ਐਂਟਰਟੇਨਮੈਂਟ ਡੈਸਕ- ਬਾਲੀਵੁੱਡ ਦੀ ਸਭ ਤੋਂ ਉਡੀਕੀ ਜਾਣ ਵਾਲੀ ਵਾਰ ਡਰਾਮਾ ਫਿਲਮ ‘ਬਾਰਡਰ 2’ ਦਾ ਟ੍ਰੇਲਰ ਰਿਲੀਜ਼ ਹੁੰਦੇ ਹੀ ਚਾਰੋਂ ਪਾਸੇ ਛਾ ਗਿਆ ਹੈ। ਜਿੱਥੇ ਪ੍ਰਸ਼ੰਸਕ ਇਸ ਨੂੰ ਦੇਖ ਕੇ ਉਤਸ਼ਾਹਿਤ ਹਨ, ਉੱਥੇ ਹੀ ਹੁਣ ਮਸ਼ਹੂਰ ਫਿਲਮ ਨਿਰਮਾਤਾ ਕਰਨ ਜੌਹਰ ਨੇ ਵੀ ਟ੍ਰੇਲਰ ਦਾ ਰਿਵਿਊ ਕਰਦਿਆਂ ਫਿਲਮ ਦੀ ਸਫਲਤਾ ਨੂੰ ਲੈ ਕੇ ਇੱਕ ਵੱਡੀ ਭਵਿੱਖਬਾਣੀ ਕਰ ਦਿੱਤੀ ਹੈ।
ਕਰਨ ਜੌਹਰ ਦੀ ਵੱਡੀ ਭਵਿੱਖਬਾਣੀ
ਕਰਨ ਜੌਹਰ ਨੇ ਆਪਣੇ ਇੰਸਟਾਗ੍ਰਾਮ ’ਤੇ ਇੱਕ ਸਟੋਰੀ ਸਾਂਝੀ ਕਰਦਿਆਂ ਲਿਖਿਆ ਕਿ ‘ਬਾਰਡਰ 2’ ਬਾਕਸ ਆਫਿਸ ’ਤੇ ਜ਼ਬਰਦਸਤ ਓਪਨਿੰਗ ਕਰੇਗੀ। ਉਨ੍ਹਾਂ ਨੇ ਟ੍ਰੇਲਰ ਦੀ ਸ਼ਲਾਘਾ ਕਰਦੇ ਹੋਏ ਇਸ ਨੂੰ ਪੂਰੀ ਤਰ੍ਹਾਂ ਡ੍ਰੈਮੈਟਿਕ, ਦੇਸ਼ ਭਗਤੀ ਨਾਲ ਭਰਪੂਰ ਅਤੇ ਭਾਵੁਕ ਕਰ ਦੇਣ ਵਾਲਾ ਦੱਸਿਆ ਹੈ। ਕਰਨ ਦੇ ਅਨੁਸਾਰ ਨਿਰਦੇਸ਼ਕ ਅਨੁਰਾਗ ਸਿੰਘ ਆਪਣੀ ਸਰਵੋਤਮ ਫਾਰਮ ਵਿੱਚ ਨਜ਼ਰ ਆ ਰਹੇ ਹਨ।
ਸਿਤਾਰਿਆਂ ਦੀ ਅਦਾਕਾਰੀ ’ਤੇ ਹੋਏ ਫਿਦਾ
ਕਰਨ ਜੌਹਰ ਨੇ ਫਿਲਮ ਦੀ ਸਟਾਰ ਕਾਸਟ ਦੀ ਤਾਰੀਫ਼ ਵਿੱਚ ਕੋਈ ਕਸਰ ਨਹੀਂ ਛੱਡੀ:
ਸੰਨੀ ਦਿਓਲ: ਕਰਨ ਨੇ ਕਿਹਾ ਕਿ ਸੰਨੀ ਦਿਓਲ ਆਪਣੀ ਜ਼ਬਰਦਸਤ ਸਟਾਰ ਪਾਵਰ ਨਾਲ ਪਰਦੇ ’ਤੇ ਦਹਾੜਦੇ ਨਜ਼ਰ ਆ ਰਹੇ ਹਨ।
ਦਿਲਜੀਤ ਦੋਸਾਂਝ: ਪੰਜਾਬੀ ਸੁਪਰਸਟਾਰ ਦਿਲਜੀਤ ਦੀ ਤਾਰੀਫ਼ ਕਰਦਿਆਂ ਉਨ੍ਹਾਂ ਨੂੰ ‘ਸ਼ਾਨਦਾਰ ਅਤੇ ਭਾਵਪੂਰਨ’ ਦੱਸਿਆ।
