ਮਰਿਆਦਾ ਪੂਰਨ ਜ਼ਿੰਦਗੀ ਬਿਤਾਉਣ ਦਾ ਸਾਰੀ ਦੁਨੀਆ ਨੂੰ ਸੰਦੇਸ਼ ਦੇਣ ਵਾਲੇ ਭਾਰਤ ’ਚ ਹੁਣ ਕੁਝ ਲੋਕ ਰਿਸ਼ਤਿਆਂ ਦਾ ਸਨਮਾਨ ਕਰਨ ਦੀ ਸੱਭਿਅਤਾ ਨੂੰ ਭੁੱਲ ਕੇ ਆਪਣਿਆਂ ਦੀ ਹੀ ਜਾਨ ਦੇ ਦੁਸ਼ਮਣ ਬਣਨ ਦੇ ਨਾਲ ਹੀ ਯੌਨ ਸ਼ੋਸ਼ਣ ਤਕ ਕਰਨ ਲੱਗੇ ਹਨ, ਜਿਸ ਦੀਆਂ ਸਿਰਫ ਪਿਛਲੇ ਲਗਭਗ 10 ਦਿਨਾਂ ਦੀਆਂ ਘਟਨਾਵਾਂ ਹੇਠਾਂ ਦਰਜ ਹਨ :
* 15 ਜੂਨ ਨੂੰ ‘ਲੁਧਿਆਣਾ’ ਵਿਚ ਹਰਿਆਣਾ ਤੋਂ ਆਪਣੀ ਵੱਡੀ ਭੈਣ ਦੇ ਕੋਲ ਰਹਿਣ ਆਈ ਮੁਟਿਆਰ ਦਾ ਉਸ ਦੇ ਜੀਜੇ ਨੇ ਹੀ ਰੇਪ ਕਰ ਦਿੱਤਾ। ਪੁਲਸ ਨੂੰ ਲਿਖਵਾਈ ਸ਼ਿਕਾਇਤ ’ਚ ਮੁਟਿਆਰ ਨੇ ਕਿਹਾ ਕਿ ਉਸ ਦੇ ਜੀਜੇ ਨੇ ਚੁੱਪ-ਚੁਪੀਤੇ ਉਸ ਦੀ ਨਹਾਉਂਦੀ ਹੋਈ ਦੀ ਵੀਡੀਓ ਬਣਾ ਲਈ ਸੀ ਅਤੇ ਉਸ ਤੋਂ ਬਾਅਦ ਉਸ ਨੂੰ ਬਲੈਕਮੇਲ ਕਰਨ ਲੱਗਾ।
* 18 ਜੂਨ ਨੂੰ ‘ਪੁਣੇ’ (ਮਹਾਰਾਸ਼ਟਰ) ’ਚ ਰੀਅਲ ਅਸਟੇਟ ਕਾਰੋਬਾਰੀ ‘ਕੇਤਨ ਵਿਸ਼ਾਲ ਅਗਰਵਾਲ’ ਨੂੰ ਉਸ ਦੀ ਮੰਗੇਤਰ ‘ਸੀਆ ਗੋਇਲ’ ਅਤੇ ‘ਸੀਆ ਗੋਇਲ’ ਦੇ ਪ੍ਰੇਮੀ ‘ਚੇਤਨ ਚੌਧਰੀ’ ਨੇ ‘ਸੀਆ’ ਦੇ ਜਨਮ ਦਿਨ ਦਾ ਜਸ਼ਨ ਮਨਾਉਣ ਦੇ ਬਹਾਨੇ ਬੁਲਾ ਕੇ ਲੋਹਗੜ੍ਹ ਕਿਲੇ ਤੋਂ 400 ਫੁੱਟ ਡੂੰਘੀ ਖੱਡ ’ਚ ਧੱਕਾ ਦੇ ਕੇ ਮਾਰ ਦਿੱਤਾ ਕਿਉਂਕਿ ਉਹ ‘ਕੇਤਨ ਵਿਸ਼ਾਲ ਅਗਰਵਾਲ’ ਨਾਲ ਵਿਆਹ ਨਹੀਂ ਕਰਨਾ ਚਾਹੁੰਦੀ ਸੀ।
