ਹੈਲਥ ਡੈਸਕ - ਬ੍ਰੈਸਟ ਕੈਂਸਰ ਵਿਰੁੱਧ ਲੜਾਈ ’ਚ ਭਾਰਤੀ ਵਿਗਿਆਨੀਆਂ ਨੇ ਇਕ ਨਵੀਂ ਉਮੀਦ ਜਗਾਈ ਹੈ। ਪੁਣੇ ਸਥਿਤ ਆਘਾਰਕਰ ਰਿਸਰਚ ਇੰਸਟੀਚਿਊਟ (ਏ. ਆਰ.ਆਈ.) ਦੇ ਖੋਜੀਆਂ ਨੇ ਇਕ ਬਹੁਤ ਹੀ ਸੂਖਮ ਨੈਨੋ-ਪਾਰਟੀਕਲ (ਨੈਨੋ ਕਣ) ਆਧਾਰਿਤ ਡਰੱਗ ਕੈਰੀਅਰ ਵਿਕਸਿਤ ਕੀਤਾ ਹੈ, ਜਿਸ ਨੇ ਪ੍ਰਯੋਗਸ਼ਾਲਾ ਦੇ ਟੈਸਟਾਂ ਵਿਚ ਕੈਂਸਰ ਕੋਸ਼ਿਕਾਵਾਂ (ਸੈੱਲਾਂ) ਨੂੰ ਨਿਸ਼ਾਨਾ ਬਣਾ ਕੇ ਟਿਊਮਰ ਨੂੰ ਕਾਫੀ ਹੱਦ ਤੱਕ ਸੁੰਗੜਨ ’ਚ ਸਫਲਤਾ ਹਾਸਲ ਕੀਤੀ ਹੈ।
ਕੈਂਸਰ ਕੋਸ਼ਿਕਾਵਾਂ ਤੱਕ ਸਿੱਧੀ ਪਹੁੰਚਦੀ ਹੈ ਦਵਾਈ
ਵਿਗਿਆਨੀਆਂ ਅਨੁਸਾਰ ਇਹ ‘ਨੈਨੋ-ਪਾਰਟੀਕਲ’ ਮਨੁੱਖੀ ਵਾਲਾਂ ਨਾਲੋਂ ਹਜ਼ਾਰਾਂ ਗੁਣਾ ਛੋਟਾ ਹੈ ਅਤੇ ਵਿਸ਼ੇਸ਼ ਤੌਰ ’ਤੇ ਬ੍ਰੈਸਟ ਕੈਂਸਰ ਕੋਸ਼ਿਕਾਵਾਂ ਤੱਕ ਜੀਨ-ਸਾਈਲੈਂਸਿੰਗ ਅਣੂਆਂ ਨੂੰ ਪਹੁੰਚਾਉਣ ਲਈ ਤਿਆਰ ਕੀਤਾ ਗਿਆ ਹੈ। ਕੈਂਸਰ ਕੋਸ਼ਿਕਾਵਾਂ ਦੇ ਅੰਦਰ ਪਹੁੰਚਣ ਤੋਂ ਬਾਅਦ ਇਹ ਉਨ੍ਹਾਂ ਜੀਨਾਂ ਨੂੰ ਬੇਅਸਰ ਕਰ ਦਿੰਦਾ ਹੈ, ਜੋ ਟਿਊਮਰ ਨੂੰ ਜਿਊਂਦਾ ਰੱਖਣ, ਇਲਾਜ ਦਾ ਵਿਰੋਧ ਕਰਨ ਅਤੇ ਲਗਾਤਾਰ ਵਧਣ ਵਿਚ ਮਦਦ ਕਰਦੇ ਹਨ।
ਲੱਖਾਂ ਔਰਤਾਂ ਲਈ ਉਮੀਦ
