ਜਸਵੰਤ ਸਿੰਘ ‘ਅਜੀਤ’
ਜਦੋਂ ਤੋਂ ਸੁਖਦੇਵ ਸਿੰਘ ਢੀਂਡਸਾ ਵਲੋਂ ਆਪਣੇ ਸ਼੍ਰੋਮਣੀ ਅਕਾਲੀ ਦਲ (ਲੋਕਤੰਤਰਿਕ) ਦੇ ਗਠਨ ਦਾ ਐਲਾਨ ਕੀਤਾ ਗਿਆ ਹੈ, ਉਦੋਂ ਤੋਂ ਹੀ ਪੰਜਾਬ ਅਤੇ ਦਿੱਲੀ ਦੇ ਅਕਾਲੀ ਧੜਿਆਂ ਦੀ ਸਰਗਰਮੀ ’ਚ ਤੇਜ਼ੀ ਆ ਗਈ ਹੈ, ਜਿਥੇ ਸੁਖਬੀਰ ਸਿੰਘ ਬਾਦਲ ਅਤੇ ਉਨ੍ਹਾਂ ਦੇ ਵਫਾਦਾਰ ਸਾਥੀਆਂ ਵਲੋਂ ਆਪਣੇ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਨੂੰ ਸ. ਢੀਂਡਸਾ ਵਲੋਂ ਲਗਾਈ ਜਾਣ ਵਾਲੀ ਸੰਨ੍ਹ ਤੋਂ ਬਚਾਉਣ ਲਈ ਅਜਿਹੀ ਨਾਕਾਬੰਦੀ ਕੀਤੀ ਗਈ ਹੈ ਕਿ ਉਸਦੇ ਕਾਰਨ ਇਕ ਤਾਂ ਦਲ ਦੇ ਛੋਟੇ-ਵੱਡੇ ਮੁਖੀਆਂ ਨੇ ਢੀਂਡਸਾ ਅਤੇ ਉਨ੍ਹਾਂ ਦੇ ਦਲ ’ਤੇ ਸ਼ਬਦੀ ਹਮਲੇ ਕਰ ਕੇ ਸੁਖਬੀਰ ਨੂੰ ਉਨ੍ਹਾਂ ਪ੍ਰਤੀ ਆਪਣੀ ਵਫਾਦਾਰੀ ਦਾ ਅਹਿਸਾਸ ਕਰਵਾਉਣਾ ਸ਼ੁਰੂ ਕਰ ਦਿੱਤਾ ਹੈ।
ਦੂਸਰੇ ਪਾਸੇ ਸੁਖਬੀਰ ਸਿੰਘ ਬਾਦਲ ਨੇ ਵੱਡੇ ਪੱਧਰ ’ਤੇ ਅਹੁਦਿਆਂ ਦੀ ਵੰਡ ਕਰ ਕੇ ਦਲ-ਬਦਲ ਕਰ ਜਾਣ ਵਾਲੇ ਸੰਭਾਵਿਤ ਮੁਖੀਆਂ, ਜਿਨ੍ਹਾਂ ਨੂੰ ਸੁਖਬੀਰ ਵਲੋਂ ਲੰਬੇ ਸਮੇਂ ਤੋਂ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਗਿਆ ਸੀ, ’ਚ ਬਾਦਲ ਅਕਾਲੀ ਦਲ ਨੂੰ ਛੱਡ ਕੇ ਲੋਕਤੰਤਰਿਕ ਅਕਾਲੀ ਦਲ ’ਚ ਹਿਜਰਤ ਕਰ ਜਾਣ ਦੀ ਇੱਛਾ ਵਧਦੀ ਜਾ ਰਹੀ ਹੈ। ਇਸ ਇੱਛਾ ਨੂੰ ਪੂਰਾ ਕਰਨ ਦੇ ਰਸਤੇ ’ਚ ਅਜੇ ਤਕ ਜੋ ਦੁਚਿੱਤੀ ਬਣੀ ਆ ਰਹੀ ਸੀ, ਉਸ ਨੂੰ ਰਣਜੀਤ ਸਿੰਘ ਤਲਵੰਡੀ, ਜੋ ਕਿਸੇ ਸਮੇਂ ਸੀਨੀਅਰ ਬਾਦਲ ਦਾ ਸੱਜਾ ਹੱਥ ਮੰਨੇ ਜਾਂਦੇ ਰਹੇ ਜਥੇ. ਜਗਦੇਵ ਸਿੰਘ ਤਲਵੰਡੀ ਦੇ ਸਪੁੱਤਰ ਹਨ, ਨੇ ਸ. ਢੀਂਡਸਾ ਦਾ ਹੱਥ ਫੜਨ ਦੀ ਪਹਿਲ ਕਰ ਕੇ ਦੂਰ ਕਰ ਦਿੱਤਾ। ਮੰਨਿਆ ਜਾ ਰਿਹਾ ਹੈ ਕਿ ਅਗਲੇ ਕੁਝ ਦਿਨਾਂ ’ਚ ਹੋਰ ਵੀ ਕਈ ਸੀਨੀਅਰ ਅਕਾਲੀ ਮੁਖੀ ਇਕ-ਇਕ ਕਰ ਕੇ ਜਥੇ. ਤਲਵੰਡੀ ਵਲੋਂ ਅਪਣਾਏ ਗਏ ਰਸਤੇ ’ਤੇ ਕਦਮ ਵਧਾ ਸੁਖਦੇਵ ਸਿੰਘ ਢੀਂਡਸਾ ਦਾ ਪੱਲਾ ਫੜ ਸਕਦੇ ਹਨ।
ਹੈਰਾਨੀਜਨਕ ਚੁੱਪ-ਮਿਲੀ ਜਾਣਕਾਰੀ ਅਨੁਸਾਰ ਸੁਖਬੀਰ ਸਿੰਘ ਬਾਦਲ ਦਲ ਦੀ ਹੋਂਦ ਅਤੇ ਆਪਣਾ ਸਨਮਾਨ ਬਚਾਈ ਰੱਖਣ ਲਈ ਜੂਝ ਰਹੇ ਹਨ ਤਾਂ ਅਜਿਹੇ ’ਚ ਉਨ੍ਹਾਂ ਦੀ ਪਤਨੀ ਹਰਸਿਮਰਤ ਕੌਰ ਅਤੇ ਉਨ੍ਹਾਂ ਦੇ ਭਰਾ ਬਿਕਰਮ ਸਿੰਘ ਮਜੀਠੀਆ ਵਲੋਂ ਅਪਣਾਈ ਗਈ ਚੁੱਪ ਕਈ ਸਵਾਲਾਂ ਨੂੰ ਜਨਮ ਦੇ ਰਹੀ ਹੈ।
ਉਧਰ ‘ਆਪ’ ਦੇ ਸੰਸਦ ਮੈਂਬਰ ਭਗਵੰਤ ਮਾਨ ਵਲੋਂ ਕੀਤਾ ਗਿਆ ਇਹ ਖੁਲਾਸਾ ਹੋਰ ਵੀ ਹੈਰਾਨੀ ਪੈਦਾ ਕਰਦਾ ਹੈ ਕਿ ਪਿਛਲੇ ਦਿਨੀਂ ਬਿਕਰਮ ਸਿੰਘ ਮਜੀਠੀਆ ਨੇ ਮਾਝੇ ਦੇ ਅਕਾਲੀਆਂ ਨਾਲ ਮੁਲਾਕਾਤ ਕਰ ਕੇ ਉਨ੍ਹਾਂ ਨੂੰ ਸੁਖਦੇਵ ਸਿੰਘ ਢੀਂਡਸਾ ਦਾ ਪੱਲਾ ਫੜਨ ਦੀ ਪ੍ਰੇਰਣਾ ਕੀਤੀ ਹੈ। ਜੇਕਰ ਇਸ ਖੁਲਾਸੇ ’ਚ ਕੋਈ ਸੱਚਾਈ ਹੈ ਤਾਂ ਸਵਾਲ ਉੱਠਦਾ ਹੈ ਕਿ ਕੀ ਬਾਦਲ ਦਲ ’ਚ ਸੰਨ੍ਹ ਲਗਾਉਣ ’ਚ ਸ. ਮਜੀਠੀਆ ਸ. ਢੀਂਡਸਾ ਦੀ ਮਦਦ ਕਰ ਰਹੇ ਹਨ?
