ਜਲੰਧਰ- ਵਿਗਿਆਨੀਆਂ ਨੇ ਖੂਨ ਵਿਚ ਮੌਜੂਦ ਸੈੱਲਾਂ ਦੀ ਮਦਦ ਨਾਲ ਦਿਲ ਦੀਆਂ ਕਈ ਸਮੱਸਿਆਵਾਂ ਨੂੰ ‘ਪੈਚ’ ਚਿਪਕਾ ਕੇ ਠੀਕ ਕਰਨ ਦਾ ਦਾਅਵਾ ਕੀਤਾ ਹੈ।
ਬ੍ਰਿਟਿਸ਼ ਵੈੱਬਸਾਈਟ ‘ਦਿ ਗਾਰਜੀਅਨ’ ਦੀ ਰਿਪੋਰਟ ਮੁਤਾਬਕ ਵਿਗਿਆਨੀਆਂ ਨੇ ਦਿਲ ਦੀਆਂ ਮਾਸਪੇਸ਼ੀਆਂ ਦਾ ਪੈਚ ਤਿਆਰ ਕੀਤਾ ਹੈ, ਜਿਸ ਨੂੰ ਦਿਲ ਵਿਚ ਇੰਪਲਾਂਟ ਕੀਤਾ ਜਾ ਸਕੇਗਾ। ਇਸ ਨਾਲ ਦਿਲ ਦੇ ਨੁਕਸਾਨ ਨੂੰ ਕੰਟਰੋਲ ਕਰਨ ਵਿਚ ਮਦਦ ਮਿਲੇਗੀ ਅਤੇ ਹਾਰਟ ਫੇਲੀਅਰ ਦੀ ਹਾਲਤ ਵਿਚ ਟ੍ਰਾਂਸਪਲਾਂਟ ਤੋਂ ਬਚਿਆ ਜਾ ਸਕੇਗਾ।
ਸੈੱਲਾਂ ਤੋਂ ਤਿਆਰ ਕੀਤੇ ਜਾਂਦੇ ਹਨ ਪੈਚ
ਜਰਮਨੀ ਦੇ ਗਾਟਿੰਜੇਨ ਯੂਨੀਵਰਸਿਟੀ ਮੈਡੀਕਲ ਸੈਂਟਰ ਦੇ ਪ੍ਰੋਫੈਸਰ ਇੰਗੋ ਕੁਚਕਾ ਅਨੁਸਾਰ ਇਹ ਪਹਿਲੀ ਵਾਰ ਹੈ ਕਿ ਦਿਲ ਦੇ ਮਰੀਜ਼ਾਂ ਲਈ ਇਕ ਲੈਬ ਗ੍ਰੀਨ ਬਾਇਓਲੋਜੀਕਲ ਟ੍ਰਾਂਸਪਲਾਂਟ ਉਪਲੱਬਧ ਹੈ, ਜੋ ਦਿਲ ਦੀਆਂ ਮਾਸਪੇਸ਼ੀਆਂ ਨੂੰ ਸਥਿਰ ਅਤੇ ਮਜ਼ਬੂਤ ਕਰਨ ਦੀ ਸਮਰੱਥਾ ਰੱਖਦਾ ਹੈ।
ਇਹ ਪੈਚ ਖੂਨ ਵਿਚੋਂ ਲਏ ਗਏ ਸੈੱਲਾਂ ਤੋਂ ਤਿਆਰ ਕੀਤੇ ਜਾਂਦੇ ਹਨ, ਜਿਨ੍ਹਾਂ ਨੂੰ ਰੀ-ਪ੍ਰੋਗ੍ਰਾਮ ਕੀਤਾ ਜਾਂਦਾ ਹੈ, ਤਾਂ ਜੋ ਉਹ ਸਟੈਮ ਸੈੱਲਾਂ ਵਾਂਗ ਕੰਮ ਕਰ ਸਕਣ।
