ਤਰਨਤਾਰਨ(ਰਮਨ)— ਸ਼੍ਰੀਨਗਰ ਦੇ ਪੁਲਵਾਮਾ ਅਧੀਨ ਆਉਂਦੇ ਆਵੰਤੀਪੁਰਾ ਇਲਾਕੇ 'ਚ ਅੱਤਵਾਦੀਆਂ ਨਾਲ ਲੋਹਾ ਲੈਣ ਜਾ ਰਹੀ ਸੀ.ਆਰ.ਪੀ.ਐੱਫ. ਦੀ ਬੱਸ 'ਤੇ 14 ਫਰਵਰੀ ਨੂੰ ਹੋਏ ਫਿਦਾਈਨ ਹਮਲੇ ਦੌਰਾਨ ਵੱਡੀ ਗਿਣਤੀ 'ਚ ਸ਼ਹੀਦ ਹੋਏ ਜਵਾਨਾਂ 'ਚੋਂ ਜ਼ਿਲਾ ਤਰਨਤਾਰਨ ਦੇ ਗੰਡੀਵਿੰਡ ਪਿੰਡ ਦਾ ਇਕ ਜਵਾਨ ਸੁਖਜਿੰਦਰ ਸਿੰਘ ਵੀ ਆਪਣੇ ਪਰਿਵਾਰ ਨੂੰ ਸਦਾ ਲਈ ਵਿਛੋੜਾ ਦਿੰਦਾ ਹੋਇਆ ਦੇਸ਼ ਲਈ ਸ਼ਹੀਦ ਹੋ ਗਿਆ।
ਸਿਹਤ ਬਣਾਉਣ ਦਾ ਸੀ ਸ਼ੌਕ :
ਸੁਖਜਿੰਦਰ ਸਿੰਘ ਦਾ ਜਨਮ 21 ਮਈ 1984 ਨੂੰ ਪਿੰਡ ਗੰਡੀਵਿੰਡ ਦੇ ਇਕ ਗਰੀਬ ਕਿਸਾਨ ਗੁਰਮੇਜ ਸਿੰਘ ਦੇ ਘਰ ਮਾਤਾ ਹਰਭਜਨ ਕੌਰ ਦੀ ਕੁੱਖੋਂ ਹੋਇਆ। ਪਿਤਾ ਗੁਰਮੇਜ ਸਿੰਘ ਨੇ ਆਪਣੇ ਬੇਟੇ ਸੁਖਜਿੰਦਰ ਸਿੰਘ ਨੂੰ ਚੰਗੀ ਸਿੱਖਿਆ ਦੇਣ ਦੇ ਮਕਸਦ ਨਾਲ ਪੜ੍ਹਾਇਆ। ਸ਼ਹੀਦ ਸੁਖਜਿੰਦਰ ਸਿੰਘ ਨੇ 10ਵੀਂ ਤੱਕ ਦੀ ਪੜ੍ਹਾਈ ਪਿੰਡ ਦੇ ਹੀ ਸਰਕਾਰੀ ਸਕੂਲ ਤੋਂ ਪਾਸ ਕਰਦੇ ਹੋਏ 12ਵੀਂ ਦੀ ਜਮਾਤ ਆਰਟਸ ਵਿਸ਼ੇ 'ਤੇ ਪੱਟੀ ਦੇ ਮੌਰਨਿੰਗ ਸਟਾਰ ਸਕੂਲ ਤੋਂ ਪਾਸ ਕੀਤੀ। ਸ਼ਹੀਦ ਸੁਖਜਿੰਦਰ ਸਿੰਘ ਨੂੰ ਆਪਣੀ ਸਿਹਤ ਬਣਾਉਣ ਦਾ ਬੜਾ ਸ਼ੌਕ ਸੀ ਜੋ ਆਪਣੇ ਆਪ ਨੂੰ ਫਿੱਟ ਰੱਖਣ ਲਈ ਚੋਹਲਾ ਸਾਹਿਬ ਅਤੇ ਪਿੰਡ ਦੇ ਜਿਮ 'ਚ ਕਸਰਤ ਕਰਦਾ ਹੋਇਆ ਬਾਕੀਆਂ ਨੂੰ ਵੀ ਨਸੀਹਤ ਦਿੰਦਾ ਰਹਿੰਦਾ।