ਇਕ ਸੀਨੀਅਰ ਅਕਾਲੀ ਮੁਖੀ ਅਨੁਸਾਰ ਮਾਨ ਦੇ ਇਸ ਖੁਲਾਸੇ ’ਚ ਸੱਚਾਈ ਹੋਣ ਦੀ ਸੰਭਾਵਨਾ ਹੋ ਸਕਦੀ ਹੈ, ਇਸ ਦਾ ਕਾਰਨ ਉਹ ਦੱਸਦੇ ਹਨ ਕਿ ਬੀਤੇ ਸਮੇਂ ’ਚ ਸੀਨੀਅਰ ਬਾਦਲ ਅਕਾਲੀ ਦਲ ਦੀਆਂ ਕਈ ਬੈਠਕਾਂ ’ਚ ਮਜੀਠੀਆ ’ਤੇ ਜੋ ਵਿਅੰਗ ਬਾਣ ਛੱਡਦੇ ਰਹੇ ਹਨ, ਉਨ੍ਹਾਂ ਦੀ ਟੀਮ ਨੂੰ ਸ. ਮਜੀਠੀਆ ਨੇ ਅਜੇ ਵੀ ਦਬਾਈ ਰੱਖਿਆ ਹੈ। ਸੰਭਵ ਹੈ ਕਿ ਉਹੀ ਟੀਮ ਹੁਣ ਬਗਾਵਤ ਦੇ ਰੂਪ ’ਚ ਉੱਭਰਦੀ ਦਿਖਾਈ ਦੇਣ ਲੱਗੀ ਹੈ। ਸ਼ਾਇਦ ਸੀਨੀਅਰ ਬਾਦਲ ਨੇ ਇਸ ਸਥਿਤੀ ਨੂੰ ਮਹਿਸੂਸ ਕਰਦੇ ਹੋਏ ਸੁਖਬੀਰ ਨੂੰ ਚਿਤਾਵਨੀ ਦਿੰਦੇ ਹੋਏ ਸੁਚੇਤ ਕੀਤਾ ਹੈ ਕਿ ਉਸ ਨੂੰ ਹੁਣ ਇਕੱਲੇ ਹੀ ਚੱਲਣ ਦੀ ਨੀਤੀ ’ਤੇ ਅੱਗੇ ਵਧਣਾ ਹੋਵੇਗਾ।
ਪੰਜਾਬ ਭਾਜਪਾ ਦੇ ਤੇਵਰ : ਉਧਰ ਦੱਸਿਆ ਗਿਆ ਹੈ ਕਿ ਪੰਜਾਬ ਪ੍ਰਦੇਸ਼ ਭਾਜਪਾ ਦੇ ਨੇਤਾਵਾਂ ਨੇ, ਜਿਵੇਂ ਕਿ ਪਹਿਲਾਂ ਵੀ ਇਨ੍ਹਾਂ ਕਾਲਮਾਂ ’ਚ ਸੰਕੇਤ ਦਿੱਤਾ ਜਾ ਚੁੱਕਾ ਹੈ ਕਿ ਇਸ ਵਾਰ ਪੰਜਾਬ ਭਾਜਪਾ ਦੇ ਨੇਤਾ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ’ਚ ਬਾਦਲ ਅਕਾਲੀ ਦਲ ਦੇ ਛੋਟੇ ਭਰਾ ਦੀ ਭੂਮਿਕਾ ਨਿਭਾਉਣ ਦੇ ਮੂਡ ’ਚ ਨਹੀਂ। ਇਸ ਵਾਰ ਉਹ ਪੰਜਾਬ ’ਚ ਬਾਦਲ ਅਕਾਲੀ ਦਲ ਦੇ ਵੱਡੇ ਭਰਾ ਦੀ ਭੂਮਿਕਾ ਨਿਭਾਉਣ ਪ੍ਰਤੀ ਦ੍ਰਿੜ੍ਹ ਸੰਕਲਪ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਇਸੇ ਮਕਸਦ ਨਾਲ ਬਾਦਲ ਅਕਾਲੀ ਦਲ ’ਤੇ ਦਬਾਅ ਪਾਉਣ ਲਈ ਉਨ੍ਹਾਂ ਨੇ ਪੰਜਾਬ ਦੀਅਾਂ 117 ਵਿਧਾਨ ਸਭਾ ਸੀਟਾਂ ’ਤੇ ਆਪਣੀ ਸਥਿਤੀ ਮਜ਼ਬੂਤ ਕਰਨ ਦੀ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ।
ਦਿੱਲੀ ’ਚ ਸਰਗਰਮੀ : ਦੱਸਿਆ ਗਿਆ ਹੈ ਕਿ ‘ਜਾਗੋ’ ਦੇ ਪ੍ਰਧਾਨ ਮਨਜੀਤ ਸਿੰਘ ਜੀ. ਕੇ. ਚਾਹੁੰਦੇ ਹਨ ਕਿ ਸ. ਢੀਂਡਸਾ ਦਿੱਲੀ ’ਚ ਆਪਣੇ ਦਲ ਦੀ ਇਕਾਈ ਕਾਇਮ ਨਾ ਕਰਨ, ਉਨ੍ਹਾਂ ਦੀ ਪਾਰਟੀ ‘ਜਾਗੋ’ ਨੂੰ ਸਮਰਥਨ ਅਤੇ ਸਹਿਯੋਗ ਦੇਵੇ, ਜਦਕਿ ਦਿੱਲੀ ਦੀ ਅਕਾਲੀ ਰਾਜਨੀਤੀ ਦੇ ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਜਿਹੀ ਸਥਿਤੀ ਦੇ ਕਾਰਨ ‘ਜਾਗੋ’ ਨੂੰ ਕੋਈ ਵਿਸ਼ੇਸ਼ ਲਾਭ ਹੋਣ ਦੀ ਸੰਭਾਵਨਾ ਨਹੀਂ।
ਇਸ ਦਾ ਕਾਰਨ ਉਹ ਇਹ ਦੱਸਦੇ ਹਨ ਕਿ ਆਪਣੀ ਪਾਰਟੀ ਦੀ ਇਕਾਈ ਕਾਇਮ ਕੀਤੇ ਬਿਨਾਂ ਸ. ਢੀਂਡਸਾ ਦਿੱਲੀ ਦੇ ਸਥਾਨਕ ਸਿੱਖਾਂ ਨਾਲ ਜੁੜ ਨਹੀਂ ਸਕਣਗੇ, ਜਿਸਦੇ ਕਾਰਨ ਅਜਿਹੀ ਸਥਿਤੀ ’ਚ ‘ਜਾਗੋ’ ਨੂੰ ਪ੍ਰਭਾਵੀ ਸਹਿਯੋਗ ਦੇਣਾ ਕਿਵੇਂ ਸੰਭਵ ਹੋ ਸਕੇਗਾ? ਉਨ੍ਹਾਂ ਦਾ ਇਹ ਵੀ ਕਹਿਣਾ ਹੈ ਕਿ ਜੀ. ਕੇ. ਅਨੁਸਾਰ ‘ਜਾਗੋ’ ਇਕ ਧਾਰਮਿਕ ਜਥੇਬੰਦੀ ਹੈ, ਜਦਕਿ ਸ. ਢੀਂਡਸਾ ਦਾ ਅਕਾਲੀ ਦਲ ਇਕ ਸਿਆਸੀ ਪਾਰਟੀ। ਅਜਿਹੇ ’ਚ ਦੋਵੇਂ ਇਕ-ਦੂਸਰੇ ਦੇ ਪੂਰਕ ਬਣ ਕੇ ਹੀ ਇਕ-ਦੂਸਰੇ ਦੀ ਸਾਰਥਕ ਮਦਦ ਕਰ ਸਕਦੇ ਹਨ।
