ਨਵੀਂ ਦਿੱਲੀ : ਇੰਡੀਅਨ ਰੇਲਵੇ ਦੀ ਆਨਲਾਈਨ ਟਿਕਟ ਬੁਕਿੰਗ ਸੇਵਾ IRCTC ਨੇ ਇੱਕੋ ਦਿਨ ਵਿੱਚ 20 ਲੱਖ ਤੋਂ ਵੱਧ ਟਿਕਟਾਂ ਬੁੱਕ ਕਰਨ ਦਾ ਨਵਾਂ ਰਿਕਾਰਡ ਕਾਇਮ ਕੀਤਾ ਹੈ। IRCTC ਦੇ ਅਨੁਸਾਰ, 7 ਸਤੰਬਰ 2026 ਨੂੰ ਕੁੱਲ 20,06,353 ਟਿਕਟਾਂ ਬੁੱਕ ਕੀਤੀਆਂ ਗਈਆਂ। ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਐਡਵਾਂਸ ਰਿਜ਼ਰਵੇਸ਼ਨ ਪੀਰੀਅਡ ਤਹਿਤ ਵਧੀ ਬੁਕਿੰਗ ਨੂੰ ਇਸ ਰਿਕਾਰਡ ਦਾ ਵੱਡਾ ਕਾਰਨ ਦੱਸਿਆ ਜਾ ਰਿਹਾ ਹੈ। ਇਸ ਤੋਂ ਇੱਕ ਦਿਨ ਬਾਅਦ, 8 ਸਤੰਬਰ ਨੂੰ ਵੀ ਲਗਭਗ 19.50 ਲੱਖ ਟਿਕਟਾਂ ਬੁੱਕ ਹੋਈਆਂ।
ਇਸ ਨਵੀਂ ਪ੍ਰਾਪਤੀ ਨਾਲ IRCTC ਨੇ ਪਿਛਲੇ ਸਾਲ ਦਾ ਇੱਕ ਦਿਨ ਵਿੱਚ ਲਗਭਗ 18.40 ਲੱਖ ਟਿਕਟਾਂ ਬੁੱਕ ਕਰਨ ਦਾ ਰਿਕਾਰਡ ਤੋੜ ਦਿੱਤਾ ਹੈ। ਇਹ ਪਹਿਲੀ ਵਾਰ ਹੈ ਜਦੋਂ ਆਨਲਾਈਨ ਟਿਕਟ ਬੁਕਿੰਗ ਦਾ ਅੰਕੜਾ 20 ਲੱਖ ਤੋਂ ਪਾਰ ਪਹੁੰਚਿਆ ਹੈ। ਆਂਕੜਿਆਂ ਮੁਤਾਬਕ ਹੁਣ ਸਿਰਫ਼ 11 ਫੀਸਦੀ ਰਿਜ਼ਰਵ ਟਿਕਟਾਂ ਹੀ ਆਫਲਾਈਨ ਬੁੱਕ ਹੁੰਦੀਆਂ ਹਨ, ਜਦਕਿ 89 ਫੀਸਦੀ ਟਿਕਟਾਂ ਆਨਲਾਈਨ ਰਾਹੀਂ ਬੁੱਕ ਕੀਤੀਆਂ ਜਾ ਰਹੀਆਂ ਹਨ।
IRCTC ਅਨੁਸਾਰ, ਟਿਕਟ ਬੁਕਿੰਗ ਸਿਸਟਮ ਨੂੰ ਮਜ਼ਬੂਤ ਕਰਨ ਲਈ ਪੁਰਾਣੇ ਸਰਵਰਾਂ ਦੀ ਜਗ੍ਹਾ ਨਵੇਂ ਸਰਵਰ ਲਗਾਏ ਗਏ ਹਨ। NGet Refresh ਤਹਿਤ ਕੀਤੇ ਸੁਧਾਰਾਂ ਨਾਲ ਸਿਸਟਮ ਦੀ ਸਮਰੱਥਾ ਲਗਭਗ ਦੁੱਗਣੀ ਹੋ ਗਈ ਹੈ। ਇਸ ਤੋਂ ਇਲਾਵਾ, 15 ਜੁਲਾਈ 2026 ਤੋਂ ਇੱਕ ਨਵਾਂ ਬੀਟਾ ਇੰਟਰਫੇਸ ਵੀ ਸ਼ੁਰੂ ਕੀਤਾ ਗਿਆ ਹੈ, ਜਿਸ ਵਿੱਚ ਸਲੀਪਰ, ਏ.