ਐਂਟਰਟੇਨਮੈਂਟ ਡੈਸਕ - ਕਮਲ ਚੰਦਰਾ ਦੇ ਨਿਰਦੇਸ਼ਨ ਹੇਠ ਬਣੀ ਫ਼ਿਲਮ ‘ਆਰੀਆਭੱਟ ਕਾ ਜ਼ੀਰੋ’ 7 ਅਗਸਤ ਨੂੰ ਪੂਰੇ ਭਾਰਤ ਦੇ ਸਿਨੇਮਾਘਰਾਂ ਵਿਚ ਰਿਲੀਜ਼ ਹੋਣ ਲਈ ਤਿਆਰ ਹੈ। ਫ਼ਿਲਮ ’ਚ ਇਕ ਸਾਧਾਰਨ ਮੁੰਡੇ ਦੀ ਅਸਾਧਾਰਨ ਯਾਤਰਾ ਦੀ ਝਲਕ ਦਿਖਾਈ ਗਈ ਹੈ, ਜੋ ਅਸਫ਼ਲਤਾਵਾਂ, ਟੁੱਟੇ ਸੁਪਨਿਆਂ, ਦਿਲ ਟੁੱਟਣ, ਪਰਿਵਾਰਕ ਜ਼ਿੰਮੇਵਾਰੀਆਂ ਤੇ ਲਗਾਤਾਰ ਸਮਾਜਿਕ ਮਜ਼ਾਕ ਨਾਲ ਜੂਝਦਿਆਂ ਇੱਜ਼ਤ ਤੇ ਸਵੈ-ਸਨਮਾਨ ਦੀ ਭਾਲ ਕਰਦਾ ਹੈ।
ਫ਼ਿਲਮ ’ਚ ਹਿਮਾਂਸ਼ ਕੋਹਲੀ, ਸੋਨਾਲੀ ਸਹਿਗਲ, ਰਵੀ ਕਿਸ਼ਨ, ਦਰਸ਼ਨ ਬਨਿਕ, ਰਾਜੇਸ਼ ਸ਼ਰਮਾ, ਗੋਪਾਲ ਦੱਤ, ਇਸ਼ਲੀਨ ਪ੍ਰਸਾਦ, ਅਲਕਾ ਅਮੀਨ, ਨੀਰਜ ਸੂਦ ਤੇ ਸ਼ਿਲਪਾ ਸ਼ਿੰਦੇ ਅਹਿਮ ਭੂਮਿਕਾਵਾਂ ’ਚ ਨਜ਼ਰ ਆਉਣਗੇ। ਇਸ ਫ਼ਿਲਮ ਨੂੰ ਲੈ ਕੇ ਕਮਲ ਚੰਦਰਾ, ਹਿਮਾਂਸ਼ ਕੋਹਲੀ ਤੇ ਸੋਨਾਲੀ ਸਹਿਗਲ ਨੇ ਪੰਜਾਬ ਕੇਸਰੀ/ ਨਵੋਦਿਆ ਟਾਈਮਜ਼/ ਜਗ ਬਾਣੀ/ ਹਿੰਦ ਸਮਾਚਾਰ ਨਾਲ ਖ਼ਾਸ ਗੱਲਬਾਤ ਕੀਤੀ ਤੇ ਦਿਲਚਸਪ ਗੱਲਾਂ ਸਾਂਝੀਆਂ ਕੀਤੀਆਂ...
‘ਜ਼ੀਰੋ’ ਨਹੀਂ, ਭਾਵਨਾਵਾਂ ਦਾ ਹੀਰੋ ਹੈ ਫ਼ਿਲਮ ਦਾ ਟਾਈਟਲ : ਕਮਲ ਚੰਦਰਾ
Q ਫ਼ਿਲਮ ਵਿੱਚ ਜ਼ੀਰੋ ਦਾ ਕੀ ਮਤਲਬ ਹੈ? ਟਾਈਟਲ ਦੇ ਪਿੱਛੇ ਕੀ ਕਹਾਣੀ ਹੈ?
