ਨਵੀਂ ਦਿੱਲੀ : 1 ਜੂਨ, 2026 ਤੋਂ ਦੇਸ਼ ਭਰ ਵਿੱਚ ਕਈ ਮਹੱਤਵਪੂਰਨ ਨਿਯਮ ਲਾਗੂ ਹੋਣ ਜਾ ਰਹੇ ਹਨ, ਜੋ ਤੁਹਾਡੀ ਰਸੋਈ ਦੇ ਬਜਟ ਤੋਂ ਲੈ ਕੇ ਬੈਂਕਿੰਗ ਅਤੇ ਡਿਜੀਟਲ ਭੁਗਤਾਨ ਤੱਕ ਸਭ ਕੁਝ ਪ੍ਰਭਾਵਿਤ ਕਰਨਗੇ। ਸਰਕਾਰ ਵੱਲੋਂ ਕੀਤੇ ਗਏ ਇਹ ਬਦਲਾਅ ਤੁਹਾਡੇ ਰੋਜ਼ਾਨਾ ਜੀਵਨ ਵਿੱਚ ਵੱਡੀ ਭੂਮਿਕਾ ਨਿਭਾਉਣਗੇ।
1. LPG ਅਤੇ PNG ਦੇ ਸਖ਼ਤ ਨਿਯਮ
ਪੈਟਰੋਲੀਅਮ ਮੰਤਰਾਲੇ ਨੇ ਉਨ੍ਹਾਂ ਗਾਹਕਾਂ ਲਈ ਨਿਯਮ ਸਖ਼ਤ ਕਰ ਦਿੱਤੇ ਹਨ ਜਿਨ੍ਹਾਂ ਕੋਲ LPG ਅਤੇ PNG ਦੋਵੇਂ ਕਨੈਕਸ਼ਨ ਹਨ। ਜੇਕਰ ਤੁਹਾਡੇ ਘਰ ਵਿੱਚ PNG ਕਨੈਕਸ਼ਨ ਐਕਟਿਵ ਹੈ, ਤਾਂ 1 ਜੂਨ ਤੋਂ 30 ਦਿਨਾਂ ਦੇ ਅੰਦਰ ਤੁਹਾਨੂੰ ਆਪਣਾ ਪੁਰਾਣਾ LPG ਸਿਲੰਡਰ ਸਰੈਂਡਰ ਕਰਨਾ ਹੋਵੇਗਾ। ਹਾਲਾਂਕਿ, ਕੰਪਨੀਆਂ ਨੇ ਇੱਕ 'ਕਨੈਕਸ਼ਨ ਟ੍ਰਾਂਸਫਰ ਵਾਊਚਰ' ਦੀ ਸਹੂਲਤ ਦਿੱਤੀ ਹੈ, ਤਾਂ ਜੋ ਭਵਿੱਖ ਵਿੱਚ PNG ਰਹਿਤ ਇਲਾਕੇ ਵਿੱਚ ਜਾਣ 'ਤੇ ਤੁਸੀਂ ਦੁਬਾਰਾ LPG ਕਨੈਕਸ਼ਨ ਚਾਲੂ ਕਰਵਾ ਸਕੋ। ਇਸ ਦੇ ਨਾਲ ਹੀ ਗੈਸ ਸਿਲੰਡਰਾਂ ਦੀਆਂ ਕੀਮਤਾਂ ਦੀ ਸਮੀਖਿਆ ਵੀ ਕੀਤੀ ਜਾਵੇਗੀ।
2. UPI ਪੇਮੈਂਟ 'ਚ ਵੱਡਾ ਬਦਲਾਅ
ਡਿਜੀਟਲ ਧੋਖਾਧੜੀ ਨੂੰ ਰੋਕਣ ਲਈ NPCI ਨੇ ਵੱਡਾ ਕਦਮ ਚੁੱਕਿਆ ਹੈ। ਹੁਣ 1 ਜੂਨ ਤੋਂ ਜਦੋਂ ਵੀ ਤੁਸੀਂ Google Pay, PhonePe ਜਾਂ Paytm ਰਾਹੀਂ ਪੈਸੇ ਭੇਜੋਗੇ, ਤਾਂ UPI PIN ਭਰਨ ਤੋਂ ਪਹਿਲਾਂ ਸਕ੍ਰੀਨ 'ਤੇ ਉਸ ਵਿਅਕਤੀ ਦਾ ਅਸਲੀ ਨਾਮ (Legal Name) ਦਿਖਾਈ ਦੇਵੇਗਾ ਜੋ ਉਸ ਦੇ ਬੈਂਕ ਖਾਤੇ ਵਿੱਚ ਦਰਜ ਹੈ। ਇਸ ਨਾਲ ਗਲਤ ਖਾਤੇ ਵਿੱਚ ਪੈਸੇ ਜਾਣ ਦੀ ਸੰਭਾਵਨਾ ਖਤਮ ਹੋ ਜਾਵੇਗੀ।
3. ਬੈਂਕਿੰਗ ਅਤੇ ATM ਚਾਰਜ