ਹਰ ਸਾਲ ਲੱਖਾਂ ਔਰਤਾਂ ਬ੍ਰੈਸਟ ਕੈਂਸਰ ਤੋਂ ਪ੍ਰਭਾਵਿਤ ਹੁੰਦੀਆਂ ਹਨ। ਅਜਿਹੇ ਵਿਚ ਇਹ ਨਵੀਂ ਤਕਨੀਕ ਭਵਿੱਖ ਵਿਚ ਵਧੇਰੇ ਪ੍ਰਭਾਵਸ਼ਾਲੀ, ਸੁਰੱਖਿਅਤ ਅਤੇ ਨਿਸ਼ਾਨੇਬੱਧ ਇਲਾਜ ਉਪਲਬਧ ਕਰਵਾਉਣ ਦੀ ਦਿਸ਼ਾ ਵਿਚ ਇਕ ਮਹੱਤਵਪੂਰਨ ਪ੍ਰਾਪਤੀ ਸਾਬਤ ਹੋ ਸਕਦੀ ਹੈ।
ਹੈਲਦੀ ਟਿਸ਼ੂਆਂ ਨੂੰ ਘੱਟ ਨੁਕਸਾਨ
ਇਸ ਤਕਨੀਕ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ਦੀ ਸਟੀਕਤਾ ਹੈ। ਖੋਜੀਅਾਂ ਨੇ ‘ਨੈਨੋ-ਪਾਰਟੀਕਲ’ ਨੂੰ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਹੈ ਕਿ ਇਹ ਐੱਮ. ਯੂ. ਸੀ.-1 ਨਾਮਕ ਪ੍ਰੋਟੀਨ ਦੀ ਪਛਾਣ ਕਰ ਸਕੇ, ਜੋ ਬ੍ਰੈਸਟ ਕੈਂਸਰ ਕੋਸ਼ਿਕਾਵਾਂ ਵਿਚ ਵੱਡੀ ਮਾਤਰਾ ਵਿਚ ਪਾਇਆ ਜਾਂਦਾ ਹੈ, ਜਦੋਂ ਕਿ ਆਮ ਕੋਸ਼ਿਕਾਵਾਂ ਵਿਚ ਬਹੁਤ ਘੱਟ ਜਾਂ ਬਿਲਕੁਲ ਨਹੀਂ ਹੁੰਦਾ। ਇਸ ਕਾਰਨ ਦਵਾਈ ਮੁੱਖ ਤੌਰ ’ਤੇ ਕੈਂਸਰ ਕੋਸ਼ਿਕਾਵਾਂ ਤੱਕ ਹੀ ਪਹੁੰਚਦੀ ਹੈ ਅਤੇ ਟਿਸ਼ੂਆਂ ਨੂੰ ਨੁਕਸਾਨ ਤੋਂ ਬਚਾਉਂਦੀ ਹੈ।
ਚੂਹਿਆਂ ’ਤੇ ਕੀਤੇ ਗਏ ਟੈਸਟਾਂ ’ਚ ਮਿਲੇ ਉਤਸ਼ਾਹਜਨਕ ਨਤੀਜੇ
ਵਿਗਿਆਨ ਅਤੇ ਤਕਨਾਲੋਜੀ ਵਿਭਾਗ (ਡੀ. ਐੱਸ. ਟੀ.) ਅਨੁਸਾਰ ਚੂਹਿਆਂ ’ਤੇ ਕੀਤੇ ਗਏ ਟੈਸਟਾਂ ਵਿਚ ਟਿਊਮਰ ਦਾ ਆਕਾਰ ਕਾਫ਼ੀ ਘੱਟ ਗਿਆ ਅਤੇ ਵੱਡੀ ਗਿਣਤੀ ਵਿਚ ਕੈਂਸਰ ਕੋਸ਼ਿਕਾਵਾਂ ਨਸ਼ਟ ਹੋ ਗਈਆਂ। ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਰਹੀ ਕਿ ਆਲੇ-ਦੁਆਲੇ ਦੇ ਟਿਸ਼ੂਆਂ ਵਿਚ ਬਹੁਤ ਘੱਟ ਨੁਕਸਾਨ ਦੇਖਿਆ ਗਿਆ।
