ਬਿਜ਼ਨੈੱਸ ਡੈਸਕ- ਭਾਰਤ ਦੇ ਗੁਆਂਢੀ ਦੇਸ਼ ਬੰਗਲਾਦੇਸ਼, ਜੋ ਕਿ ਜੁਲਾਈ ਤੋਂ ਵੱਡੀ ਸਿਆਸੀ ਅਸਥਿਰਤਾ ਨਾਲ ਜੂਝ ਰਿਹਾ ਹੈ, ਨੇ ਸੱਤਾ ’ਚ ਤਖ਼ਤਾਪਲਟ ਦੇਖਿਆ ਹੈ। ਹੁਣ ਇਸ ਦਾ ਵਿੱਤੀ ਮੋਰਚੇ ’ਤੇ ਵੀ ਭਾਰੀ ਸੱਟ ਦੇਖਣ ਨੂੰ ਮਿਲ ਰਹੀ ਹੈ। ਜੁਲਾਈ ’ਚ, ਬੰਗਲਾਦੇਸ਼ ’ਚ ਮਹਿੰਗਾਈ ਦਰ ਨੇ ਸਾਲਾਂ ਦਾ ਰਿਕਾਰਡ ਤੋੜ ਦਿੱਤਾ ਹੈ ਅਤੇ ਇਕ ਨਵੀਂ ਉੱਚਾਈ 'ਤੇ ਪਹੁੰਚ ਗਈ ਹੈ। ਬੰਗਲਾਦੇਸ਼ ਜੁਲਾਈ 'ਚ ਪ੍ਰਚੂਨ ਮਹਿੰਗਾਈ ਦਰ 11.66 ਫੀਸਦੀ 'ਤੇ ਪਹੁੰਚ ਗਈ, ਜੋ 12 ਸਾਲਾਂ 'ਚ ਇਸ ਦਾ ਸਭ ਤੋਂ ਉੱਚਾ ਪੱਧਰ ਹੈ।
ਖੁਰਾਕੀ ਮਹਿੰਗਾਈ ਦਰ ’ਚ ਉਛਾਲ ਬੰਗਲਾਦੇਸ਼ ’ਚ ਮਹਿੰਗਾਈ ਦਰ ਚੜ੍ਹਣ ਦਾ ਕਾਰਨ
ਬੰਗਲਾਦੇਸ਼ ਦੇ ਸਥਾਨਕ ਅਖਬਾਰ ‘ਦਿ ਢਾਕਾ ਟ੍ਰਿਬਿਊਨ’ ਨੇ ਲਿਖਿਆ ਹੈ ਕਿ ਜੁਲਾਈ 'ਚ ਖਾਣ-ਪੀਣ ਵਾਲੀਆਂ ਵਸਤਾਂ ਦੀ ਮਹਿੰਗਾਈ ਦਰ ’ਚ ਵਾਧੇ ਕਾਰਨ ਪ੍ਰਚੂਨ ਮਹਿੰਗਾਈ ਦਰ 12 ਸਾਲਾਂ 'ਚ ਸਭ ਤੋਂ ਉੱਚੇ ਪੱਧਰ 'ਤੇ ਪਹੁੰਚ ਗਈ ਹੈ ਅਤੇ ਇਸ ਤੋਂ ਪਹਿਲਾਂ ਮਈ 'ਚ ਪ੍ਰਚੂਨ ਮਹਿੰਗਾਈ ਦਰ ਦਾ ਉੱਚ ਪੱਧਰ 9.94 ਸੀ। ਜੁਲਾਈ ’ਚ ਖੁਰਾਕੀ ਮਹਿੰਗਾਈ ਦਰ 14.10 ਫੀਸਦੀ ਦੇ ਰਿਕਾਰਡ ਪੱਧਰ 'ਤੇ ਰਹੀ, ਜਦਕਿ ਗੈਰ-ਖੁਰਾਕ ਵਸਤੂਆਂ ਦੀ ਮਹਿੰਗਾਈ ਦਰ 9.68 ਫੀਸਦੀ ਰਹੀ। ਇਸ ਤੋਂ ਪਹਿਲਾਂ ਜੂਨ ਮਹੀਨੇ ’ਚ ਦੋਵੇਂ 10.42 ਫੀਸਦੀ ਅਤੇ 9.15 ਫੀਸਦੀ 'ਤੇ ਸਨ। ਇਹ ਅੰਕੜਾ ਬਿਊਰੋ ਆਫ ਸਟੈਟਿਸਟਿਕਸ ਵੱਲੋਂ ਜਾਰੀ ਅੰਕੜਿਆਂ ਦੇ ਹਵਾਲੇ ਨਾਲ ਜਾਰੀ ਕੀਤਾ ਗਿਆ ਹੈ।
