ਟੋਰਾਂਟੋ/ਇਸਲਾਮਾਬਾਦ (ਬਿਊਰੋ): ਬਲੋਚਿਸਤਾਨ ਦੀ ਨੌਜਵਾਨ ਮਨੁੱਖੀ ਅਧਿਕਾਰ ਕਾਰਕੁਨ ਕਰੀਮਾ ਬਲੋਚ ਦੇ ਕਤਲ ਨੂੰ ਟੋਰਾਂਟੋ ਪੁਲਸ ਨੇ ਮੰਗਲਵਾਰ ਨੂੰ ਗੈਰ ਅਪਰਾਧਿਕ ਘਟਨਾ ਕਰਾਰ ਦਿੱਤਾ। ਪੁਲਸ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਾਂਚ ਵਿਚ ਕਿਸੇ ਵੀ ਤਰ੍ਹਾਂ ਦੇ ਅਜਿਹੇ ਸਬੂਤ ਨਹੀਂ ਮਿਲੇ ਹਨ, ਜਿਸ ਨਾਲ ਮੌਤ 'ਤੇ ਸ਼ੱਕ ਕੀਤਾ ਜਾਵੇ। ਕੈਨੇਡਾ ਪੁਲਸ ਦੇ ਇਸ ਦਾਅਵੇ ਦੇ ਬਾਅਦ ਬਲੋਚਿਸਤਾਨ ਦੇ ਲੋਕ ਭੜਕ ਪਏ ਅਤੇ ਉਹਨਾਂ ਵੱਲੋਂ ਕਈ ਥਾਂਵਾਂ 'ਤੇ ਪ੍ਰਦਰਸ਼ਨ ਕਰਦਿਆਂ ਕੈਨੇਡਾ ਸਰਕਾਰ ਨੂੰ ਇਸ ਕਤਲਕਾਂਡ ਦੀ ਨਿਰਪੱਖ ਜਾਂਚ ਕਰਨ ਦੀ ਮੰਗ ਕੀਤੀ ਗਈ। ਕਰੀਮਾ ਦਾ ਕਤਲ ਹੋਣ ਦਾ ਖਦਸ਼ਾ ਜਾਹਰ ਕੀਤਾ ਜਾ ਰਿਹਾ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਪਾਕਿਸਤਾਨ ਦੀ ਖੁਫੀਆ ਏਜੰਸੀ ਆਈ.ਐੱਸ.ਆਈ. ਨੇ ਉਸ ਦਾ ਕਤਲ ਕੀਤਾ ਹੈ।
ਜਾਂਚ 'ਤੇ ਕੀਤੇ ਗਏ ਸਵਾਲ
ਟੋਰਾਂਟੋ ਪੁਲਸ ਨੇ ਟਵੀਟ ਕੀਤਾ,''ਮੌਤ ਦੇ ਹਾਲਾਤਾਂ ਦੀ ਜਾਂਚ ਕੀਤੀ ਗਈ ਹੈ ਅਤੇ ਅਧਿਕਾਰੀਆਂ ਨੇ ਇਸ ਨੂੰ ਇਕ ਗੈਰ ਅਪਰਾਧਿਕ ਮੌਤ ਦੇ ਰੂਪ ਵਿਚ ਦੱਸਿਆ ਹੈ।