ਨਵੀਂ ਦਿੱਲੀ– ਭਾਰਤੀ ਕ੍ਰਿਕਟ ’ਚ ਸੱਟ ਪ੍ਰਬੰਧਨ ਅਤੇ ਖਿਡਾਰੀਆਂ ਦੀ ਫਿਟਨੈੱਸ ਨੂੰ ਲੈ ਕੇ ਇਕ ਵਾਰ ਫਿਰ ਸਵਾਲ ਖੜ੍ਹੇ ਹੋ ਗਏ ਹਨ ਕਿਉਂਕਿ ‘ਸੈਂਟਰ ਆਫ ਐਕਸੀਲੈਂਸ (ਸੀ.ਓ.ਈ.) ਦੀ ਖੇਡ ਵਿਗਿਆਨ ਅਤੇ ਮੈਡੀਕਲ ਟੀਮ ਅਤੇ ਭਾਰਤੀ ਪੁਰਸ਼ ਸੀਨੀਅਰ ਚੋਣ ਕਮੇਟੀ ਵਿਚਾਲੇ ਤਾਲਮੇਲ ਦੀ ਕਮੀ ਕਾਰਨ ਜਸਪ੍ਰੀਤ ਬੁਮਰਾਹ ਸ਼੍ਰੀਲੰਕਾ ਵਿਰੁੱਧ ਟੈਸਟ ਸੀਰੀਜ਼ ’ਚੋਂ ਬਾਹਰ ਹੋ ਗਿਆ ਹੈ।
ਇਹ ਪਤਾ ਲੱਗਾ ਹੈ ਕਿ ਚੋਣ ਕਮੇਟੀ ਨੂੰ ਸ਼ੁਰੂਆਤ ’ਚ ਦੱਸਿਆ ਗਿਆ ਸੀ ਕਿ ਬੁਮਰਾਹ 15 ਅਗਸਤ ਤੋਂ ਸ਼ੁਰੂ ਹੋਣ ਵਾਲੀ ਇਸ ਟੈਸਟ ਸੀਰੀਜ਼ ਲਈ ਉਪਲੱਬਧ ਰਹੇਗਾ ਪਰ ਬਾਅਦ ’ਚ ਪਤਾ ਲੱਗਾ ਕਿ ਉਸ ਦੀ ਸੱਟ ਉਮੀਦ ਤੋਂ ਵੱਧ ਗੰਭੀਰ ਹੈ। ਖਿਡਾਰੀਆਂ ਦੀ ਸੱਟ ਪ੍ਰਬੰਧਨ ਵਿਵਸਥਾ ’ਤੇ ਚਰਚਾ ਲਈ ਸੋਮਵਾਰ ਨੂੰ ਵੀ.ਵੀ.ਐੱਸ. ਲਕਸ਼ਮਣ ਸਮੇਤ ਸੀ.ਓ.ਈ. ਦੇ ਚੋਟੀ ਦੇ ਅਧਿਕਾਰੀਆਂ ਤੇ ਚੋਣ ਕਮੇਟੀ ਦੇ ਪ੍ਰਧਾਨ ਅਜੀਤ ਅਗਰਕਰ ਵਿਚਾਲੇ ਆਨਲਾਈਨ ਮੀਟਿੰਗ ਹੋਈ।
ਖੇਡ ’ਚ ਸੱਟ ਲੱਗਣਾ ਸੁਭਾਵਿਕ ਪ੍ਰਕਿਰਿਆ ਹੈ ਪਰ ਅਤਿ-ਆਧੁਨਿਕ ਸੁਵਿਧਾਵਾਂ ਨਾਲ ਲੈਸ ਸੀ.ਓ.ਈ. ਦੀ ਖੇਡ ਵਿਗਿਆਨ ਟੀਮ ਦਾ ਪ੍ਰਦਰਸ਼ਨ ਹੁਣ ਤੱਕ ਉਮੀਦਾਂ ਅਨੁਸਾਰ ਨਹੀਂ ਹੈ।
ਬੀ.ਸੀ.ਸੀ.ਆਈ. ’ਚ ਨਿਤਿਨ ਪਟੇਲ ਦੇ ਜਾਣ ਤੋਂ ਬਾਅਦ ਤੋਂ ਖੇਡ ਵਿਗਿਆਨ ਵਿਭਾਗ ਦੇ ਮੁਖੀ ਦਾ ਅਹੁਦਾ ਖਾਲੀ ਹੈ। ਅਜਿਹੇ ’ਚ ਸੀ. ਓ.ਈ. ਦੇ ਅੰਤ੍ਰਿਮ ਖੇਡ ਵਿਗਿਆਨ ਮੁਖੀ ਧਨੰਜਯ ਕੌਸ਼ਿਕ ਦੀ ਭੂਮਿਕਾ ’ਤੇ ਵੀ ਨਜ਼ਰਾਂ ਹਨ, ਜੋ ਬੈਂਗਲੁਰੂ ਸਥਿਤ ਹਾਈ ਪ੍ਰਫਾਰਮੈਂਸ ਸੈਂਟਰ ਦਾ ਸੰਚਾਲਨ ਕਰ ਰਿਹਾ ਹੈ। ਉਸ ਦੀ ਯੋਗਤਾ ’ਤੇ ਹਾਲਾਂਕਿ ਸਵਾਲ ਨਹੀਂ ਹਨ ਪਰ ਖਿਡਾਰੀਆਂ ਦੀ ਵਾਪਸੀ ਦੀ ਸਮਾਂ-ਸੀਮਾ ਤੈਅ ਕਰਨ ਅਤੇ ‘ਰਿਟਰਨ ਟੂ ਪਲੇਅ’ ਪ੍ਰੋਟੋਕੋਲ ਦੀ ਲਗਾਤਾਰ ਪਾਲਣ ਨੂੰ ਲੈ ਕੇ ਸਵਾਲ ਉੱਠ ਰਹੇ ਹਨ।
ਹਰਸ਼ਿਤ ਰਾਣਾ ਦੇ ਮਾਮਲੇ ’ਚ ਵੀ ਇਹ ਸਵਾਲ ਉਠਾਇਆ ਜਾ ਰਿਹਾ ਹੈ ਕਿ ਜਦੋਂ ਉਸ ਦਾ ਭਾਰ ਜ਼ਿਆਦਾ ਦਿਸ ਰਿਹਾ ਸੀ ਤਦ ਵੀ ਖੇਡ ਵਿਗਿਆਨ ਟੀਮ ਨੇ ਉਸ ਨੂੰ ਫਿੱਟ ਕਿਵੇਂ ਐਲਾਨ ਕੀਤਾ। ਇਸ ਤੋਂ ਬਾਅਦ ਉਸ ਦੀ ਹੈਮਸਟ੍ਰਿੰਗ ਸੱਟ ਦੁਬਾਰਾ ਉੱਭਰ ਆਈ। ਇਸੇ ਤਰ੍ਹਾਂ ਦੱਖਣ ਭਾਰਤ ਦੇ ਇਕ ਟੀ-20 ਮਾਹਿਰ ਬੱਲੇਬਾਜ਼ ਦੇ ਇੰਗਲੈਂਡ ਪਹੁੰਚਣ ’ਤੇ ਜ਼ਿਆਦਾ ਭਾਰ ਹੋਣ ਦੀਆਂ ਖਬਰਾਂ ਸਨ।
ਵਾਸ਼ਿੰਗਟਨ ਸੁੰਦਰ ਅਤੇ ਨਿਤੀਸ਼ ਕੁਮਾਰ ਰੈੱਡੀ ਦੇ ਲਗਾਤਾਰ ਜ਼ਖ਼ਮੀ ਹੋਣ ’ਤੇ ਵੀ ਸਵਾਲ ਉੱਠ ਰਹੇ ਹਨ। ਸੁੰਦਰ ਵਰਗੇ ਨੌਜਵਾਨ ਸਪਿੰਨਰ ਦਾ ਵਾਰ-ਵਾਰ ਮਾਸਪੇਸ਼ੀਆਂ ’ਚ ਖਿਚਾਅ ਦੀ ਸਮੱਸਿਆ ਤੋਂ ਪ੍ਰੇਸ਼ਾਨ ਹੋਣਾ ਚਿੰਤਾ ਦਾ ਵਿਸ਼ਾ ਹੈ ਤਾਂ ਉੱਥੇ ਹੀ, ਇਸ ਗੱਲ ’ਤੇ ਸਵਾਲ ਉੱਠ ਰਹੇ ਹਨ ਕਿ ਕੀ ਰੈੱਡੀ ਨੂੰ ਗੇਂਦਬਾਜ਼ੀ ਦੀ ਰਫਤਾਰ ਵਧਾਉਣ ਲਈ ਸੁਤੰਤਰ ਤੇਜ਼ ਗੇਂਦਬਾਜ਼ੀ ਕੋਚ ਸਟੀਫਨ ਜੋਨਸ ਨਾਲ ਵੱਖਰੇ ਤੌਰ ’ਤੇ ਸਿਖਲਾਈ ਦੀ ਇਜਾਜ਼ਤ ਦਿੱਤੀ ਗਈ ਸੀ? ਕੀ 120 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਤੋਂ ਅਚਾਨਕ 130 ਕਿਲੋਮੀਟਰ ਪ੍ਰਤੀ ਘੰਟੇ ਦੇ ਵਿਚਾਲੇ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਉਸ ਦੀ ਸੱਟ ਦਾ ਕਾਰਨ ਬਣਿਆ?
ਸੀ.ਓ.ਈ. ਦੇ ਕੰਮਕਾਜ ’ਤੇ ਨਜ਼ਰ ਰੱਖਣ ਵਾਲੇ ਬੀ.ਸੀ.ਸੀ.ਆਈ. ਦੇ ਇਕ ਅਧਿਕਾਰੀ ਨੇ ਨਾਂ ਗੁਪਤ ਰੱਖਣ ਦੀ ਸ਼ਰਤ ’ਤੇ ਕਿਹਾ, ‘‘ਸਭ ਤੋਂ ਸੁਰੱਖਿਅਤ ਬਦਲ ਕਿਸੇ ਖਿਡਾਰੀ ਨੂੰ ਬਾਹਰ ਕਰਨਾ ਹੁੰਦਾ ਹੈ ਪਰ ਸਵਾਲ ਇਹ ਹੈ ਕਿ ਕੀ ਸੀ.ਓ.ਈ. ਦੀ ਮੌਜੂਦਾ ਖੇਡ ਵਿਗਿਆਨ ਟੀਮ ਚੋਟੀ ਦੇ ਖਿਡਾਰੀਆਂ ਨੂੰ ਸਮੇਂ ’ਤੇ ਮੈਦਾਨ ’ਤੇ ਵਾਪਸ ਲਿਆਉਣ ਲਈ ਪੂਰੀ ਕੋਸ਼ਿਸ਼ ਕਰ ਰਹੀ ਹੈ।’’
ਉਸ ਨੇ ਕਿਹਾ, ‘‘ਚੋਣਕਾਰਾਂ ਨੂੰ ਭਰੋਸਾ ਦਿਵਾਇਆ ਗਿਆ ਸੀ ਕਿ ਬੁਮਰਾਹ ਘੱਟੋ-ਘੱਟ ਇਕ ਟੈਸਟ ਮੈਚ ਲਈ ਉਪਲੱਬਧ ਰਹੇਗਾ। ਹੁਣ ਉਸ ਨੂੰ ਦੱਸਿਆ ਗਿਆ ਹੈ ਕਿ ਪੈਰ ਦੀ ਸੱਟ ਤੋਂ ਉੱਭਰ ਰਿਹਾ ਸਾਈ ਸੁਦਰਸ਼ਨ ਨੈੱਟ ’ਤੇ 75 ਮਿੰਟ ਬੱਲੇਬਾਜ਼ੀ ਕਰ ਰਿਹਾ ਹੈ ਅਤੇ ਸੱਟ ਤੋਂ ਚੰਗੀ ਵਾਪਸੀ ਦੇ ਸੰਕੇਤ ਦੇ ਰਿਹਾ ਹੈ ਪਰ ਜੇਕਰ ਬਾਅਦ ’ਚ ਇਹ ਦੱਸਿਆ ਜਾਂਦਾ ਹੈ ਕਿ ਸਾਈ ਸ਼੍ਰੀਲੰਕਾ ਵਿਰੁੱਧ ਪਹਿਲੇ ਟੈਸਟ ਤੱਕ ਫਿੱਟ ਨਹੀਂ ਹੋ ਸਕੇਗਾ ਤਾਂ ਚੋਣ ਪ੍ਰਕਿਰਿਆ ਪ੍ਰਭਾਵਿਤ ਹੋਵੇਗੀ।’’
ਭਾਰਤੀ ਟੀਮ ਦੇ ਫਿਜ਼ੀਓ ਕਾਮਲੇਸ਼ ਜੈਨ ਦੀ ਭੂਮਿਕਾ ਵੀ ਹੁਣ ਸਮੀਖਿਆ ਦੇ ਘੇਰੇ ’ਚ ਦੱਸੀ ਜਾ ਰਹੀ ਹੈ। ਉਹ ਤਕਰੀਬਨ 5 ਸਾਲਾਂ ਤੋਂ ਭਾਰਤੀ ਟੀਮ ਨਾਲ ਹੈ ਅਤੇ ਖਿਡਾਰੀਆਂ ਵਿਚਾਲੇ ਕਾਫੀ ਪ੍ਰਸਿੱਧ ਮੰਨਿਆ ਜਾਂਦਾ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਮੁੱਖ ਕੋਚ ਗੌਤਮ ਗੰਭੀਰ ਅਤੇ ਅਗਰਕਰ ਇਸ ਬੈਠਕ ਦਾ ਇੰਤਜ਼ਾਰ ਕਰ ਰਹੇ ਹਨ। ਮੀਟਿੰਗ ’ਚ ਲਕਸ਼ਮਣ ਅਤੇ ਬੀ.ਸੀ.ਸੀ.ਆਈ .ਸਕੱਤਰ ਦੇਵਜੀਤ ਸੈਕੀਆ ਵੀ ਸ਼ਾਮਲ ਹੋਵੇਗਾ।
ਗੰਭੀਰ ਦੇ ਅਗਲੇ ਤਿੰਨ ਹਫਤੇ ਸ਼੍ਰੀਲੰਕਾ ’ਚ ਰਹਿਣ ਕਾਰਨ ਇਹ ਸਪੱਸ਼ਟ ਨਹੀਂ ਹੈ ਕਿ ਸਮੀਖਿਆ ਮੀਟਿੰਗ ਆਹਮੋ-ਸਾਹਮਣੇ ਹੋਵੇਗੀ ਜਾਂ ਆਨਲਾਈਨ ਹੋਵੇਗੀ। ਇਹ ਸਵਾਲ ਵੀ ਉੱਠ ਰਿਹਾ ਹੈ ਕਿ ਜੁਲਾਈ ’ਚ ਜਦੋਂ ਗੰਭੀਰ ਅਤੇ ਅਗਰਕਰ ਦੋਵੇਂ ਭਾਰਤ ’ਚ ਉਪਲਬਧ ਸਨ ਤਦ ਇਹ ਮੀਟਿੰਗ ਕਿਉਂ ਨਹੀਂ ਕੀਤੀ ਗਈ।
'ਮਾਫ਼ ਕਰਨਾ ਐਸ਼ ਭਾਈ...' ਅਰਸ਼ਦੀਪ ਸਿੰਘ ਨੇ ਰਵੀਚੰਦਰਨ ਅਸ਼ਵਿਨ ਤੋਂ ਮੁਆਫੀ ਕਿਉਂ ਮੰਗੀ?
NEXT STORY 