ਵਰੁਣ ਧਵਨ: ਕਰਨ ਅਨੁਸਾਰ, ਵਰੁਣ ਦੀ ਖਾਮੋਸ਼ੀ ਇੰਨੀ ਪ੍ਰਭਾਵਸ਼ਾਲੀ ਹੈ ਕਿ ਉਹ ਬਿਨਾਂ ਬੋਲੇ ਹੀ ਇੱਕ ਸ਼ਕਤੀਸ਼ਾਲੀ ਸੰਦੇਸ਼ ਦੇ ਰਹੇ ਹਨ।
ਆਹਾਨ ਸ਼ੈੱਟੀ: ਉਨ੍ਹਾਂ ਨੇ ਆਹਾਨ ਦੀ ਸਕ੍ਰੀਨ ’ਤੇ ਦਮਦਾਰ ਮੌਜੂਦਗੀ ਦੀ ਵੀ ਸ਼ਲਾਘਾ ਕੀਤੀ।
ਤਿੰਨਾਂ ਸੈਨਾਵਾਂ ਦਾ ਦਿਖਾਇਆ ਸ਼ੌਰਿਆ
ਫਿਲਮ ਦੀ ਕਹਾਣੀ 1971 ਦੀ ਭਾਰਤ-ਪਾਕਿਸਤਾਨ ਜੰਗ ਤੋਂ ਪ੍ਰੇਰਿਤ ਹੈ। ਟ੍ਰੇਲਰ ਵਿੱਚ ਦਿਖਾਇਆ ਗਿਆ ਹੈ ਕਿ ਕਿਵੇਂ ਭਾਰਤੀ ਸੈਨਾ ਦੀਆਂ ਤਿੰਨੋਂ ਟੁਕੜੀਆਂ—ਥਲ ਸੈਨਾ (ਵਰੁਣ ਧਵਨ), ਵਾਯੂ ਸੈਨਾ (ਦਿਲਜੀਤ ਦੋਸਾਂਝ) ਅਤੇ ਨੌ ਸੈਨਾ (ਆਹਾਨ ਸ਼ੈੱਟੀ)—ਨੇ ਮਿਲ ਕੇ ਦੁਸ਼ਮਣ ਦਾ ਸਾਹਮਣਾ ਕੀਤਾ ਸੀ। ਟ੍ਰੇਲਰ ਦੀ ਸ਼ੁਰੂਆਤ ਸੰਨੀ ਦਿਓਲ ਦੇ ਨਿਡਰ ਅੰਦਾਜ਼ ਅਤੇ ਪਾਕਿਸਤਾਨੀ ਟੈਂਕਾਂ ਵੱਲ ਦੇਖਦਿਆਂ ਦਿੱਤੇ ਗਏ ਜੋਸ਼ੀਲੇ ਭਾਸ਼ਣ ਨਾਲ ਹੁੰਦੀ ਹੈ।
ਇਸ ਦਿਨ ਹੋਵੇਗੀ ਰਿਲੀਜ਼
ਜੇ. ਪੀ. ਦੱਤਾ ਅਤੇ ਟੀ-ਸੀਰੀਜ਼ ਵੱਲੋਂ ਪ੍ਰੋਡਿਊਸ ਕੀਤੀ ਗਈ ਇਹ ਫਿਲਮ 23 ਜਨਵਰੀ ਨੂੰ ਸਿਨੇਮਾਘਰਾਂ ਵਿੱਚ ਦਸਤਕ ਦੇਣ ਜਾ ਰਹੀ ਹੈ। ਫਿਲਮ ਵਿੱਚ ਸੋਨਮ ਬਾਜਵਾ, ਮੋਨਾ ਸਿੰਘ ਅਤੇ ਆਨਿਆ ਸਿੰਘ ਵੀ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ।
ਸੁਰਿਆਕੁਮਾਰ ਨਾਲ ਪੰਗਾ ਲੈ ਬੁਰੀ ਫਸੀ ਅਦਾਕਾਰਾ, ਪੈ ਗਿਆ ਪਰਚਾ
NEXT STORY 