ਸੰਗਤ ਵਲੋਂ ਭੇਟ ਕੀਤਾ ਆਟਾ ਬਾਜ਼ਾਰ ’ਚ : ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਸੰਗਤਾਂ ਵਲੋਂ ਲੰਗਰ ਲਈ ਭੇਟ ਕੀਤੇ ਗਏ ਆਟੇ ਨੂੰ ਬਾਜ਼ਾਰ ’ਚ ਵੇਚੇ ਜਾਣ ਨੂੰ ਲੈ ਕੇ ਸੋਸ਼ਲ ਮੀਡੀਆ ’ਤੇ ਹੋਈ ਚਰਚਾ ਦੇ ਸਬੰਧ ’ਚ ਗੁਰਦੁਆਰਾ ਕਮੇਟੀ ਦੀ ਕਾਰਜਕਾਰਨੀ ਦੇ ਸੀਨੀਅਰ ਮੈਂਬਰ ਅਤੇ ਧਰਮ ਪ੍ਰਚਾਰ ਕਮੇਟੀ ਦੇ ਸਾਬਕਾ ਚੇਅਰਮੈਨ ਪਰਮਜੀਤ ਸਿੰਘ ਰਾਣਾ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਗੁਰਦੁਆਰਾ ਕਮੇਟੀ ਵਲੋਂ ਆਟਾ ਵੇਚੇ ਜਾਣ ਦੀ ਜਾਣਕਾਰੀ ਸੋਸ਼ਲ ਮੀਡੀਆ ਤੋਂ ਹੀ ਮਿਲੀ। ਉਨ੍ਹਾਂ ਨੂੰ ਨਾ ਤਾਂ ਇਸ ਗੱਲ ਦਾ ਪਤਾ ਹੈ ਕਿ ‘ਪੁਰਾਣੇ’ ਅਤੇ ‘ਖਰਾਬ’ ਹੋ ਰਹੇ ਆਟੇ ਨੂੰ ਵੇਚਣ ਦੇ ਸਬੰਧ ’ਚ ਫੈਸਲਾ ਲੈਣ ਲਈ ਕੋਈ ਕਮੇਟੀ ਬਣਾਈ ਗਈ ਸੀ ਜਾਂ ਉਸ ’ਚ ਕੌਣ-ਕੌਣ ਮੈਂਬਰ ਸ਼ਾਮਲ ਸਨ। ਉਨ੍ਹਾਂ ਨੇ ਇਕ ਹੋਰ ਸਵਾਲ ਦੇ ਜਵਾਬ ’ਚ ਦੱਸਿਆ ਕਿ ਉਨ੍ਹਾਂ ਨੂੰ ਇਸ ਗੱਲ ਦੀ ਵੀ ਕੋਈ ਜਾਣਕਾਰੀ ਨਹੀਂ ਕਿ ਇਹ ਆਟਾ 15-16 ਰੁਪਏ ਕਿਲੋ ਵੇਚਿਆ ਗਿਆ ਜਾਂ 18.40 ਰੁਪਏ। ਉਨ੍ਹਾਂ ਨੇ ਇਸ ਗੱਲ ’ਤੇ ਹੈਰਾਨੀ ਪ੍ਰਗਟ ਕੀਤੀ ਕਿ ਅਜਿਹੇ ਮਹੱਤਵਪੂਰਨ ਮੁੱਦਿਆਂ ਦੇ ਸਬੰਧ ’ਚ ਕਮੇਟੀ ਦੀ ਕਾਰਜਕਾਰਨੀ ਦੇ ਸੀਨੀਅਰ ਮੈਂਬਰ ਤਕ ਨੂੰ ਵੀ ਹਨੇਰੇ ’ਚ ਰੱਖਿਆ ਜਾਂਦਾ ਹੈ। ਇਕ ਹੋਰ ਸਵਾਲ ਦੇ ਜਵਾਬ ’ਚ ਉਨ੍ਹਾਂ ਕਿਹਾ ਕਿ ਜੇਕਰ ਇਹ ਮਾਮਲਾ ਬਹੁਤ ਹੀ ਗੰਭੀਰ ਅਤੇ ਚਿੰਤਾਜਨਕ ਹੈ ਤਾਂ ਇਸ ਦੀ ਨਿਰਪੱਖ ਜਾਂਚ ਕਰਵਾ ਕੇ ਸਥਿਤੀ ਸਪੱਸ਼ਟ ਕੀਤੀ ਜਾਣੀ ਚਾਹੀਦੀ ਹੈ।
