ਕ੍ਰਾਈਸਟਚਰਚ- ਭਾਰਤ ਤੇ ਨਿਊਜ਼ੀਲੈਂਡ ਦਰਮਿਆਨ 5 ਮੈਚਾਂ ਦੀ ਟੀ20 ਸੀਰੀਜ਼ ਦਾ ਪਹਿਲਾ ਮੈਚ ਅੱਜ ਕ੍ਰਾਈਸਟਚਰਚ ਦੇ ਹੇਗਲੇ ਓਵਰ ਸਟੇਡੀਅਮ 'ਚ ਖੇਡਿਆ ਜਾਵੇਗਾ। ਪਿਛਲੀਆਂ 2 ਟੀ-20 ਲੜੀਆਂ ’ਚ ਅਜੇਤੂ ਰਹੀ ਭਾਰਤੀ ਟੀਮ ਨੂੰ ਨਿਊਜ਼ੀਲੈਂਡ ਆ ਕੇ ਆਰਾਮ ਕਰਨ, ਅਨੁਕੂਲਨ ਤੇ ਅਭਿਆਸ ਲਈ 2 ਹੀ ਦਿਨ ਦਾ ਸਮਾਂ ਮਿਲਿਆ ਪਰ ਆਪਣੇ ਬੱਲੇਬਾਜ਼ਾਂ ਦੇ ਦਮ ’ਤੇ ਸ਼੍ਰੇਅਸ ਅਈਅਰ ਦੀ ਟੀਮ ਜਿੱਤ ਨਾਲ ਦੌਰੇ ਦਾ ਆਗਾਜ਼ ਕਰਨਾ ਚਾਹੇਗੀ। ਨਿਊਜ਼ੀਲੈਂਡ ’ਚ ਪਿਛਲੀ ਵਾਰ ਭਾਰਤ ਨੇ 2022 ’ਚ ਨੇਪੀਅਰ ’ਚ ਟੀ-20 ਮੈਚ ਖੇਡਿਆ ਸੀ ਤੇ ਮੀਂਹ ਪ੍ਰਭਾਵਿਤ ਉਹ ਮੈਚ ਡਕਵਰਥ ਲੂਈਸ ਪ੍ਰਣਾਲੀ ਦੇ ਆਧਾਰ ’ਤੇ ਡਰਾਅ ਰਿਹਾ ਸੀ। ਭਾਰਤ ਨੇ ਉਹ ਲੜੀ ਜਿੱਤੀ ਸੀ ਕਿਉਂਕਿ ਖਰਾਬ ਮੌਸਮ ਕਾਰਨ ਇਕ ਹੀ ਮੈਚ ਹੋ ਸਕਿਆ ਸੀ।
ਭਾਰਤ ਦੇ ਸਿਰਫ 4 ਬੱਲੇਬਾਜ਼ ਪਹਿਲਾਂ ਨਿਊਜ਼ੀਲੈਂਡ ’ਚ ਟੀ-20 ਖੇਡ ਚੁੱਕੇ ਹਨ ਜਿਨ੍ਹਾਂ ’ਚ ਕਪਤਾਨ ਅਈਅਰ, ਈਸ਼ਾਨ ਕਿਸ਼ਨ, ਸੰਜੂ ਸੈਮਸਨ ਤੇ ਸ਼ਿਵਮ ਦੂਬੇ ਸ਼ਾਮਲ ਹਨ। ਅਭਿਸ਼ੇਕ ਸ਼ਰਮਾ, ਤਿਲਕ ਵਰਮਾ ਤੇ ਵੈਭਵ ਸੂਰਯਵੰਸ਼ੀ ਭਾਵੇਂ ਹੀ ਹਮਲਾਵਰ ਪਾਰੀਆਂ ਖੇਡਣ ’ਚ ਮਾਹਿਰ ਹੋਣ ਪਰ ਇੱਥੋਂ ਦੀਆਂ ਤੇਜ਼ ਤੇ ਉਛਾਲ ਵਾਲੀਆਂ ਪਿੱਚਾਂ ’ਤੇ ਉਨ੍ਹਾਂ ਨੂੰ ਢਲਣ ’ਚ ਸਮਾਂ ਲੱਗ ਸਕਦਾ ਹੈ। ਅਈਅਰ ਦੀ ਕਪਤਾਨੀ ਦੀ ਸ਼ੁਰੂਆਤ ਆਇਰਲੈਂਡ ਤੇ ਇੰਗਲੈਂਡ ਵਿਰੁੱਧ ਹਾਰ ਨਾਲ ਹੋਈ ਸੀ ਤੇ ਹੁਣ ਉਸ ਦੇ ਸਾਹਮਣੇ ਖੁਦ ਨੂੰ ਮੁਸ਼ਕਿਲ ਹਾਲਾਤ ’ਚ ਸਾਬਤ ਕਰਨ ਦੀ ਚੁਣੌਤੀ ਹੋਵੇਗੀ।
ਏਸ਼ੀਆਈ ਖੇਡਾਂ ’ਚ ਸੋਨ ਤਮਗਾ ਜਿੱਤਣ ਤੋਂ ਬਾਅਦ ਭਾਰਤ ਨੇ ਵੈਸਟਇੰਡੀਜ਼ ਵਿਰੁੱਧ ਘਰੇਲੂ ਲੜੀ ਡਰਾਅ ਖੇਡੀ। ਜੇਕਰ ਨਿਊਜ਼ੀਲੈਂਡ ਵਿਰੁੱਧ ਲੜੀ ਵੀ ਉਸੇ ਤਰ੍ਹਾਂ ਰਹਿੰਦੀ ਹੈ ਜਿਵੇਂ ਇੰਗਲੈਂਡ ਵਿਰੁੱਧ ਸੀ ਤਾਂ ਅਈਅਰ ’ਤੇ ਦਬਾਅ ਵੱਧ ਜਾਵੇਗਾ। ਅਜਿਹਾ ਮੰਨਿਆ ਜਾ ਰਿਹਾ ਹੈ ਕਿ 2 ਸਾਲ ਬਾਅਦ ਆਸਟ੍ਰੇਲੀਆ ਤੇ ਨਿਊਜ਼ੀਲੈਂਡ ’ਚ ਹੋਣ ਵਾਲੇ ਟੀ-20 ਵਿਸ਼ਵ ਕੱਪ ’ਚ ਉਹ ਭਾਰਤ ਦਾ ਕਪਤਾਨ ਹੋਵੇਗਾ।
ਵੈਸਟਇੰਡੀਜ਼ ਵਿਰੁੱਧ ਘਰੇਲੂ ਲੜੀ ਖਤਮ ਹੋਣ ਤੋਂ ਬਾਅਦ ਭਾਰਤ ਤੋਂ ਲੰਬੀ ਉਡਾਣ ਲੈ ਕੇ ਇੱਥੇ ਪਹੁੰਚਣ ’ਤੇ ਅਈਅਰ ਨੇ ਕਿਹਾ ਕਿ ਉਸ ਦੀ ਟੀਮ ਨੂੰ ਵੱਖ-ਵੱਖ ਹਾਲਾਤ ’ਚ ਖੇਡਣ ਦੀ ਆਦਤ ਹੈ। ਭਾਰਤੀ ਟੀਮ ’ਚ ਜ਼ਖ਼ਮੀ ਆਲਰਾਊਂਡਰ ਹਾਰਦਿਕ ਪੰਡਯਾ ਤੇ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਵੀ ਨਹੀਂ ਹਨ। ਬੁਮਰਾਹ ਇਸ ਦੌਰੇ ’ਚ ਸਿਰਫ ਵਨ ਡੇ ਜਾਂ ਟੈਸਟ ਖੇਡੇਗਾ।
ਸੂਰਯਵੰਸ਼ੀ ਦੇ ਖੇਡਣ ਦੀ ਉਮੀਦ ਘੱਟ ਹੀ ਹੈ ਪਰ ਅਭਿਸ਼ੇਕ ਤੇ ਸੈਮਸਨ ਨੇ ਵੈਸਟਇੰਡੀਜ਼ ਵਿਰੁੱਧ ਚੰਗਾ ਪ੍ਰਦਰਸ਼ਨ ਕੀਤਾ ਹੈ।
ਗੇਂਦਬਾਜ਼ੀ ’ਚ ਤਜ਼ਰਬੇਕਾਰ ਤੇਜ਼ ਗੇਂਦਬਾਜ਼ ਭੁਵਨੇਸ਼ਵਰ ਕੁਮਾਰ ਦੀ 4 ਸਾਲ ਬਾਅਦ ਵਾਪਸੀ ਹੋਈ ਹੈ ਤੇ ਸਪਿੰਨਰ ਵਰੁਣ ਚੱਕਰਵਰਤੀ ਫਿੱਟ ਹੋ ਕੇ ਟੀਮ ’ਚ ਪਰਤਿਆ ਹੈ। ਆਲਰਾਊਂਡਰ ਨਿਤੀਸ਼ ਕੁਮਾਰ ਰੈੱਡੀ ਤੇ ਸ਼ਿਵਮ ਦੂਬੇ ਨੂੰ ਆਪਣੀ ਉਪਯੋਗਤਾ ਸਾਬਤ ਕਰਨੀ ਪਵੇਗੀ।
