ਜਲੰਧਰ (ਲਖਨਪਾਲ)- ਪੰਜਾਬੀ ਸਿਨੇਮਾ ਦੇ ਦਰਸ਼ਕਾਂ ਲਈ ਇਕ ਵਾਰ ਫਿਰ ਗਿੱਪੀ ਗਰੇਵਾਲ ਅਤੇ ਸ਼ਹਿਨਾਜ਼ ਗਿੱਲ ਦੀ ਜੋੜੀ ‘ਸਿੰਘ ਵਰਸਿਜ਼ ਕੌਰ’ ਦੀ ਨਵੀਂ ਕਹਾਣੀ ਨੂੰ ਲੈ ਕੇ ਵੱਡੇ ਪਰਦੇ ’ਤੇ ਦਸਤਕ ਦੇਣ ਲਈ ਤਿਆਰ ਹੈ। ਨਵਨੀਤ ਸਿੰਘ ਦੇ ਨਿਰਦੇਸ਼ਨ ਹੇਠ ਬਣੀ ਫ਼ਿਲਮ ‘ਸਿੰਘ ਵਰਸਿਜ਼ ਕੌਰ 2’ ਵਿਚ ਗਿੱਪੀ ਗਰੇਵਾਲ ਅਤੇ ਸ਼ਹਿਨਾਜ਼ ਗਿੱਲ ਮੁੱਖ ਭੂਮਿਕਾਵਾਂ ਵਿਚ ਨਜ਼ਰ ਆਉਣਗੇ। ਹੰਬਲ ਮੋਸ਼ਨ ਪਿਕਚਰਜ਼ ਅਤੇ ਐੱਸ. ਵੀ. ਐੱਫ. ਐਂਟਰਟੇਨਮੈਂਟ ਦੇ ਸਹਿਯੋਗ ਨਾਲ ਬਣੀ ਇਹ ਫ਼ਿਲਮ ਕਾਮੇਡੀ, ਰੋਮਾਂਸ, ਐਕਸ਼ਨ ਅਤੇ ਜਜ਼ਬਾਤਾਂ ਨਾਲ ਭਰਪੂਰ ਦੱਸੀ ਜਾ ਰਹੀ ਹੈ। ਫ਼ਿਲਮ ਦੀ ਕਹਾਣੀ ਪੰਜਾਬ ਤੋਂ ਸ਼ੁਰੂ ਹੋ ਕੇ ਕੋਲਕਾਤਾ ਅਤੇ ਕੈਨੇਡਾ ਤੱਕ ਪਹੁੰਚਦੀ ਹੈ, ਜਿੱਥੇ ਇਕ ਦਿਲਚਸਪ ਘਟਨਾਚੱਕਰ ਕਹਾਣੀ ਨੂੰ ਨਵਾਂ ਮੋੜ ਦਿੰਦਾ ਹੈ।
ਫ਼ਿਲਮ ਵਿਚ ਗਿੱਪੀ ਗਰੇਵਾਲ ਨਿਹਾਲ ਦੇ ਕਿਰਦਾਰ ਵਿਚ ਨਜ਼ਰ ਆਵੇਗਾ, ਜਦਕਿ ਸ਼ਹਿਨਾਜ਼ ਗਿੱਲ ਜਸਨੀਤ ਕੌਰ ਦੀ ਭੂਮਿਕਾ ਨਿਭਾਅ ਰਹੀ ਹੈ, ਜਿਸ ਦਾ ਕਿਰਦਾਰ ਬੰਗਾਲੀ ਪਿਛੋਕੜ ਨਾਲ ਜੁੜਿਆ ਹੋਇਆ ਹੈ। ‘ਸਿੰਘ ਵਰਸਿਜ਼ ਕੌਰ 2’ 11 ਸਤੰਬਰ 2026 ਨੂੰ ਦੁਨੀਆ ਭਰ ਦੇ ਸਿਨੇਮਾਘਰਾਂ ਵਿਚ ਰਿਲੀਜ਼ ਹੋਣ ਜਾ ਰਹੀ ਹੈ। ਫ਼ਿਲਮ ਵਿਚ ਪ੍ਰਿੰਸ ਕੰਵਲਜੀਤ ਸਿੰਘ, ਰਘਵੀਰ ਬੋਲੀ, ਹਨੀ ਮੱਟੂ, ਰੁਪਿੰਦਰ ਰੂਪੀ, ਗੁਰਪ੍ਰੀਤ ਭੰਗੂ ਅਤੇ ਹੋਰ ਕਲਾਕਾਰ ਵੀ ਅਹਿਮ ਭੂਮਿਕਾਵਾਂ ਵਿਚ ਹਨ।
ਫ਼ਿਲਮ ਦੇ ਕਿਰਦਾਰਾਂ, ਸ਼ੂਟਿੰਗ ਦੇ ਤਜਰਬਿਆਂ ’ਤੇ ਗਿੱਪੀ ਗਰੇਵਾਲ ਤੇ ਸ਼ਹਿਨਾਜ਼ ਗਿੱਲ ਦੀ ਜੋੜੀ ਨੇ ‘ਜਗ ਬਾਣੀ’ ਨਾਲ ਕੀਤੀ ਖ਼ਾਸ ਗੱਲਬਾਤ ਦੇ ਕੁਝ ਅੰਸ਼ :-
ਸਵਾਲ : ਤੁਹਾਨੂੰ ਨਵਨੀਤ ਸਿੰਘ ਨੇ ਫ਼ਿਲਮਾਂ ’ਚ ਡੈਬਿਊ ਕਰਵਾਇਆ ਸੀ, ਕੀ ਕਹੋਗੇ ਉਨ੍ਹਾਂ ਬਾਰੇ?