ਇਹ ਸੈੱਲ ਦਿਲ ਦੀਆਂ ਮਾਸਪੇਸ਼ੀਆਂ ਅਤੇ ਜੋੜਨ ਵਾਲੇ ਟਿਸ਼ੂ ਵਿਚ ਵਿਕਸਤ ਹੁੰਦੇ ਹਨ। ਇਹ ਸੈੱਲ ਕੋਲਾਜੇਨ ਜੈੱਲ ਵਿਚ ਪਾਏ ਜਾਂਦੇ ਹਨ ਅਤੇ ਇਕ ਕਸਟਮ-ਮੇਡ ਮੋਲਡ ਵਿਚ ਵੱਧਦੇ ਹਨ। ਇਸ ਤੋਂ ਬਾਅਦ ਇਹ ਸੈੱਲ ਇਕ ਪੈਚ ਦੇ ਰੂਪ ਵਿਚ ਤਿਆਰ ਕੀਤੇ ਜਾਂਦੇ ਹਨ ਅਤੇ ਇਸ ਪੈਚ ਨੂੰ ਇਕ ਵਿਸ਼ੇਸ਼ ਝਿੱਲੀ ’ਤੇ ਲਾਇਆ ਜਾਂਦਾ ਹੈ, ਜਿਸ ਦਾ ਆਕਾਰ 5 ਤੋਂ 10 ਸੈਂਟੀਮੀਟਰ ਹੁੰਦਾ ਹੈ।
ਤਕਨਾਲੋਜੀ ਦਾ ਪ੍ਰੀਖਣ ਸਿਹਤਮੰਦ ਬਾਂਦਰਾਂ ’ਤੇ
ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਪੈਚਾਂ ਵਿਚ ਉਹ ਗੁਣ ਹੁੰਦੇ ਹਨ, ਜੋ ਇਕ ਨੌਜਵਾਨ ਦਿਲ ਵਿਚ ਪਾਏ ਜਾਂਦੇ ਹਨ। ਇਹ ਪੈਚ ਮਰੀਜ਼ਾਂ ਦੇ ਦਿਲ ਵਿਚ ਇੰਪਲਾਂਟ ਕੀਤਾ ਜਾਂਦਾ ਹੈ, ਜਿਸ ਨਾਲ ਦਿਲ ਦੀਆਂ ਮਾਸਪੇਸ਼ੀਆਂ ਮਜ਼ਬੂਤ ਹੁੰਦੀਆਂ ਹਨ।
ਪੈਚ ਦਾ ਸਭ ਤੋਂ ਵੱਡਾ ਫਾਇਦਾ ਇਹ ਹੈ ਕਿ ਇਸ ਦੀ ਵਰਤੋਂ ਨਾਲ ਦਿਲ ਵਿਚ ਸੈੱਲਾਂ ਦਾ ਅਸਧਾਰਨ ਵਾਧਾ ਜਾਂ ਦਿਲ ਦੀ ਧੜਕਣ ਵਿਚ ਅਨਿਯਮਿਤ ਵਰਗੀਆਂ ਸਮੱਸਿਆਵਾਂ ਨਹੀਂ ਹੁੰਦੀਆਂ, ਜੋ ਕਿ ਦਿਲ ਦੀਆਂ ਗੰਭੀਰ ਬੀਮਾਰੀਆਂ ਵਿਚ ਖਤਰਨਾਕ ਹੋ ਸਕਦੀਆਂ ਹਨ।
ਵਿਗਿਆਨੀਆਂ ਨੇ ਇਸ ਤਕਨੀਕ ਦਾ ਪ੍ਰੀਖਣ ਕੀਤਾ ਸਿਹਤਮੰਦ ਬਾਂਦਰਾਂ ’ਤੇ ਕੀਤਾ, ਜਿਸ ਵਿਚ ਕੋਈ ਅਸਧਾਰਨ ਧੜਕਣ, ਟਿਊਮਰ ਬਣਨ ਜਾਂ ਮੌਤ ਦੇ ਕੋਈ ਸੰਕੇਤ ਨਹੀਂ ਮਿਲੇ।
ਹੁਣ ਤਕ 15 ਮਰੀਜ਼ਾਂ ਦਾ ਕੀਤਾ ਗਿਆ ਇਲਾਜ