ਸ਼ੱਕ ਕਰਨ ਦੀ ਕੋਈ ਵਜ੍ਹਾ ਨਹੀਂ ਮਿਲੀ ਹੈ। ਇਸ ਬਾਰੇ ਵਿਚ ਪਰਿਵਾਰ ਨੂੰ ਵੀ ਜਾਣਕਾਰੀ ਦੇ ਦਿੱਤੀ ਗਈ ਹੈ।'' ਭਾਵੇਂਕਿ ਸੋਸ਼ਲ ਮੀਡੀਆ 'ਤੇ ਟੋਰਾਂਟੋ ਪੁਲਸ ਦੀ ਜਾਂਚ 'ਤੇ ਸਵਾਲ ਖੜ੍ਹੇ ਹੋਣ ਲੱਗੇ ਹਨ। ਲੋਕ ਪੁਲਸ 'ਤੇ ਨਿਸ਼ਾਨਾ ਵਿੰਨ੍ਹ ਰਹੇ ਹਨ ਅਤੇ ਕਹਿ ਰਹੇ ਹਨ ਕਿ ਮੌਤ ਦੇ ਤੁਰੰਤ ਬਾਅਦ ਕਿਵੇਂ ਕਿਸੇ ਫ਼ੈਸਲੇ 'ਤੇ ਪਹੁੰਚਿਆ ਜਾ ਸਕਦਾ ਹੈ। ਪੁਲਸ ਦੀ ਇਹ ਜਾਂਚ ਫਰਜ਼ੀ ਹੈ। ਇਕ ਟਵਿੱਟਰ ਯੂਜ਼ਰ ਨੇ ਲਿਖਿਆ,''ਆਖਿਰ ਕਿਵੇਂ ਮੌਤ ਦੇ ਕੁਝ ਹੀ ਘੰਟਿਆਂ ਵਿਚ ਪੁਲਸ ਨੇ ਫ਼ੈਸਲਾ ਸੁਣਾ ਦਿੱਤਾ। ਟੋਰਾਂਟੋ ਪੁਲਸ ਕਿਵੇਂ ਕੰਮ ਕਰ ਰਹੀ ਹੈ।''
ਉੱਥੇ ਇਕ ਹੋਰ ਯੂਜ਼ਰ ਨੇ ਟੋਰਾਂਟੋ ਪੁਲਸ ਦੀ ਜਾਂਚ ਨੂੰ ਫਰਜ਼ੀ ਦੱਸਦਿਆਂ ਉਹਨਾਂ 'ਤੇ ਅੱਤਵਾਦੀਆਂ ਦੇ ਨਾਲ ਖੜ੍ਹੇ ਹੋਣ ਦਾ ਦੋਸ਼ ਲਗਾਇਆ। ਯੂਜ਼ਰ ਨੇ ਲਿਖਿਆ,''ਦੁਨੀਆ ਨੂੰ ਧੋਖਾ ਨਾ ਦਿਓ। ਆਪਣੀ ਨਕਲੀ ਜਾਂਚ ਦੇ ਮੁਤਾਬਕ, ਤੁਸੀਂ ਅੱਤਵਾਦੀਆਂ ਦੇ ਸਾਥੀ ਲੱਗਦੇ ਹੋ। ਬੇਰਹਿਮ ਕਤਲ ਦੇ ਮਾਮਲੇ ਵਿਚ ਤੁਹਾਡੇ ਵੀ ਸ਼ਾਮਲ ਹੋਣ ਦਾ ਖਦਸ਼ਾ ਹੈ। ਤੁਸੀਂ ਜੋ ਮਹਾਨ ਨੇਤਾ ਦੇ ਨਾਲ ਕੀਤਾ, ਉਸ ਦਾ ਭੁਗਤਾਨ ਤੁਹਾਨੂੰ ਕਰਨਾ ਪਵੇਗਾ।''
ਸ਼ੱਕੀ ਹਾਲਤਾਂ ਵਿਚ ਹੋਈ ਸੀ ਲਾਪਤਾ
ਇੱਥੇ ਦੱਸ ਦਈਏ ਕਿ ਕਰੀਮਾ ਬਲੋਚ ਕੈਨੇਡਾ ਦੇ ਟੋਰਾਂਟੋ ਸ਼ਹਿਰ ਵਿਚ ਇਕ ਝੀਲ ਕਿਨਾਰੇ ਸੱਕੀ ਹਾਲਤਾਂ ਵਿਚ ਮ੍ਰਿਤਕ ਮਿਲੀ ਸੀ। ਕਰੀਮਾ ਐਤਵਾਰ ਦੁਪਹਿਰ ਕਰੀਬ 3 ਵਜੇ ਸ਼ੱਕੀ ਹਾਲਤਾਂ ਵਿਚ ਲਾਪਤਾ ਹੋ ਗਈ ਸੀ। ਟੋਰਾਂਟੋ ਪੁਲਸ ਨੇ ਬਲੋਚ ਕਾਰਕੁਨ ਨੂੰ ਲੱਭਣ ਲਈ ਜਨਤਾ ਤੋਂ ਮਦਦ ਮੰਗੀ ਸੀ। ਇਸ ਦੌਰਾਨ ਉਹਨਾਂ ਦੀ ਲਾਸ਼ ਟੋਰਾਂਟੋ ਨੇੜੇ ਇਕ ਝੀਲ ਕਿਨਾਰੇ ਬਰਾਮਦ ਹੋਈ। ਉਸ ਦੇ ਪਤੀ ਹੰਮਾਲ ਹੈਦਰ ਅਤੇ ਭਰਾ ਨੇ ਬੌਡੀ ਦੀ ਸ਼ਨਾਖਤ ਕੀਤੀ। ਕਰੀਮਾ 2016 ਵਿਚ ਉਸ ਸਮੇਂ ਸੁਰਖੀਆਂ ਵਿਚ ਆਈ ਸੀ ਜਦੋਂ ਉਹਨਾਂ ਨੇ ਪੀ.ਐੱਮ. ਨਰਿੰਦਰ ਮੋਦੀ ਲਈ ਰੱਖੜੀ ਮੌਕੇ ਇਕ ਵੀਡੀਓ ਸੰਦੇਸ਼ ਰਿਕਾਰਡ ਕੀਤਾ ਸੀ। ਇਸ ਵਿਚ ਕਰੀਮਾ ਨੇ ਕਿਹਾ ਸੀ ਕਿ ਅਸੀਂ ਤੁਹਾਨੂੰ ਆਪਣਾ ਭਰਾ ਮੰਨਦੇ ਹਾਂ। ਨਾਲ ਹੀ ਬਲੋਚਿਸਤਾਨ ਵਿਚ ਯੁੱਧ ਅਪਰਾਧਾਂ ਦੇ ਪ੍ਰਤੀ ਆਵਾਜ਼ ਚੁੱਕਣ ਦੀ ਅਪੀਲ ਕੀਤੀ ਸੀ।
ਦੁਨੀਆ ਭਰ ਵਿਚ ਪ੍ਰਦਰਸ਼ਨ
ਬਲੋਚਿਸਤਾਨ ਪੋਸਟ ਨੇ ਦੱਸਿਆ ਕਿ ਸਥਾਨਕ ਲੋਕਾਂ ਨੇ ਬਲੋਚ ਨੇਤਾ ਦੇ ਕਤਲ ਦੇ ਵਿਰੋਧ ਵਿਚ ਵੱਡੀ ਗਿਣਤੀ ਵਿਚ ਪ੍ਰਦਰਸ਼ਨ ਕੀਤਾ। ਇਸ ਵਿਚ ਕੈਨੇਡਾ ਅਤੇ ਦੁਨੀਆ ਭਰ ਵਿਚ ਕਈ ਹੋਰ ਥਾਂਵਾਂ 'ਤੇ ਸਾਥੀ ਕਾਰਕੁਨਾਂ ਨੇ ਕਰੀਮਾ ਦੀ ਅਚਾਨਕ ਮੌਤ 'ਤੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ। ਉਹਨਾਂ ਨੇ ਇਹ ਮੰਨਣ ਤੋਂ ਇਨਕਾਰ ਕਰ ਦਿੱਤਾ ਕਿ ਇਹ ਇਕ ਹਾਦਸਾ ਸੀ। ਉਹਨਾਂ ਨੇ ਕੈਨੇਡਾ ਸਰਕਾਰ ਨੂੰ ਇਸ ਮਾਮਲੇ ਦੀ ਨਿਰਪੱਖ ਤੌਰ 'ਤੇ ਜਾਂਚ ਕਰਨ ਅਤੇ ਨਿਆਂ ਕਰਨ ਦੀ ਮੰਗ ਕੀਤੀ ਹੈ।
ਮਿਸੀਸਾਗਾ 'ਚ ਭੇਸ ਬਦਲ ਕੇ ਲੁਟੇਰਿਆਂ ਨੇ ਲੁੱਟੀ ਸੁਨਿਆਰੇ ਦੀ ਦੁਕਾਨ, ਇਕ ਕਾਬੂ
NEXT STORY 
