ਨਵੀਂ ਦਿੱਲੀ, (ਭਾਸ਼ਾ)- ਮਾਹਰਾਂ ਅਨੁਸਾਰ ਚਾਲੂ ਮਾਲੀ ਸਾਲ ਦੀ ਜੁਲਾਈ-ਸਤੰਬਰ ਤਿਮਾਹੀ ’ਚ ਕੁੱਲ ਘਰੇਲੂ ਉਤਪਾਦ (ਜੀ. ਡੀ. ਪੀ.) ’ਚ 8.2 ਫ਼ੀਸਦੀ ਦਾ ਵਾਧਾ ਮਜ਼ਬੂਤ ਘਰੇਲੂ ਮੰਗ, ਸੇਵਾਵਾਂ ਦੀ ਬਰਾਮਦ ’ਚ ਮਜ਼ਬੂਤੀ ਅਤੇ ਘੱਟ ਮਹਿੰਗਾਈ ਕਾਰਨ ਸੰਭਵ ਹੋਇਆ। ਉਨ੍ਹਾਂ ਕਿਹਾ ਕਿ ਇਹ ਪ੍ਰਦਰਸ਼ਨ ਭਾਰਤ ਦੀ ਮਜ਼ਬੂਤ ਆਰਥਿਕ ਸਮਰੱਥਾ ਨੂੰ ਦਰਸਾਉਂਦਾ ਹੈ।
ਭਾਰਤੀ ਸਟੇਟ ਬੈਂਕ (ਐੱਸ. ਬੀ. ਆਈ.) ਦੀ ਖੋਜ ਰਿਪੋਰਟ ’ਚ ਕਿਹਾ ਗਿਆ, ‘‘ਭਾਰਤ ਦੀ ਵਿਕਾਸ ਗਾਥਾ ਨਵੀਆਂ, ਵੱਡੀਆਂ ਅਤੇ ਸਾਹਸੀ ਊਚਾਈਆਂ ਨੂੰ ਛੂਹ ਰਹੀ ਹੈ। ਮਾਲੀ ਸਾਲ 2025-26 ਦੀ ਦੂਜੀ ਤਿਮਾਹੀ ’ਚ 6 ਤਿਮਾਹੀਆਂ ਦਾ ਸਭ ਤੋਂ ਉੱਚਾ 8.2 ਫ਼ੀਸਦੀ ਦਾ ਅੰਕੜਾ ਇਸ ਦੀ ਪੁਸ਼ਟੀ ਕਰਦਾ ਹੈ।’’
ਮਾਹਰਾਂ ਅਨੁਸਾਰ ਦੂਜੀ ਤਿਮਾਹੀ ਦੇ ਮਜ਼ਬੂਤ ਜੀ. ਡੀ. ਪੀ. ਵਾਧੇ ਦਾ ਮੁੱਖ ਆਧਾਰ ਨਿੱਜੀ ਖਪਤ ਰਿਹਾ, ਜਦੋਂ ਕਿ ਅਮਰੀਕੀ ਟੈਰਿਫਾਂ ਦੇ ਮੱਦੇਨਜ਼ਰ ਅਗਾਊਂ ਬਰਾਮਦ ਨੇ ਬਰਾਮਦ ਵਾਧੇ ਨੂੰ ਸਹਾਰਾ ਦਿੱਤਾ। ਬਰਾਮਦ ’ਚ 5.6 ਫ਼ੀਸਦੀ ਦਾ ਵਾਧਾ ਹੋਇਆ, ਜੋ ਤਿਮਾਹੀ ਆਧਾਰ ’ਤੇ ਸੁਸਤੀ ਦਰਸਾਉਂਦਾ ਹੈ ਪਰ ਸਾਲਾਨਾ ਆਧਾਰ ’ਤੇ ਸੁਧਾਰ ਵਿਖਾਉਂਦਾ ਹੈ, ਭਾਵ ਬਾਹਰੀ ਮੰਗ ਦੀ ਤਸਵੀਰ ਮਿਲੀ-ਜੁਲੀ ਹੈ।
ਐੱਸ. ਬੀ. ਆਈ. ਦੀ ਖੋਜ ਰਿਪੋਰਟ ‘ਈਕੋਰੈਪ’ ’ਚ ਕਿਹਾ ਗਿਆ ਕਿ ਕੁਲ ਮਿਲਾ ਕੇ ਰੁਝਾਨ ਦੱਸਦੇ ਹਨ ਕਿ ਜੀ. ਡੀ. ਪੀ. ਵਾਧਾ ਮੁੱਖ ਤੌਰ ’ਤੇ ਘਰੇਲੂ ਮੰਗ ਨਾਲ ਚੱਲਦਾ ਹੈ, ਜਿਸ ਨੂੰ ਸੇਵਾ ਬਰਾਮਦ, ਘੱਟ ਮਹਿੰਗਾਈ ਅਤੇ ਲੇਬਰ-ਇੰਟੈਂਸਿਵ ਖੇਤਰਾਂ ’ਚ ਮੁੱਲ ਵਾਧੇ ਦਾ ਵਿਸਥਾਰ ਸਹਾਰਾ ਦੇ ਰਿਹਾ ਹੈ।
ਐੱਚ. ਡੀ. ਐੱਫ. ਸੀ. ਬੈਂਕ ਦੀ ਰਿਪੋਰਟ ’ਚ ਕਿਹਾ ਗਿਆ ਹੈ, ‘‘ਅੱਗੇ ਚੱਲ ਕੇ ਅਸੀਂ ਦੂਜੀ ਛਿਮਾਹੀ ’ਚ ਜੀ. ਡੀ. ਪੀ. ਵਾਧਾ ਦਰ ਦੀ ਔਸਤ ਲੱਗਭਗ 6.6 ਫ਼ੀਸਦੀ ਰਹਿਣ ਦੀ ਉਮੀਦ ਕਰਦੇ ਹਾਂ, ਕਿਉਂਕਿ ਆਧਾਰ ਪ੍ਰਭਾਵ ਘੱਟ ਹੋਵੇਗਾ, ਸਰਕਾਰੀ ਖਰਚਿਆਂ ਦੀ ਰਫਤਾਰ ਸਾਧਾਰਣ ਹੋਵੇਗੀ ਅਤੇ ਅਮਰੀਕਾ ਦੇ ਉੱਚੇ ਟੈਕਸਾਂ ਅਤੇ ਗਲੋਬਲ ਸੁਸਤੀ ਦਾ ਪ੍ਰਭਾਵ ਬਰਾਮਦ ’ਤੇ ਦਿਸੇਗਾ।’’
ਮਹਿੰਦਰਾ ਸਮੂਹ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ. ਈ. ਓ.) ਅਤੇ ਪ੍ਰਬੰਧ ਨਿਰਦੇਸ਼ਕ ਅਨਿਸ਼ ਸ਼ਾਹ ਨੇ ਕਿਹਾ, ‘‘ਦੇਸ਼ ਦੀ ਦੂਜੀ ਤਿਮਾਹੀ ਦੀ ਜੀ. ਡੀ. ਪੀ. ਵਾਧਾ ਦਰ ਘਰੇਲੂ ਮੰਗ ਦੀ ਡੂੰਘਾਈ ਅਤੇ ਅਰਥਵਿਵਸਥਾ ਦੀ ਮਜ਼ਬੂਤੀ ਨੂੰ ਦਰਸਾਉਂਦੀ ਹੈ। ਅਮਰੀਕੀ ਟੈਰਿਫਾਂ ਵਰਗੀਆਂ ਚੁਣੌਤੀਆਂ ਦੇ ਬਾਵਜੂਦ ਸਾਡੇ ਵਿਨਿਰਮਾਣ ਅਤੇ ਸੇਵਾ ਖੇਤਰ ਨੇ ਜ਼ਿਕਰਯੋਗ ਅਨੁਕੂਲਨ ਸਮਰੱਥਾ ਵਿਖਾਈ ਹੈ।’’
ਉਦਯੋਗ ਸੰਗਠਨ ਐਸੋਚੈਮ ਦੇ ਪ੍ਰਧਾਨ ਨਿਰਮਲ ਕੁਮਾਰ ਮਿੰਡਾ ਨੇ ਕਿਹਾ, ‘‘ਮਾਲੀ ਸਾਲ 2025-26 ਦੀ ਦੂਜੀ ਤਿਮਾਹੀ ’ਚ ਕੁੱਲ ਘਰੇਲੂ ਉਤਪਾਦ ਦੀ ਅਸਲ ਵਾਧਾ ਦਰ ਦੇਸ਼ ਦੇ ਮਜਬੂਤ ਆਰਥਿਕ ਲਚਕੀਲੇਪਨ ਦਾ ਇਕ ਹੋਰ ਸਬੂਤ ਹੈ। ਪ੍ਰਮੁੱਖ ਖੇਤਰਾਂ ’ਚ ਵਿਆਪਕ ਵਿਸਥਾਰ ਅਤੇ ਘਰੇਲੂ ਮੰਗ ’ਚ ਸੁਧਾਰ ਦੱਸਦੇ ਹਨ ਕਿ ਨੀਤੀਗਤ ਸਥਿਰਤਾ ਅਤੇ ਸੁਧਾਰ ਅਸਲ ਵਾਧਾ ਦਰ ’ਚ ਬਦਲ ਰਹੇ ਹਨ।’’
ਸੋਲਰ ਰੇਡੀਏਸ਼ਨ ਕਾਰਨ ਭਾਰਤ ਸਮੇਤ ਪੂਰੀ ਦੁਨੀਆ ’ਚ ਭੜਥੂ
NEXT STORY 