-ਫ਼ਿਲਮ ’ਚ ਨੀਰਜ ਸੂਦ ਜੀ ਦੇ ਕਿਰਦਾਰ ਦਾ ਨਾਂ ਆਰੀਆਭੱਟ ਸ਼੍ਰੀਵਾਸਤਵ ਹੈ ਤੇ ਉਨ੍ਹਾਂ ਦੇ ਪੁੱਤਰ ਦਾ ਨਾਂ ਬ੍ਰਹਮਗੁਪਤ ਸ਼੍ਰੀਵਾਸਤਵ (ਬੱਗੂ) ਹੈ। ਆਰੀਆਭੱਟ ਨੇ ਸਿਫ਼ਰ (ਜ਼ੀਰੋ) ਦੀ ਖੋਜ ਕੀਤੀ ਸੀ, ਇਸ ਲਈ ਮੁਹੱਲੇ ਵਾਲੇ ਮਜ਼ਾਕ ’ਚ ਕਹਿੰਦੇ ਹਨ ਕਿ ਇਕ ਆਰੀਆਭੱਟ ਨੇ ਜ਼ੀਰੋ ਬਣਾਇਆ ਸੀ ਅਤੇ ਇਸ ਆਰੀਆਭੱਟ ਨੇ ਘਰ ’ਚ ਇਕ ‘ਜ਼ੀਰੋ’ ਪੈਦਾ ਕਰ ਦਿੱਤਾ। ਇਹ ਘਰ ਦਾ ਜ਼ੀਰੋ ਹੀ ਫ਼ਿਲਮ ਦਾ ਸਭ ਤੋਂ ਵੱਡਾ ਸਸਪੈਂਸ ਹੈ, ਜੋ ਕਹਾਣੀ ਨਾਲ ਸਾਹਮਣੇ ਆਉਂਦਾ ਹੈ।
Q ਕੀ ਤੁਹਾਨੂੰ ਲੱਗਦਾ ਹੈ ਕਿ ਭਾਰਤੀ ਪਰਿਵਾਰਾਂ ’ਚ ਪਿਓ ਤੇ ਪੁੱਤਰ ਵਿਚਾਲੇ ਭਾਵਨਾਵਾਂ ਪ੍ਰਗਟ ਕਰਨ ’ਚ ਝਿਜਕ ਹੁੰਦੀ ਹੈ?
-ਬਿਲਕੁਲ। ਭਾਰਤੀ ਪਰਿਵਾਰਾਂ ’ਚ ਪਿਓ ਤੇ ਪੁੱਤਰ ਇਕ-ਦੂਜੇ ਦੀ ਬਹੁਤ ਪ੍ਰਵਾਹ ਕਰਦੇ ਹਨ, ਪਰ ਸਾਹਮਣੇ ਆ ਕੇ ਆਪਣੇ ਪਿਆਰ ਦਾ ਇਜ਼ਹਾਰ ਘੱਟ ਕਰਦੇ ਹਨ। ਕਈ ਵਾਰ ਉਨ੍ਹਾਂ ਦੇ ਵਿਚਾਰ ਨਹੀਂ ਮਿਲਦੇ, ਬਹਿਸ ਵੀ ਹੁੰਦੀ ਹੈ ਪਰ ਜੇਕਰ ਪਿਓ ਜਾਂ ਪੁੱਤਪ ਵਿੱਚੋਂ ਕਿਸੇ ਨੂੰ ਕੋਈ ਪ੍ਰੇਸ਼ਾਨੀ ਹੋ ਜਾਵੇ ਤਾਂ ਸਭ ਤੋਂ ਪਹਿਲਾਂ ਉਹੀ ਇਕ-ਦੂਜੇ ਦੀ ਚਿੰਤਾ ਕਰਦੇ ਹਨ। ਮੇਰੇ ਆਪਣੇ ਜੀਵਨ ’ਚ ਵੀ ਅਜਿਹਾ ਹੀ ਰਿਸ਼ਤਾ ਰਿਹਾ ਹੈ। ਅਸੀਂ ਆਹਮੋ-ਸਾਹਮਣੇ ਘੱਟ ਗੱਲਾਂ ਕਰਦੇ ਹਾਂ ਪਰ ਜੇਕਰ ਉਨ੍ਹਾਂ ਨੂੰ ਕੋਈ ਤਕਲੀਫ਼ ਹੋ ਜਾਵੇ ਤਾਂ ਸਭ ਤੋਂ ਪਹਿਲਾਂ ਮੈਨੂੰ ਚਿੰਤਾ ਹੁੰਦੀ ਹੈ। ਮੈਨੂੰ ਲੱਗਦਾ ਹੈ ਕਿ ਇਹ ਭਾਵਨਾਤਮਕ ਜੁੜਾਵ ਹੀ ਇਸ ਫ਼ਿਲਮ ਦੀ ਸਭ ਤੋਂ ਵੱਡੀ ਤਾਕਤ ਹੈ।
Q ਫ਼ਿਲਮ ਦੀ ਕਾਸਟਿੰਗ ਨੂੰ ਲੈ ਕੇ ਤੁਹਾਡਾ ਤਜਰਬਾ ਕਿਹੋ ਜਿਹਾ ਰਿਹਾ?
-ਮੈਂ ਖ਼ੁਦ ਨੂੰ ਖ਼ੁਸ਼ਕਿਸਮਤ ਮੰਨਦਾ ਹਾਂ ਕਿ ਇਸ ਫ਼ਿਲਮ ਲਈ ਇੰਨੀ ਸ਼ਾਨਦਾਰ ਕਾਸਟ ਮਿਲੀ। ਸਭ ਤੋਂ ਪਹਿਲਾਂ ਸੋਨਾਲੀ ਤੇ ਹਿਮਾਂਸ਼ ਫ਼ਿਲਮ ਨਾਲ ਜੁੜੇ। ਉਸ ਤੋਂ ਬਾਅਦ ਅਸੀਂ ਕਹਾਣੀ ਦੇ ਹਿਸਾਬ ਨਾਲ ਬਾਕੀ ਕਲਾਕਾਰਾਂ ਨੂੰ ਚੁਣਿਆ। ਜਿਸ-ਜਿਸ ਕਲਾਕਾਰ ਨੂੰ ਅਸੀਂ ਕਹਾਣੀ ਸੁਣਾਈ, ਲਗਭਗ ਸਾਰਿਆਂ ਨੇ ਤੁਰੰਤ ਫ਼ਿਲਮ ਲਈ ਹਾਮੀ ਭਰ ਦਿੱਤੀ। ਅਜਿਹਾ ਲੱਗਾ ਜਿਵੇਂ ਇਹ ਪੂਰੀ ਟੀਮ ਪਹਿਲਾਂ ਤੋਂ ਹੀ ਇਸ ਫ਼ਿਲਮ ਦਾ ਹਿੱਸਾ ਬਣਨ ਲਈ ਬਣੀ ਹੋਵੇ। ਅਲਕਾ ਅਮੀਨ ਜੀ ਨਾਲ ਮੇਰਾ ਇਕ ਪੁਰਾਣਾ ਵਾਅਦਾ ਵੀ ਸੀ। ਮੈਂ ਉਨ੍ਹਾਂ ਨੂੰ ਪਹਿਲਾਂ ਹੀ ਕਿਹਾ ਸੀ ਕਿ ਜਦੋਂ ਮੈਂ ਨਿਰਦੇਸ਼ਕ ਬਣਾਂਗਾ ਤਾਂ ਉਨ੍ਹਾਂ ਨੂੰ ਆਪਣੀ ਫ਼ਿਲਮ ’ਚ ਜ਼ਰੂਰ ਕਾਸਟ ਕਰਾਂਗਾ। ਇਸ ਫ਼ਿਲਮ ਰਾਹੀਂ ਉਹ ਵਾਅਦਾ ਵੀ ਪੂਰਾ ਹੋ ਗਿਆ।
‘ਰਿੰਕੂ’ ਸਿਰਫ਼ ਪ੍ਰੇਮਿਕਾ ਨਹੀਂ, ਬੱਗੂ ਦੀ ਸਭ ਤੋਂ ਵੱਡੀ ਤਾਕਤ: ਸੋਨਾਲੀ
Q ਫ਼ਿਲਮ ’ਚ ਅਜਿਹਾ ਕੀ ਵੱਖਰਾ ਦਿਸਿਆ ਜਿਸ ਨੇ ਤੁਹਾਨੂੰ ਆਕਰਸ਼ਿਤ ਕੀਤਾ?
