ਮਾਛੀਵਾੜਾ ਸਾਹਿਬ,(ਟੱਕਰ) : ਮਾਛੀਵਾੜਾ ਗਾਂਧੀ ਚੌਂਕ ਨੇੜੇ ਅੱਜ ਸ਼ਾਮ ਉਸ ਸਮੇਂ ਭੱਜਦੜ ਮਚ ਗਈ ਜਦੋਂ ਨਸ਼ਾ ਤਸਕਰਾਂ ਦਾ ਪਿੱਛਾ ਕਰਦੀ ਹੋਈ ਐਸ. ਟੀ. ਐਫ਼ ਟੀਮ ਨੇ ਨਸ਼ੇ ਦੀ ਖੇਪ ਸਮੇਤ ਕਈ ਨੌਜਵਾਨਾਂ ਨੂੰ ਕਾਬੂ । ਜਾਣਕਾਰੀ ਮੁਤਾਬਕ ਇਕ ਸਵਿਫਟ ਕਾਰ ਜਿਸ ਦਾ ਐਸ. ਟੀ. ਐਫ਼ ਦੀ ਟੀਮ ਵਲੋਂ ਪਿੱਛਾ ਕੀਤਾ ਜਾ ਰਿਹਾ ਸੀ, ਮੇਨ ਚੌਂਕ ਤੋਂ ਗਾਂਧੀ ਚੌਂਕ ਵੱਲ ਭਰੇ ਬਜ਼ਾਰ 'ਚ ਆ ਵੜੀ। ਗਾਂਧੀ ਚੌਂਕ 'ਚ ਟ੍ਰੈਫਿਕ ਜਾਮ ਹੋਣ ਕਾਰਨ ਕਾਰ 'ਚ ਬੈਠੇ 4 ਨੌਜਵਾਨ ਗੱਡੀ ਨੂੰ ਉਥੇ ਛੱਡ ਗਲੀਆਂ 'ਚ ਭੱਜ ਨਿਕਲੇ।
ਜਿਨ੍ਹਾਂ ਦਾ ਪਿੱਛਾ ਕਰਦੀ ਆ ਰਹੀ ਐਸ. ਟੀ. ਐਫ਼ ਟੀਮ ਨੇ ਉਕਤ ਤਸਕਰਾਂ ਨੂੰ ਕਾਬੂ ਕਰਨ ਲਈ ਸਾਰੇ ਬਜ਼ਾਰ ਦੀ ਘੇਰਾਬੰਦੀ ਕਰ ਲਈ ਤੇ ਕੁਝ ਹੀ ਮਿੰਟਾਂ ਬਾਅਦ ਇਨ੍ਹਾਂ ਨੌਜਵਾਨਾਂ ਨੂੰ ਕਾਬੂ ਕਰ ਲਿਆ ਗਿਆ। ਐਸ. ਟੀ. ਐਫ਼ ਟੀਮ ਦੀ ਅਗਵਾਈ ਕਰ ਰਹੇ ਇੰਸਪੈਕਟਰ ਹਰਬੰਸ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਵਲੋਂ ਨਸ਼ਾ ਤਸਕਰਾਂ ਦਾ ਪਿੱਛਾ ਕੀਤਾ ਜਾ ਰਿਹਾ ਸੀ ਤੇ ਅਚਾਨਕ ਇਹ ਬਜ਼ਾਰ 'ਚ ਆ ਵੜੇ ਤੇ ਉਨ੍ਹਾਂ ਦੀ ਟੀਮ ਨੇ ਤਸਕਰਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਨ੍ਹਾਂ ਕਿਹਾ ਕਿ ਇਹ ਤਸਕਰ ਪਿਛਲੇ ਕਾਫ਼ੀ ਸਮੇਂ ਤੋਂ ਨਸ਼ੇ ਦੀ ਤਸਕਰੀ ਕਰ ਰਹੇ ਸਨ ਤੇ ਐਸ. ਟੀ. ਐਫ਼ ਦੀ ਟੀਮ ਵਲੋਂ ਇਨ੍ਹਾਂ ਉਪਰ ਬਾਜ਼ ਅੱਖ ਰੱਖੀ ਸੀ। ਇੰਸਪੈਕਟਰ ਹਰਬੰਸ ਸਿੰਘ ਨੇ ਦੱਸਿਆ ਕਿ ਇਨ੍ਹਾਂ ਨੌਜਵਾਨਾਂ ਤੋਂ ਨਸ਼ੀਲਾ ਪਦਾਰਥ ਬਰਾਮਦ ਹੋਇਆ ਹੈ। ਐਸ. ਟੀ. ਐਫ਼ ਦੀ ਟੀਮ ਨੇ ਜਿਹੜੇ ਨਸ਼ਾ ਤਸਕਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਉਨ੍ਹਾਂ 'ਚੋਂ 2 ਜਾਂ 3 ਮਾਛੀਵਾੜਾ ਨਾਲ ਸਬੰਧਿਤ ਦੱਸੇ ਜਾ ਰਹੇ ਹਨ।
ਕੈਪਟਨ ਅਮਰਿੰਦਰ ਸਿੰਘ ਨੇ ਲਿਆ ਕਣਕ ਦੀ ਖਰੀਦ ਦਾ ਜਾਇਜਾ
NEXT STORY 
