ਚੰਡੀਗੜ੍ਹ (ਸੰਦੀਪ ਮਿੱਤਲ) : ਅੰਤਰਰਾਸ਼ਟਰੀ ਸਹਿਕਾਰਤਾ ਦੇ ਖੇਤਰ 'ਚ ਭਾਰਤ ਲਈ ਇੱਕ ਮਹੱਤਵਪੂਰਨ ਉਪਲੱਬਧੀ ਸਾਹਮਣੇ ਆਈ ਹੈ। ਇਫਕੋ (IFFCO) ਦੇ ਚੇਅਰਮੈਨ ਦਲੀਪ ਸਿੰਘ ਸੰਘਾਣੀ ਨੂੰ ਇੰਟਰਨੈਸ਼ਨਲ ਕੋ-ਆਪਰੇਟਿਵ ਅਲਾਇੰਸ (ICA) ਦੇ ਗਲੋਬਲ ਬੋਰਡ ਲਈ At-Large Director ਚੁਣਿਆ ਗਿਆ ਹੈ। ਇਹ ਚੋਣ 15 ਸਤੰਬਰ ਨੂੰ ਪਨਾਮਾ ਸਿਟੀ 'ਚ ਹੋਈ ICA ਜਨਰਲ ਅਸੈਂਬਲੀ ਦੌਰਾਨ ਹੋਈ, ਜਿਸ ਨਾਲ ਭਾਰਤ ਦੀ ਸਹਿਕਾਰਤਾ ਲਹਿਰ ਨੂੰ ਵਿਸ਼ਵ ਪੱਧਰੀ ਸੰਸਥਾਗਤ ਮੰਚ ’ਤੇ ਨਵੀਂ ਨੁਮਾਇੰਦਗੀ ਮਿਲੀ ਹੈ। ਸੰਘਾਣੀ 2026 ਤੋਂ 2030 ਤੱਕ ਦੇ ਕਾਰਜਕਾਲ ਲਈ ICA ਦੇ ਗਲੋਬਲ ਬੋਰਡ ਵਿੱਚ ਸੇਵਾ ਨਿਭਾਉਣਗੇ। ਉਪਲੱਬਧ ਚੋਣ ਜਾਣਕਾਰੀ ਅਨੁਸਾਰ ਉਨ੍ਹਾਂ ਨੂੰ 526 ਵੋਟਾਂ ਪ੍ਰਾਪਤ ਹੋਈਆਂ। ਭਾਰਤ ਵੱਲੋਂ ਉਨ੍ਹਾਂ ਦੀ ਚੋਣ ਨੂੰ ਦੇਸ਼ ਦੇ ਸਹਿਕਾਰਤਾ ਖੇਤਰ ਦੀ ਅੰਤਰਰਾਸ਼ਟਰੀ ਪੱਧਰ ’ਤੇ ਮੌਜੂਦਗੀ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ।
ਇਸ ਪੂਰੇ ਘਟਨਾਕ੍ਰਮ 'ਚ ਪੰਜਾਬ ਨਾਲ ਸਬੰਧਿਤ ਭਾਜਪਾ ਆਗੂ ਅਤੇ ਸਹਿਕਾਰਤਾ ਖੇਤਰ ਨਾਲ ਜੁੜੇ ਇਫਕੋ ਦੇ ਡਾਇਰੈਕਟਰ ਜਗਦੀਪ ਸਿੰਘ ਨਕਈ ਦੀ ਭੂਮਿਕਾ ਦੀ ਵਿਸ਼ੇਸ਼ ਰਹੀ ਹੈ। ਦਲੀਪ ਸਿੰਘ ਸੰਘਾਣੀ ਦੇ ਨਜ਼ਦੀਕੀ ਸਹਿਯੋਗੀ ਵਜੋਂ ਜਾਣੇ ਜਾਂਦੇ ਨਕਈ ਨੇ ਚੋਣ ਪ੍ਰਕਿਰਿਆ ਦੌਰਾਨ ਵਿਦੇਸ਼ਾਂ 'ਚ ਸਹਿਕਾਰਤਾ ਖੇਤਰ ਨਾਲ ਜੁੜੇ ਆਪਣੇ ਸੰਪਰਕਾਂ ਰਾਹੀਂ ਸਹਿਯੋਗ ਇਕੱਠਾ ਕਰਨ ਲਈ ਯਤਨ ਕੀਤੇ ਹੋਣ ਦਾ ਉਨ੍ਹਾਂ ਦੇ ਸਮਰਥਕਾਂ ਵੱਲੋਂ ਦਾਅਵਾ ਕੀਤਾ ਗਿਆ ਹੈ। ਜਾਣਕਾਰੀ ਮੁਤਾਬਕ ਪਿਛਲੇ ਦਿਨਾਂ ਦੌਰਾਨ ਕੈਨੇਡਾ, ਜਪਾਨ, ਅਮਰੀਕਾ ਸਮੇਤ ਏਸ਼ੀਆ, ਯੂਰਪ ਅਤੇ ਅਫ਼ਰੀਕਾ ਦੇ ਵੱਖ-ਵੱਖ ਖੇਤਰਾਂ ਨਾਲ ਜੁੜੇ ਸਹਿਕਾਰਤਾ ਨੁਮਾਇੰਦਿਆਂ ਨਾਲ ਸੰਪਰਕ ਅਤੇ ਵਿਚਾਰ-ਵਟਾਂਦਰੇ ਕੀਤੇ ਗਏ। ਨਕਈ ਨਾਲ ਜੁੜੇ ਸਹਿਯੋਗੀਆਂ ਦਾ ਕਹਿਣਾ ਹੈ ਕਿ ਅੰਤਰਰਾਸ਼ਟਰੀ ਸਹਿਕਾਰਤਾ ਜਗਤ 'ਚ ਬਣੇ ਨਿੱਜੀ ਅਤੇ ਸੰਸਥਾਗਤ ਸੰਪਰਕਾਂ ਨੇ ਚੋਣ ਦੌਰਾਨ ਸੰਘਾਣੀ ਦੀ ਉਮੀਦਵਾਰੀ ਲਈ ਸਮਰਥਨ ਬਣਾਉਣ 'ਚ ਯੋਗਦਾਨ ਪਾਇਆ।