-ਮੇਰੇ ਲਈ ਕਿਸੇ ਵੀ ਪ੍ਰਾਜੈਕਟ ਨੂੰ ਚੁਣਨ ’ਚ ਸਭ ਤੋਂ ਪਹਿਲੀ ਤੇ ਸਭ ਤੋਂ ਅਹਿਮ ਚੀਜ਼ ਉਸ ਦੀ ਸਕ੍ਰਿਪਟ ਹੁੰਦੀ ਹੈ। ਜੇਕਰ ਸਕ੍ਰਿਪਟ ਚੰਗੀ ਹੁੰਦੀ ਹੈ, ਤਦ ਹੀ ਮੈਂ ਅੱਗੇ ਦੀਆਂ ਗੱਲਾਂ ਸੋਚਦੀ ਹਾਂ। ਇਸ ਫ਼ਿਲਮ ਦੀ ਸਕ੍ਰਿਪਟ ਮੈਨੂੰ ਬਹੁਤ ਪਸੰਦ ਆਈ। ਇਸ ਤੋਂ ਬਾਅਦ ਮੇਰਾ ਕਿਰਦਾਰ ਵੀ ਮੈਨੂੰ ਬਹੁਤ ਦਿਲਚਸਪ ਲੱਗਾ। ਮੈਂ ਇਕ ਛੋਟੇ ਸ਼ਹਿਰ ਦੀ ਕੁੜੀ ਦਾ ਕਿਰਦਾਰ ਨਿਭਾ ਰਹੀ ਹਾਂ ਪਰ ਉਹ ਬਹੁਤ ਚਲਾਕ ਤੇ ਸਮਝਦਾਰ ਹੈ। ਅਜਿਹਾ ਕਿਰਦਾਰ ਮੈਂ ਪਹਿਲਾਂ ਕਦੇ ਨਹੀਂ ਨਿਭਾਇਆ ਸੀ। ਇਸ ਤੋਂ ਪਹਿਲਾਂ ਮੈਂ ਇਕ ਮਾਡਰਨ, ਲੰਡਨ ਬੇਸਡ ਕੁੜੀ ਦਾ ਕਿਰਦਾਰ ਕਰ ਚੁੱਕੀ ਸੀ, ਇਸ ਲਈ ਇਹ ਮੇਰੇ ਲਈ ਬਿਲਕੁਲ ਵੱਖਰਾ ਤੇ ਚੁਣੌਤੀਪੂਰਨ ਤਜਰਬਾ ਸੀ। ਇਕ ਅਦਾਕਾਰ ਵਜੋਂ ਮੈਂ ਹਮੇਸ਼ਾ ਅਜਿਹੇ ਕਿਰਦਾਰ ਕਰਨਾ ਚਾਹੁੰਦੀ ਹਾਂ ਜੋ ਮੈਨੂੰ ਕੁੱਝ ਨਵਾਂ ਕਰਨ ਦਾ ਮੌਕਾ ਦੇਣ।
Q ਤੁਹਾਡੇ ਕਿਰਦਾਰ ਦੀ ਕੀ ਖ਼ਾਸੀਅਤ ਹੈ?