‘ਸੀਅਾ’ ਨੇ ਪੁੱਛਗਿੱਛ ਦੌਰਾਨ ਪੁਲਸ ਨੂੰ ਝੂਠ ਬੋਲਿਆ ਸੀ ਕਿ ‘ਕੇਤਨ ਵਿਸ਼ਾਲ ਅਗਰਵਾਲ’ ਫੋਟੋ ਲੈਂਦੇ ਹੋਏ ਤਿਲਕ ਕੇ ਖੱਡ ’ਚ ਡਿੱਗ ਗਿਆ ਸੀ। ‘ਕੇਤਨ ਵਿਸ਼ਾਲ ਅਗਰਵਾਲ’ ਅਤੇ ‘ਸੀਆ ਗੋਇਲ’ ਦੇ ਵਿਆਹ ਲਈ ਰਾਜਸਥਾਨ ’ਚ 17 ਕਰੋੜ ਰੁਪਏ ’ਚ ਇਕ ਪੈਲੇਸ ਅਤੇ ਮਹਿਮਾਨਾਂ ਨੂੰ ਲਿਆਉਣ ਲਈ 2 ਚਾਰਟਰ ਜਹਾਜ਼ ਵੀ ਬੁੱਕ ਕੀਤੇ ਗਏ ਸਨ। ਪੁਲਸ ਨੂੰ ਭਟਕਾਉਣ ਲਈ ‘ਸੀਆ’ ਨੇ ਇੰਸਟਾਗ੍ਰਾਮ ’ਤੇ ਇਕ ਭਾਵੁਕ ਪੋਸਟ ਵੀ ਲਿਖੀ ਸੀ, ‘‘ਕੇਤਨ, ਤੁਸੀਂ ਮੇਰੇ ਜਨਮ ਦਿਨ ’ਤੇ ਇਕੱਲੀ ਛੱਡ ਗਏ। ਵਾਪਸ ਆ ਜਾਓ।’’
* 19 ਜੂਨ ਨੂੰ ‘ਹਾਜੀਪੁਰ’ (ਪੰਜਾਬ) ਦੇ ‘ਦਗਨ’ ਪਿੰਡ ’ਚ ਮਾਮੂਲੀ ਵਿਵਾਦ ਤੋਂ ਬਾਅਦ ‘ਲਕਸ਼ਮੀ ਨਾਰਾਇਣ’ ਨਾਂ ਦੇ ਇਕ ਵਿਅਕਤੀ ਨੇ ਚਾਕੂ ਨਾਲ ਅਾਪਣੀ ਪਤਨੀ ‘ਜੋਤੀ’ ਉੱਤੇ ਕਈ ਵਾਰ ਕਰ ਕੇ ਉਸ ਦੀ ਹੱਤਿਆ ਕਰ ਦਿੱਤੀ।
* 21 ਜੂਨ ਨੂੰ ‘ਸੁੰਦਰਨਗਰ’ (ਹਿਮਾਚਲ ਪ੍ਰਦੇਸ਼) ਦੇ ਪਿੰਡ ‘ਮੇਹਰੀ’ ਵਿਚ ਘਰੇਲੂ ਵਿਵਾਦ ਕਾਰਨ ‘ਖੇਮਾਰਾਮ’ ਨਾਂ ਦੇ ਨੌਜਵਾਨ ਨੇ ਅਾਪਣੀ ਮਾਂ ‘ਪਾਰਵਤੀ ਦੇਵੀ’ (51) ਨੂੰ ਲਾਠੀ ਨਾਲ ਕੁੱਟ-ਕੁੱਟ ਕੇ ਮਾਰ ਦਿੱਤਾ ਅਤੇ ਬਚਾਅ ਕਰਨ ਆਏ ਅਾਪਣੇ ਪਿਤਾ ਨੂੰ ਵੀ ਜ਼ਖਮੀ ਕਰ ਦਿੱਤਾ।
* 22 ਜੂਨ ਨੂੰ ‘ਲਾਤੂਰ’ (ਮਹਾਰਾਸ਼ਟਰ) ’ਚ ਇਕ 45 ਸਾਲਾ ਮਹਿਲਾ ਨੂੰ ਜਾਇਦਾਦ ਵਿਵਾਦ ਦੇ ਕਾਰਨ ਅਾਪਣੇ ਪ੍ਰੇਮੀ ‘ਊਧਵ ਮਾਰੂਤੀ’ (24) ਉੱਪਰ ਖੌਲਦਾ ਹੋਇਆ ਤੇਲ ਪਾ ਕੇ ਉਸ ਦੀ ਹੱਤਿਆ ਕਰ ਦੇਣ ਦੇ ਦੋਸ਼ ’ਚ ਗ੍ਰਿਫਤਾਰ ਕੀਤਾ ਗਿਆ।
* 22 ਜੂਨ ਨੂੰ ਹੀ ‘ਮੁਰਾਦਾਬਾਦ’ (ਉੱਤਰ ਪ੍ਰਦੇਸ਼) ਦੇ ‘ਮਝੋਲਾ’ ਪਿੰਡ ’ਚ ਇਕ ਮਹਿਲਾ ਨੂੰ ਪੇਟ ਗੈਸ ਦੀ ਦਵਾਈ ਦੇ ਨਾਂ ’ਤੇ ਜ਼ਹਿਰੀਲੀ ਸ਼ਰਾਬ ਪਿਲਾ ਕੇ ਮਾਰਨ ਦੇ ਦੋਸ਼ ’ਚ ਉਸ ਦੇ ਪਤੀ ਅਤੇ ਸਹੁਰੇ ਨੂੰ ਗ੍ਰਿਫਤਾਰ ਕੀਤਾ ਗਿਆ।
* 23 ਜੂਨ ਨੂੰ ਹੀ ‘ਬੈਂਗਲੁਰੂ’ (ਕਰਨਾਟਕ) ’ਚ ਇਕ ਮਹਿਲਾ ਅਤੇ ਉਸ ਦੇ ਲਿਵ-ਇਨ-ਪਾਰਟਨਰ ਨੂੰ ਇਕ ਲੋਨ ਵਿਵਾਦ ਕਾਰਨ ਮਹਿਲਾ ਦੇ ਮਾਤਾ-ਪਿਤਾ ਅਤੇ ਛੋਟੀ ਭੈਣ ਦੀ ਹੱਤਿਆ ਦੇ ਦੋਸ਼ ’ਚ ਗ੍ਰਿਫਤਾਰ ਕੀਤਾ ਗਿਆ।
* 23 ਜੂਨ ਨੂੰ ਹੀ ‘ਸੋਨੀਪਤ’ (ਹਰਿਆਣਾ) ਦੇ ਥਾਣਾ ਕਲਾਂ ਪਿੰਡ ’ਚ ‘ਸਰਦਾਰ ਸਿੰਘ’ (70) ਨਾਂ ਦੇ ਵਿਅਕਤੀ ਨੂੰ ਕੁੱਟ-ਕੁੱਟ ਕੇ ਮਾਰਨ ਦੇ ਦੋਸ਼ ’ਚ ਉਸ ਦੇ ਨਸ਼ੇੜੀ ਬੇਟੇ ‘ਬ੍ਰਹਮਦਾਸ’ ਨੂੰ ਗ੍ਰਿਫਤਾਰ ਕੀਤਾ ਗਿਆ।
* 24 ਜੂਨ ਨੂੰ ਹੀ ‘ਫਤੇਹਪੁਰ’ (ਉੱਤਰ ਪ੍ਰਦੇਸ਼) ਜ਼ਿਲੇ ਦੇ ‘ਸੀਤਾਪੁਰ’ ਪਿੰਡ ’ਚ ‘ਰਾਮ ਖੇਲਾਵਨ’ (70) ਨੇ ਅਾਪਣੀ ਪਤਨੀ ਦੇ ਇਲਾਜ ਲਈ ਅਾਪਣੇ ਬੇਟੇ ‘ਅਵਨੀਸ਼ ਸ਼ਰਮਾ’ (36) ਤੋਂ ਪੈਸੇ ਮੰਗੇ ਜਿਸ ਤੋਂ ਇਨਕਾਰ ਕਰਨ ’ਤੇ ‘ਰਾਮ ਖੇਲਾਵਨ’ ਨੇ ਗੋਲੀ ਮਾਰ ਕੇ ‘ਅਵਨੀਸ਼ ਸ਼ਰਮਾ’ ਦੀ ਹੱਤਿਆ ਕਰ ਦਿੱਤੀ ਅਤੇ ਬਚਾਅ ਕਰਨ ਆਈ ਨੂੰਹ ‘ਮਨੀਸ਼ਾ’ (26) ਨੂੰ ਵੀ ਜ਼ਖਮੀ ਕਰ ਦਿੱਤਾ।
* ਅਤੇ ਹੁਣ 24 ਜੂਨ ਨੂੰ ਹੀ ‘ਬੁਲੰਦਸ਼ਹਿਰ’ (ਉੱਤਰ ਪ੍ਰਦੇਸ਼) ਦੀ ਇਕ ਅਦਾਲਤ ਨੇ 2 ਸਾਲਾ ਇਕ ਬੱਚੀ ਨਾਲ ਜਬਰ-ਜ਼ਨਾਹ ਕਰਨ ਦੇ ਦੋਸ਼ ’ਚ ਉਸ ਦੇ ਫੁੱਫੜ ਨੂੰ 50,000 ਰੁਪਏ ਜੁਰਮਾਨਾ ਅਤੇ 40 ਸਾਲ ਕੈਦ ਦੀ ਸਜ਼ਾ ਸੁਣਾਈ।
ਇਹ ਘਟਨਾਵਾਂ ਰਿਸ਼ਤਿਅਾਂ ’ਚ ਟੁੱਟਦੇ ਵਿਸ਼ਵਾਸ ਦੀਅਾਂ ਦਰਦਨਾਕ ਤਸਵੀਰਾਂ ਹਨ। ਅਾਪਣੀ ਪ੍ਰਾਚੀਨ ਸੱਭਿਅਤਾ ’ਤੇ ਮਾਣ ਕਰਨ ਵਾਲੇ ਸਾਡੇ ਦੇਸ਼ ’ਚ ਲੋਕਾਂ ਦੇ ਨੈਤਿਕ ਪਤਨ ਦੇ ਇਹ ਤਾਂ ਕੁਝ ਮਾਮਲੇ ਹਨ ਜੋ ਸਾਹਮਣੇ ਆਏ ਹਨ।
ਇਨ੍ਹਾਂ ਤੋਂ ਇਲਾਵਾ ਵੀ ਪਤਾ ਨਹੀਂ ਕਿੰਨੇ ਅਜਿਹੇ ਮਾਮਲੇ ਹੋਏ ਹੋਣਗੇ ਜੋ ਪ੍ਰਕਾਸ਼ ’ਚ ਨਹੀਂ ਆ ਸਕੇ। ਅਜਿਹੀਅਾਂ ਘਟਨਾਵਾਂ ਜਿਥੇ ਬਹੁਤ ਨਿੰਦਣਯੋਗ ਹਨ, ਉਥੇ ਅਜਿਹਾ ਕਰਨ ਵਾਲਿਅਾਂ ਨੂੰ ਤੇਜ਼ੀ ਨਾਲ ਕਾਨੂੰਨੀ ਕਾਰਵਾਈ ਕਰ ਕੇ ਸਖਤ ਤੋਂ ਸਖਤ ਸਜ਼ਾ ਦੇਣ ਦੀ ਲੋੜ ਹੈ।
–ਵਿਜੇ ਕੁਮਾਰ
ਸ੍ਰੀ ਦਰਬਾਰ ਸਾਹਿਬ ਤੋਂ ਅੱਜ ਦਾ ਹੁਕਮਨਾਮਾ (25 ਜੂਨ 2026)
NEXT STORY 