ਨਿਊਜ਼ੀਲੈਂਡ ਦੇ ਕਪਤਾਨ ਮਿਸ਼ੇਲ ਸੈਂਟਨਰ ਨੇ ਕਿਹਾ ਕਿ ਸ਼ਾਨਦਾਰ ਬੱਲੇਬਾਜ਼ਾਂ ਨਾਲ ਭਰੀ ਭਾਰਤੀ ਟੀਮ ਲਈ ਸਪਾਟ ਪਿੱਚ ਬਣਾਉਣਾ ਸਹੀ ਰਣਨੀਤੀ ਨਹੀਂ ਹੁੰਦੀ। ਉਸ ਨੇ ਉਮੀਦ ਜਤਾਈ ਕਿ ਗਲੇਨ ਫਿਲਿਪਸ ਤੇ ਫਿਨ ਐਲਨ ਵਰਗੇ ਉਸ ਦੇ ਹਮਲਾਵਰ ਬੱਲੇਬਾਜ਼ ਭਾਰਤੀਆਂ ’ਤੇ ਭਾਰੂ ਪੈਣਗੇ। ਨਿਊਜ਼ੀਲੈਂਡ ਕੋਲ ਜੈਕਬ ਡਫੀ, ਮੈਟ ਹੈਨਰੀ, ਐਡਮ ਮਿਲਨੇ, ਲਾਕੀ ਫਰਗਿਊਸਨ, ਕਾਇਲ ਜੈਮੀਸਨ ਤੇ ਬਲੇਅਰ ਟਿਕਨਰ ਵਰਗੇ ਸ਼ਾਨਦਾਰ ਗੇਂਦਬਾਜ਼ ਹਨ।
ਟੀਮਾਂ :
ਭਾਰਤ : ਸ਼੍ਰੇਅਸ ਅਈਅਰ (ਕਪਤਾਨ), ਅਭਿਸ਼ੇਕ ਸ਼ਰਮਾ, ਸੰਜੂ ਸੈਮਸਨ, ਵੈਭਵ ਸੂਰਯਵੰਸ਼ੀ, ਈਸ਼ਾਨ ਕਿਸ਼ਨ, ਤਿਲਕ ਵਰਮਾ, ਅਕਸ਼ਰ ਪਟੇਲ, ਸ਼ਿਵਮ ਦੂਬੇ, ਨਿਤੀਸ਼ ਕੁਮਾਰ ਰੈੱਡੀ, ਨਮਨ ਧੀਰ, ਪ੍ਰਿੰਸ ਯਾਦਵ, ਮਯੰਕ ਯਾਦਵ, ਅਰਸ਼ਦੀਪ ਸਿੰਘ, ਭੁਵਨੇਸ਼ਵਰ ਕੁਮਾਰ, ਵਰੁਣ ਚੱਕਰਵਰਤੀ, ਕੁਲਦੀਪ ਯਾਦਵ।
ਨਿਊਜ਼ੀਲੈਂਡ : ਮਿਸ਼ੇਲ ਸੈਂਟਨਰ (ਕਪਤਾਨ), ਫਿਨ ਐਲਨ, ਮਿਸ਼ੇਲ ਬ੍ਰੇਸਵੈੱਲ, ਮਾਰਕ ਚੈਪਮੈਨ, ਡੇਵੋਨ ਕਾਨਵੇ, ਜੈਕਬ ਡਫੀ, ਲਾਕੀ ਫਰਗਿਊਸਨ, ਜੈਕ ਫੋਕੇਸ, ਮੈਟ ਹੈਨਰੀ, ਬੇਵੋਨ ਜੈਕਬਸ, ਕਾਇਲ ਜੈਮੀਸਨ, ਐਡਮ ਮਿਲਨੇ, ਡੈਰਿਲ ਮਿਸ਼ੇਲ, ਗਲੇਨ ਫਿਲਿਪਸ, ਟਿਮ ਸੀਫਰਟ, ਨਾਥਨ ਸਮਿਥ।
ਮਿਚੇਲ ਸਟਾਰਕ ਨੇ ਰਚਿਆ ਇਤਿਹਾਸ, ਗਲੇਨ ਮੈਕਗ੍ਰਾ ਦਾ ਤੋੜਿਆ ਰਿਕਾਰਡ
NEXT STORY 