-ਰਿੰਕੂ, ਬੱਗੂ ਦੀ ਜ਼ਿੰਦਗੀ ’ਚ ਹਮੇਸ਼ਾ ਉਸ ਦਾ ਸਾਥ ਦੇਣ ਵਾਲੀ ਕੁੜੀ ਹੈ। ਉਸ ਦਾ ਕਿਰਦਾਰ ਸਿਰਫ਼ ਇਕ ਪ੍ਰੇਮਿਕਾ ਦਾ ਨਹੀਂ, ਸਗੋਂ ਹਰ ਸਮੱਸਿਆ ਦਾ ਹੱਲ ਕੱਢਣ ਵਾਲੀ ਸਮਝਦਾਰ ਕੁੜੀ ਦਾ ਹੈ। ਉਹ ਬੱਗੂ ਨੂੰ ਅੱਗੇ ਵਧਣ ਲਈ ਪ੍ਰੇਰਿਤ ਕਰਦੀ ਹੈ। ਫ਼ਿਲਮ ਵਿਚ ਉਨ੍ਹਾਂ ਦਾ ਵਿਆਹ ਹੁੰਦਾ ਹੈ ਜਾਂ ਨਹੀਂ ਤੇ ਉਨ੍ਹਾਂ ਦੀ ਪ੍ਰੇਮ ਕਹਾਣੀ ਕਿਸ ਮੋੜ ’ਤੇ ਪੁੱਜਦੀ ਹੈ, ਇਹ ਫ਼ਿਲਮ ਦੇਖ ਕੇ ਹੀ ਪਤਾ ਲੱਗੇਗਾ।
Q ਖ਼ੁਦ 'ਤੇ ਭਰੋਸਾ ਰੱਖਣ ਦੀ ਪ੍ਰੇਰਨਾ ਕਿੱਥੋਂ ਮਿਲਦੀ ਹੈ?
-ਜਦੋਂ ਮੈਂ ਛੋਟੀ ਸੀ, ਉਦੋਂ ਮੇਰੀ ਮਾਂ ਨੂੰ ਮੇਰੇ ’ਤੇ ਸਭ ਤੋਂ ਵੱਧ ਭਰੋਸਾ ਸੀ। ਉਨ੍ਹਾਂ ਦੀ ਵਜ੍ਹਾ ਕਰ ਕੇ ਮੈਨੂੰ ਖ਼ੁਦ ’ਤੇ ਵਿਸ਼ਵਾਸ ਕਰਨਾ ਆਇਆ। ਵਿਆਹ ਤੋਂ ਬਾਅਦ ਮੇਰੇ ਪਤੀ ਵੀ ਮੇਰੇ ਸਭ ਤੋਂ ਵੱਡੇ ਸਪੋਰਟ ਸਿਸਟਮ ਹਨ। ਹੁਣ ਜਦੋਂ ਮੇਰਾ ਬੱਚਾ ਹੈ ਤਾਂ ਉਸ ਤੋਂ ਵੀ ਪ੍ਰੇਰਣਾ ਮਿਲਦੀ ਹੈ।
Q ਆਪਣਾ ਯੋਗਾ ਚੈਨਲ ਕਿਵੇਂ ਸ਼ੁਰੂ ਕੀਤਾ?
