ਮਲੇਰਕੋਟਲਾ— ਅਕਸਰ ਵੇਖਣ 'ਚ ਆਉਂਦਾ ਹੈ ਕਿ ਪੱਤਰਕਾਰਾਂ ਅੰਦਰ ਧੜ੍ਹੇਬੰਦੀ ਬਹੁਤ ਜ਼ਿਆਦਾ ਹੁੰਦੀ ਹੈ। ਪੱਤਰਕਾਰਾਂ 'ਚ ਪਾੜੋ ਅਤੇ ਰਾਜ ਕਰੋ ਵਾਲੀ ਨੀਤੀ ਅਪਣਾ ਕੇ ਸਰਕਾਰਾਂ ਅਤੇ ਨੌਕਰਸ਼ਾਹ ਇਸ ਗੱਲ ਦਾ ਫਾਇਦਾ ਚੁੱਕਦੇ ਹਨ। ਸ਼ਾਇਦ ਇਹੋ ਕਾਰਨ ਹੈ ਕਿ ਬਹੁਤ ਵਾਰ ਪੱਤਰਕਾਰਾਂ ਦੇ ਕਤਲ ਵੀ ਹੋਏ ਅਤੇ ਉਨ੍ਹਾਂ ਨੂੰ ਵੱਡੇ-ਵੱਡੇ ਝੂਠੇ ਕੇਸਾਂ 'ਚ ਫਸਾ ਕੇ ਸੱਚ ਦੀ ਆਵਾਜ਼ ਨੂੰ ਦਬਾਉਣ ਦੇ ਯਤਨ ਵੀ ਹੋਏ। ਮਲੇਰਕੋਟਲਾ 'ਚ ਹੁਣ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ 'ਚ ਜਦੋਂ ਕਾਸਿਫ ਫਾਰੂਕੀ ਨਾਮ ਦੇ ਪੰਜਾਬ ਦੇ ਇਕ ਨਾਮੀ ਪੱਤਰਕਾਰ 'ਤੇ ਪੁਲਸ ਨੇ ਸੜਕ ਹਾਦਸੇ ਦਾ ਇਕ ਝੂਠਾ ਪਰਚਾ ਦਰਜ ਕੀਤਾ ਤਾਂ ਮਲੇਰਕੋਟਲੇ ਦਾ ਸਾਰਾ ਪੱਤਰਕਾਰ ਭਾਈਚਾਰਾ ਇਕ ਮੰਚ 'ਤੇ ਆ ਗਿਆ। ਦੱਸ ਦਈਏ ਕਿ ਕਾਸਿਫ ਫਾਰੂਕੀ 'ਤੇ ਦਰਜ ਮਾਮਲੇ ਨੂੰ ਰੱਦ ਕਰਵਾਉਣ ਲਈ ਅੱਜ ਜਿਉਂ ਹੀ ਸਾਰੇ ਮਲੇਰਕੋਟਲਾ ਅਤੇ ਸੰਗਰੂਰ ਦੇ ਪੱਤਰਕਾਰਾਂ ਨੇ ਏਕਤਾ ਦਿਖਾਈ ਤਾਂ ਸੰਗਰੂਰ ਜ਼ਿਲ੍ਹਾ ਪੁਲਸ ਦੇ ਐੱਸ. ਐੱਸ. ਪੀ. ਅਤੇ ਹੋਰ ਵੱਡੇ ਪੁਲਸ ਅਧਿਕਾਰੀਆਂ ਨੂੰ ਵੀ ਪੱਤਰਕਾਰਾਂ ਦੀ ਗੱਲ ਸੁਣਨ ਲਈ ਮਜਬੂਰ ਹੋਣਾ ਪਿਆ। ਪੱਤਰਕਾਰਾਂ ਦੇ ਇਕ ਵਫ਼ਦ ਨੇ ਐੱਸ. ਐੱਸ. ਪੀ. ਸੰਗਰੂਰ ਡਾ. ਸੰਦੀਪ ਗਰਗ ਨੂੰ ਇਕ ਮੰਗ ਪੱਤਰ ਦੇ ਕੇ ਇਨਸਾਫ਼ ਦੀ ਗੁਹਾਰ ਲਾਈ ਹੈ। ਇਸ ਦੌਰਾਨ ਐੱਸ. ਐੱਸ. ਪੀ. ਸੰਗਰੂਰ ਡਾ. ਸੰਦੀਪ ਗਰਗ ਨੇ ਪੱਤਰਕਾਰਾਂ ਦੇ ਵਫ਼ਦ ਨਾਲ ਗੱਲਬਾਤ ਕਰਦੇ ਭਰੋਸਾ ਦਿੱਤਾ ਕਿ ਕਾਸਿਫ ਫਾਰੂਕੀ 'ਤੇ ਦਰਜ ਮਾਮਲੇ 'ਚ ਪੂਰਾ ਇਨਸਾਫ਼ ਕੀਤਾ ਜਾਵੇਗਾ।
