ਵਾਸ਼ਿੰਗਟਨ (ਇੰਟ.) : ਅਮਰੀਕਾ ਦੀਆਂ ਮਿਡਟਰਮ ਚੋਣਾਂ ਵਿਚ ਡੈਮੋਕ੍ਰੇਟਿਕ ਪਾਰਟੀ ਨੇ ਕਾਂਗਰਸ ਦੇ ਦੋਵਾਂ ਸਦਨਾਂ ਅਤੇ ਗਵਰਨਰ ਅਹੁਦਿਆਂ ਦੇ ਨਾਲ-ਨਾਲ ਸੂਬਾ ਵਿਧਾਨ ਸਭਾਵਾਂ ਵਿਚ ਵੀ ਵੱਡੀ ਲੀਡ ਹਾਸਲ ਕੀਤੀ ਹੈ। ਵਿਧਾਨ ਸਭਾ ਨਤੀਜਿਆਂ ਤੋਂ ਬਾਅਦ ਇਕ ਦਹਾਕੇ ਤੋਂ ਵੱਧ ਸਮੇਂ ਵਿਚ ਪਹਿਲੀ ਵਾਰ ਡੈਮੋਕ੍ਰੇਟਸ ਦੇਸ਼ ਦੀਆਂ ਅੱਧੀਆਂ ਤੋਂ ਵੱਧ ਸੂਬਾ ਵਿਧਾਨ ਸਭਾਵਾਂ ’ਤੇ ਕੰਟਰੋਲ ਕਰਨ ਵਿਚ ਸਫਲ ਰਹੇ ਹਨ। ਚੋਣਾਂ ਤੋਂ ਪਹਿਲਾਂ 49 ਦੋ-ਸਦਨਾਂ ਵਾਲੀਆਂ ਸੂਬਾ ਵਿਧਾਨ ਸਭਾਵਾਂ ’ਚੋਂ 28 ’ਤੇ ਰਿਪਬਲਿਕਨਾਂ ਅਤੇ 18 ’ਤੇ ਡੈਮੋਕ੍ਰੇਟਸ ਦਾ ਕੰਟਰੋਲ ਸੀ। ਹੁਣ ਡੈਮੋਕ੍ਰੇਟਸ 24 ਸੂਬਿਆਂ ਵਿਚ ਦੋਵਾਂ ਸਦਨਾਂ ਵਿਚ ਬਹੁਮਤ ਰੱਖਦੇ ਹਨ, ਜਦਕਿ ਰਿਪਬਲਿਕਨ 22 ਸੂਬਿਆਂ ਵਿਚ ਅੱਗੇ ਹਨ। ਨਾਰਥ ਕੈਰੋਲਿਨਾ ਅਤੇ ਟੈਕਸਾਸ ਵਿਚ ਸੱਤਾ ਵੰਡੀ ਹੋਈ ਹੈ। ਅਲਾਸਕਾ ਅਤੇ ਜਾਰਜੀਆ ਦੇ ਕੁਝ ਨਤੀਜੇ ਅਜੇ ਬਕਾਇਆ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਚੋਣ ਨਤੀਜਿਆਂ ਦਾ ਅਸਰ 2028 ਦੀਆਂ ਰਾਸ਼ਟਰਪਤੀ ਚੋਣਾਂ ਤੋਂ ਪਹਿਲਾਂ ਚੋਣ ਪ੍ਰਣਾਲੀ ’ਤੇ ਵੀ ਪੈ ਸਕਦਾ ਹੈ।
ਇਹ ਵੀ ਪੜ੍ਹੋ : ਪਾਕਿਸਤਾਨ 'ਚ ਪੁਲਸ ਟੀਮ 'ਤੇ ਵੱਡਾ ਅੱਤਵਾਦੀ ਹਮਲਾ: 11 ਜਵਾਨਾਂ ਦੀ ਮੌਤ, 12 ਹੋਰ ਜ਼ਖਮੀ
ਵਿਸਕਾਨਸਿਨ ਅਤੇ ਮਿਸ਼ੀਗਨ ’ਚ ਵੱਡੀ ਜਿੱਤ
