ਕਾਹਨੂੰਵਾਨ(ਜਾਫਲਪੁਰ)-ਛੋਟਾ ਘੱਲੂਘਾਰਾ ਸਾਹਿਬ ਵਿਖੇ ਹਜ਼ਾਰਾਂ ਸ਼ਹੀਦ ਸਿੰਘਾਂ ਦੀ ਯਾਦ ਵਿਚ ਬਣੀ ਯਾਦਗਾਰ ਦੇ ਮੁੱਖ ਗੇਟ ਸਾਹਮਣਿਓਂ ਲੰਘਦੀ ਡਰੇਨ ਵਾਲੇ ਪਾਸੇ ਅਤੇ ਪਾਰਕਿੰਗ ਕੰਪਲੈਕਸ ਵਿਚ ਲੱਗੇ ਕੂੜੇ ਦੇ ਵੱਡੇ ਢੇਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ 'ਸਵੱਛ ਭਾਰਤ' ਮੁਹਿੰਮ 'ਤੇ ਪ੍ਰਸ਼ਨ ਚਿੰਨ੍ਹ ਲਗਾ ਰਹੇ ਹਨ। ਇਸ ਸਥਾਨ ਨੂੰ ਦੇਖਣ ਲਈ ਦੂਰੋਂ-ਦੂਰੋਂ ਸੈਲਾਨੀ ਹਰ ਰੋਜ਼ ਇਥੇ ਆਉਂਦੇ ਹਨ। ਇਹ ਯਾਦਗਾਰ ਇਤਿਹਾਸਕ ਘਟਨਾਵਾਂ ਦੀ ਗਵਾਹੀ ਭਰਨ ਤੋਂ ਇਲਾਵਾ ਖੂਬਸੂਰਤੀ ਦਾ ਬੇਜੋੜ ਮੁਜੱਸਮਾ ਹੈ। ਇਸ ਸਥਾਨ ਉੱਪਰ ਰਮਨੀਕ ਅਤੇ ਵਿਸ਼ਾਲ ਯਾਦਗਾਰਾਂ ਉਸਾਰਨ ਲਈ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਵਿਸ਼ੇਸ਼ ਰੁਚੀ ਲੈ ਕੇ ਕਰੋੜਾਂ ਦੀ ਰਕਮ ਆਪਣੇ ਡਰੀਮ ਪ੍ਰਾਜੈਕਟ ਨੂੰ ਨੇਪਰੇ ਚਾੜ੍ਹਨ ਲਈ ਦਿੱਤੀ ਸੀ। ਇਸ ਯਾਦਗਾਰ ਦੀ ਖੂਬਸੂਰਤੀ ਨੂੰ ਬਰਕਰਾਰ ਰੱਖਣ ਲਈ ਪੰਜਾਬ ਸਰਕਾਰ ਵਲੋਂ ਲੱਖਾਂ ਰੁਪਏ ਦਾ ਬਜਟ ਵੀ ਰੱਖਿਆ ਹੈ।
ਅੱਜ ਜਦੋਂ ਸ਼ਹੀਨ ਮੈਮੋਰੀਅਲ ਦੇ ਮੁੱਖ ਗੇਟ ਦੇ ਹਾਲਾਤ ਦੇਖੇ ਗਏ ਤਾਂ ਗੇਟ ਦੇ ਸਾਹਮਣੇ ਡਰੇਨ ਦੇ ਕੰਢੇ ਝੋਨੇ ਦੀ ਪਰਾਲੀ , ਸਵਾਹ, ਪਲਾਸਟਿਕ, ਕਾਗਜ਼ਾਂ ਦਾ ਕੂੜਾ ਖਿਲਰਿਆ ਪਿਆ ਸੀ ਅਤੇ ਡਰੇਨ ਦੇ ਕੰਢਿਆਂ ਨੂੰ ਲੱਗ ਰਿਹਾ ਖੋਰਾ ਵੀ ਇਸ ਖੂਬਸੂਰਤੀ 'ਤੇ ਦਾਗ ਵਾਂਗ ਪ੍ਰਤੀਤ ਹੋ ਰਿਹਾ ਸੀ। ਇਸ ਤੋਂ ਇਲਾਵਾ ਮੱਖ ਗੇਟ ਸਾਹਮਣੇ ਬਣੀ ਪਾਰਕਿੰਗ ਵਿਚ ਘਾਹ ਅਤੇ ਕੂੜੇ ਦੀ ਭਰਮਾਰ ਹੈ। ਇਨ੍ਹਾਂ ਹਾਲਾਤਾਂ ਨੂੰ ਦੇਖ ਕੇ ਲਗਦਾ ਹੈ ਕਿ ਸ਼ਾਇਦ ਪ੍ਰਸ਼ਾਸਨਿਕ ਅਧਿਕਾਰੀ ਅਤੇ ਯਾਦਗਾਰ ਦੇ ਪ੍ਰਬੰਧਕ ਕੇਵਲ ਖਾਨਾ-ਪੂਰਤੀ ਲਈ ਹੀ ਇਸ ਸਥਾਨ ਉੱਤੇ ਆਉਂਦੇ ਹਨ।
ਇਸ ਯਾਦਗਾਰ ਦੀ ਦੇਖਭਾਲ ਲਈ ਬਣੀ ਮੈਂਟੀਨੈਂਸ ਕਮੇਟੀ ਦੇ ਜ਼ਿੰਮੇਵਾਰ ਅਧਿਕਾਰੀ ਐੱਸ. ਡੀ. ਐੱਮ. ਮਨਮੋਹਨ ਸਿੰਘ ਕੰਗ ਨਾਲ ਜਦੋਂ ਉਕਤ ਮਸਲੇ ਸਬੰਧੀ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਊਣਤਾਈਆਂ ਨੂੰ ਤੁਰੰਤ ਦੂਰ ਕੀਤਾ ਜਾਵੇਗਾ ਅਤੇ ਯਾਦਗਾਰ ਦੀ ਦਿੱਖ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਉਣ ਲਈ ਹਰ ਸੰਭਵ ਯਤਨ ਕੀਤੇ ਜਾਣਗੇ।
ਪੰਜਾਬ ਐਂਡ ਚੰਡੀਗੜ੍ਹ ਕਾਲਜ ਟੀਚਰਜ਼ ਯੂਨੀਅਨ ਨੇ ਦਿੱਤਾ ਧਰਨਾ
NEXT STORY 