ਦੱਸ ਦਈਏ ਕਿ 28 ਮਈ ਨੂੰ ਇਹ ਮਾਮਲਾ ਉਸ ਵੇਲੇ ਉੱਠਿਆ ਜਦੋਂ ਪੱਤਰਕਾਰ ਕਾਸਿਫ ਫਾਰੂਕੀ ਆਪਣੇ ਬੁਲੇਟ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਆਪਣੇ ਘਰੋਂ ਆਪਣੇ ਦੋਸਤ ਮੁਹੰਮਦ ਅਮਜਦ ਵਾਸੀ ਕਿਲ੍ਹਾ ਦੇ ਘਰੋਂ ਆਪਣੀ ਗੱਡੀ ਲੈਣ ਜਾ ਰਿਹਾ ਸੀ। ਕਾਸਿਫ ਫਾਰੂਕੀ ਵੱਲੋਂ ਪੁਲਸ ਨੂੰ ਦਿੱਤੇ ਗਏ ਬਿਆਨ ਅਨੁਸਾਰ ਇਸ ਦੌਰਾਨ ਜਦੋਂ ਉਹ ਗੁਰਦੁਆਰਾ ਹਾਅ ਦਾ ਨਾਅਰਾ ਸਾਹਿਬ ਤੋਂ ਗਰੇਵਾਲ ਚੌਂਕ ਵੱਲ ਜਾ ਰਿਹਾ ਸੀ ਤਾਂ ਉਸ ਦੇ ਅੱਗੇ ਇਕ ਛੋਟਾ ਹਾਥੀ ਗੱਡੀ ਆ ਗਈ। ਉਸ ਛੋਟੇ ਹਾਥੀ ਗੱਡੀ ਅੱਗੇ ਇਕ ਬੁਲੇਟ ਮੋਟਰਸਾਈਕਲ ਆ ਗਿਆ, ਜਿਸ ਨੂੰ ਇਕ ਬੱਚਾ ਚਲਾ ਰਿਹਾ ਸੀ। ਜਿਸ ਨੇ ਛੋਟੇ ਹਾਥੀ ਦੇ ਅੱਗਿਓਂ ਬਿਨ੍ਹਾਂ ਪਿੱਛੇ ਵੇਖੇ, ਬਿਨ੍ਹਾਂ ਕੋਈ ਇਸ਼ਾਰਾ ਦਿੱਤੇ ਜਾਂ ਕੋਈ ਹਾਰਨ ਦਿੱਤੇ ਆਪਣਾ ਮੋਟਰਸਾਈਕਲ ਖੱਬੇ ਪਾਸੇ ਤੋਂ ਸੱਜੇ ਪਾਸੇ ਵੱਲ ਨੂੰ ਮੋੜ ਲਿਆ। ਜਿਸ ਉਪਰੰਤ ਉਸ ਦਾ ਮੋਟਰਸਾਈਕਲ ਯਕਦਮ ਕਾਸਿਫ ਫਾਰੂਕੀ ਅੱਗੇ ਆ ਕੇ ਉਸ ਦੇ ਮੋਟਰਸਾਈਕਲ 'ਚ ਵਜ ਗਿਆ। ਫਾਰੂਕੀ ਦੇ ਬਿਆਨ ਮੁਤਾਬਕ ਉਸ ਦਾ ਮੋਟਰਸਾਈਕਲ ਹੌਲੀ ਹੋਣ ਕਰਕੇ ਉਹ ਸੰਭਲ ਗਿਆ ਪਰ ਉਸ ਦੀ ਖੱਬੀ ਲੱਤ ਤੇ ਗਿੱਟੇ 'ਤੇ ਸੱਟਾਂ ਕਾਰਨ ਦਰਦ ਨਾਲ ਉਸ ਦੀ ਹਾਲਤ ਖਰਾਬ ਹੋ ਗਈ, ਜਿਸ ਦੀ ਜਾਣਕਾਰੀ ਉਸ ਨੇ ਆਪਣੇ ਦੋਸਤਾਂ ਨੂੰ ਫੋਨ ਕਰਕੇ ਦਿੱਤੀ। ਬਿਆਨ ਮੁਤਾਬਕ ਇਹ ਹਾਦਸਾ ਉਸ ਮੋਟਰਸਾਈਕਲ ਸਵਾਰ ਬੱਚੇ ਵੱਲੋਂ ਆਪਣੇ ਮੋਟਰਸਾਈਕਲ ਨੂੰ ਲਾਪਰਵਾਹੀ ਅਤੇ ਅਣਗਹਿਲੀ ਨਾਲ ਖੱਬੇ ਪਾਸੇ ਤੋਂ ਸੱਜੇ ਪਾਸੇ ਵੱਲ ਨੂੰ ਮੋੜਨ ਕਰਕੇ ਹੋਇਆ ਹੈ, ਜਦਕਿ ਦੂਜੇ ਪਾਸੇ ਕਾਸਿਫ ਫਾਰੂਕ 'ਤੇ ਐੱਫ. ਆਈ. ਆਰ. ਦਰਜ ਕਰਵਾਉਣ ਵਾਲੇ ਮੋਟਰਸਾਈਕਲ ਸਵਾਰ ਬੱਚੇ ਨੇ ਕਹਾਣੀ ਇਸ ਤੋਂ ਬਿਲਕੁਲ ਉਲਟ ਦੱਸੀ ਹੈ।
ਅੰਮ੍ਰਿਤਪਾਲ ਸਿੰਘ ਨਾਮ ਦੇ ਉਸ ਬੱਚੇ ਨੇ ਪੁਲਸ ਨੂੰ ਬਿਆਨ ਦਿੱਤਾ ਹੈ ਕਿ ਉਹ ਆਪਣਾ ਬੁਲੇਟ ਮੋਟਰਸਾਈਕਲ ਨੰਬਰ ਡੀ. ਐੱਲ . 45 ਐੱਮ 6843 'ਤੇ ਸਵਾਰ ਹੋ ਕੇ ਕਾਲਜ ਚੌਂਕ ਮਲੇਰਕੋਟਲਾ ਤੋਂ ਗੁਰਦੁਆਰਾ ਹਾਅ ਦਾ ਨਾਅਰਾ ਨੇੜੇ ਆਪਣੇ ਉਸਤਾਦ ਸੌਦਾਗਰ ਅਲੀ ਇਲੈਕਟ੍ਰੀਸ਼ੀਅਨ ਦੀ ਦੁਕਾਨ 'ਤੇ ਜਾ ਰਿਹਾ ਸੀ ਅਤੇ ਜਦੋਂ ਉਹ ਸੜਕ ਪਾਰ ਕਰਕੇ ਆਪਣਾ ਮੋਟਰਸਾਈਕਲ ਆਪਣੇ ਉਸਤਾਦ ਦੀ ਦੁਕਾਨ ਅੱਗੇ ਖੜ੍ਹਾ ਕਰ ਰਿਹਾ ਸੀ ਤਾਂ ਕਾਸਿਫ ਫਾਰੂਕੀ ਨੇ ਆਪਣਾ ਮੋਟਰਸਾਈਕਲ ਬਿਨ੍ਹਾਂ ਹਾਰਨ ਦਿੱਤਿਆਂ ਗਲਤ ਪਾਸੇ ਲਿਆ ਕੇ ਉਸ 'ਚ ਮਾਰਿਆ, ਜਿਸ ਨਾਲ ਉਸ ਦੀ ਲੱਤ ਟੁੱਟ ਗਈ ਅਤੇ ਮੋਟਰਸਾਈਕਲ ਦਾ ਵੀ ਨੁਕਸਾਨ ਹੋਇਆ।
