ਗਿਆਨ ਕਿਸ ਨੂੰ ਮਿਲਦਾ ਹੈ? ਉਸ ਨੂੰ ਜੋ ਸ਼ਰਧਾ ਨਾਲ ਖੁਦ ਨੂੰ ਗੁਰੂ ਪ੍ਰਤੀ ਸਮਰਪਿਤ ਕਰੇ ਅਤੇ ਕਹੇ ਕਿ ਮੈਨੂੰ ਗਿਆਨ ਦਿਓ। ਜਦੋਂ ਗੁਰੂ ਤੁਹਾਨੂੰ ਗਿਆਨ ਦੇਣਾ ਬੰਦ ਕਰੇ ਜਿਵੇਂ ਪੂਰਨ ਆਹੂਤੀ ਦੇਵੇ ਤਾਂ ਸ਼ਿਸ਼ ਹੋਣ ਦੇ ਨਾਂ 'ਤੇ ਗੁਰੂ ਚਰਨਾਂ ਵਿਚ ਭੇਟ ਸਮਰਪਿਤ ਕਰੋ। ਭੇਟ ਕੀ ਹੋਵੇ? ਜੋ ਚੀਜ਼ ਤੁਹਾਨੂੰ ਸਭ ਤੋਂ ਜ਼ਿਆਦਾ ਪਿਆਰੀ ਹੋਵੇ, ਉਹੋ ਭੇਟ ਕਰੋ। ਰਾਜਾ ਜਨਕ ਅਸ਼ਟਾਵਕਰ ਜੀ ਕੋਲ ਗਿਆਨ ਲੈਣ ਆਏ ਤਾਂ ਜਨਕ ਨੇ ਮਰਿਆਦਾ ਅਨੁਸਾਰ ਫੁੱਲਾਂ ਦੀ ਮਾਲਾ ਗੁਰੂ ਚਰਨਾਂ ਵਿਚ ਭੇਟ ਕਰ ਕੇ ਪੂਜਨ ਕੀਤਾ, ਆਰਤੀ ਉਤਾਰੀ। ਫਿਰ ਬੋਲੇ ਕਿ ਮੈਂ ਤੁਹਾਨੂੰ ਕੀ ਭੇਟ ਕਰਾਂ? ਇਸ 'ਤੇ ਅਸ਼ਟਾਵਕਰ ਜੀ ਬੋਲੇ,''ਭੇਟ ਆਪਣੀ ਇੱਛਾ ਅਨੁਸਾਰ ਦਿੱਤੀ ਜਾਂਦੀ ਹੈ।'' ਇਹ ਸੁਣ ਕੇ ਜਨਕ ਬੋਲੇ,''ਪ੍ਰਭੂ, ਮੈਂ ਆਪਣਾ ਤਨ, ਮਨ, ਧਨ ਸਭ ਤੁਹਾਨੂੰ ਦਿੱਤਾ।'' ਗੁਰੂ ਬੋਲੇ,''ਮੈਨੂੰ ਸਵੀਕਾਰ ਹੈ।'' ਫਿਰ ਸਤਿਸੰਗ ਸ਼ੁਰੂ ਹੋਇਆ। ਜਦੋਂ ਸਮਾਪਤੀ ਹੋਈ ਤਾਂ ਜਨਕ ਪ੍ਰਣਾਮ ਕਰ ਕੇ ਚੱਲ ਪਏ। ਉਸ ਵੇਲੇ ਅਸ਼ਟਾਵਕਰ ਬੋਲੇ,''ਰਾਜਨ, ਕਿਥੇ ਚੱਲ ਪਿਆ?'' ਜਨਕ ਬੋਲੇ,''ਆਪਣੇ ਘਰ।'' ਗੁਰੂ ਨੇ ਕਿਹਾ,''ਇੰਨੀ ਜਲਦੀ ਬਦਲ ਗਿਆ, ਹੁਣੇ ਤਾਂ ਤੂੰ ਸਭ ਕੁਝ ਮੈਨੂੰ ਸਮਰਪਿਤ ਕਰ ਦਿੱਤਾ ਸੀ। ਫਿਰ ਹੁਣ ਮੇਰੀ ਇਜਾਜ਼ਤ ਤੋਂ ਬਿਨਾਂ ਕਿਵੇਂ ਜਾਵੇਂਗਾ?'' ਰਾਜਾ ਜਨਕ ਨੂੰ ਅਹਿਸਾਸ ਹੋ ਗਿਆ ਕਿ ਮਹੱਲ ਤਾਂ ਉਨ੍ਹਾਂ ਦਾ ਨਹੀਂ। ਫਿਰ ਅਸ਼ਟਾਵਕਰ ਜੀ ਬੋਲੇ,''ਰਾਜਨ, ਤੂੰ ਅਜੇ ਹੋਰ ਵੀ ਬੇਈਮਾਨੀ ਕੀਤੀ ਹੈ, ਤੂੰ ਮੈਨੂੰ ਮਨ ਵੀ ਦਿੱਤਾ ਸੀ, ਫਿਰ ਤੇਰੇ ਅੰਦਰ ਇਹ ਸੰਕਲਪ ਕਿਵੇਂ ਉੱਠਿਆ ਕਿ ਤੂੰ ਇਥੋਂ ਜਾਵੇਂ? ਗੱਲ ਪੈਸੇ ਦੀ ਨਹੀਂ ਅਤੇ ਨਾ ਹੀ ਮਹੱਲਾਂ ਦੀ ਹੈ। ਜਦੋਂ ਤੂੰ ਕਿਹਾ ਕਿ ਮਨ ਤੁਹਾਨੂੰ ਦਿੱਤਾ ਤਾਂ ਦਿੱਤਾ। ਇਸ ਮਨ ਵਿਚ ਅੱਜ ਤੋਂ ਬਾਅਦ ਸੰਕਲਪ ਉਹੋ ਉੱਠਦਾ ਜੋ ਮੈਂ ਕਹਿੰਦਾ, ਮੇਰੀ ਇੱਛਾ ਤੋਂ ਬਿਨਾਂ ਕੋਈ ਵਿਚਾਰ ਤੇਰੇ ਮਨ ਵਿਚ ਨਾ ਉੱਠੇ।''