ਮਾਨਸਾ, ਬਰਨਾਲਾ, ਫਰੀਦਕੋਟ, ਸੰਗਰੂਰ ਅਤੇ ਬਠਿੰਡਾ ਜ਼ਿਲ੍ਹਿਆਂ ਦੇ ਸਮਰਥਕਾਂ ਨੇ ਕਿਹਾ ਕਿ ਜਗਦੀਪ ਸਿੰਘ ਨਕਈ ਸਾਬਕਾ ਪਾਰਲੀਮਾਨੀ ਸਕੱਤਰ ਵੱਲੋਂ ਵਿਦੇਸ਼ਾਂ 'ਚ ਸਹਿਕਾਰਤਾ ਖੇਤਰ ਨਾਲ ਜੁੜੇ ਦੋਸਤਾਂ, ਸਾਥੀਆਂ ਅਤੇ ਹੋਰ ਸੰਪਰਕਾਂ ਨਾਲ ਕੀਤੇ ਗਏ ਸੰਵਾਦ ਨੇ ਇਸ ਚੋਣ 'ਚ ਸਹਿਯੋਗ ਦਾ ਮਾਹੌਲ ਤਿਆਰ ਕਰਨ 'ਚ ਭੂਮਿਕਾ ਨਿਭਾਈ। ਉਨ੍ਹਾਂ ਕਿਹਾ ਕਿ ਦਲੀਪ ਸਿੰਘ ਸੰਘਾਣੀ ਦੀ ਜਿੱਤ ਨਾਲ ਭਾਰਤ ਦੇ ਨਾਲ-ਨਾਲ ਪੰਜਾਬ ਦੀ ਸਹਿਕਾਰਤਾ ਲਹਿਰ ਨੂੰ ਵੀ ਅੰਤਰਰਾਸ਼ਟਰੀ ਪੱਧਰ ’ਤੇ ਪਛਾਣ ਮਿਲੀ ਹੈ। ਉਨ੍ਹਾਂ ਨੇ ਜਗਦੀਪ ਸਿੰਘ ਨਕਈ ਨਾਲ ਕੰਮ ਕਰਨ ਵਾਲੀ ਵਿਦੇਸ਼ੀ ਸਹਿਯੋਗੀ ਟੀਮ ਅਤੇ ਸਹਿਕਾਰਤਾ ਖੇਤਰ ਨਾਲ ਜੁੜੇ ਸਾਰੇ ਸਾਥੀਆਂ ਦਾ ਧੰਨਵਾਦ ਕੀਤਾ।
ICA ਦੁਨੀਆ ਭਰ ਦੀਆਂ ਸਹਿਕਾਰੀ ਸੰਸਥਾਵਾਂ ਦੀ ਨੁਮਾਇੰਦਗੀ ਕਰਨ ਵਾਲਾ ਪ੍ਰਮੁੱਖ ਅੰਤਰਰਾਸ਼ਟਰੀ ਮੰਚ ਹੈ। ਇਸ ਦੇ ਗਲੋਬਲ ਬੋਰਡ 'ਚ ਭਾਰਤ ਦੀ ਨੁਮਾਇੰਦਗੀ ਨਾਲ ਭਾਰਤੀ ਸਹਿਕਾਰਤਾ ਮਾਡਲ, ਕਿਸਾਨ-ਕੇਂਦਰਿਤ ਸੰਸਥਾਵਾਂ ਅਤੇ ਸਹਿਕਾਰਤਾ ਆਧਾਰਿਤ ਵਿਕਾਸ ਦੇ ਤਜਰਬਿਆਂ ਨੂੰ ਅੰਤਰਰਾਸ਼ਟਰੀ ਪੱਧਰ ’ਤੇ ਪੇਸ਼ ਕਰਨ ਲਈ ਇੱਕ ਮਹੱਤਵਪੂਰਨ ਮੰਚ ਉਪਲਬਧ ਹੋਵੇਗਾ। ਦਲੀਪ ਸਿੰਘ ਸੰਘਾਣੀ ਦੀ ਚੋਣ ਨੂੰ ਇਸ ਤਰ੍ਹਾਂ ਭਾਰਤੀ ਸਹਿਕਾਰਤਾ ਖੇਤਰ ਦੀ ਵਿਸ਼ਵ ਪੱਧਰੀ ਭੂਮਿਕਾ ਨਾਲ ਜੁੜੇ ਇੱਕ ਮਹੱਤਵਪੂਰਨ ਵਿਕਾਸ ਵਜੋਂ ਦੇਖਿਆ ਜਾ ਰਿਹਾ ਹੈ।
ਰੋਹਿਤ ਸ਼ਰਮਾ ਤੇ ਵਿਰਾਟ ਕੋਹਲੀ ਨੂੰ ਸਨਮਾਨਿਤ ਕਰੇਗਾ PCA ! IND-WI ਵਨਡੇ ਮੈਚ ਦੌਰਾਨ ਦਿੱਤਾ ਜਾਵੇਗਾ ਅਵਾਰਡ
NEXT STORY 
