ਠਾਣੇ(ਪੀ.ਟੀ.ਆਈ.) ਠਾਣੇ ਵਿੱਚ ਪੁਲਸ ਨੇ ਛੇ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਅਤੇ ਉਨ੍ਹਾਂ ਤੋਂ 45 ਲੱਖ ਰੁਪਏ ਤੋਂ ਵੱਧ ਦੇ ਨਕਲੀ ਭਾਰਤੀ ਕਰੰਸੀ ਨੋਟ ਜ਼ਬਤ ਕੀਤੇ ਹਨ। ਇੱਕ ਅਧਿਕਾਰੀ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਕ੍ਰਾਈਮ ਬ੍ਰਾਂਚ ਦੇ ਡਿਪਟੀ ਕਮਿਸ਼ਨਰ ਆਫ਼ ਪੁਲਸ (ਡੀਸੀਪੀ) ਅਮਰਸਿੰਘ ਜਾਧਵ ਨੇ ਵੀਰਵਾਰ ਨੂੰ ਪੱਤਰਕਾਰਾਂ ਨੂੰ ਦੱਸਿਆ ਕਿ ਭਿਵੰਡੀ ਸ਼ਹਿਰ ਵਿੱਚ ਇੱਕ ਟਰਾਂਸਪੋਰਟ ਕੰਪਨੀ ਦੇ ਦਫ਼ਤਰ ਵਿੱਚ ਨਕਲੀ ਨੋਟ ਛਾਪੇ ਜਾ ਰਹੇ ਸਨ। ਇੱਕ ਗੁਪਤ ਸੂਚਨਾ 'ਤੇ ਕਾਰਵਾਈ ਕਰਦੇ ਹੋਏ, ਭਿਵੰਡੀ ਪੁਲਸ ਦੀ ਅਪਰਾਧ ਸ਼ਾਖਾ ਨੇ 3 ਮਈ ਨੂੰ ਅਵਾਚਿਤਪਾੜਾ ਵਿੱਚ ਛਾਪਾ ਮਾਰਿਆ ਅਤੇ ਸੂਰਜ ਤਾਨਾਜੀ ਸ਼ੇਂਡੇ, ਭਰਤ ਵਾਲਕੂ ਸਾਸੇ ਅਤੇ ਸਵਪਨਿਲ ਜਗਦੀਸ਼ ਪਾਟਿਲ ਤੋਂ 500 ਰੁਪਏ ਦੇ ਨਕਲੀ ਨੋਟ, ਜਿਨ੍ਹਾਂ ਦੀ ਕੀਮਤ 30 ਲੱਖ ਰੁਪਏ ਸੀ, ਜ਼ਬਤ ਕੀਤੇ। ਡੀਸੀਪੀ ਨੇ ਕਿਹਾ ਕਿ ਦੋ ਦਿਨ ਬਾਅਦ, ਰਾਮਦਾਸ ਸ਼ਾਲਿਕ ਡਾਲਵੀ, ਵਿਜੇ ਕਰਨੇਕਰ ਉਰਫ਼ ਵਿੱਕੀ ਅਤੇ ਸ਼ੇਖਰ ਰਾਮਦਾਸ ਬੈਟਿਨ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ, ਜਿਨ੍ਹਾਂ ਤੋਂ 15,50,000 ਰੁਪਏ ਦੇ ਨਕਲੀ ਨੋਟ ਜ਼ਬਤ ਕੀਤੇ ਗਏ। ਪੁਲਸ ਨੇ ਸਵਾਦਨਾਕਾ ਵਿਖੇ ਸਥਿਤ ਇੱਕ ਟਰਾਂਸਪੋਰਟ ਕੰਪਨੀ ਦੇ ਦਫ਼ਤਰ 'ਤੇ ਵੀ ਛਾਪਾ ਮਾਰਿਆ, ਜਿੱਥੇ ਨੋਟ ਛਾਪੇ ਜਾ ਰਹੇ ਸਨ। ਪੁਲਸ ਨੇ ਕੰਪਨੀ ਤੋਂ ਲੈਪਟਾਪ, ਪ੍ਰਿੰਟਰ, ਕਟਰ ਅਤੇ ਬਾਂਡ ਪੇਪਰ ਤੋਂ ਇਲਾਵਾ ਹੋਰ ਸਮੱਗਰੀ ਵੀ ਜ਼ਬਤ ਕੀਤੀ ਹੈ। ਜਾਧਵ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
'ਅੱਤਵਾਦੀਆਂ ਨੂੰ ਸਰਕਾਰੀ ਸਨਮਾਨ ਦੇਣਾ ਪਾਕਿਸਤਾਨ ਦੀ ਪੁਰਾਣੀ ਪਰੰਰਪਰਾ' : ਵਿਦੇਸ਼ ਸਕੱਤਰ
NEXT STORY 