-ਕੋਵਿਡ ਦੌਰਾਨ ਮੈਂ ਘਰ ਸੀ ਤੇ ਮੇਰੇ ਕੋਲ ਕਾਫ਼ੀ ਸਮਾਂ ਸੀ। ਉਸੇ ਸਮੇਂ ਮੈਂ ਯੋਗ ’ਤੇ ਧਿਆਨ ਦੇਣਾ ਸ਼ੁਰੂ ਕੀਤਾ। ਮੈਂ ਇਕ ਸਰਟੀਫ਼ਾਈਡ ਯੋਗਾ ਟੀਚਰ ਵੀ ਹਾਂ, ਹਾਲਾਂਕਿ ਮੈਂ ਨਿਯਮਿਤ ਰੂਪ ’ਚ ਕਲਾਸਾਂ ਨਹੀਂ ਲੈਂਦੀ। ਵਿਆਹ ਤੇ ਬੱਚੇ ਤੋਂ ਬਾਅਦ ਮੈਂ ਕੁੱਝ ਸਮੇਂ ਲਈ ਵੱਡੇ ਪ੍ਰਾਜੈਕਟਾਂ ਤੋਂ ਬ੍ਰੇਕ ਲਿਆ ਸੀ।
‘ਬਿਲੀਵ ਇਨ ਯੁਅਰਸੈਲਫ਼’ ਜ਼ਿੰਦਗੀ ਦਾ ਮੰਤਰ : ਹਿਮਾਂਸ਼ ਕੋਹਲੀ
Q ਬੱਗੂ ਵਰਗੇ ਕਿਰਦਾਰ ਨੂੰ ਨਿਭਾਉਣ ਲਈ ਤੁਹਾਨੂੰ ਕਿਸ ਗੱਲ ਨੇ ਸਭ ਤੋਂ ਵੱਧ ਆਕਰਸ਼ਿਤ ਕੀਤਾ?
-ਮੈਨੂੰ ਇਹ ਕਿਰਦਾਰ ਨਿਭਾਉਣ ’ਚ ਬਹੁਤ ਮਜ਼ਾ ਆਇਆ ਕਿਉਂਕਿ ਇਹ ਮੇਰੇ ਲਈ ਬਿਲਕੁਲ ਵੱਖਰਾ ਸੀ। ਜਿਸ ਤਰ੍ਹਾਂ ਨਾਲ ਇਸ ਨੂੰ ਲਿਖਿਆ ਗਿਆ ਹੈ ਤੇ ਜਿਸ ਤਰ੍ਹਾਂ ਇਸ ਦੀ ਯਾਤਰਾ ਅੱਗੇ ਵਧਦੀ ਹੈ, ਉਹ ਕਾਫ਼ੀ ਦਿਲਚਸਪ ਹੈ। ਪਹਿਲੀ ਵਾਰ ਸਕ੍ਰਿਪਟ ਸੁਣਦਿਆਂ ਹੀ ਮੈਨੂੰ ਲੱਗਾ ਕਿ ਇਹ ਇਕ ਵੱਖਰੀ ਤਰ੍ਹਾਂ ਦੀ ਕਹਾਣੀ ਹੈ। ਜਦੋਂ ਤੁਸੀਂ ਕਹਾਣੀ ਸ਼ੁਰੂ ਕਰਦੇ ਹੋ ਤਾਂ ਲੱਗਦਾ ਹੈ ਕਿ ਇਹ ਇਕ ਆਮ ਕਹਾਣੀ ਹੋਵੇਗੀ ਪਰ ਅੱਗੇ ਜਾ ਕੇ ਇਹ ਤੁਹਾਨੂੰ ਲਗਾਤਾਰ ਹੈਰਾਨ ਕਰਦੀ ਹੈ। ਮੈਂ ਚਾਹੁੰਦਾ ਹਾਂ ਕਿ ਦਰਸ਼ਕ ਫ਼ਿਲਮ ਦੇਖਣ ਤੇ ਫਿਰ ਦੱਸਣ ਕਿ ਉਨ੍ਹਾਂ ਨੂੰ ਇਹ ਕਿਹੋ ਜਿਹੀ ਲੱਗੀ।
Q ਫ਼ਿਲਮ ਦੀ ਟੈਗਲਾਈਨ ਹੈ ‘ਬਿਲੀਵ ਇਨ ਯੁਅਰਸੈਲਫ਼’। ਤੁਹਾਡੇ ਲਈ ਇਸ ਦਾ ਕੀ ਮਤਲਬ ਹੈ?