ਗਿੱਪੀ ਗਰੇਵਾਲ : ਮੈਂ ਹਮੇਸ਼ਾ ਆਪਣੀਆਂ ਫ਼ਿਲਮਾਂ ਦਾ ਕ੍ਰੈਡਿਟ ਨਵਨੀਤ ਭਾਜੀ ਨੂੰ ਦਿੰਦਾ ਹਾਂ, ਭਾਜੀ ਨੇ ਉਂਗਲ ਫੜ ਕੇ ਸਾਨੂੰ ਸਭ ਕੁਝ ਸਿਖਾਇਆ, ਉਹ ਗੱਲਾਂ ਸਿਖਾਈਆਂ ਜੋ ਅੱਜ ਮੈਂ ਅੱਗੇ ਹੋਰ ਲੋਕਾਂ ਨੂੰ ਦੱਸਦਾ ਹਾਂ।
ਸਵਾਲ : ਗਿੱਪੀ ਗਰੇਵਾਲ ਨਾਲ ਮੁੜ ਤੋਂ ਕੰਮ ਕਰਨ ਦਾ ਤਜ਼ਰਬਾ ਕਿਵੇਂ ਦਾ ਰਿਹਾ?
ਸ਼ਹਿਨਾਜ਼ ਗਿੱਲ : ਮੈਂ ਗਿੱਪੀ ਗਰੇਵਾਲ ਨਾਲ ‘ਡਾਕਾ’ ਫਿਲਮ ’ਚ ਕੰਮ ਕੀਤਾ ਸੀ ਤੇ ਹੁਣ ਮੈਂ 7 ਸਾਲ ਬਾਅਦ ਉਨ੍ਹਾਂ ਨਾਲ ਲੀਡ ਰੋਲ ਕਰ ਰਹੀ ਹਾਂ। ਮੈਂ ‘ਡਾਕਾ’ ਫਿਲਮ ਵੇਲੇ ਸੋਚਿਆ ਸੀ ਕਿ ਕਾਸ਼ ਮੈਂ ਗਿੱਪੀ ਗਰੇਵਾਲ ਨਾਲ ਲੀਡ ਰੋਲ ਕਰਦੀ ਤੇ ਅੱਜ ਮੇਰਾ ਇਹ ਸੁਪਨਾ ਵੀ ਪੂਰਾ ਹੋ ਗਿਆ।
ਸਵਾਲ : ‘ਸਿੰਘ ਵਰਸਿਜ਼ ਕੌਰ’ ਦਾ 13 ਸਾਲ ਬਾਅਦ ਸੀਕੁਅਲ ਬਣ ਰਿਹੈ, ਇੰਨਾ ਸਮਾਂ ਕਿਉਂ ਲੱਗਾ?
ਗਿੱਪੀ ਗਰੇਵਾਲ : ਜੇ ਪਹਿਲੀ ਫਿਲਮ ਹਿੱਟ ਹੁੰਦੀ ਹੈ ਤਾਂ ਹੀ ਉਸ ਦਾ ਸੀਕੁਅਲ ਬਣਦਾ ਹੈ। ਅੱਜ ਤੋਂ 4 ਸਾਲ ਪਹਿਲਾਂ ਵੀ ਇਹ ਫ਼ਿਲਮ ਬਣਨ ਲੱਗੀ ਸੀ ਪਰ ਉਸ ਦੀ ਕਹਾਣੀ ਮੈਨੂੰ ‘ਸਿੰਘ ਵਰਸਿਜ਼ ਕੌਰ’ ਵਰਗੀ ਨਹੀਂ ਲੱਗੀ ਤੇ ਬਾਅਦ ’ਚ ਨਵਨੀਤ ਭਾਜੀ ਇਹ ਕਹਾਣੀ ਲੈ ਕੇ ਆਏ ਤਾਂ ਮੈਨੂੰ ਪਸੰਦ ਆ ਗਈ ਤੇ ਮੈਂ ਹਾਂ ਕਰ ਦਿੱਤੀ।
ਸਵਾਲ : ਕੀ ‘ਸਿੰਘ ਵਰਸਿਜ਼ ਕੌਰ 2’ ਲਈ ਸ਼ਹਿਨਾਜ਼ ਦੀ ਉਡੀਕ ਹੋ ਰਹੀ ਸੀ ਜਾਂ ਸਕ੍ਰਿਪਟ ਦੀ?
