ਨਵੀਂ ਦਿੱਲੀ- ਪੁਲਾੜ ਵਾਹਨ ‘ਡ੍ਰੈਗਨ’ ਦੇ ਪੁਲਾੜ ਪ੍ਰਯੋਗਸ਼ਾਲਾ ਨਾਲ ਜੁੜਣ ਦੇ ਨਾਲ ਹੀ ਵੀਰਵਾਰ ਨੂੰ ਭਾਰਤੀ ਪੁਲਾੜ ਯਾਤਰੀ ਸ਼ੁਭਾਂਸ਼ੂ ਸ਼ੁਕਲਾ (39) ਅਤੇ 3 ਹੋਰ ਯਾਤਰੀ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ (ਆਈ.ਐੱਸ.ਐੱਸ.) 'ਤੇ ਪਹੁੰਚ ਗਏ। ਪੁਲਾੜ ਵਾਹਨ ਉਸ ਸਮੇਂ ਪੁਲਾੜ ਸਟੇਸ਼ਨ ਨਾਲ ਜੁੜਿਆ ਜਦੋਂ ਇਹ ਭਾਰਤੀ ਸਮੇਂ ਅਨੁਸਾਰ ਸ਼ਾਮ 4:01 ਵਜੇ ਉੱਤਰੀ ਅਟਲਾਂਟਿਕ ਮਹਾਸਾਗਰ ਉੱਪਰੋਂ ਲੰਘ ਰਿਹਾ ਸੀ। ਇਹ ਪਹਿਲੀ ਵਾਰ ਹੈ ਜਦੋਂ ਕੋਈ ਭਾਰਤੀ ਪੁਲਾੜ ਯਾਤਰੀ ਅੰਤਰਰਾਸ਼ਟਰੀ ਸਪੇਸ ਸਟੇਸ਼ਨ 'ਤੇ ਗਿਆ ਹੈ।
ਅਮਰੀਕੀ ਪੁਲਾੜ ਏਜੰਸੀ ‘ਨਾਸਾ’ ਨੇ ਇਕ ਬਿਆਨ ’ਚ ਕਿਹਾ, ‘‘ਵੀਰਵਾਰ ਨੂੰ ਸਵੇਰੇ 6:31 ਵਜੇ (ਭਾਰਤੀ ਸਮੇਂ ਅਨੁਸਾਰ ਸ਼ਾਮ 4:01 ਵਜੇ) ਐਕਸਿਓਮ ਮਿਸ਼ਨ-4 ਦੇ ਤਹਿਤ ਸਪੇਸਐਕਸ ਡ੍ਰੈਗਨ ਪੁਲਾੜ ਵਾਹਨ ਚੌਥੇ ਨਿੱਜੀ ਪੁਲਾੜ ਯਾਤਰੀ ਮਿਸ਼ਨ ਲਈ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ ’ਤੇ ਪੁੱਜਾ।’’ ਨਾਸਾ ਦੀ ਇਕ ਲਾਈਵ ਵੀਡੀਓ ’ਚ ਪੁਲਾੜ ਵਾਹਨ ਨੂੰ ਪੁਲਾੜ ਸਟੇਸ਼ਨ ਦੇ ਕੋਲ ਆਉਂਦੇ ਹੋਏ ਵਿਖਾਇਆ ਗਿਆ ਅਤੇ ‘ਡਾਕਿੰਗ’ ਪ੍ਰਕਿਰਿਆ ਭਾਰਤੀ ਸਮੇਂ ਅਨੁਸਾਰ ਸ਼ਾਮ 4:15 ਵਜੇ ਪੂਰੀ ਹੋਈ।
