ਨਿਊਜਰਸੀ, (ਇੰਟ.)- ਫੀਫਾ ਵਿਸ਼ਵ ਕੱਪ ਦੇ ਫਾਈਨਲ ਤੋਂ ਪਹਿਲਾਂ ਫੁੱਟਬਾਲ ਜਗਤ ’ਚ ਇਕ ਅਜਿਹੀ ਕਹਾਣੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ, ਜਿਹੜੀ ਕਿਸੇ ਫਿਲਮੀ ਕਹਾਣੀ ਤੋਂ ਘੱਟ ਨਹੀਂ ਲੱਗਦੀ। ਮੌਜੂਦਾ ਚੈਂਪੀਅਨ ਅਰਜਨਟੀਨਾ ਨੇ ਇੰਗਲੈਂਡ ਨੂੰ 2-1 ਨਾਲ ਹਰਾ ਕੇ ਫਾਈਨਲ ’ਚ ਜਗ੍ਹਾ ਬਣਾਈ ਹੈ, ਜਿੱਥੇ ਉਸ ਦਾ ਸਾਹਮਣਾ ਯੂਰਪੀਅਨ ਚੈਂਪੀਅਨ ਸਪੇਨ ਨਾਲ ਹੋਵੇਗਾ। ਇਸ ਮੁਕਾਬਲੇ ਦਾ ਸਭ ਤੋਂ ਵੱਡਾ ਆਕਰਸ਼ਣ ਲਿਓਨਲ ਮੈਸੀ ਅਤੇ ਸਪੇਨ ਦੇ ਨੌਜਵਾਨ ਸਟਾਰ ਲਾਮਿਨ ਯਾਮਾਲ ਦੀ ਪਹਿਲੀ ਆਹਮੋ-ਸਾਹਮਣੇ ਦੀ ਭੇੜ ਹੋਵੇਗੀ ਪਰ ਦੋਵਾਂ ਦੀ ਪਹਿਲੀ ਮੁਲਾਕਾਤ ਮੈਦਾਨ ’ਤੇ ਨਹੀਂ, ਸਗੋਂ ਉਦੋਂ ਹੋਈ ਸੀ, ਜਦੋਂ ਯਾਮਾਲ ਸਿਰਫ ਕੁਝ ਮਹੀਨਿਆਂ ਦਾ ਬੱਚਾ ਸੀ।
2007 ਦੀ ਤਸਵੀਰ ਨੇ ਫਿਰ ਖੱਟੀਆਂ ਸੁਰਖੀਆਂ
ਵਿਸ਼ਵ ਕੱਪ ਫਾਈਨਲ ਤੋਂ ਪਹਿਲਾਂ 2007 ਦੀ ਇਕ ਤਸਵੀਰ ਸੋਸ਼ਲ ਮੀਡੀਆ ’ਤੇ ਫਿਰ ਵਾਇਰਲ ਹੋ ਗਈ ਹੈ। ਤਸਵੀਰ ’ਚ ਨੌਜਵਾਨ ਮੈਸੀ ਬੱਚੇ ਲਾਮਿਨ ਯਾਮਾਲ ਨੂੰ ਨੁਹਾਉਂਦਾ ਹੋਇਆ ਦਿਖਾਈ ਦੇ ਰਿਹਾ ਹੈ। ਇਹ ਤਸਵੀਰ 2 ਸਾਲ ਪਹਿਲਾਂ ਵੀ ਯੂਰੋ 2024 ਦੌਰਾਨ ਚਰਚਾ ’ਚ ਆਈ ਸੀ ਪਰ ਹੁਣ ਵਿਸ਼ਵ ਕੱਪ ਫਾਈਨਲ ਤੋਂ ਪਹਿਲਾਂ ਇਸ ਦੀ ਅਹਿਮੀਅਤ ਹੋਰ ਵਧ ਗਈ ਹੈ। ਯਾਮਾਲ ਦੇ ਪਿਤਾ ਮੁਨਿਰ ਨਸਰਾਉਈ ਨੇ ਇਹ ਤਸਵੀਰ ਸਾਂਝੀ ਕਰਦਿਆਂ ਲਿਖਿਆ ਸੀ, ‘‘ਦੋ ਧਾਕੜਾਂ ਦੀ ਸ਼ੁਰੂਆਤ’’।