ਡੈਮੋਕ੍ਰੇਟਸ ਨੇ ਵਿਸਕਾਨਸਿਨ ਵਿਚ ਵਿਧਾਨ ਸਭਾ ਅਤੇ ਸੈਨੇਟ ਦੋਵਾਂ ’ਤੇ ਕਬਜ਼ਾ ਕਰ ਲਿਆ ਹੈ। ਇੱਥੇ ਗਵਰਨਰ ਵੀ ਇਸੇ ਪਾਰਟੀ ਦਾ ਹੈ। ਮਿਸ਼ੀਗਨ ਵਿਚ ਵੀ ਪਾਰਟੀ ਨੇ ਪ੍ਰਤੀਨਿਧੀ ਸਦਨ ਵਿਚ ਬਹੁਮਤ ਹਾਸਲ ਕੀਤਾ ਅਤੇ ਸੈਨੇਟ ਵਿਚ ਆਪਣੀ ਸਥਿਤੀ ਮਜ਼ਬੂਤ ਕੀਤੀ। ਮਿਨੀਸੋਟਾ ਵਿਚ ਵਿਧਾਨ ਸਭਾ ’ਤੇ ਦੁਬਾਰਾ ਕੰਟਰੋਲ ਮਿਲਿਆ, ਜਦਕਿ ਸੈਨੇਟ ਅਤੇ ਗਵਰਨਰ ਦਾ ਅਹੁਦਾ ਬਰਕਰਾਰ ਰਿਹਾ। ਪੈਨਸਿਲਵੇਨੀਆ ਵਿਚ ਸੈਨੇਟ ਜਿੱਤਣ ਦੇ ਨਾਲ ਪ੍ਰਤੀਨਿਧੀ ਸਦਨ ’ਤੇ ਪਕੜ ਕਾਇਮ ਰੱਖੀ। ਐਰੀਜ਼ੋਨਾ ਅਤੇ ਨਿਊ ਹੈਂਪਸ਼ਾਇਰ ਵਿਚ ਵੀ ਦੋਵਾਂ ਸਦਨਾਂ ’ਚ ਡੈਮੋਕ੍ਰੇਟਿਕ ਬਹੁਮਤ ਸਥਾਪਤ ਹੋਇਆ। ਜਾਰਜੀਆ, ਨਾਰਥ ਕੈਰੋਲਿਨਾ ਅਤੇ ਟੈਕਸਾਸ ’ਚ ਪ੍ਰਤੀਨਿਧੀ ਸਦਨ ਵਿਚ ਪਾਰਟੀ ਨੂੰ ਜਿੱਤ ਮਿਲੀ।
2028 ਦੀਆਂ ਚੋਣਾਂ ਅਤੇ ਹੱਦਬੰਦੀ ’ਤੇ ਪਵੇਗਾ ਅਸਰ
ਸੂਬਾ ਵਿਧਾਨ ਸਭਾਵਾਂ ’ਤੇ ਕੰਟਰੋਲ ਮਿਲਣ ਨਾਲ ਡੈਮੋਕ੍ਰੇਟਸ ਨੂੰ ਚੋਣ ਨਿਯਮ ਬਣਾਉਣ, ਬਜਟ ਮਨਜ਼ੂਰ ਕਰਨ ਅਤੇ ਸਿੱਖਿਆ, ਲੇਬਰ, ਗਰਭਪਾਤ ਅਤੇ ਹਥਿਆਰਾਂ ਨਾਲ ਜੁੜੇ ਕਾਨੂੰਨਾਂ ’ਤੇ ਵਧੇਰੇ ਪ੍ਰਭਾਵ ਮਿਲੇਗਾ। ਇਸ ਦਾ ਸਭ ਤੋਂ ਵੱਡਾ ਅਸਰ ਭਵਿੱਖ ਵਿਚ ਚੋਣ ਖੇਤਰਾਂ ਦੀ ਹੱਦਬੰਦੀ ’ਤੇ ਪੈ ਸਕਦਾ ਹੈ। 2030 ਦੀ ਜਨਗਣਨਾ ਤੋਂ ਬਾਅਦ ਨਵੇਂ ਸੰਸਦੀ ਅਤੇ ਵਿਧਾਨਕ ਚੋਣ ਖੇਤਰ ਤੈਅ ਹੋਣਗੇ। ਅਜਿਹੇ ਵਿਚ ਸੂਬਾ ਸਰਕਾਰਾਂ ਵਿਚ ਬਹੁਮਤ ਰੱਖਣ ਵਾਲੀ ਪਾਰਟੀ ਨੂੰ ਸੀਟਾਂ ਦੀਆਂ ਹੱਦਾਂ ਨਿਰਧਾਰਤ ਕਰਨ ਵਿਚ ਵੱਡੀ ਭੂਮਿਕਾ ਮਿਲੇਗੀ। ਡੈਮੋਕ੍ਰੇਟਸ ਵੋਟਿੰਗ ਦੀ ਸੁਵਿਧਾ ਵਧਾਉਣ ਅਤੇ ਡਾਕ ਰਾਹੀਂ ਵੋਟਿੰਗ ਦੇ ਨਿਯਮਾਂ ’ਚ ਬਦਲਾਅ ਦੀ ਕੋਸ਼ਿਸ਼ ਵੀ ਕਰ ਸਕਦੇ ਹਨ।