ਇਹ ਦੋਂਵੇ ਬਿਆਨ ਇਕ ਦੂਜੇ ਦੇ ਉਲਟ ਸਨ। ਪੁਲਸ ਨੇ ਮੌਕੇ 'ਤੇ ਲੱਗੇ ਸੀ. ਸੀ. ਟੀ. ਵੀ. ਕੈਮਰੇ ਦੀ ਜਾਂਚ ਕਰਨੀ ਜ਼ਰੂਰੀ ਨਹੀਂ ਸਮਝੀ ਅਤੇ ਪੱਤਰਕਾਰ ਕਾਸਿਫ ਫਾਰੂਕੀ 'ਤੇ ਪਰਚਾ ਦੇ ਕੇ ਉਸ ਦੇ ਸਾਫ਼-ਸੁਥਰੇ ਅਤੇ ਇਮਾਨਦਾਰ ਅਕਸ ਨੂੰ ਦਾਗਦਾਰ ਕਰ ਦਿੱਤਾ। ਸੰਗਰੂਰ ਦੇ ਐੱਸ. ਐੱਸ. ਪੀ. ਡਾ ਸੰਦੀਪ ਗਰਗ ਨੇ ਇਹ ਸਾਰੀ ਗੱਲ ਬੜੇ ਧਿਆਨ ਨਾਲ ਸੁਣੀ ਅਤੇ ਮੌਕੇ 'ਤੇ ਕਾਸਿਫ ਫਾਰੂਕੀ ਨਾਲ ਪਹੁੰਚੇ ਪੱਤਰਕਾਰ ਭਾਈਚਾਰੇ ਦੇ ਲੋਕਾਂ ਨੂੰ ਭਰੋਸਾ ਦਿੱਤਾ ਕਿ ਇਸ ਕੇਸ ਦੀ ਜਾਂਚ ਕਰਕੇ ਪੂਰਾ ਇਨਸਾਫ਼ ਕੀਤਾ ਜਾਵੇਗਾ ਅਤੇ ਇਸ ਲਈ ਉਹ ਸਾਫ਼-ਸੁਥਰੇ ਅਕਸ ਅਤੇ ਇਮਾਨਦਾਰ ਦਿੱਖ ਵਾਲੇ ਮਾਲੇਰਕੋਟਲਾ ਦੇ ਐੱਸ. ਪੀ. ਮਨਜੀਤ ਸਿੰਘ ਬਰਾੜ ਨੂੰ ਇਸ ਮਾਮਲੇ ਦੀ ਜਾਂਚ ਸੌਂਪ ਰਹੇ ਹਨ। ਦੱਸ ਦਈਏ ਕਿ ਅੱਜ ਪੱਤਰਕਾਰਾਂ ਦਾ ਜਿਹੜਾ ਵਫ਼ਦ ਐੱਸ. ਐੱਸ. ਪੀ. ਸੰਗਰੂਰ ਨੂੰ ਮਿਲਿਆ ਉਸ 'ਚ ਹੋਰਨਾਂ ਤੋਂ ਇਲਾਵਾ ਸੰਗਰੂਰ ਪ੍ਰੈਸ ਕਲੱਬ ਦੇ ਪ੍ਰਧਾਨ ਕੀਰਤੀਪਾਲ, ਵਿੱਕੀ ਭੁੱਲਰ, ਅਨਿਲ ਜੈਨ ਲਹਿਰਾਗਾਗਾ, ਹਰਕੰਵਲ ਸਿੰਘ, ਟੋਨੀ ਸ਼ਰਮਾਂ, ਪਰਮਿੰਦਰ ਜੋਸ਼ੀ ਵਿਨੋਦ ਗੋਇਲ ਦਿੜ੍ਹਬਾ ਤੇ ਸੰਜੀਵ ਗੋਇਲ ਦਿੜ੍ਹਬਾ ਦੇ ਨਾਮ ਸ਼ਾਮਲ ਹਨ।
ਕਾਸਿਫ ਫਾਰੂਕੀ 'ਤੇ ਤਾਂ ਪਰਚਾ ਦਰਜ ਕਰਤਾ ਪਰ ਅੰਮ੍ਰਿਤਪਾਲ ਦਾ ਕੀ ਜਿਹੜਾ ਖੁਦ ਮਨ ਰਿਹੈ ਕਿ ਉਹ ਕਸੂਰਵਾਰ ਹੈ
