ਨੈਸ਼ਨਲ ਡੈਸਕ- ਕੇਰਲ ਤੋਂ ਇਕ ਵੱਡੀ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ ਹੋਈਆਂ ਮਿਊਂਸਪਲ ਚੋਣਾਂ ਵਿੱਚ ਭਾਜਪਾ ਨੇ ਇਤਿਹਾਸਕ ਜਿੱਤ ਦਰਜ ਕਰਦਿਆਂ ਪਹਿਲੀ ਵਾਰ ਸੂਬੇ ਦੀ ਰਾਜਧਾਨੀ ਤਿਰੂਵਨੰਤਪੁਰਮ ਕਾਰਪੋਰੇਸ਼ਨ ਵਿੱਚ ਆਪਣਾ ਮੇਅਰ ਬਣਾਇਆ ਹੈ। ਭਾਜਪਾ ਨੇਤਾ ਵੀ.ਵੀ. ਰਾਜੇਸ਼ ਸ਼ੁੱਕਰਵਾਰ ਨੂੰ ਨਿਗਮ ਦੇ ਮੇਅਰ ਚੁਣੇ ਗਏ ਹਨ।
ਭਾਜਪਾ ਨੇ ਤਿਰੂਵਨੰਤਪੁਰਮ ਦੇ 101 ਵਾਰਡਾਂ ਵਿੱਚੋਂ 50 ਵਿੱਚ ਜਿੱਤ ਪ੍ਰਾਪਤ ਕੀਤੀ ਅਤੇ ਵੀ.ਵੀ. ਰਾਜੇਸ਼ ਨੇ ਇੱਕ ਆਜ਼ਾਦ ਕੌਂਸਲਰ ਦੇ ਸਹਿਯੋਗ ਨਾਲ ਕੁੱਲ 51 ਵੋਟਾਂ ਹਾਸਲ ਕਰਕੇ ਜਿੱਤ ਦਰਜ ਕੀਤੀ। ਇਸ ਜਿੱਤ ਨਾਲ ਉੱਥੇ ਪਿਛਲੇ ਚਾਰ ਦਹਾਕਿਆਂ ਤੋਂ ਚੱਲ ਰਿਹਾ ਐਲ.ਡੀ.ਐਫ. (LDF) ਦਾ ਸ਼ਾਸਨ ਖਤਮ ਹੋ ਗਿਆ ਹੈ।
ਸੂਬੇ ਦੀਆਂ ਕੁੱਲ 6 ਨਗਰ ਨਿਗਮਾਂ ਵਿੱਚੋਂ ਯੂ.ਡੀ.ਐੱਫ. (UDF) ਨੇ 4 (ਕੋਲਮ, ਕੋਚੀ, ਤ੍ਰਿਸ਼ੂਰ ਅਤੇ ਕੰਨੂਰ) ਵਿੱਚ ਜਿੱਤ ਹਾਸਲ ਕੀਤੀ ਹੈ, ਜਦਕਿ ਐਲ.ਡੀ.ਐੱਫ. ਅਤੇ ਭਾਜਪਾ ਨੇ ਇੱਕ-ਇੱਕ ਨਿਗਮ ਵਿੱਚ ਜਿੱਤ ਪ੍ਰਾਪਤ ਕੀਤੀ। ਕੋਲਮ ਵਿੱਚ ਏ.ਕੇ. ਹਫੀਜ਼, ਕੋਚੀ ਵਿੱਚ ਵੀ.ਕੇ. ਮਿਨੀਮੋਲ ਅਤੇ ਤ੍ਰਿਸ਼ੂਰ ਵਿੱਚ ਡਾ. ਨਿਜੀ ਜਸਟਿਨ ਮੇਅਰ ਬਣੇ ਹਨ। ਕੋਜ਼ੀਕੋਡ ਕਾਰਪੋਰੇਸ਼ਨ ਵਿੱਚ ਐੱਲ.ਡੀ.ਐੱਫ. ਨੇ ਸਭ ਤੋਂ ਵੱਧ ਵਾਰਡ ਜਿੱਤੇ ਹਨ।
ਪਾਲਾ ਨਗਰਪਾਲਿਕਾ ਵਿੱਚ ਇੱਕ ਨਵਾਂ ਰਿਕਾਰਡ ਬਣਿਆ ਹੈ, ਜਿੱਥੇ 21 ਸਾਲਾ ਦੀਆ ਬਿਨੂ ਪੁਲੀਕੰਕੰਦਮ ਕੇਰਲ ਦੀ ਸਭ ਤੋਂ ਨੌਜਵਾਨ ਮਿਉਂਸਪਲ ਚੇਅਰਪਰਸਨ ਚੁਣੀ ਗਈ ਹੈ। ਉਸ ਨੇ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਜਿੱਤੀ ਅਤੇ ਬਾਅਦ ਵਿੱਚ ਯੂ.ਡੀ.ਐੱਫ. ਨੂੰ ਸਮਰਥਨ ਦਿੱਤਾ।
ਤਿਰੂਵਨੰਤਪੁਰਮ ਤੋਂ ਇਲਾਵਾ, ਭਾਜਪਾ ਨੇ ਤ੍ਰਿਪੁਨੀਥੁਰਾ ਅਤੇ ਪਲੱਕੜ ਨਗਰਪਾਲਿਕਾਵਾਂ ਵਿੱਚ ਵੀ ਜਿੱਤ ਹਾਸਲ ਕੀਤੀ ਹੈ। ਇਹ ਚੋਣ ਨਤੀਜੇ ਕੇਰਲ ਦੀ ਰਾਜਨੀਤੀ ਵਿੱਚ ਇੱਕ ਵੱਡੀ ਤਬਦੀਲੀ ਦੇ ਸੰਕੇਤ ਹਨ, ਖਾਸ ਕਰਕੇ ਰਾਜਧਾਨੀ ਵਿੱਚ ਭਾਜਪਾ ਦਾ ਵਧਦਾ ਪ੍ਰਭਾਵ ਅਤੇ ਪਾਲਾ ਵਰਗੇ ਰਵਾਇਤੀ ਗੜ੍ਹਾਂ ਵਿੱਚ ਨਵੇਂ ਚਿਹਰਿਆਂ ਦਾ ਉਭਾਰ ਮਹੱਤਵਪੂਰਨ ਹੈ।
ਸਾਹਿਬਜ਼ਾਦੇ ਦੇਸ਼ ਦਾ ਮਾਣ, ਹਰੇਕ ਭਾਰਤੀ ਨੂੰ ਉਨ੍ਹਾਂ ਤੋਂ ਤਾਕਤ ਅਤੇ ਪ੍ਰੇਰਨਾ ਮਿਲਦੀ ਹੈ: PM ਮੋਦੀ
NEXT STORY 