ਇਹ ਵੀ ਪੜ੍ਹੋ : ਦਰਦਨਾਕ ਸੜਕ ਹਾਦਸੇ 'ਚ ਖਤਮ ਹੋ ਗਿਆ ਪੂਰਾ ਪਰਿਵਾਰ, ਕਾਰ ਦੇ ਉੱਡੇ ਪਰਖੱਚੇ
ਟਰੰਪ ਸਰਕਾਰ ਪ੍ਰਤੀ ਨਾਰਾਜ਼ਗੀ ਨੇ ਬਣਾਇਆ ਮਾਹੌਲ
ਐਕਸੀਓਸ ਅਨੁਸਾਰ, ਹੁਣ ਅਮਰੀਕਾ ਦੀ 75 ਫੀਸਦੀ ਆਬਾਦੀ ਡੈਮੋਕ੍ਰੇਟਿਕ ਗਵਰਨਰ ਵਾਲੇ ਸੂਬਿਆਂ ਵਿਚ ਰਹਿੰਦੀ ਹੈ, ਜਦਕਿ 53 ਫੀਸਦੀ ਲੋਕ ਅਜਿਹੇ ਸੂਬਿਆਂ ਵਿਚ ਹਨ ਜਿੱਥੇ ਗਵਰਨਰ ਅਤੇ ਵਿਧਾਨ ਸਭਾ ਦੋਵਾਂ ’ਤੇ ਡੈਮੋਕ੍ਰੇਟਸ ਦਾ ਕੰਟਰੋਲ ਹੈ। ਫਾਕਸ ਨਿਊਜ਼ ਦੇ ਵੋਟਰ ਸਰਵੇਖਣ ਵਿਚ ਅਰਥਵਿਵਸਥਾ, ਸਰਕਾਰੀ ਭ੍ਰਿਸ਼ਟਾਚਾਰ, ਈਰਾਨ ਜੰਗ ਅਤੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਕੰਮਕਾਜ ਨੂੰ ਲੈ ਕੇ ਨਾਰਾਜ਼ਗੀ ਸਾਹਮਣੇ ਆਈ। ਲੱਗਭਗ ਤਿੰਨ-ਚੌਥਾਈ ਵੋਟਰਾਂ ਨੇ ਦੇਸ਼ ਦੀ ਦਿਸ਼ਾ ਅਤੇ ਅਰਥਵਿਵਸਥਾ ’ਤੇ ਨਾਂਹਪੱਖੀ ਰਾਏ ਪ੍ਰਗਟਾਈ। ਡੈਮੋਕ੍ਰੇਟਿਕ ਪਾਰਟੀ ਨੇ ਇਨ੍ਹਾਂ ਨਤੀਜਿਆਂ ਨੂੰ ਇਤਿਹਾਸਕ ਜਿੱਤ ਦੱਸਦਿਆਂ ਕਿਹਾ ਹੈ ਕਿ ਇਸ ਨਾਲ ਸੂਬਿਆਂ ਵਿਚ ਉਸ ਦੀਆਂ ਨੀਤੀਆਂ ਨੂੰ ਅੱਗੇ ਵਧਾਉਣ ਦੀ ਤਾਕਤ ਵਧੇਗੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8s
For Whatsapp:- https://whatsapp.com/channel/0029Va94hsaHAdNVur4L170e
ਹੋਰਮੁਜ਼ ਸਟ੍ਰੇਟ ਤੋਂ ਲੰਘ ਰਹੇ ਟੈਂਕਰ ’ਚ ਲੱਗੀ ਅੱਗ
NEXT STORY 