-ਮੇਰੇ ਲਈ ਖ਼ੁਦ ’ਤੇ ਭਰੋਸਾ ਰੱਖਣਾ ਤੇ ਆਪਣੀ ਸੱਚਾਈ ਨਾਲ ਜਿਊਣਾ ਸਭ ਤੋਂ ਵੱਧ ਜ਼ਰੂਰੀ ਹੈ। ਇਕ ਕਲਾਕਾਰ ਜਦੋਂ ਆਪਣੇ ਸਫ਼ਰ ਦੀ ਸ਼ੁਰੂਆਤ ਕਰਦਾ ਹੈ, ਉਦੋਂ ਜ਼ਿਆਦਾਤਰ ਲੋਕ ਉਸ ’ਤੇ ਭਰੋਸਾ ਨਹੀਂ ਕਰਦੇ। ਹਰ ਇਨਸਾਨ ਦੀ ਜ਼ਿੰਦਗੀ ’ਚ ਅਜਿਹਾ ਦੌਰ ਆਉਂਦਾ ਹੈ, ਜਦੋਂ ਲੋਕ ਉਸ ਨੂੰ ਘੱਟ ਸਮਝਦੇ ਹਨ। ਇਕ ਅਦਾਕਾਰ ਹੋਣ ਦੇ ਨਾਤੇ ਸਾਨੂੰ ਲਗਾਤਾਰ ਰਿਜੈਕਸ਼ਨ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਕਈ ਵਾਰ ਆਖ਼ਰੀ ਦੌਰ ਤੱਕ ਪੁੱਜਣ ਤੋਂ ਬਾਅਦ ਵੀ ਕੰਮ ਨਹੀਂ ਮਿਲਦਾ। ਪਰ ਅਜਿਹੇ ਸਮੇਂ ’ਚ ਖ਼ੁਦ ’ਤੇ ਵਿਸ਼ਵਾਸ ਬਣਾਏ ਰੱਖਣਾ ਸਭ ਤੋਂ ਜ਼ਰੂਰੀ ਹੁੰਦਾ ਹੈ। ਇਹੋ ਗੱਲ ਮੈਨੂੰ ਫ਼ਿਲਮ ਤੇ ਬੱਗੂ ਦੇ ਕਿਰਦਾਰ ਨਾਲ ਜੋੜਦੀ ਹੈ।
Q ਫ਼ਿਲਮ ’ਚ ਪਿਓ-ਪੁੱਤਰ ਦੇ ਰਿਸ਼ਤੇ ਨੂੰ ਕਿਵੇਂ ਦੇਖਦੇ ਹੋ?
-ਸਾਡੇ ਸਮਾਜ ’ਚ ਅਕਸਰ ਪਿਓ ਤੇ ਪੁੱਤਰ ਇਕ-ਦੂਜੇ ਨਾਲ ਬਹੁਤ ਪਿਆਰ ਕਰਦੇ ਹਨ ਪਰ ਉਸ ਨੂੰ ਖੁੱਲ੍ਹ ਕੇ ਜ਼ਾਹਿਰ ਨਹੀਂ ਕਰ ਪਾਉਂਦੇ। ਫ਼ਿਲਮ ’ਚ ਵੀ ਇਹੋ ਰਿਸ਼ਤਾ ਦਿਖਾਇਆ ਗਿਆ ਹੈ।
‘ਸਪਾਈਡਰ-ਮੈਨ’ ਨੇ ਮਚਾਇਆ ਬਾਕਸ ਆਫਿਸ ’ਤੇ ਤੂਫ਼ਾਨ, 6 ਦਿਨਾਂ ’ਚ ਕੀਤੀ 9,500 ਕਰੋੜ ਰੁਪਏ ਦੀ ਕਮਾਈ
NEXT STORY 