ਗਿੱਪੀ ਗਰੇਵਾਲ : ਦੋਵਾਂ ਦੀ ਉਡੀਕ ਸੀ। ਇਕ ਵਧੀਆ ਫਿਲਮ ਲਈ ਵਧੀਆ ਸਕ੍ਰਿਪਟ ਦਾ ਹੋਣਾ ਲਾਜ਼ਮੀ ਹੈ। ਵਧੀਆ ਸਕ੍ਰਿਪਟ ਕਾਰਨ ਮੈਂ ‘ਸਿੰਘ ਵਰਸਿਜ਼ ਕੌਰ’ ਨੂੰ ਚੁਣਿਆ ਤੇ ਫਿਰ ਸ਼ਹਿਨਾਜ਼ ਗਿੱਲ ਵੀ ਇਸ ਫਿਲਮ ਦਾ ਹਿੱਸਾ ਬਣ ਗਈ।
ਸਵਾਲ : ‘ਫੁਲਕਾਰੀ’ ਤੋਂ ‘ਸਿੰਘ ਵਰਸਿਜ਼ ਕੌਰ 2’ ਤੱਕ ਆ ਗਏ ਹੋ, ਅੱਗੇ ਕੀ ਕੁਝ ਖਾਸ ਹੋਣ ਵਾਲਾ ਹੈ?
ਗਿੱਪੀ ਗਰੇਵਾਲ : ਅਸੀਂ ਤਾਂ ਹਰ ਸਮੇਂ ਕੋਸ਼ਿਸ਼ ਕਰਦੇ ਹਾਂ ਕੀ ਕੁਝ ਵਧੀਆ ਕੀਤਾ ਜਾਵੇ। ਵੱਡੇ ਪ੍ਰੋਡਿਊਸਰ ਤੇ ਪ੍ਰੋਡਕਸ਼ਨ ਹਾਊਸ ਨਾਲ ਗੱਲਬਾਤ ਕਰਦੇ ਹਾਂ ਤਾਂ ਜੋ ਪੰਜਾਬੀ ਫ਼ਿਲਮ ਇੰਡਸਟਰੀ ਹੋਰ ਵੱਡੀ ਹੋ ਸਕੇ। ਹਿੱਟ ਦਾ ਕੋਈ ਫਾਰਮੂਲਾ ਨਹੀਂ ਕਿ ਦਰਸ਼ਕ ਨੂੰ ਕੀ ਪਸੰਦ ਆਵੇਗਾ ਕੀ ਨਹੀਂ। ਅਸੀਂ ਫਿਲਮ ਸਿਰਫ਼ ਤੇ ਸਿਰਫ਼ ਦਰਸ਼ਕਾਂ ਦੇ ਮਨੋਰੰਜਨ ਲਈ ਬਣਾਉਂਦੇ ਹਾਂ।
ਸਵਾਲ : ਸ਼ਹਿਨਾਜ਼ ਗਿੱਲ ਤੁਸੀਂ ਫ਼ਿਲਮ ’ਚ ਐਕਸ਼ਨ ਕੀਤਾ, ਤਜ਼ਰਬਾ ਸਾਂਝਾ ਕਰੋ?
ਸ਼ਹਿਨਾਜ਼ ਗਿੱਲ : ਐਕਸ਼ਨ ਲਈ ਤਾਂ ਮੈਂ ਬਹੁਤ ਜ਼ਿਆਦਾ ਮਿਹਨਤ ਕੀਤੀ। ਐਕਸ਼ਨ ’ਚ ਮੈਂ ਆਪਣੀ ਜਾਨ ਲਾ ਦਿੱਤੀ ਤਾਂ ਜੋ ਫ਼ਿਲਮ ਵਧੀਆ ਬਣੇ।
ਸਵਾਲ : ਇਸ ਫ਼ਿਲਮ ’ਚ ਬੰਗਾਲੀ ਟੱਚ ਵੀ ਹੈ ਕੀ ਤੁਸੀਂ ਬੰਗਾਲੀ ਸਿੱਖੀ?
ਸ਼ਹਿਨਾਜ਼ ਗਿੱਲ : ਜੀ ਹਾਂ, ਮੈਂ ਫਿਲਮ ’ਚ ਬੰਗਾਲੀ ਬੋਲੀ ਹੈ ਤੇ ਮੈਨੂੰ ਅਜੇ ਵੀ ਬੰਗਾਲੀ ਦੀ ਕੁਝ ਸ਼ਬਦ ਬੋਲਣੇ ਆਉਂਦੇ ਹਨ।
ਦਿ ਰਿਵੋਲੂਸ਼ਨਰੀਜ਼ ’ਚ ਦਿਸੇਗੀ ਉਨ੍ਹਾਂ ਕ੍ਰਾਂਤੀਕਾਰੀਆਂ ਦੀ ਕਹਾਣੀ, ਜਿਨ੍ਹਾਂ ਨੇ ਆਜ਼ਾਦੀ ਦੀ ਚਿੰਗਾਰੀ ਲਾਈ : ਨਿਖਿਲ ਅਡਵਾਨੀ
NEXT STORY 