ਬੰਗਲਾਦੇਸ਼ ਦੇ ਕੇਂਦਰੀ ਬੈਂਕ ਅਤੇ ਫਾਇਨੈਂਸ਼ੀਅਲ ਇੰਟੈਲੀਜੈਂਸ ਯੂਨਿਟ ’ਚ ਤਾਬੜਤੋੜ ਅਸਤੀਫੇ
ਇਕ ਹਫਤੇ ਤੋਂ ਲਗਭਗ ਸਾਰੇ ਸਰਕਾਰੀ ਅਤੇ ਵਿੱਤੀ ਸੰਚਾਲਨ ਬੰਦ ਹੋਣ ਕਾਰਨ ਬੰਗਲਾਦੇਸ਼ ਦੀਆਂ ਆਰਥਿਕ ਸੰਸਥਾਵਾਂ ਵਿਚ ਲਗਾਤਾਰ ਹਲਚਲ ਮਚ ਗਈ ਹੈ। ਤਾਜ਼ਾ ਅਪਡੇਟ 'ਚ ਬੰਗਲਾਦੇਸ਼ ਬੈਂਕ ਦੇ ਗਵਰਨਰ ਦੇ ਅਸਤੀਫੇ ਤੋਂ ਬਾਅਦ ਕੇਂਦਰੀ ਬੈਂਕ ਦੇ ਸਲਾਹਕਾਰ ਅਬੂ ਫਰਾਹ ਮੁਹੰਮਦ ਨਾਸਿਰ ਨੇ ਵੀ ਅਸਤੀਫਾ ਦੇ ਦਿੱਤਾ ਹੈ। ਨਾਲ ਹੀ ਦੋ ਡਿਪਟੀ ਗਵਰਨਰ ਕਾਜ਼ੀ ਸੈਦੁਰ ਰਹਿਮਾਨ ਅਤੇ ਮੁਹੰਮਦ ਖੁਰਸ਼ੀਦ ਆਲਮ ਨੇ ਅਸਤੀਫਾ ਦੇ ਦਿੱਤਾ ਹੈ। ਫਾਈਨੈਂਸ਼ੀਅਲ ਇੰਟੈਲੀਜੈਂਸ ਯੂਨਿਟ ਬੰਗਲਾਦੇਸ਼ (BFUI) ਦੇ ਮੁਖੀ ਮਸੂਦ ਬਿਸਵਾਸ ਨੇ ਵੀ ਅਸਤੀਫਾ ਦੇ ਦਿੱਤਾ ਹੈ। ਇਨ੍ਹਾਂ ਅਧਿਕਾਰੀਆਂ ਨੇ ਬੰਗਲਾਦੇਸ਼ ਦੀ ਅੰਤ੍ਰਿਮ ਸਰਕਾਰ ਦੇ ਹੁਕਮਾਂ ਤੋਂ ਬਾਅਦ ਆਪਣੇ ਅਸਤੀਫੇ ਦੇ ਦਿੱਤੇ ਹਨ। ਪਿਛਲੇ ਹਫਤੇ ਸ਼ੁੱਕਰਵਾਰ ਨੂੰ ਬੰਗਲਾਦੇਸ਼ ਬੈਂਕ ਦੇ ਗਵਰਨਰ ਅਬਦੁਰ ਰਊਫ ਤਾਲੁਕਦਾਰ ਨੇ ਨਿੱਜੀ ਕਾਰਨਾਂ ਦਾ ਹਵਾਲਾ ਦਿੰਦੇ ਹੋਏ ਅਸਤੀਫਾ ਦੇ ਦਿੱਤਾ ਸੀ।
ਬੰਗਲਾਦੇਸ਼ ਕਿਹੋ ਜਿਹੀ ਹੈ ਐੱਫ.ਐੱਮ.ਸੀ.ਜੀ. ਕੰਪਨੀਆਂ ਦੀ ਹਾਲਤ?
