ਨਵੀਂ ਦਿੱਲੀ- ਸਰਕਾਰ ਨੇ ਸਾਲ 2026 ’ਚ ਕਣਕ ਖਰੀਦ ਦਾ ਟੀਚਾ ਦੱਸ ਦਿੱਤਾ ਹੈ, ਜੋ ਪਿਛਲੇ ਸਾਲ ਤੋਂ ਵੀ ਕਿਤੇ ਜ਼ਿਆਦਾ ਹੈ। ਇਸ ਨਾਲ ਦੇਸ਼ ਦੇ ਕਰੋੜਾਂ ਕਿਸਾਨਾਂ ਨੂੰ ਫਾਇਦਾ ਹੋਵੇਗਾ, ਕਿਉਂਕਿ ਇਸ ਸਾਲ ਕਣਕ ਦੀ ਬੰਪਰ ਪੈਦਾਵਾਰ ਹੋਣ ਦਾ ਅੰਦਾਜ਼ਾ ਹੈ। ਇਸ ਦੇ ਨਾਲ ਹੀ ਸਰਕਾਰ ਨੇ ਕਣਕ ਦਾ ਐੱਮ. ਐੱਸ. ਪੀ. ਵੀ ਵਧਾਇਆ ਹੈ, ਜਿਸ ਤੋਂ ਬਾਅਦ ਹੁਣ ਕਿਸਾਨਾਂ ਨੂੰ ਪ੍ਰਤੀ ਕੁਇੰਟਲ ਲੱਗਭਗ 160 ਰੁਪਏ ਜ਼ਿਆਦਾ ਮਿਲਣਗੇ।
ਸਰਕਾਰ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਦੇਸ਼ ’ਚ ਅਨਾਜ ਦਾ ਭੰਡਾਰ ਵੀ ਇਸ ਸਾਲ ਰਿਕਾਰਡ ਪੱਧਰ ’ਤੇ ਪਹੁੰਚ ਜਾਵੇਗਾ। ਖੁਰਾਕ ਅਤੇ ਜਨਤਕ ਵੰਡ ਵਿਭਾਗ (ਡੀ. ਐੱਫ. ਪੀ. ਡੀ.) ਦੇ ਸਕੱਤਰ ਦੀ ਪ੍ਰਧਾਨਗੀ ’ਚ ਸੂਬਿਆਂ ਦੇ ਖੁਰਾਕ ਸਕੱਤਰਾਂ ਦੀ ਬੈਠਕ ’ਚ ਦੱਸਿਆ ਗਿਆ ਹੈ ਕਿ ਸਰਕਾਰ ਨੇ 2026-27 ਹਾੜੀ ਮੰਡੀਕਰਨ ਸੀਜ਼ਨ (ਆਰ. ਐੱਮ. ਐੱਸ.) ਲਈ ਕਣਕ ਖਰੀਦ ਦਾ ਟੀਚਾ 3.03 ਕਰੋੜ ਟਨ ਤੈਅ ਕੀਤਾ ਹੈ। ਹਰ ਸਾਲ ਅਪ੍ਰੈਲ ਤੋਂ ਜੂਨ ਦੇ ਦਰਮਿਆਨ ਜ਼ਿਆਦਾਤਰ ਕਣਕ ਦੀ ਖਰੀਦ ਕੀਤੀ ਜਾਂਦੀ ਹੈ, ਜਦੋਂ ਕਿ ਹੋਰ ਫਸਲਾਂ ਦੀ ਖਰੀਦ ਪੂਰੇ ਸੀਜ਼ਨ ’ਚ ਮਾਰਚ ਤੱਕ ਹੁੰਦੀ ਹੈ। ਇਸ ਦਾ ਮਤਲਬ ਹੈ ਕਿ ਇਸ ਸਾਲ ਵੀ ਕਿਸਾਨਾਂ ਨੂੰ ਜੂਨ ਤੱਕ ਆਪਣੀ ਕਣਕ ਸਰਕਾਰੀ ਰੇਟਾਂ ’ਤੇ ਵੇਚਣ ਦਾ ਮੌਕਾ ਮਿਲੇਗਾ।
ਝੋਨੇ ਦੀ ਵੀ ਹੋਵੇਗੀ ਜੰਮ ਕੇ ਖਰੀਦ
ਇਸ ਦੇ ਨਾਲ ਹੀ ਸਰਕਾਰ ਨੇ 2025-26 (ਹਾੜੀ ਫਸਲ) ਲਈ ਝੋਨੇ ਦੀ ਖਰੀਦ ਦਾ ਅੰਦਾਜ਼ਾ ਚੌਲਾਂ ਦੇ ਬਰਾਬਰ 76 ਲੱਖ ਟਨ ਲਾਇਆ ਹੈ। ਉੱਥੇ ਹੀ ਸੂਬਿਆਂ ਵੱਲੋਂ ਖਰੀਦ ਦਾ ਅੰਦਾਜ਼ਾ ਲਗਭਗ 7,79,000 ਟਨ ਮੋਟੇ ਅਨਾਜ, ਜਿਸ ’ਚ ਮਿਲੇਟਸ (ਸ਼੍ਰੀ ਅੰਨ) ਵੀ ਸ਼ਾਮਲ ਹਨ, ਲਾਇਆ ਗਿਆ ਹੈ। ਇਸ ਸਾਲ ਕਣਕ ਦਾ ਉਤਪਾਦਨ ਪਿਛਲੇ ਸਾਲ ਦੇ ਰਿਕਾਰਡ 11.79 ਕਰੋੜ ਟਨ ਨੂੰ ਪਾਰ ਕਰ ਸਕਦਾ ਹੈ ਅਤੇ 12 ਕਰੋੜ ਟਨ ਤੱਕ ਪਹੁੰਚ ਸਕਦਾ ਹੈ, ਕਿਉਂਕਿ 3.34 ਕਰੋੜ ਹੈਕਟੇਅਰ ’ਚ ਕਣਕ ਦੀ ਰਿਕਾਰਡ ਬਿਜਾਈ ਅਤੇ ਅਨੁਕੂਲ ਮੌਸਮ ਦੀ ਵਜ੍ਹਾ ਕਰ ਕੇ ਉਤਪਾਦਨ ਵਧਣ ਦੀ ਸੰਭਾਵਨਾ ਹੈ।
