਦਫਾ ਕਰਨ 'ਚ ਲੱਗ ਗਈ ਪਰ ਜਦੋਂ ਇਲਾਕੇ ਦੇ ਕੁੱਝ ਪਤਵੰਤਿਆਂ ਨੇ ਦਖ਼ਲ ਦਿੱਤਾ ਤਾਂ ਉਹ ਹਰਕਤ 'ਚ ਆਈ, ਜਿਸ ਤੋਂ ਬਾਅਦ ਟਿੱਬਾ ਪੁਲਸ ਨੇ ਅਗਵਾ ਕੁੜੀ ਦੇ ਮਾਤਾ-ਪਿਤਾ ਅਤੇ ਚਾਚੇ ਸਮੇਤ 6 ਵਿਅਕਤੀਆਂ ’ਤੇ ਅਗਵਾ, ਕੁੱਟਮਾਰ ਅਤੇ ਚੋਰੀ ਦਾ ਕੇਸ ਦਰਜ ਕਰ ਕੇ ਕੇਸ ਦੀ ਛਾਣਬੀਨ ਸ਼ੁਰੂ ਕਰ ਦਿੱਤੀ ਪਰ ਘਟਨਾ ਤੋਂ ਇਕ ਹਫ਼ਤਾ ਬੀਤ ਜਾਣ ’ਤੇ ਨਾ ਤਾ ਕਿਸੇ ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਹੋਈ ਅਤੇ ਨਾ ਪੁਲਸ ਕੁੜੀ ਦਾ ਕੋਈ ਸੁਰਾਗ ਲਗਾ ਸਕੀ ਹੈ। ਦਰਜ ਕੇਸ ਮੁਤਾਬਕ ਚੰਦਰਲੋਕ ਕਾਲੋਨੀ ਦਾ ਰਹਿਣ ਵਾਲਾ 32 ਸਾਲਾ ਪੀੜਤ ਪਵਨ ਕੁਮਾਰ ਇਕ ਜਿੰਮ ਚਲਾਉਂਦਾ ਹੈ।
ਕੁੱਝ ਸਮਾਂ ਪਹਿਲਾਂ ਮਾਇਆਪੁਰੀ ਦੇ ਨਿਊ ਪੰਜਾਬੀ ਬਾਗ ਦੀ ਰਹਿਣ ਵਾਲੀ ਸੋਫੀਆ ਉਰਫ਼ ਸੋਨੀਆ ਨਾਲ ਉਸ ਨੂੰ ਪਿਆਰ ਹੋ ਗਿਆ, ਜੋ ਕਿ ਮੂਲ ਰੂਪ ਤੋਂ ਉੱਤਰ ਪ੍ਰਦੇਸ਼ ਦੇ ਜ਼ਿਲ੍ਹਾ ਸਹਾਰਨਪੁਰ ਦੇ ਇਸਲਾਮ ਨਗਰ ਦੀ ਰਹਿਣ ਵਾਲੀ ਹੈ। ਉਹ ਦੋਵੇਂ ਵਿਆਹ ਕਰਨਾ ਚਾਹੁੰਦੇ ਸਨ ਪਰ ਵੱਖ-ਵੱਖ ਜਾਤਾਂ ਦੇ ਹੋਣ ਕਾਰਨ ਸੋਫੀਆ ਦੇ ਮਾਤਾ-ਪਿਤਾ ਇਸ ਵਿਆਹ ਦੇ ਖ਼ਿਲਾਫ਼ ਸਨ। ਸੋਫੀਆ ਮੁਹੰਮਦਨ ਭਾਈਚਾਰੇ ਨਾਲ ਸਬੰਧਿਤ ਸੀ, ਜਦੋਂ ਕਿ ਪਵਨ ਹਿੰਦੂ ਹੈ। ਬਾਵਜੂਦ ਇਸ ਦੇ ਸੋਫੀਆ ਨੇ ਆਪਣੇ ਪਰਿਵਾਰ ਵਾਲਿਆਂ ਖ਼ਿਲਾਫ਼ ਜਾ ਕੇ ਪਵਨ ਨਾਲ ਤਾਜਪੁਰ ਰੋਡ ਦੇ ਗੁਰਦੁਆਰਾ ਸਾਹਿਬ 'ਚ ਸਿੱਖ ਰੀਤਾਂ ਮੁਤਾਬਕ ਪਵਨ ਨਾਲ ਵਿਆਹ ਕਰ ਲਿਆ ਅਤੇ ਸੁਰੱਖਿਆ ਲਈ ਅਦਾਲਤ 'ਚ ਪਟੀਸ਼ਨ ਦਾਇਰ ਕਰ ਦਿੱਤੀ ਪਰ ਬਾਅਦ 'ਚ ਸੋਫੀਆ ਦੇ ਪਰਿਵਾਰ ਵਾਲਿਆਂ ਵੱਲੋਂ ਉਨ੍ਹਾਂ ਦੇ ਵਿਆਹ ’ਤੇ ਸਹਿਮਤੀ ਜਤਾਉਣ ’ਤੇ ਪਟੀਸ਼ਨ ’ਤੇ ਕਾਰਵਾਈ ਬੰਦ ਕਰਵਾ ਦਿੱਤੀ, ਜਿਸ ਤੋਂ ਬਾਅਦ ਮੁਲਜ਼ਮਾਂ ਨੇ ਇਸ ਘਟਨਾ ਨੂੰ ਅੰਜਾਮ ਦਿੱਤਾ।
ਸੁਪਨੇ ’ਚ ਵੀ ਨਹੀਂ ਸੋਚਿਆ ਸੀ ਕਿ ਇੰਨੀ ਵੱਡੀ ਸਾਜ਼ਿਸ਼ ਰਚੀ ਹੈ
ਪਵਨ ਨੇ ਦੱਸਿਆ ਕਿ ਵਿਆਹ ਤੋਂ ਬਾਅਦ ਸੋਫੀਆ ਦੇ ਮਾਤਾ-ਪਿਤਾ ’ਚ ਇਕਦਮ ਬਦਲਿਆ ਵਰਤਾਅ ਦੇਖ ਕੇ ਉਹ ਕਾਫੀ ਹੱਦ ਤੱਕ ਆਸਵੰਦ ਹੋ ਗਿਆ ਕਿ ਹੁਣ ਸਭ ਕੁਝ ਠੀਕ ਹੋ ਗਿਆ ਹੈ ਅਤੇ ਸੋਫੀਆ ਦੇ ਮਾਤਾ-ਪਿਤਾ ਨੇ ਦੋਵਾਂ ਨੂੰ ਕਬੂਲ ਲਿਆ ਹੈ ਪਰ ਉਸ ਦੀ ਇਹ ਸੋਚ ਬਾਅਦ 'ਚ ਗਲਤ ਸਾਬਿਤ ਹੋਈ। ਉਸ ਨੇ ਕਦੇ ਸੁਪਨੇ 'ਚ ਵੀ ਨਹੀਂ ਸੋਚਿਆ ਸੀ ਕਿ ਇਸ ਸਭ ਦੇ ਪਿੱਛੇ ਦੋਵਾਂ ਨੂੰ ਵੱਖਰਾ ਕਰਨ ਦੀ ਮੁਲਜ਼ਮਾਂ ਵੱਲੋਂ ਇਕ ਬਹੁਤ ਵੱਡੀ ਸਾਜ਼ਿਸ਼ ਰਚੀ ਜਾ ਰਹੀ ਹੈ। ਉਸ ਨੇ ਦੱਸਿਆ ਕਿ ਪਿਛਲੇ ਮਹੀਨੇ ਦੀ 26 ਸਤੰਬਰ ਨੂੰ ਉਸ ਦੀ ਸੱਸ ਉਸ ਦੇ ਘਰ ਆ ਕੇ ਸ਼ਗਨ ਦੇ ਕੇ ਗਈ ਅਤੇ ਨਾਲ ਹੀ ਰਾਤ ਦੀ ਰੋਟੀ ਦਾ ਸੱਦਾ ਦੇ ਕੇ ਗਈ। 2 ਦਿਨ ਬਾਅਦ ਉਹ ਅਤੇ ਸੋਫੀਆ ਖੁਸ਼ੀ-ਖੁਸ਼ੀ ਰਾਤ 11 ਵਜੇ ਸੋਫੀਆ ਦੇ ਪੇਕੇ ਗਏ। ਉੱਥੇ ਸੋਫੀਆ ਦੇ ਮਾਤਾ-ਪਿਤਾ ਅਤੇ ਚਾਚੇ ਤੋਂ ਇਲਾਵਾ 3 ਵਿਅਕਤੀ ਹੋਰ ਸਨ। ਸੱਸ ਨੇ ਉਸ ਨੂੰ ਕੋਲਡ ਡਰਿੰਕ ਦਿੱਤੀ। ਉਸ ਨੇ ਕੁਝ ਘੁੱਟ ਹੀ ਪੀਤੇ ਸਨ ਕਿ ਅਚਾਨਕ ਉਸ ਦਾ ਸਹੁਰਾ ਮੁਹੰਮਦ ਰਿਹਾਨ ਇਹ ਕਹਿ ਕੇ ਲਲਕਾਰਦਾ ਹੋਇਆ ਉਸ ’ਤੇ ਟੁੱਟ ਪਿਆ ਕਿ ਇਸ ਨੇ ਉਨ੍ਹਾਂ ਦੀ ਧੀ ਨੂੰ ਘਰੋਂ ਭਜਾ ਕੇ ਵਿਆਹ ਕੀਤਾ ਹੈ, ਅੱਜ ਇਸ ਨੂੰ ਮਜ਼ਾ ਚਖਾ ਦਿਓ। ਸੱਸ ਚੀਕਦੀ ਰਹੀ ਕਿ ਅੱਜ ਜਿਊਂਦਾ ਨਹੀਂ ਛੱਡਣਾ। ਫਿਰ ਸੋਫੀਆ ਦੇ ਚਾਚੇ ਨੇ ਪਿੱਛੋਂ ਲੋਹੇ ਦੀ ਰਾਡ ਨਾਲ ਉਸ ਦੇ ਸਿਰ ’ਤੇ ਵਾਰ ਕਰ ਦਿੱਤਾ ਅਤੇ ਸੱਸ ਸਮੇਤ ਉਥੇ ਮੌਜੂਦ ਹੋਰਨਾਂ ਮੁਲਜ਼ਮਾਂ ਨੇ ਉਸ ਨੂੰ ਬੇਰਹਿਮੀ ਨਾਲ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਇਸ ਦੌਰਾਨ ਸੋਫੀਆ ਬਚਾਅ ਲਈ ਆਈ ਤਾਂ ਮੁਲਜ਼ਮਾਂ ਨੇ ਉਸ ਦੀ ਬਾਂਹ ਫੜ੍ਹ ਕੇ ਮਰੋੜ ਦਿੱਤੀ ਅਤੇ ਉਸ ਦੇ ਮੂੰਹ ’ਤੇ ਰੁਮਾਲ ਰੱਖ ਕੇ ਧੱਕਦੇ ਹੋਏ ਥੱਲੇ ਲੈ ਗਏ।
ਸਿਰ ’ਤੇ ਸੱਟ ਲੱਗਣ ਕਾਰਨ ਹੋਇਆ ਬੇਹੋਸ਼
ਪੀੜਤ ਨੇ ਦੱਸਿਆ ਕਿ ਸਿਰ 'ਚ ਸੱਟ ਲੱਗਣ ਕਾਰਨ ਉਸ ਦੀਆਂ ਅੱਖਾਂ ਅੱਗੇ ਹਨ੍ਹੇਰਾ ਛਾ ਗਿਆ ਸੀ ਅਤੇ ਉਹ ਕੁੱਝ ਪਲ ਲਈ ਬੇਹੋਸ਼ ਹੋ ਗਿਆ। ਕਰੀਬ 5 ਮਿੰਟ ਬਾਅਦ ਜਦੋਂ ਉਸ ਨੂੰ ਹੋਸ਼ ਆਇਆ ਤਾਂ ਉਸ ਨੇ ਪਾਇਆ ਕਿ ਉਸ ਦਾ ਮੋਬਾਇਲ, ਜੇਬ 'ਚ ਪਈ ਨਕਦੀ 12000 ਰੁਪਏ ਅਤੇ ਹੋਰ ਸਮਾਨ ਗਾਇਬ ਹੈ। ਉਹ ਕਿਸੇ ਤਰ੍ਹਾਂ ਪੌੜੀਆਂ ਉੱਤਰ ਕੇ ਥੱਲੇ ਆਇਆ ਤਾਂ ਮੁਲਜ਼ਮ ਉਸ ਦੀ ਪਤਨੀ ਨੂੰ ਸਫੇਦ ਰੰਗ ਦੀ ਸਵਿੱਫਟ ਕਾਰ ’ਚ ਜ਼ਬਰਦਸਤੀ ਪਾ ਕੇ ਲੈ ਗਏ।
ਮਦਦ ਲਈ ਦੋਸਤ ਬੁਲਾਇਆ
ਪਵਨ ਨੇ ਦੱਸਿਆ ਕਿ ਉਸ ਨੇ ਮਦਦ ਲਈ ਆਪਣੇ ਦੋਸਤ ਹਰਪ੍ਰੀਤ ਸਹਾਰਨ ਨੂੰ ਘਰ ਬੁਲਾਇਆ, ਉਦੋਂ ਤੱਕ ਉੱਥੇ ਕਾਫੀ ਲੋਕ ਆ ਚੁੱਕੇ ਸਨ। ਹਰਪ੍ਰੀਤ ਨੇ ਉਸ ਨੂੰ ਇਲਾਜ ਲਈ ਜ਼ਿਲ੍ਹਾ ਹਸਪਤਾਲ ਪਹੁੰਚਾਇਆ, ਜਿੱਥੇ ਇਲਾਜ ਤੋਂ ਬਾਅਦ ਉਸ ਨੂੰ ਛੁੱਟੀ ਦੇ ਦਿੱਤੀ ਗਈ। ਇਸ ਤੋਂ ਬਾਅਦ ਉਸ ਨੇ ਪੁਲਸ ਨੂੰ ਇਸ ਦੀ ਸ਼ਿਕਾਇਤ ਕੀਤੀ।