...ਅਤੇ ਆਖਿਰ ’ਚ : ਦਿੱਲੀ ਗੁਰਦੁਆਰਾ ਕਮੇਟੀ ਦੀਆਂ ਆਮ ਚੋਣਾਂ ਸਮੇਂ ਸਿਰ ਭਾਵ ਅਗਲੇ ਸਾਲ ਦੇ ਮਾਰਚ ਮਹੀਨੇ ਤਕ ਹੀ ਜਾਣ ਦੀ ਭਿਣਕ ਪੈਂਦੇ ਹੀ ਚੋਣ ਮੈਦਾਨ ’ਚ ਉਤਰਨ ਦੀਆਂ ਚਾਹਵਾਨ ਪਾਰਟੀਆਂ ਨੇ ਆਪਣੀ ਸਰਗਰਮੀ ਵਧਾ ਦਿੱਤੀ ਹੈ। ਇਸੇ ਦਰਮਿਆਨ ਪਤਾ ਲੱਗਾ ਹੈ ਕਿ ਦਿੱਲੀ ਦੇ ਕੁਝ ਪ੍ਰਮੁੱਖ ਸਿੱਖਾਂ ਵਲੋਂ ਇਹ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਕਿ ਬਾਦਲ-ਵਿਰੋਧੀ ਵੋਟਾਂ ਨੂੰ ਖਿੱਲਰਨ ਤੋਂ ਬਚਾਉਣ ਲਈ ਕਿਸ ਤਰ੍ਹਾਂ ਸ਼੍ਰੋਮਣੀ ਅਕਾਲੀ ਦਲ (ਦਿੱਲੀ) ਦੇ ਮੁਖੀਆਂ ਸਰਸਾ ਭਰਾਵਾਂ ਅਤੇ ‘ਜਾਗੋ’ ਦੇ ਮੁਖੀ ਮਨਜੀਤ ਸਿੰਘ ਜੀ. ਕੇ. ’ਚ ਸਮਝੌਤਾ ਕਰਵਾ ਦਿੱਤਾ ਗਿਆ। ਓਧਰ ਇਹ ਵੀ ਪਤਾ ਲੱਗਾ ਹੈ ਕਿ ਬਾਦਲ ਅਕਾਲੀ ਦਲ ਦੇ ਕਈ ਕੇਂਦਰੀ ਮੁਖੀ ਇਨ੍ਹਾਂ ਚੋਣਾਂ ’ਚ ਆਪਣੀ ਵਾਪਸੀ ਯਕੀਨੀ ਬਣਾਉਣ ਲਈ ਅਜਿਹਾ ਜਾਲ ਬੁਣਨ ’ਚ ਰੁੱਝ ਗਏ ਹਨ, ਜਿਸ ਨਾਲ ਸਰਸਾ ਅਤੇ ਜੀ. ਕੇ. ’ਚ ਸਮਝੌਤਾ ਨਾ ਹੋ ਸਕੇ, ਇਸ ਦੇ ਨਾਲ ਹੀ ਉਹ ਕੁਝ ਅਜਿਹੀਆਂ ਡੰਮੀ ਪਾਰਟੀਆਂ ਦੇ ਸਹਿਯੋਗ ਨਾਲ ਉਮੀਦਵਾਰ ਮੈਦਾਨ ’ਚ ਉਤਾਰ ਸਕਣ, ਜੋ ਬਾਦਲ-ਵਿਰੋਧੀ ਵੋਟਾਂ ਨੂੰ ਵੰਡਣ ’ਚ ਸਹਾਇਕ ਹੋਣ, ਉਨ੍ਹਾਂ ਦੀ ਜਿੱਤ ਯਕੀਨੀ ਬਣਾਉਣ ’ਚ ਮਦਦਗਾਰ ਸਾਬਤ ਹੋ ਸਕਣ।
ਰਾਜਸਥਾਨ ’ਚ ਤੁਰੰਤ ਕਰਵਾਓ ਸ਼ਕਤੀ ਪ੍ਰੀਖਣ
NEXT STORY 