ਪੁਲਸ ਵੱਲੋਂ ਕਾਸਿਫ ਫਾਰੂਕੀ 'ਤੇ ਦਰਜ ਕੀਤੀ ਐੱਫ. ਆਈ. ਆਰ. ਨੂੰ ਜੇਕਰ ਧਿਆਨ ਨਾਲ ਪੜ੍ਹਿਆ ਜਾਵੇ ਤਾਂ ਉਸ 'ਚ ਸ਼ਿਕਾਇਤ ਕਰਤਾ ਇਹ ਸਾਫ਼ ਮੰਨ ਰਿਹੈ ਕਿ ਉਹ ਕਰੀਬ 18 ਸਾਲ ਦਾ ਹੈ ਅਤੇ ਖੁਦ ਮੋਟਰਸਾਈਕਲ ਚਲਾ ਕੇ ਆਪਣੇ ਉਸਤਾਦ ਦੀ ਦੁਕਾਨ 'ਤੇ ਪਹੁੰਚਿਆ। ਜਦਕਿ ਮੋਟਰਸਾਈਕਲ ਐਕਟ ਇਹ ਸਾਫ਼ ਕਹਿੰਦਾ ਹੈ ਕਿ ਕੋਈ ਵੀ 18 ਸਾਲ ਤੋਂ ਘੱਟ ਬੱਚਾ ਵਹੀਕਲ ਨਹੀਂ ਚਲਾ ਸਕਦਾ ਅਤੇ ਜੇਕਰ ਚਲਾਉਂਦਾ ਹੈ ਤਾਂ ਨਾ ਸਿਰਫ ਉਸ 'ਤੇ ਸਗੋਂ ਉਸ ਦੇ ਪਿਤਾ 'ਤੇ ਵੀ ਪਰਚਾ ਦਰਜ ਹੁੰਦਾ ਹੈ। ਹੁਣ ਸਵਾਲ ਇਹ ਉੱਠਦਾ ਹੈ ਕਿ ਕਾਸਿਫ ਫਾਰੂਕੀ ਤਾਂ ਖੁਦ ਨੂੰ ਬੇਗੁਨਾਹ ਕਹਿ ਰਿਹਾ ਹੈ ਪਰ ਪੁਲਸ ਨੇ ਉਸ 'ਤੇ ਪਰਚਾ ਦਰਜ ਕਰ ਦਿੱਤਾ ਪਰ ਅੰਮ੍ਰਿਤਪਾਲ ਤਾਂ ਖੁਦ ਮੰਨ ਰਿਹੈ ਕਿ ਉਸ ਨੇ 18 ਸਾਲ ਤੋਂ ਘੱਟ ਹੋਣ ਦੇ ਬਾਵਜੂਦ ਵਾਹਨ ਚਲਾ ਕੇ ਜੁਰਮ ਕੀਤਾ ਹੈ। ਫਿਰ ਉਸ 'ਤੇ ਕਾਨੂੰਨੀ ਕਾਰਵਾਈ ਕਿਉਂ ਨਹੀਂ ਕੀਤੀ ਗਈ? ਕੀ ਪੁਲਸ ਨੇ ਇਸ ਮਾਮਲੇ 'ਚ ਕਿਤੇ ਨਾ ਕਿਤੇ ਕਾਸਿਫ ਫਾਰੂਕੀ ਨਾਲ ਕਿਸੇ ਗੱਲ ਦੀ ਖੁੰਦਕ ਕੱਢੀ ਹੈ ਜਾਂ ਫਿਰ ਉਸ 'ਤੇ ਪਰਚਾ ਕਿਸੇ ਦਬਾਅ ਹੇਠ ਕੀਤਾ ਗਿਆ ਕਾਰਾ ਹੈ। ਇਹ ਸਚਾਈ ਤਾਂ ਐੱਸ. ਪੀ. ਮਨਜੀਤ ਸਿੰਘ ਬਰਾੜ ਦੀ ਜਾਂਚ ਤੋਂ ਬਾਅਦ ਹੀ ਪਤਾ ਚੱਲ ਪਾਵੇਗੀ ਪਰ ਅੰਮ੍ਰਿਤਪਾਲ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਦੀ ਮੰਗ ਨੇ ਜ਼ਰੂਰ ਜ਼ੋਰ ਫੜ ਲਿਆ ਹੈ।
ਹੁਣ ਉੱਪਰੋਂ ਲੈ ਕੇ ਹੇਠਲੇ ਅਧਿਕਾਰੀਆਂ ਨੂੰ ਨਿਰਦੇਸ਼, ਜਿੰਨਾ ਹੋ ਸਕੇ ਇਕੱਠਾ ਕਰੋ ਨਿੱਜੀ GST
NEXT STORY 