ਇਸ ਤੋਂ ਬਾਅਦ ਟੀਮ ਨੇ ਇਸ ਪੈਚ ਨੂੰ 46 ਸਾਲਾ ਔਰਤ ’ਤੇ ਅਜ਼ਮਾਇਆ, ਜੋ ਕਿ ਹਾਰਟ ਫੇਲੀਅਰ ਨਾਲ ਜੂਝ ਰਹੀ ਸੀ। ਤਿੰਨ ਮਹੀਨਿਆਂ ਬਾਅਦ ਔਰਤ ਦਾ ਦਿਲ ਟਰਾਂਸਪਲਾਂਟ ਕੀਤਾ ਗਿਆ ਅਤੇ ਵਿਗਿਆਨੀਆਂ ਨੇ ਵੇਖਿਆ ਕਿ ਪੈਚ ਨੇ ਆਪਣੀ ਜਗ੍ਹਾ ਬਣਾ ਲਈ ਸੀ ਅਤੇ ਖੂਨ ਦਾ ਪ੍ਰਵਾਹ ਬਣ ਗਿਆ ਸੀ।
ਇਸ ਤਕਨੀਕ ਨੂੰ ਲਾਗੂ ਕਰਨ ਵਿਚ ਕਈ ਮਹੀਨੇ ਲੱਗ ਜਾਂਦੇ ਹਨ ਅਤੇ ਇਹ ਸਾਰੇ ਮਰੀਜ਼ਾਂ ਲਈ ਢੁਕਵੀਂ ਨਹੀਂ ਹੋ ਸਕਦੀ। ਹਾਲਾਂਕਿ 15 ਮਰੀਜ਼ ਪਹਿਲਾਂ ਹੀ ਇਨ੍ਹਾਂ ਪੈਚਾਂ ਨਾਲ ਇਲਾਜ ਕਰਵਾ ਚੁੱਕੇ ਹਨ ਅਤੇ ਚੱਲ ਰਹੇ ਕਲੀਨਿਕਲ ਪ੍ਰੀਖਣ ਵਿਚ ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਹ ਪੈਚ ਦਿਲ ਦੇ ਕੰਮ ਵਿਚ ਸੁਧਾਰ ਲਿਆ ਸਕਦੇ ਹਨ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਦੁਨੀਆ ਭਰ ਵਿਚ ਹਾਰਟ ਟਰਾਂਸਪਲਾਂਟ ਕਰਵਾਉਣ ਵਾਲਿਆਂ ਦੀ ਗਿਣਤੀ ਲੱਖਾਂ ਵਿਚ ਹੈ, ਜਦਕਿ ਇਨ੍ਹਾਂ ਅੰਗਾਂ ਦੀ ਹਮੇਸ਼ਾ ਕਮੀ ਰਹਿੰਦੀ ਹੈ।
ਆਰਟੀਫੀਸ਼ੀਅਲ ਹਾਰਟ ਪੰਪ ਬਹੁਤ ਮਹਿੰਗੇ ਹੁੰਦੇ ਹਨ ਅਤੇ ਇਨ੍ਹਾਂ ਵਿਚ ਗੁੰਝਲਾਂ ਦਾ ਖ਼ਤਰਾ ਵੀ ਵੱਧ ਹੁੰਦਾ ਹੈ। ਅਜਿਹੇ ਵਿਚ ਵਿਗਿਆਨੀਆਂ ਦਾ ਨਵਾਂ ਹਾਰਟ ਮਾਸਪੇਸ਼ੀ ਪੈਚ ਇਨ੍ਹਾਂ ਸਮੱਸਿਆਵਾਂ ਤੋਂ ਕਾਫੀ ਹੱਦ ਤਕ ਰਾਹਤ ਦਿਵਾਉਣ ਵਿਚ ਕਾਰਗਰ ਸਾਬਤ ਹੋ ਸਕਦਾ ਹੈ।
ਫਿੱਕੀ ਹੋ ਸਕਦੀ ਹੈ ਖੰਡ, ਚਾਲੂ ਸਾਲ ’ਚ 15 ਫੀਸਦੀ ਘੱਟ ਸਕਦੈ ਉਤਪਾਦਨ
NEXT STORY 