ਕਈ ਪ੍ਰਮੁੱਖ ਬੈਂਕਾਂ ਨੇ ਮੁਫ਼ਤ ATM ਟ੍ਰਾਂਜੈਕਸ਼ਨਾਂ ਦੀ ਸੀਮਾ ਖਤਮ ਹੋਣ ਤੋਂ ਬਾਅਦ ਲੱਗਣ ਵਾਲੇ ਚਾਰਜ ਵਧਾ ਦਿੱਤੇ ਹਨ। ਹੁਣ ਬੈਲੇਂਸ ਚੈੱਕ ਕਰਨ ਜਾਂ ਮਿੰਨੀ-ਸਟੇਟਮੈਂਟ ਦੇਖਣ 'ਤੇ ਵੀ ਜ਼ਿਆਦਾ ਫੀਸ ਦੇਣੀ ਪੈ ਸਕਦੀ ਹੈ। ਰਾਹਤ ਦੀ ਗੱਲ ਇਹ ਹੈ ਕਿ 50,000 ਰੁਪਏ ਤੱਕ ਦੀ ਨਕਦ ਜਮ੍ਹਾਂ ਕਰਵਾਉਣ ਲਈ ਹੁਣ ਪੈਨ ਕਾਰਡ ਦੀ ਲਾਜ਼ਮੀ ਸ਼ਰਤ ਵਿੱਚ ਢਿੱਲ ਦਿੱਤੀ ਗਈ ਹੈ, ਹਾਲਾਂਕਿ ਵੱਡੇ ਲੈਣ-ਦੇਣ ਲਈ ਇਹ ਅਜੇ ਵੀ ਜ਼ਰੂਰੀ ਰਹੇਗਾ।
4. ਟੈਕਸ ਦਾਤਿਆਂ ਨੂੰ ਮਿਲੇਗੀ ਰਾਹਤ
ਨੌਕਰੀਪੇਸ਼ਾ ਲੋਕਾਂ ਲਈ ਪੁਰਾਣੀ ਟੈਕਸ ਵਿਵਸਥਾ ਤਹਿਤ ਬੱਚਿਆਂ ਦੇ ਐਜੂਕੇਸ਼ਨ ਅਲਾਊਂਸ ਦੀ ਟੈਕਸ ਫ੍ਰੀ ਲਿਮਟ ਵਧਾ ਕੇ 3,000 ਰੁਪਏ ਪ੍ਰਤੀ ਮਹੀਨਾ ਅਤੇ ਹੋਸਟਲ ਅਲਾਊਂਸ 9,000 ਰੁਪਏ ਪ੍ਰਤੀ ਮਹੀਨਾ ਕਰ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ, ਬੈਂਗਲੁਰੂ, ਪੁਣੇ, ਹੈਦਰਾਬਾਦ ਅਤੇ ਅਹਿਮਦਾਬਾਦ ਵਰਗੇ ਸ਼ਹਿਰ ਹੁਣ 50% HRA ਟੈਕਸ ਛੋਟ ਦੇ ਦਾਇਰੇ ਵਿੱਚ ਆ ਗਏ ਹਨ। ਜਿਨ੍ਹਾਂ ਦੀ ਟੈਕਸ ਦੇਣਦਾਰੀ 10,000 ਰੁਪਏ ਤੋਂ ਵੱਧ ਹੈ, ਉਨ੍ਹਾਂ ਨੂੰ 15 ਜੂਨ ਤੱਕ 15% ਐਡਵਾਂਸ ਟੈਕਸ ਜਮ੍ਹਾਂ ਕਰਵਾਉਣਾ ਹੋਵੇਗਾ।
5. ਤੇਲ ਦੇ ਨਿਰਯਾਤ 'ਤੇ ਡਿਊਟੀ ਘਟੀ
ਕੇਂਦਰ ਸਰਕਾਰ ਨੇ ਪੈਟਰੋਲ, ਡੀਜ਼ਲ ਅਤੇ ਹਵਾਈ ਜਹਾਜ਼ ਦੇ ਬਾਲਣ (ATF) ਦੇ ਨਿਰਯਾਤ (Export) 'ਤੇ ਲੱਗਣ ਵਾਲੀ ਡਿਊਟੀ ਘਟਾ ਦਿੱਤੀ ਹੈ। ਪੈਟਰੋਲ 'ਤੇ 1.5 ਰੁਪਏ, ਡੀਜ਼ਲ 'ਤੇ 3 ਰੁਪਏ ਅਤੇ ATF 'ਤੇ 7 ਰੁਪਏ ਪ੍ਰਤੀ ਲੀਟਰ ਦੀ ਕਟੌਤੀ ਕੀਤੀ ਗਈ ਹੈ।
6. ਟ੍ਰੇਨਾਂ ਦੇ ਸਮੇਂ 'ਚ ਬਦਲਾਅ
ਰੇਲ ਯਾਤਰੀਆਂ ਲਈ ਵੀ 1 ਜੂਨ ਤੋਂ ਵੱਡਾ ਬਦਲਾਅ ਹੋ ਰਿਹਾ ਹੈ। ਸਦਰਨ ਰੇਲਵੇ ਨੇ ਚੇਨਈ ਸਬਅਰਬਨ ਨੈੱਟਵਰਕ ਦੀਆਂ 200 ਤੋਂ ਵੱਧ ਟ੍ਰੇਨਾਂ ਦਾ ਟਾਈਮ ਟੇਬਲ ਬਦਲ ਦਿੱਤਾ ਹੈ। ਯਾਤਰੀਆਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਆਪਣੀ ਯਾਤਰਾ ਤੋਂ ਪਹਿਲਾਂ ਨਵਾਂ ਸਮਾਂ ਜ਼ਰੂਰ ਚੈੱਕ ਕਰ ਲੈਣ।
ਹੁੰਡਈ ਦੀ ਫੈਕਟਰੀ ਨੂੰ ਲੱਗੀ ਭਿਆਨਕ ਅੱਗ: ਦੋ ਯੂਨਿਟ ਸੜ ਕੇ ਸੁਆਹ, ਆਸਮਾਨ 'ਚ ਫੈਲਿਆ ਕਾਲਾ ਧੂੰਆਂ
NEXT STORY 