ਦੇਸ਼ ’ਚ ਅਨਾਜ ਦਾ ਬੰਪਰ ਭੰਡਾਰ
ਭਾਰਤੀ ਖੁਰਾਕ ਨਿਗਮ (ਐੱਫ. ਸੀ. ਆਈ.) ਦੇ ਕਣਕ ਭੰਡਾਰ 1 ਅਪ੍ਰੈਲ 2026 ਤੱਕ ਲੱਗਭਗ 1.82 ਕਰੋੜ ਟਨ ਹੋਣ ਦਾ ਅੰਦਾਜ਼ਾ ਹੈ, ਜਿਸ ਨਾਲ ਘਰੇਲੂ ਜ਼ਰੂਰਤਾਂ ਲਈ ਲੋੜੀਂਦੀ ਸਪਲਾਈ ਯਕੀਨੀ ਬਣੇਗੀ। ਭਾਰਤ ਨੇ ਫਰਵਰੀ ’ਚ ਕਣਕ ਅਤੇ ਕਣਕ ਉਤਪਾਦਾਂ ਦੀ ਬਰਾਮਦ ’ਤੇ 4 ਸਾਲ ਤੋਂ ਲੱਗੀ ਰੋਕ ਹਟਾ ਦਿੱਤੀ ਹੈ ਅਤੇ ਸ਼ੁਰੂਆਤੀ ਤੌਰ ’ਤੇ 25 ਲੱਖ ਟਨ ਕਣਕ ਅਤੇ 5,00,000 ਟਨ ਕਣਕ ਉਤਪਾਦਾਂ ਦੀ ਬਰਾਮਦ ਦੀ ਮਨਜ਼ੂਰੀ ਦਿੱਤੀ ਗਈ ਹੈ। ਇਸ ਦਾ ਫਾਇਦਾ ਵੀ ਕਿਸਾਨਾਂ ਨੂੰ ਮਿਲੇਗਾ, ਕਿਉਂਕਿ ਬਰਾਮਦ ਖੁੱਲ੍ਹਣ ਨਾਲ ਅਨਾਜ ਦੀ ਮੰਗ ਵਿਦੇਸ਼ਾਂ ’ਚ ਵੀ ਵਧੇਗੀ।
ਵਧੇ ਐੱਮ. ਐੱਸ. ਪੀ. ’ਤੇ ਹੋਵੇਗੀ ਖਰੀਦ
ਸਰਕਾਰ 5 ਸੂਬਿਆਂ ’ਚ 10 ਫੀਸਦੀ ਤੱਕ ਟੁੱਟੇ ਹੋਏ ਦਾਣਿਆਂ ਵਾਲੇ ਬਿਹਤਰ ਚੌਲਾਂ ਦੀ ਸਪਲਾਈ ਲਈ ਪਾਇਲਟ ਪ੍ਰਾਜੈਕਟ ਚਲਾ ਰਹੀ ਹੈ। ਆਂਧਰਾ ਪ੍ਰਦੇਸ਼ ’ਚ ਖੁਰਾਕ ਪੈਕਿੰਗ ’ਤੇ ਕਿਊ. ਆਰ. ਕੋਡ ਟੈਗਿੰਗ ਦਾ ਪਾਇਲਟ ਪ੍ਰਾਜੈਕਟ ਸਫਲਤਾਪੂਰਵਕ ਪੂਰਾ ਹੋ ਗਿਆ ਹੈ ਅਤੇ ਹੋਰ ਸੂਬਿਆਂ ’ਚ ਵੀ ਇਸ ਨੂੰ ਲਾਗੂ ਕਰਨ ਦੀ ਯੋਜਨਾ ਹੈ। ਇਸ ਵਾਰ ਕਿਸਾਨਾਂ ਨੂੰ ਰਾਹਤ ਦਿੰਦੇ ਹੋਏ ਸਰਕਾਰ ਨੇ ਹਾੜੀ ਮੰਡੀਕਰਨ ਸੀਜ਼ਨ 2026-27 ਲਈ ਕਣਕ ਦਾ ਘੱਟੋ-ਘੱਟ ਸਮਰਥਨ ਮੁੱਲ 2,585 ਰੁਪਏ ਪ੍ਰਤੀ ਕੁਇੰਟਲ ਤੈਅ ਕੀਤਾ ਹੈ। ਇਹ ਪਿਛਲੇ ਸਾਲ ਦੇ ਮੁਕਾਬਲੇ 160 ਰੁਪਏ ਜ਼ਿਆਦਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e
ਵਿਕਸਿਤ ਭਾਰਤ ਦੀ ਨੀਂਹ ਹੈ 'ਨਾਰੀ ਸ਼ਕਤੀ': PM ਮੋਦੀ ਨੇ ਮਹਿਲਾ ਦਿਵਸ ਦੀਆਂ ਦਿੱਤੀਆਂ ਮੁਬਾਰਕਾਂ
NEXT STORY 