ਲਗਾਤਾਰ ਲਗਾਉਂਦਾ ਰਿਹਾ ਥਾਣੇ ਦੇ ਚੱਕਰ
ਪੀੜਤ ਨੇ ਦੱਸਿਆ ਕਿ ਘਟਨਾ ਵਾਲੀ ਰਾਤ ਨੂੰ ਹੀ ਉਸ ਨੇ ਪੁਲਸ ਦੇ ਕੋਲ ਆਪਣੀ ਸ਼ਿਕਾਇਤ ਦਿੱਤੀ ਸੀ ਪਰ ਉਹ ਕਾਰਵਾਈ ਦੇ ਨਾਂ ’ਤੇ ਟਾਲ-ਮਟੋਲ ਕਰਦੀ ਰਹੀ। ਕਦੇ ਪੁਲਸ ਉਸ ਨੂੰ ਕਹਿੰਦੀ ਰਹੀ ਕਿ ਇਹ ਉਸ ਦਾ ਘਰੇਲੂ ਮਾਮਲਾ ਹੈ, ਕਾਰਵਾਈ ਨਹੀਂ ਬਣਦੀ। ਜੇਕਰ ਕਾਰਵਾਈ ਹੋਈ ਵੀ ਤਾਂ ਹਲਕੀਆਂ ਧਾਰਾਵਾਂ ਤਹਿਤ ਹੋਵੇਗੀ। ਪੁਲਸ ਦੇ ਇਸ ਰਵੱਈਏ ਨੂੰ ਦੇਖਦੇ ਹੋਏ ਉਹ ਇਲਾਕਾ ਕੌਂਸਲਰ ਅਤੇ ਹੋਰ ਪਤਵੰਤਿਆਂ ਨੂੰ ਜਾ ਕੇ ਮਿਲਿਆ, ਜਿਨ੍ਹਾਂ ਦੇ ਦਖ਼ਲ ਤੋਂ ਬਾਅਦ ਪੁਲਸ ਉਸ ਦੀ ਸੁਣਵਾਈ ਕਰਨ ’ਤੇ ਰਾਜ਼ੀ ਹੋਈ।
ਕਤਲ ਨਾ ਕਰ ਦਿੱਤਾ ਜਾਵੇ
ਪਵਨ ਦਾ ਕਹਿਣਾ ਹੈ ਕਿ ਉਸ ਦੀ ਪਤਨੀ ਨੂੰ ਅਗਵਾ ਹੋਏ 7 ਦਿਨ ਹੋ ਚੁੱਕੇ ਹਨ ਪਰ ਅਜੇ ਤੱਕ ਉਸ ਦਾ ਕੋਈ ਸੁਰਾਗ ਨਹੀਂ ਲੱਗਾ। ਉਸ ਨੂੰ ਸ਼ੱਕ ਹੈ ਕਿ ਕਿਤੇ ਉਸ ਦੀ ਪਤਨੀ ਦਾ ਕਤਲ ਨਾ ਕਰ ਦਿੱਤਾ ਜਾਵੇ। ਉਸ ਨੇ ਉੱਚ ਅਧਿਕਾਰੀਆਂ ਨੂੰ ਜਲਦ ਤੋਂ ਜਲਦ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ। ਪਵਨ ਪਹਿਲਾਂ ਆਪਣੇ ਪੱਧਰ ’ਤੇ ਛਾਣਬੀਨ ਕਰਦਾ ਰਿਹਾ ਪਰ ਜਦੋਂ ਉਸ ਨੂੰ ਸੋਫੀਆ ਦਾ ਕੋਈ ਸੁਰਾਗ ਨਾ ਲੱਗਾ ਤਾਂ ਉਹ ਪੁਲਸ ਕੋਲ ਆਇਆ।
ਰੇਲ ਪਟੜੀਆਂ ਦੇ ਨੇੜੇ ਦਰੱਖਤ ਨਾਲ ਲਟਕਦੀ ਮਿਲੀ ਲਾਸ਼, ਫੈਲੀ ਸਨਸਨੀ
NEXT STORY 