ਦੇਸ਼ ਦੀ ਸੇਵਾ ਦਾ ਸੀ ਜਜ਼ਬਾ :
ਸ਼ਹੀਦ ਸੁਖਜਿੰਦਰ ਨੂੰ ਬਚਪਨ ਤੋਂ ਹੀ ਸੁਪਨਾ ਸੀ ਕਿ ਉਹ ਵੱਡਾ ਹੋ ਕੇ ਸਿਰਫ ਸੀ. ਆਰ. ਪੀ. ਐੱਫ. 'ਚ ਭਰਤੀ ਹੋ ਕੇ ਦੇਸ਼ ਦੀ ਸੇਵਾ ਕਰਨ ਦੇ ਨਾਲ ਅੱਤਵਾਦੀਆਂ ਨੂੰ ਸਬਕ ਸਿਖਾਵੇਗਾ। ਸ਼ਹੀਦ ਸੁਖਜਿੰਦਰ ਆਪਣੀ ਪੜ੍ਹਾਈ ਤੋਂ ਬਾਅਦ ਮਿਤੀ 17 ਫਰਵਰੀ 2003 'ਚ ਸੀ. ਆਰ. ਪੀ. ਐੱਫ. ਦੀ 76 ਬਟਾਲੀਅਨ 'ਚ ਬਤੌਰ ਕਾਂਸਟੇਬਲ ਭਰਤੀ ਹੋਇਆ, ਜਿਸ ਨੇ ਆਪਣੀ ਟ੍ਰੇਨਿੰਗ ਉੜੀਸਾ ਦੇ ਭੂਵਨੇਸ਼ਵਰ ਤੋਂ ਹਾਸਲ ਕੀਤੀ। ਇਸ ਤੋਂ ਬਾਅਦ ਸੁਖਜਿੰਦਰ ਨੇ ਜੰਮੂ, ਅਲੀਗੜ੍ਹ, ਸ਼੍ਰੀਨਗਰ, ਅਸਾਮ, ਤੋਂ ਬਾਅਦ ਇਸ ਵੇਲੇ ਦੋਬਾਰਾ ਜੰਮੂ ਕੈਂਪ 'ਚ ਆਪਣੀ ਡਿਉੂਟੀ ਕਰ ਰਿਹਾ ਸੀ। ਸੁਖਜਿੰਦਰ ਸਿੰਘ ਦਾ ਪਰਿਵਾਰ 'ਚ ਬੜਾ ਮਿਲਾਪੜਾ ਅਤੇ ਹਮਦਰਦੀ ਭਰਿਆ ਸੁਭਾਅ ਸੀ। ਜੋ ਵਹਿਮਾਂ ਭਰਮਾਂ ਤੋਂ ਦੂਰ ਰਹਿੰਦਾ ਅਤੇ ਹਮੇਸ਼ਾ ਯਾਰਾਂ ਦੀ ਮਦਦ ਲਈ ਵਧ ਚੜ੍ਹ ਕੇ ਅੱਗੇ ਆਉਂਦਾ।
ਵਿਆਹ ਤੋਂ 8 ਸਾਲ ਬਾਅਦ ਮਿਲੀ ਸੀ ਪੁੱਤਰ ਦੀ ਦਾਤ :
ਸੁਖਜਿੰਦਰ ਸਿੰਘ ਦਾ ਵਿਆਹ ਜ਼ਿਲਾ ਤਰਨਤਾਰਨ ਦੇ ਪਿੰਡ ਸ਼ਕਰੀ ਦੀ ਸਰਬਜੀਤ ਕੌਰ ਨਾਲ 9 ਨਵੰਬਰ 2010 'ਚ ਹੋਇਆ। ਵਿਆਹ ਤੋਂ ਬਾਅਦ ਬਾਬਾ ਬੁੱਢਾ ਸਾਹਿਬ ਜੀ ਦੀ ਅਪਾਰ ਕ੍ਰਿਪਾ ਨਾਲ ਇਨ੍ਹਾਂ ਦੇ ਘਰ ਕਰੀਬ 8 ਸਾਲ ਬਾਅਦ ਇਕ ਲੜਕੇ ਗੁਰਜੋਤ ਸਿੰਘ ਨੇ ਜਨਮ ਲਿਆ ਜੋ ਇਸ ਸਮੇਂ ਕਰੀਬ 8 ਮਹੀਨੇ ਦਾ ਹੈ। ਸੁਖਜਿੰਦਰ ਸਿੰਘ ਨੂੰ ਪ੍ਰਮਾਤਮਾ ਨੇ ਬੱਚੇ ਦੀ ਦਾਤ ਦੇ ਨਾਲ ਹੀ ਹੈੱਡ ਕਾਂਸਟੇਬਲ ਦੀ ਤਰੱਕੀ ਦਿੰਦੇ ਹੋਏ ਇਕ ਹੋਰ ਖੁਸ਼ੀ ਦੇ ਦਿੱਤੀ। ਇਸ ਦੌਰਾਨ ਸੁਖਜਿੰਦਰ ਆਪਣੀ ਡਿਉੂਟੀ ਦੌਰਾਨ ਸਮਾਂ ਮਿਲਦੇ ਹੀ ਪਰਿਵਾਰ ਨਾਲ ਖੁਸ਼ੀਆਂ ਦੇ ਨਾਲ-ਨਾਲ ਹਰ ਗੱਲ ਪਤਨੀ ਅਤੇ ਯਾਰਾਂ ਨਾਲ ਸਾਂਝੀ ਕਰਦਾ ਰਹਿੰਦਾ । ਸੁਖਜਿੰਦਰ ਸਿੰਘ ਜਦੋਂ ਵੀ ਛੁੱਟੀ ਆਉਂਦਾ ਤਾਂ ਆਪਣੀ ਮਾਂ ਹਰਭਜਨ ਕੌਰ ਨੂੰ ਖੁਸ਼ੀ ਨਾਲ ਗੋਦੀ 'ਚ ਚੁੱਕ ਭੰਗੜਾ ਪਾਉਂਦਾ ਹੋਇਆ ਕਹਿੰਦਾ '' ਮਾਂ ਮੈਨੂੰ ਆਸ਼ੀਰਵਾਦ ਦੇ ਕੀ ਮੈਂ ਤੁਹਾਨੂੰ ਸਾਰੇ ਸੰਸਾਰ ਦੀਆਂ ਖੁਸ਼ੀਆਂ ਦਿੰਦਾ ਰਹਾਂ ਤੇ ਦੇਸ਼ ਦੇ ਦੁਸ਼ਮਣ ਅੱਤਵਾਦੀਆਂ ਦੇ ਦੰਦ ਖੱਟੇ ਕਰਦਾ ਰਹਾਂ''।
ਪਿਤਾ ਨਾਲ ਵਟਾਉਂਦਾ ਸੀ ਖੇਤੀ 'ਚ ਹੱਥ :
ਸੁਖਜਿੰਦਰ ਸਿੰਘ ਨੂੰ ਛੁੱਟੀ ਦੌਰਾਨ ਆਪਣੀ ਸਿਹਤ 'ਚ ਵਾਧਾ ਡਰ ਸਤਾਉਂਦਾ ਰਹਿੰਦਾ ਜੋ ਆਪਣੇ ਵਿਹਲੜ ਸਾਥੀ ਯਾਰ ਨੂੰ ਜਿਥੇ ਕੋਈ ਕੰਮ ਧੰਦਾ ਕਰਨ ਦੀ ਨਸੀਹਤ ਦਿੰਦਾ ਉਥੇ ਆਪਣੇ ਪਿਤਾ ਅਤੇ ਭਰਾ ਨਾਲ ਖੇਤੀਬਾੜੀ ਦੇ ਸਾਰੇ ਕੰਮਾਂ 'ਚ ਹੱਥ ਵਟਾਉਂਦਾ। ਦਸੰਬਰ ਮਹੀਨੇ 'ਚ 40 ਦਿਨਾਂ ਦੀ ਛੁੱਟੀ ਆਏ ਸੁਖਜਿੰਦਰ ਨੇ ਆਪਣੇ ਬੇਟੇ ਗੁਰਜੋਤ ਦੀ ਪਹਿਲੀ ਲੋਹੜੀ ਮੌਕੇ ਸਾਰੇ ਪਰਿਵਾਰ ਨਾਲ਼ ਖੁਸ਼ੀ ਸਾਂਝੀ ਕਰਦੇ ਹੋਏ ਖੂਬ ਭੰਗੜਾ ਪਾਇਆ। ਉਹ ਜਦੋਂ ਵੀ ਛੁੱਟੀ ਤੋਂ ਵਾਪਸ ਪਰਤਦਾ ਤਾਂ ਨੈਸ਼ਨਲ ਹਾਈਵੇ 'ਤੇ ਬਣੇ ਦੇਸ਼ ਭਗਤ ਸੰਤ ਬਾਬਾ ਵਿਸਾਖਾ ਸਿੰਘ ਜੀ ਦੇ ਗੁਰਦੁਆਰਾ ਸਾਹਿਬ ਵਿਖੇ ਅਰਦਾਸ ਕਰ ਕੇ ਜਾਂਦਾ। ਇਸ ਵਾਰ ਛੁੱਟੀ ਦੌਰਾਨ ਪਤਨੀ ਅਤੇ ਬੱਚੇ ਨੂੰ ਨਵੇਂ ਕੱਪੜਿਆਂ ਦੇ ਨਾਲ ਕੱਪੜੇ ਧੋਣ ਵਾਲੀ ਮਸ਼ੀਨ ਲੈ ਕੇ ਦਿੱਤੀ। ਸੁਖਜਿੰਦਰ ਸਿੰਘ ਦੀ ਇਕ ਭੈਣ ਲਖਵਿੰਦਰ ਕੌਰ ਨੇਵੀ 'ਚ ਤਾਇਨਾਤ ਵਿਆਹੀ ਹੋਈ ਹੈ ਅਤੇ ਇਕ ਛੋਟਾ ਭਰਾ ਗੁਰਜੰਟ ਸਿੰਘ ਜੰਟਾ ਜੋ ਗਾਇਕ ਹੈ। ਕੁੱਲ 2 ਕਿੱਲੇ ਜ਼ਮੀਨ ਦਾ ਮਾਲਕ ਇਹ ਪਰਿਵਾਰ 7 ਮਾਲ ਡੰਗਰਾਂ ਤੋਂ ਆਪਣੇ ਘਰ ਦਾ ਗੁਜ਼ਾਰਾ ਚਲਾ ਰਿਹਾ ਸੀ, ਜਿਸ ਦਾ ਇੱਕੋ ਇਕ ਸਹਾਰਾ ਸੁਖਜਿੰਦਰ ਸਰਕਾਰੀ ਨੌਕਰੀ 'ਚ ਭਰਤੀ ਹੋਣ ਤੋਂ ਬਾਅਦ ਪੁਲਵਾਮਾ ਹਮਲੇ ਦੌਰਾਨ ਸਾਰਿਆਂ ਨੂੰ ਛੱਡ ਸੰਸਾਰ ਤੋਂ ਚਲੇ ਜਾਣ ਨਾਲ ਪਰਿਵਾਰ ਅਤੇ ਦੇਸ਼ ਲਈ ਬਹੁਤ ਵੱਡਾ ਘਾਟਾ ਮਹਿਸੂਸ ਕਰ ਰਿਹਾ ਹੈ।
ਪਾਠ ਦਾ ਭੋਗ ਅੱਜ :
ਸੁਖਜਿੰਦਰ ਸਿੰਘ ਨਮਿਤ ਆਖੰਡ ਪਾਠ ਦਾ ਭੋਗ 23 ਫਰਵਰੀ ਨੂੰ ਉਨ੍ਹਾਂ ਦੇ ਗ੍ਰਹਿ ਪਿੰਡ ਗੰਡੀਵਿੰਡ ਵਿਖੇ 10 ਵਜੇ ਪੈਣ ਉਪਰੰਤ ਸ਼ਰਧਾਂਜਲੀ ਸਮਾਰੋਹ ਪਿੰਡ ਗੰਡੀਵਿੰਡ ਦਾਣਾ ਮੰਡੀ ਫੋਕਲ ਪੁਆਇੰਟ ਵਿਖੇ ਹੋਵੇਗਾ।
ਮਹਿਕਦੇ ਗੁਲਾਬ ਵਾਂਗ ਕਾਬਲੀਅਤ ਦੀ ਮਹਿਕ ਵੰਡਣ ਵਾਲਾ ਗਭਰੂ ਸੀ 'ਮਨਿੰਦਰ ਅਤਰੀ'
NEXT STORY 