ਯੂਨੀਸੇਫ ਦੇ ਚੈਰਿਟੀ ਕੈਲੰਡਰ ਲਈ ਹੋਇਆ ਸੀ ਫੋਟੋਸ਼ੂਟ
ਇਹ ਤਸਵੀਰ ਫ੍ਰੀਲਾਂਸ ਫੋਟੋਗ੍ਰਾਫਰ ਜੋਆਨ ਮਾਨਫੋਰਟ ਨੇ 2007 ’ਚ ਖਿੱਚੀ ਸੀ। ਉਸ ਸਮੇਂ ਕੈਟਲਨ ਅਖ਼ਬਾਰ ਡਿਯਾਰੀਓ ਸਪੋਰਟ ਅਤੇ ਯੂਨੀਸੇਫ ਵੱਲੋਂ ਇਕ ਚੈਰਿਟੀ ਕੈਲੰਡਰ ਤਿਆਰ ਕੀਤਾ ਜਾ ਰਿਹਾ ਸੀ। ਇਸ ਤਹਿਤ ਬਾਰਸੀਲੋਨਾ ਦੇ ਖਿਡਾਰੀਆਂ ਦੀਆਂ ਬੱਚਿਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨਾਲ ਤਸਵੀਰਾਂ ਲਈਆਂ ਗਈਆਂ ਸਨ। ਲੱਕੀ ਡਰਾਅ ਦੇ ਜ਼ਰੀਏ ਯਾਮਾਲ ਦੇ ਪਰਿਵਾਰ ਦੀ ਚੋਣ ਹੋਈ ਅਤੇ ਕੈਂਪ ਨੋਊ ’ਚ ਮੈਸੀ ਨਾਲ ਇਹ ਯਾਦਗਾਰ ਫੋਟੋਸ਼ੂਟ ਹੋਇਆ।
ਸ਼ਰਮੀਲੇ ਮੈਸੀ ਲਈ ਵੀ ਸੀ ਅਨੌਖਾ ਤਜਰਬਾ
ਫੋਟੋਗ੍ਰਾਫਰ ਮਾਨਫੋਰਟ ਮੁਤਾਬਕ ਉਸ ਸਮੇਂ 20 ਸਾਲਾ ਮੈਸੀ ਬੇਹੱਦ ਸ਼ਰਮੀਲੇ ਸੁਭਾਅ ਦਾ ਸੀ। ਜਦੋਂ ਉਹ ਡਰੈਸਿੰਗ ਰੂਮ ’ਚ ਪਹੁੰਚਿਆ ਤਾਂ ਉੱਥੇ ਪਾਣੀ ਨਾਲ ਭਰਿਆ ਇਕ ਛੋਟਾ ਟੱਬ ਅਤੇ ਉਸ ’ਚ ਬੱਚਾ ਯਾਮਾਲ ਮੌਜੂਦ ਸਨ। ਸ਼ੁਰੂਆਤ ’ਚ ਮੈਸੀ ਨੂੰ ਸਮਝ ਹੀ ਨਹੀਂ ਆਇਆ ਕਿ ਬੱਚੇ ਨੂੰ ਕਿਵੇਂ ਗੋਦ ’ਚ ਫੜੇ। ਕਿਸੇ ਨੇ ਵੀ ਉਸ ਸਮੇਂ ਨਹੀਂ ਸੋਚਿਆ ਸੀ ਕਿ ਇਹੀ ਬੱਚਾ ਇਕ ਦਿਨ ਦੁਨੀਆ ਦੇ ਸਭ ਤੋਂ ਵੱਡੇ ਫੁੱਟਬਾਲ ਮੰਚ ’ਚ ਮੈਸੀ ਦਾ ਵਿਰੋਧੀ ਬਣੇਗਾ।
ਯਾਮਾਲ ਨੇ ਘੱਟ ਉਮਰ ’ਚ ਰਚਿਆ ਇਤਿਹਾਸ
ਬਾਰਸੀਲੋਨਾ ਲਈ 15 ਸਾਲ ਦੀ ਉਮਰ ’ਚ ਡੈਬਿਊ ਕਰਨ ਵਾਲੇ ਲਾਮਿਨ ਯਾਮਾਲ ਨੇ ਬੇਹੱਦ ਘੱਟ ਸਮੇਂ ’ਚ ਖੁਦ ਨੂੰ ਦੁਨੀਆ ਦੇ ਸਰਵਸ਼੍ਰੇਸ਼ਠ ਨੌਜਵਾਨ ਖਿਡਾਰੀਆਂ ’ਚ ਸ਼ਾਮਿਲ ਕਰ ਲਿਆ। ਉਹ ਕਲੱਬ ਨਾਲ ਕਈ ਖਿਤਾਬ ਜਿੱਤ ਚੁੱਕਾ ਹੈ ਅਤੇ ਸਪੇਨ ਨੂੰ ਯੂਰੋ 2024 ਦਾ ਚੈਂਪੀਅਨ ਬਣਾਉਣ ’ਚ ਵੀ ਅਹਿਮ ਭੂਮਿਕਾ ਨਿਭਾ ਚੁੱਕਾ ਹੈ। 19 ਸਾਲ ਦੀ ਉਮਰ ’ਚ ਹੀ ਉਸ ਨੂੰ ਫੁੱਟਬਾਲ ਦਾ ਅਗਲਾ ਸੁਪਰਸਟਾਰ ਮੰਨਿਆ ਜਾ ਰਿਹਾ ਹੈ।
ਵਿਸ਼ਵ ਕੱਪ ਫਾਈਨਲ ’ਚ ਪੀੜ੍ਹੀਆਂ ਦੀ ਟੱਕਰ
39 ਸਾਲਾ ਲਿਓਨਲ ਮੈਸੀ ਨੂੰ ਫੁੱਟਬਾਲ ਇਤਿਹਾਸ ਦੇ ਮਹਾਨ ਖਿਡਾਰੀਆਂ ’ਚ ਗਿਣਿਆ ਜਾਂਦਾ ਹੈ, ਜਦਕਿ ਯਾਮਾਲ ਨੂੰ ਉਨ੍ਹਾਂ ਦਾ ਉੱਤਰਾਧਿਕਾਰੀ ਮੰਨਿਆ ਜਾ ਰਿਹਾ ਹੈ। ਅਜਿਹੇ ’ਚ ਵਿਸ਼ਵ ਕੱਪ ਫਾਈਨਲ ਸਿਰਫ ਅਰਜਨਟੀਨਾ ਅਤੇ ਸਪੇਨ ਵਿਚਾਲੇ ਖਿਤਾਬੀ ਮੁਕਾਬਲਾ ਨਹੀਂ ਹੋਵੇਗਾ, ਸਗੋਂ ਇਹ 2 ਪੀੜ੍ਹੀਆਂ, 2 ਯੁੱਗਾਂ ਅਤੇ 2 ਅਸਾਧਾਰਨ ਪ੍ਰਤਿਭਾਵਾਂ ਵਿਚਾਲੇ ਯਾਦਗਾਰ ਟੱਕਰ ਵੀ ਸਾਬਿਤ ਹੋ ਸਕਦਾ ਹੈ। ਜੇਕਰ ਯਾਮਾਲ ਆਪਣੀ ਟੀਮ ਨੂੰ ਵਿਸ਼ਵ ਚੈਂਪੀਅਨ ਬਣਾਉਣ ’ਚ ਸਫਲ ਰਹਿੰਦਾ ਹੈ ਤਾਂ ਇਹ ਉਸ ਦੇ ਸ਼ਾਨਦਾਰ ਕਰੀਅਰ ਦੀਆਂ ਸਭ ਤੋਂ ਵੱਡੀਆਂ ਪ੍ਰਾਪਤੀਆਂ ’ਚੋਂ ਇਕ ਹੋਵੇਗੀ।
ENG Vs IND: ਭਾਰਤ ਨੂੰ ਇੰਗਲੈਂਡ 'ਚ ਇੱਕ ਹੋਰ ਝਟਕਾ, ਧਾਕੜ ਖਿਡਾਰੀ ਆਖਰੀ ਮੈਚ ਤੋਂ ਬਾਹਰ
NEXT STORY 