ਸੀ. 3 ਟਾਇਰ ਅਤੇ ਏ.ਸੀ. 2 ਟਾਇਰ ਵਰਗੀਆਂ ਸ਼੍ਰੇਣੀਆਂ ਵਿੱਚ ਸੀਟਾਂ ਦੀ ਉਪਲਬਧਤਾ ਇੱਕੋ ਸਕ੍ਰੀਨ 'ਤੇ ਦਿਖਾਈ ਦਿੰਦੀ ਹੈ। ਸਿਸਟਮ ਵਿੱਚ ਐਂਟੀ-ਬੋਟ (Anti-BOT) ਅਤੇ CDN ਤਕਨਾਲੋਜੀ ਦੀ ਵਰਤੋਂ ਨਾਲ ਬੋਟ ਟ੍ਰੈਫਿਕ ਵਿੱਚ 55 ਤੋਂ 65 ਫੀਸਦੀ ਤੱਕ ਦੀ ਕਮੀ ਆਈ ਹੈ।
ਗਲਤ ਤਰੀਕੇ ਨਾਲ ਟਿਕਟਾਂ ਦੀ ਬੁਕਿੰਗ ਰੋਕਣ ਲਈ IRCTC ਵੱਲੋਂ ਹੁਣ ਤੱਕ 3.04 ਕਰੋੜ ਫਰਜ਼ੀ ਯੂਜ਼ਰ ਆਈ.ਡੀ. ਬੰਦ ਕੀਤੀਆਂ ਜਾ ਚੁੱਕੀਆਂ ਹਨ ਅਤੇ 6.33 ਕਰੋੜ ਆਈ.ਡੀ. ਮੁੜ ਜਾਂਚ (re-validation) ਲਈ ਭੇਜੀਆਂ ਗਈਆਂ ਹਨ। ਇਸ ਦੇ ਨਾਲ ਹੀ 16,041 ਸ਼ੱਕੀ ਈਮੇਲ ਡੋਮੇਨ ਵੀ ਬਲਾਕ ਕੀਤੇ ਗਏ ਹਨ। ਨਵੇਂ ਨਿਯਮਾਂ ਅਨੁਸਾਰ, ਅਧਿਕਾਰਤ ਏਜੰਟਾਂ ਲਈ ਸਵੇਰੇ 8:00 ਤੋਂ 8:10 ਵਜੇ ਤੱਕ ARP ਟਿਕਟਾਂ ਬੁੱਕ ਕਰਨ 'ਤੇ ਰੋਕ ਲਗਾਈ ਗਈ ਹੈ। ਇਸ ਤੋਂ ਇਲਾਵਾ, 12 ਅਕਤੂਬਰ 2025 ਤੋਂ ਓਪਨਿੰਗ ARP ਵਿੰਡੋ ਵਿੱਚ ਟਿਕਟ ਬੁੱਕ ਕਰਨ ਲਈ ਯੂਜ਼ਰ ਦਾ ਆਧਾਰ ਵੈਰੀਫਾਈਡ ਹੋਣਾ ਲਾਜ਼ਮੀ ਕੀਤਾ ਗਿਆ ਹੈ।
ਬ੍ਰਿਕਸ ਦੇ ਮੰਚ ਤੋਂ ਪੁਤਿਨ ਨੇ G7 ਦਾ ਉਡਾਇਆ ਮਜ਼ਾਕ; ਕਿਹਾ- 'ਅਸੀਂ 40% ਹਾਂ, ਉਹ ਸਾਡੇ ਤੋਂ ਘੱਟ'
NEXT STORY 