ਬੰਗਲਾਦੇਸ਼ ’ਚ ਕਾਰੋਬਾਰ ਕਰ ਰਹੀਆਂ ਭਾਰਤੀ ਐੱਫ.ਐੱਮ.ਸੀ.ਜੀ. ਕੰਪਨੀਆਂ ਦਾ ਕਹਿਣਾ ਹੈ ਕਿ ਹੁਣ ਉਨ੍ਹਾਂ ਦਾ ਕਾਰੋਬਾਰ ਹੌਲੀ-ਹੌਲੀ ਆਮ ਵਾਂਗ ਹੋ ਰਿਹਾ ਹੈ। ਕਈ ਭਾਰਤੀ ਐੱਫ.ਐੱਮ.ਸੀ.ਜੀ. ਕੰਪਨੀਆਂ ਦਾ ਵੀ ਬੰਗਲਾਦੇਸ਼ ’ਚ ਕਾਰੋਬਾਰ ਹੈ, ਜਿਸ ’ਚ ਬ੍ਰਿਟੇਨਿਆ, ਗੋਦਰੇਜ ਕੰਜ਼ਿਊਮਰ ਪ੍ਰੋਡਕਟਸ, ਮੈਰੀਕੋ, ਡਾਬਰ, ਇਮਾਮੀ ਅਤੇ ਪਿਡੀਲਾਈਟ ਇੰਡਸਟਰੀਜ਼ ਸ਼ਾਮਲ ਹਨ। ਇਨ੍ਹਾਂ ਤੋਂ ਇਲਾਵਾ ਡੋਮਿਨੋਜ਼ ਪੀਜ਼ਾ ਚੇਨ ਚਲਾਉਣ ਵਾਲੀ ਕੰਪਨੀ ਜੁਬੀਲੈਂਟ ਫੂਡਵਰਕਸ ਲਿਮਟਿਡ (ਜੇ.ਐੱਫ.ਐੱਲ.) ਦੇ ਵੀ ਬੰਗਲਾਦੇਸ਼ ’ਚ ਲਗਭਗ 30 ਸਟੋਰ ਹਨ।
ਕੀ ਕਹਿੰਦਾ ਹੈ ਮੈਰੀਕੋ
ਮੈਰੀਕੋ ਨੇ ਕਿਹਾ ਹੈ ਕਿ ਉਸ ਦੀਆਂ ਨਿਰਮਾਣ ਇਕਾਈਆਂ ਨੇ 11 ਅਗਸਤ ਨੂੰ ਆਮ ਕੰਮ ਸ਼ੁਰੂ ਕਰ ਦਿੱਤਾ ਸੀ। ਕੰਪਨੀ ਮੁਤਾਬਕ ਬਾਜ਼ਾਰ 'ਚ ਸੰਚਾਲਨ ਦੀ ਸਥਿਤੀ 'ਚ ਹੌਲੀ-ਹੌਲੀ ਸੁਧਾਰ ਹੋ ਰਿਹਾ ਹੈ ਅਤੇ ਇਸ ਦੇ ਰਿਟੇਲ ਕਰਮਚਾਰੀਆਂ ਅਤੇ ਵਿਤਰਕਾਂ ਦੇ ਵੱਡੇ ਹਿੱਸੇ ਨੇ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਮੈਰੀਕੋ ਦੇ ਕੌਮਾਂਤਰੀ ’ਚ ਬੰਗਲਾਦੇਸ਼ ਦੀ ਹਿੱਸੇਦਾਰੀ 44 ਫੀਸਦੀ ਤੱਕ ਹੈ। ਇਸ ਦੀਆਂ ਦੋ ਫੈਕਟਰੀਆਂ ਅਤੇ ਪੰਜ ਡਿਪੂ ਹਨ। ਸਾਲ 1999 ’ਚ, ਇਸ ਨੇ ਇਕ ਸਹਾਇਕ ਕੰਪਨੀ ਮੈਰੀਕੋ ਬੰਗਲਾਦੇਸ਼ ਦਾ ਗਠਨ ਕੀਤਾ ਸੀ ਜੋ ਉਥੋਂ ਦੇ ਸਟਾਕ ਐਕਸਚੇਂਜਾਂ ’ਚ ਇਕ ਸੂਚੀਬੱਧ ਸੰਸਥਾ ਵੀ ਹੈ।