ਅਜੇ ਸ਼ੁਰੂਆਤੀ ਪੜਾਅ ਵਿਚ ਹੈ ਖੋਜ
ਇਹ ਅਧਿਐਨ ਵੱਕਾਰੀ ਜਰਨਲ ‘ਐਡਵਾਂਸਡ ਹੈਲਥਕੇਅਰ ਮਟੀਰੀਅਲਜ਼’ ਵਿਚ ਪ੍ਰਕਾਸ਼ਿਤ ਹੋਇਆ ਹੈ। ਹਾਲਾਂਕਿ ਵਿਗਿਆਨੀਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਖੋਜ ਅਜੇ ਸ਼ੁਰੂਆਤੀ ਵਿਕਾਸ ਪੜਾਅ ਵਿਚ ਹੈ ਅਤੇ ਮਨੁੱਖਾਂ ’ਤੇ ਟੈਸਟ ਕਰਨ ਤੋਂ ਪਹਿਲਾਂ ਕਈ ਹੋਰ ਅਧਿਐਨ ਕੀਤੇ ਜਾਣੇ ਬਾਕੀ ਹਨ। ਇਸ ਦੇ ਬਾਵਜੂਦ ਮਾਹਿਰ ਇਸ ਨੂੰ ਭਵਿੱਖ ਦੇ ਸਟੀਕ ਅਤੇ ਘੱਟ ਜ਼ਹਿਰੀਲੇ ਕੈਂਸਰ ਦੇ ਇਲਾਜ ਦੀ ਦਿਸ਼ਾ ਵਿਚ ਇਕ ਮਹੱਤਵਪੂਰਨ ਕਦਮ ਮੰਨ ਰਹੇ ਹਨ।
ਕੀਮੋਥੈਰੇਪੀ ਦੀ ਵੱਡੀ ਕਮੀ ਨੂੰ ਦੂਰ ਕਰਨ ਦੀ ਸੰਭਾਵਨਾ
ਵਿਗਿਆਨੀਆਂ ਦਾ ਮੰਨਣਾ ਹੈ ਕਿ ਇਹ ਤਕਨੀਕ ਕੀਮੋਥੈਰੇਪੀ ਦੀ ਸਭ ਤੋਂ ਵੱਡੀ ਸਮੱਸਿਆ- ਭਾਵ ਸਵਸਥ ਕੋਸ਼ਿਕਾਵਾਂ ਨੂੰ ਹੋਣ ਵਾਲੇ ਨੁਕਸਾਨ ਨੂੰ ਕਾਫ਼ੀ ਹੱਦ ਤੱਕ ਘੱਟ ਕਰ ਸਕਦੀ ਹੈ। ਰਵਾਇਤੀ ਕੈਂਸਰ ਦਵਾਈਆਂ ਜਿਥੇ ਸਰੀਰ ’ਤੇ ਬੁਰਾ ਪ੍ਰਭਾਵ ਪਾਉਂਦੀਆਂ ਹਨ, ਉਥੇ ਹੀ ਇਹ ਪ੍ਰਣਾਲੀ ‘ਗਾਈਡਡ ਮਿਜ਼ਾਈਲ’ ਵਾਂਗ ਸਿਰਫ ਕੈਂਸਰ ਕੋਸ਼ਿਕਾਵਾਂ ’ਤੇ ਹੀ ਹਮਲਾ ਕਰਦੀ ਹੈ।
ਲਗਾਤਾਰ ਹੋ ਰਿਹੈ ਸਿਰਦਰਦ ਤਾਂ ਬਿਲਕੁਲ ਨਾ ਕਰੋ ਇਗਨੋਰ ! ਹਾਰਟ ਅਟੈਕ ਦਾ ਵਧ ਸਕਦੈ ਖ਼ਤਰਾ
NEXT STORY 
