ਚੰਡੀਗੜ੍ਹ (ਰਾਏ) : ਅਤਿ-ਆਧੁਨਿਕ ਸ਼ਹਿਰ ਮੰਨਿਆ ਜਾਣ ਵਾਲਾ ਚੰਡੀਗੜ੍ਹ ਇਸ ਵਾਰ ਸਵੱਛ ਸਰਵੇਖਣ ਅਭਿਆਨ-2019 'ਚ 20ਵੇਂ ਨੰਬਰ 'ਤੇ ਰਿਹਾ, ਜਦੋਂਕਿ ਪਿਛਲੇ ਸਾਲ ਤੀਸਰੇ ਸਥਾਨ 'ਤੇ ਸੀ। ਸਭ ਤੋਂ ਵੱਡੇ ਸਫਾਈ ਸਰਵੇਖਣ ਦੇ ਨਤੀਜੇ 'ਸਵੱਛ ਸਰਵੇਖਣ 2019' ਕੇਂਦਰੀ ਮੰਤਰਾਲੇ ਵਲੋਂ ਐਲਾਨ ਕੀਤੇ ਗਏ। ਆਵਾਸ ਤੇ ਸ਼ਹਿਰੀ ਮਾਮਲਿਆਂ ਦੇ ਰਾਜ ਮੰਤਰੀ ਹਰਦੀਪ ਪੁਰੀ ਨੇ ਦਿੱਲੀ 'ਚ ਆਯੋਜਿਤ ਇਕ ਸਮਾਰੋਹ 'ਚ ਇਸ ਸਰਵੇਖਣ ਦੇ ਨਤੀਜੇ ਐਲਾਨੇ। ਇਸ ਸਾਲ ਸ਼ਹਿਰ ਨੂੰ ਸਿਰਫ਼ 'ਬੈਸਟ ਸਟੇਟ ਕੈਪੀਟਲ/ਯੂ. ਟੀ. ਇਨ ਸਾਲਿਡ ਵੇਸਟ ਮੈਨੇਜਮੈਂਟ'ਦਾ ਇਨਾਮ ਮਿਲਿਆ ਹੈ। ਚੰਡੀਗੜ੍ਹ ਨੂੰ 10 ਲੱਖ ਤਕ ਦੀ ਆਬਾਦੀ ਵਾਲੇ ਸ਼ਹਿਰਾਂ 'ਚ 10ਵਾਂ ਸਥਾਨ ਮਿਲਿਆ ਹੈ।
ਸਵੱਛ ਸਰਵੇਖਣ-2016 'ਚ ਸ਼ਹਿਰ ਦੋ ਨੰਬਰ 'ਤੇ ਸੀ। 2017 'ਚ ਆਪਣੇ ਵਰਗ ਦੇ ਸ਼ਹਿਰਾਂ 'ਚ ਇਸ ਨੂੰ 11ਵਾਂ ਸਥਾਨ ਮਿਲਿਆ ਸੀ ਅਤੇ 2018 'ਚ ਚੰਡੀਗੜ੍ਹ ਦੇਸ਼ ਭਰ ਦੇ 4203 ਸ਼ਹਿਰਾਂ 'ਚ ਤੀਸਰੇ ਰੈਂਕ 'ਤੇ ਸੀ। ਦੂਜੇ ਪਾਸੇ ਇੰਦੌਰ ਨੇ ਹੈਟ੍ਰਿਕ ਲਾਈ ਹੈ ਅਤੇ ਉਹ ਨੰਬਰ ਇਕ ਰੈਂਕ 'ਤੇ ਇਸ ਸਾਲ ਵੀ ਬਣਿਆ ਰਿਹਾ। ਸਿਟੀ ਫੋਰਮ ਆਫ ਰੈਜ਼ੀਡੈਂਟਸ ਵੈੱਲਫੇਅਰ ਆਰਗੇਨਾਈਜ਼ੇਸ਼ਨ ਦੇ ਪ੍ਰਧਾਨ ਵਿਨੋਦ ਵਸ਼ਿਸ਼ਠ ਨੇ ਕਿਹਾ ਕਿ ਪਿਛਲੇ ਸਾਲ ਸ਼ਹਿਰ ਪਹਿਲੇ ਨੰਬਰ 'ਤੇ ਸੀ ਅਤੇ ਇਸ ਵਾਰ 21ਵੇਂ ਨੰਬਰ 'ਤੇ ਹੈ। ਇਸ ਦਾ ਮਤਲਬ ਹੈ ਕਿ ਨਗਰ ਨਿਗਮ ਅਤੇ ਪ੍ਰਸ਼ਾਸਨ ਦੀਆਂ ਕੋਸ਼ਿਸ਼ਾਂ ਤੋਂ ਲੋਕ ਖੁਸ਼ ਨਹੀਂ ਹਨ।