ਕੀ ਕਿਹਾ ਡਾਬਰ ਇੰਡੀਆ ਨੇ
ਡਾਬਰ ਇੰਡੀਆ ਨੇ ਇਹ ਵੀ ਕਿਹਾ ਕਿ ਉਸ ਦੀਆਂ ਫੈਕਟਰੀਆਂ ਅਤੇ ਸਟਾਕ ਰੱਖਣ ਵਾਲੇ ਵਪਾਰੀ ਹੁਣ ਆਮ ਕਾਰੋਬਾਰ ਕਰ ਰਹੇ ਹਨ। ਡਾਬਰ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ.ਈ.ਓ.) ਮੋਹਿਤ ਮਲਹੋਤਰਾ ਨੇ ਕਿਹਾ ਕਿ ਅਸੀਂ ਸਥਿਤੀ 'ਤੇ ਨੇੜਿਓਂ ਨਜ਼ਰ ਰੱਖ ਰਹੇ ਹਾਂ ਅਤੇ ਆਮ ਸਥਿਤੀ ਨੂੰ ਬਹਾਲ ਕਰਨ ਦੀਆਂ ਸਾਰੀਆਂ ਕੋਸ਼ਿਸ਼ਾਂ ਦੇ ਹਿੱਸੇ ਵਜੋਂ, ਸੰਚਾਲਨ ਜਲਦੀ ਹੀ ਪੂਰੀ ਤਰ੍ਹਾਂ ਚਾਲੂ ਹੋ ਜਾਵੇਗਾ। ਉਸ ਨੇ ਕਿਹਾ ਕਿ ਬੰਗਲਾਦੇਸ਼ ਡਾਬਰ ਦੇ ਏਕੀਕ੍ਰਿਤ ਮਾਲੀਏ ’ਚ 1 ਫੀਸਦੀ ਤੋਂ ਘੱਟ ਅਤੇ ਇਸ ਦੇ ਲਾਭ ’ਚ 0.5 ਫੀਸਦੀ ਦਾ ਯੋਗਦਾਨ ਪਾਉਂਦਾ ਹੈ। ਭਾਰਤੀ ਕੰਪਨੀ ਇਮਾਮੀ ਦੀ ਬੰਗਲਾਦੇਸ਼ ’ਚ ਮੌਜੂਦਗੀ ਵੀ ਹੈ ਪਰ ਇਹ ਆਕਾਰ ’ਚ ਛੋਟੀ ਹੈ। ਬੰਗਲਾਦੇਸ਼ ਇਮਾਮੀ ਦੇ ਕੁੱਲ ਏਕੀਕ੍ਰਿਤ ਮਾਲੀਏ ’ਚ ਲਗਭਗ ਚਾਰ ਫੀਸਦੀ ਯੋਗਦਾਨ ਪਾਉਂਦਾ ਹੈ।
ਅੰਤ੍ਰਿਮ ਸਰਕਾਰ ਦੇ ਗਠਨ ਪਿੱਛੋਂ ਸਥਿਤੀ ਕੰਟ੍ਰੋਲ ’ਚ ਆ ਰਹੀ