ਪੁਲਾੜ ਵਾਹਨ ਅਤੇ ਆਈ.ਐੱਸ.ਐੱਸ. ਵਿਚਾਲੇ ਸੰਚਾਰ ਅਤੇ ਊਰਜਾ ਸੰਪਰਕ ਸਥਾਪਤ ਹੋਣ ਦੇ ਨਾਲ ਹੀ ‘ਡਾਕਿੰਗ’ ਪ੍ਰਕਿਰਿਆ ਪੂਰੀ ਹੋ ਗਈ। ਤਜਰਬੇਕਾਰ ਪੁਲਾੜ ਯਾਤਰੀ ਪੈਗੀ ਵ੍ਹਿਟਸਨ ਮਿਸ਼ਨ ਕਮਾਂਡਰ ਹਨ ਅਤੇ ਸ਼ੁਕਲਾ ਐਕਸਿਓਮ-4 ਮਿਸ਼ਨ ਲਈ ਮਿਸ਼ਨ ਪਾਇਲਟ ਹਨ। ਇਨ੍ਹਾਂ ਤੋਂ ਇਲਾਵਾ, ਹੰਗਰੀ ਦੇ ਪੁਲਾੜ ਯਾਤਰੀ ਟਿਬੋਰ ਕਪੂ ਅਤੇ ਪੋਲੈਂਡ ਦੇ ਸਲਾਵੋਜ ਉਜਨਾਂਸਕੀ-ਵਿਸਨੀਵਸਕੀ ਐਕਸਿਓਮ-4 ਮਿਸ਼ਨ ਦਾ ਹਿੱਸਾ ਹਨ। ਲਖਨਊ ’ਚ ਜਨਮੇ ਸ਼ੁਕਲਾ ਪੁਲਾੜ ਲਈ ਉੜਾਨ ਭਰਨ ਵਾਲੇ ਦੂਜੇ ਭਾਰਤੀ ਪੁਲਾੜ ਯਾਤਰੀ ਬਣ ਗਏ ਹਨ।
ਇਸ ਤੋਂ 41 ਸਾਲ ਪਹਿਲਾਂ ਭਾਰਤ ਦੇ ਰਾਕੇਸ਼ ਸ਼ਰਮਾ 1984 ’ਚ ਤਤਕਾਲੀ ਸੋਵੀਅਤ ਸੰਘ ਦੇ ਸੈਲਿਊਟ-7 ਪੁਲਾੜ ਸਟੇਸ਼ਨ ਦੇ ਤਹਿਤ ਪੰਧ ’ਚ 8 ਦਿਨ ਰਹੇ ਸਨ। ਪੋਲੈਂਡ ਦੇ ਇੰਜੀਨੀਅਰ ਸਲਾਵੋਜ ਇਕ ਮਿਸ਼ਨ ਮਾਹਰ ਅਤੇ ਯੂਰਪੀ ਪੁਲਾੜ ਏਜੰਸੀ ਦੇ ਪੁਲਾੜ ਯਾਤਰੀ ਹਨ। ਉਹ ਪੁਲਾੜ ਦੀ ਯਾਤਰਾ ਕਰਨ ਵਾਲੇ ਆਪਣੇ ਦੇਸ਼ ਦੇ ਦੂਜੇ ਵਿਅਕਤੀ ਬਣ ਗਏ ਹਨ। ਮਕੈਨੀਕਲ ਇੰਜੀਨੀਅਰ ਅਤੇ ਮਿਸ਼ਨ ਮਾਹਰ ਟਿਬੋਰ ਕਪੂ ਪੁਲਾੜ ’ਚ ਜਾਣ ਵਾਲੇ ਹੰਗਰੀ ਦੇ ਦੂਜੇ ਯਾਤਰੀ ਬਣ ਗਏ ਹਨ। ਹੰਗਰੀ ਦਾ ਆਖਰੀ ਪੁਲਾੜ ਮਿਸ਼ਨ 45 ਸਾਲ ਪਹਿਲਾਂ ਹੋਇਆ ਸੀ।
ISS 'ਤੇ ਪਹੁੰਚਣ ਮਗਰੋਂ ਇਕ ਵੀਡੀਓ ਜਾਰੀ ਕਰਦੇ ਹੋਏ ਸ਼ੁਭਾਂਸ਼ੂ ਨੇ ਹਿੰਦੀ 'ਚ ਆਪਣੇ ਦੇਸ਼ ਵਾਸੀਆਂ ਦੇ ਨਾਂ ਇਕ ਸੰਦੇਸ਼ ਜਾਰੀ ਕੀਤਾ ਹੈ, ਜਿਸ 'ਚ ਉਨ੍ਹਾਂ ਕਿਹਾ ਕਿ ਦੇਸ਼ ਵਾਸੀਆਂ ਦੀਆਂ ਦੁਆਵਾਂ ਸਦਕਾ ਉਹ ਇੱਥੇ ਤੱਕ ਪਹੁੰਚ ਗਏ ਹਨ। ਹਾਲਾਂਕਿ ਇਹ ਇੰਨਾ ਆਸਾਨ ਨਹੀਂ ਹੈ, ਜਿੰਨਾ ਕਿ ਲੱਗ ਰਿਹਾ ਹੈ। ਘੱਟ ਗ੍ਰੈਵਿਟੀ ਕਾਰਨ ਉਨ੍ਹਾਂ ਦਾ ਸਿਰ ਭਾਰੀ ਹੈ ਤੇ ਸਰੀਰ ਹਾਲੇ ਸਾਥ ਨਹੀਂ ਦੇ ਰਿਹਾ, ਪਰ ਅਗਲੇ ਕੁਝ ਦਿਨਾਂ ਦੌਰਾਨ ਉਨ੍ਹਾਂ ਨੂੰ ਉੱਥੇ ਰਹਿਣ ਦੀ ਆਦਤ ਹੋ ਜਾਵੇਗੀ।
ਉਨ੍ਹਾਂ ਅੱਗੇ ਕਿਹਾ ਕਿ ਇਹ ਤਾਂ ਹਾਲੇ ਇਸ ਮਿਸ਼ਨ ਦਾ ਪਹਿਲਾ ਪੜਾਅ ਹੈ, ਉਨ੍ਹਾਂ ਨੇ 14 ਦਿਨ ਇੱਥੇ ਬਿਤਾਉਣੇ ਹਨ, ਜਿਸ ਦੌਰਾਨ ਉਹ ਉੱਥੇ ਕਈ ਤਰ੍ਹਾਂ ਦੇ ਵਿਗਿਆਨਕ ਪ੍ਰਯੋਗ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਸ ਸਫ਼ਰ ਨੂੰ ਲੈ ਕੇ ਉਹ ਕਾਫ਼ੀ ਉਤਸ਼ਾਹਿਤ ਹਨ ਤੇ ਉਨ੍ਹਾਂ ਦੇ ਮੋਢੇ 'ਤੇ ਜੋ ਤਿਰੰਗਾ ਲੱਗਿਆ ਹੈ, ਉਹ ਉਨ੍ਹਾਂ ਨੂੰ ਇਸ ਗੱਲ ਦਾ ਅਹਿਸਾਸ ਕਰਵਾਉਂਦਾ ਹੈ ਕਿ ਪੂਰਾ ਦੇਸ਼ ਉਨ੍ਹਾਂ ਦੇ ਨਾਲ ਹੈ। ਉਨ੍ਹਾਂ ਕਿਹਾ ਕਿ ਮੈਨੂੰ ਉਮੀਦ ਹੈ ਕਿ ਅਗਲੇ 14 ਦਿਨ ਬੇਹੱਦ ਉਤਸ਼ਾਹਪੂਰਵਕ ਤੇ ਸ਼ਾਨਦਾਰ ਹੋਣ ਵਾਲੇ ਹਨ। ਉਨ੍ਹਾਂ ਆਪਣੇ ਇਸ ਮੈਸੇਜ ਦਾ ਅੰਤ 'ਜੈ ਹਿੰਦ, ਜੈ ਭਾਰਤ' ਕਹਿ ਕੇ ਕੀਤਾ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
ਆਸ਼ਰਮ ਜਾਂ ਟਾਰਚਰ ਸੈੱਲ ! ਬਜ਼ੁਰਗਾਂ ਦੇ ਬੰਨ੍ਹੇ ਹੱਥ, ਬੇਸਮੈਂਟਾਂ 'ਚ ਕੀਤਾ ਕੈਦ, ਹਾਲ ਦੇਖ ਕੰਬ ਜਾਵੇਗੀ ਰੂਹ
NEXT STORY 