ਇਨ੍ਹਾਂ ਸ਼੍ਰੇਣੀਆਂ 'ਚ ਚੰਡੀਗੜ੍ਹ ਦੀ ਹਾਲਤ
ਪਹਿਲਾ ਭਾਗ : ਸੇਵਾ ਪੱਧਰ ਤਰੱਕੀ (1250 ਅੰਕਾਂ 'ਚੋਂ) ਚੰਡੀਗੜ੍ਹ ਨੂੰ ਮਿਲੇ 1129 (ਇਸ ਸ਼੍ਰੇਣੀ 'ਚ ਅੱਵਲ ਇੰਦੌਰ)
ਦੂਜਾ ਭਾਗ : ਪ੍ਰਮਾਣਿਕ (1250 ਅੰਕਾਂ 'ਚੋਂ) ਚੰਡੀਗੜ੍ਹ ਨੂੰ ਮਿਲੇ 500 (ਇਸ ਸ਼੍ਰੇਣੀ 'ਚ ਅੱਵਲ ਇੰਦੌਰ)
ਤੀਜਾ ਭਾਗ : ਪ੍ਰਤੱਖ ਅਵਲੋਕਨ (1250 ਅੰਕਾਂ 'ਚੋਂ) ਚੰਡੀਗੜ੍ਹ ਨੂੰ ਮਿਲੇ 1120 (ਜਮਸ਼ੇਦਪੁਰ ਅੱਵਲ)
ਚੌਥਾ ਭਾਗ : ਨਾਗਰਿਕ ਪ੍ਰਤੀਕਿਰਿਆ ਤੇ ਸਫਾਈ ਐਪ (1250 ਅੰਕਾਂ 'ਚੋਂ) ਚੰਡੀਗੜ੍ਹ ਨੂੰ ਮਿਲੇ 1038 (ਇੰਦੌਰ ਅੱਵਲ)
ਕੁਲ ਅੰਕ : 5000 'ਚੋਂ ਚੰਡੀਗੜ੍ਹ ਨੂੰ 3787 ਨੰਬਰ ਮਿਲੇ, ਜਦਕਿ ਪਹਿਲੇ ਨੰਬਰ 'ਤੇ ਰਹੇ ਇੰਦੌਰ ਨੂੰ 4659 ਅੰਕ ਮਿਲੇ।
ਖਾਸ ਗੱਲਾਂ
* ਸਵੱਛ ਸਰਵੇਖਣ 'ਚ 20ਵਾਂ ਸਥਾਨ।
* ਚੰਡੀਗੜ੍ਹ ਨੂੰ ਸਾਲਿਡ ਵੇਸਟ ਮੈਨੇਜਮੈਂਟ ਲਈ ਕੈਪੀਟਲ ਸਿਟੀਜ਼ ਸ਼੍ਰੇਣੀ 'ਚ ਬੈਸਟ ਸਿਟੀ ਦਾ ਦਰਜਾ ਦਿੱਤਾ ਗਿਆ ਹੈ।
* ਐੱਮ. ਸੀ. ਐੱਮ. ਡੀ. ਏ. ਵੀ. ਕਾਲਜ 'ਚ ਕੰਪੋਸਟ ਮੇਕਿੰਗ ਅਤੇ ਮਸ਼ਰੂਮ ਪਲਾਂਟੇਸ਼ਨ ਲਈ ਚੰਡੀਗੜ੍ਹ ਨੂੰ ਬੈਸਟ ਸਿਟੀਜ਼ਨ ਲੈਡ ਇਨੀਸ਼ੀਏਟਿਵ ਲਈ ਤਿੰਨ ਪੁਰਸਕਾਰਾਂ 'ਚੋਂ ਇਕ ਮਿਲਿਆ।
* ਚੰਡੀਗੜ੍ਹ ਨੂੰ ਮਿਊਂਸਪਲ ਸਾਲਿਡ ਵੇਸਟ ਮੈਨੇਜਮੈਂਟ 'ਚ ਥ੍ਰੀ ਸਟਾਰ ਰੇਟਿੰਗ ਮਿਲੀ।
* ਚੰਡੀਗੜ੍ਹ ਨੂੰ 10 ਲੱਖ ਤਕ ਦੀ ਆਬਾਦੀ ਵਾਲੇ ਸ਼ਹਿਰਾਂ 'ਚ 10ਵਾਂ ਸਥਾਨ ਮਿਲਿਆ ਹੈ।
ਜਲੰਧਰ : ਪੇਪਰ ਦੇਣ ਤੋਂ ਬਾਅਦ ਸ਼ੱਕੀ ਹਾਲਾਤ 'ਚ ਲਾਪਤਾ ਹੋਈਆਂ ਵਿਦਿਆਰਥਣਾਂ
NEXT STORY 