ਬੰਗਲਾਦੇਸ਼ ’ਚ ਪਿਛਲੇ ਹਫ਼ਤੇ ਅੰਤ੍ਰਿਮ ਸਰਕਾਰ ਦੇ ਗਠਨ ਤੋਂ ਬਾਅਦ ਸਥਿਤੀ ਹੌਲੀ-ਹੌਲੀ ਕਾਬੂ ’ਚ ਆ ਰਹੀ ਹੈ। ਹੁਣ ਬੰਗਲਾਦੇਸ਼ ’ਚ ਅੰਤ੍ਰਿਮ ਸਰਕਾਰ ਦੇ ਮੁਖੀ ਮੁਹੰਮਦ ਯੂਨਸ ਹਨ, ਜੋ ਬੰਗਲਾਦੇਸ਼ ਨੈਸ਼ਨਲਿਸਟ ਪਾਰਟੀ ਦੇ ਨੇਤਾ ਹਨ ਅਤੇ ਦੇਸ਼ 'ਤੇ ਰਾਜ ਕਰ ਰਹੇ ਹਨ। ਹਾਲਾਂਕਿ ਬੰਗਲਾਦੇਸ਼ 'ਚ ਜੁਲਾਈ ਤੋਂ ਭੱਖ ਰਹੀ ਅੱਗ ਕਾਰਨ ਸ਼ੇਖ ਹਸੀਨਾ ਨੂੰ ਪ੍ਰਧਾਨ ਮੰਤਰੀ ਦਾ ਅਹੁਦਾ ਅਤੇ ਦੇਸ਼ ਛੱਡਣਾ ਪਿਆ ਸੀ।
ਬੰਗਲਾਦੇਸ਼ ਦੀ ਅੰਤ੍ਰਿਮ ਸਰਕਾਰ ਨੇ 15 ਅਗਸਤ ਦੀ ਰਾਸ਼ਟਰੀ ਛੁੱਟੀ ਨੂੰ ਰੱਦ ਕਰ ਦਿੱਤਾ ਹੈ। ਸਲਾਹਕਾਰ ਕੌਂਸਲ ਦੀ ਮੀਟਿੰਗ ’ਚ 15 ਅਗਸਤ ਦੀ ਛੁੱਟੀ ਰੱਦ ਕਰਨ ਦੀ ਪ੍ਰਵਾਨਗੀ ਦਿੱਤੀ ਗਈ। ਬੰਗਲਾਦੇਸ਼ ਦੀ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਪਿਤਾ ਅਤੇ ਦੇਸ਼ ਦੇ ਸੰਸਥਾਪਕ ਬੰਗਬੰਧੂ ਸ਼ੇਖ ਮੁਜੀਬੁਰ ਰਹਿਮਾਨ ਦੀ 15 ਅਗਸਤ ਨੂੰ ਹੱਤਿਆ ਕਰ ਦਿੱਤੀ ਗਈ ਸੀ ਅਤੇ ਇਸ ਦਿਨ ਬੰਗਲਾਦੇਸ਼ ’ਚ ਰਾਸ਼ਟਰੀ ਛੁੱਟੀ ਸੀ।
ਜਾਣੋ ਬੰਗਲਾਦੇਸ਼ ਦਾ ਪੂਰਾ ਮਾਮਲਾ
ਜੁਲਾਈ ’ਚ, ਬੰਗਲਾਦੇਸ਼ ’ਚ ਇਕ ਦੇਸ਼ ਪੱਧਰੀ ਵਿਦਿਆਰਥੀ ਅੰਦੋਲਨ ਨੇ ਆਰਥਿਕ ਸਰਗਰਮੀਆਂ ਨੂੰ ਪ੍ਰਭਾਵਿਤ ਕੀਤਾ ਅਤੇ ਸਰਕਾਰੀ ਨੌਕਰੀਆਂ ’ਚ ਰਿਜ਼ਰਵੇਸ਼ਨ ਖਿਲਾਫ ਪ੍ਰਦਰਸ਼ਨ ਕਰ ਰਹੇ ਪ੍ਰਦਰਨਸ਼ਕਾਰੀਆਂ ਨੇ ਵੀ ਸ਼ੇਖ ਹਸੀਨਾ ਦੀ ਅਗਵਾਈ ਵਾਲੀ ਸਰਕਾਰ ਦੇ ਅਸਤੀਫੇ ਦੀ ਮੰਗ ਕੀਤੀ। ਅਗਸਤ ਦੇ ਸ਼ੁਰੂ ਵਿਚ ਇਹ ਵਿਰੋਧ ਹਿੰਸਕ ਹੋ ਗਿਆ, ਜਿਸ ਤੋਂ ਬਾਅਦ ਹਸੀਨਾ ਨੂੰ ਪ੍ਰਧਾਨ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫਾ ਦੇ ਕੇ ਦੇਸ਼ ਛੱਡਣਾ ਪਿਆ। ਬੰਗਲਾਦੇਸ਼ ਅਗਸਤ ਦੇ ਪਹਿਲੇ ਹਫ਼ਤੇ ਘਰੇਲੂ ਹਿੰਸਾ ਦੀ ਮਾਰ ਹੇਠ ਆਇਆ ਸੀ। ਸਰਕਾਰ ਵਿਰੋਧੀ ਪ੍ਰਦਰਸ਼ਨ ਹਿੰਸਕ ਹੋ ਜਾਣ ਤੋਂ ਬਾਅਦ ਸਾਰੇ ਕਾਰੋਬਾਰੀ ਕੰਮ ਠੱਪ ਹੋ ਗਏ।
ਬੰਗਲਾਦੇਸ਼ ’ਚ 5 ਅਗਸਤ ਨੂੰ ਸ਼ੇਖ ਹਸੀਨਾ ਦੀ ਸਰਕਾਰ ਡਿੱਗਣ ਤੋਂ ਬਾਅਦ ਦੇਸ਼ ਭਰ ’ਚ ਭੜਕੀ ਹਿੰਸਾ ਦੀਆਂ ਘਟਨਾਵਾਂ ’ਚ 230 ਤੋਂ ਵੱਧ ਲੋਕ ਮਾਰੇ ਗਏ ਸਨ। ਇਸ ਕਾਰਨ ਇਨ੍ਹਾਂ ਪ੍ਰਦਰਸ਼ਨਾਂ ’ਚ ਮਰਨ ਵਾਲਿਆਂ ਦੀ ਗਿਣਤੀ 560 ਹੋ ਗਈ ਹੈ। ਪੂਰੀ ਦੁਨੀਆ ਨੇ ਦੇਖਿਆ ਕਿ ਪ੍ਰਦਰਸ਼ਨਕਾਰੀਆਂ ਨੇ ਪ੍ਰਧਾਨ ਮੰਤਰੀ ਦੀ ਰਿਹਾਇਸ਼ 'ਚ ਦਾਖਲ ਹੋ ਕੇ ਭੰਨ-ਤੋੜ, ਅੱਗਜ਼ਨੀ ਅਤੇ ਲੁੱਟਮਾਰ ਵਰਗੀਆਂ ਘਟਨਾਵਾਂ ਨੂੰ ਅੰਜਾਮ ਦਿੱਤਾ। ਇਸ ਸਿਆਸੀ ਚੁੱਕ-ਥੱਲ ਕਾਰਨ ਕਈ ਦਿਨਾਂ ਤੱਕ ਕਰਫਿਊ ਲਗਾਇਆ ਗਿਆ ਅਤੇ ਇੰਟਰਨੈੱਟ ਬੰਦ ਰਿਹਾ, ਜਿਸ ਤੋਂ ਬਾਅਦ ਬੰਗਲਾਦੇਸ਼ ਸੁਰਖੀਆਂ 'ਚ ਰਿਹਾ।
ਹਰ ਮਹੀਨੇ 30000 ਰੁਪਏ ਜਮ੍ਹਾ ਕਰ ਮਿਲਣਗੇ 5 ਕਰੋੜ! ਹੈਰਾਨ ਨਾ ਹੋਵੇ, ਇਹ ਫਾਰਮੂਲਾ ਬਣਾਵੇਗਾ ਕਰੋੜਪਤੀ!
NEXT STORY 
