ਕ੍ਰਿਸਮਸ : 25 ਦਸੰਬਰ
ਪ੍ਰਭੂ ਯਿਸੂ ਮਸੀਹ ਦੀ ਪੈਦਾਇਸ਼ ਬਾਰੇ ਦੇਖੋ ਕੈਸੀ ਤ੍ਰਾਸਦੀ ਹੈ ਕਿ ਸਿਰਜਣਹਾਰ ਨੇ ਮਹਿਲ-ਮਾੜੀਆਂ ਛੱਡ ਕੇ ਮਾਮੂਲੀ ਜਗ੍ਹਾ ਚੁਣ ਲਈ। ਪ੍ਰਭੂ ਯਿਸੂ ਮਸੀਹ ਦੇ ਜਨਮ ਬਾਰੇ ਪਵਿੱਤਰ ਬਾਈਬਲ 'ਚ ਇੰਝ ਦੱਸਿਆ ਗਿਆ ਹੈ ਕਿ ਯਿਸੂ ਦੀ ਮਾਤਾ ਮਰੀਅਮ ਦੀ ਇਕ ਤਰਖਾਣ ਯੂਸਫ ਨਾਲ ਮੰਗਣੀ ਹੋ ਚੁੱਕੀ ਸੀ ਅਤੇ ਉਨ੍ਹਾਂ ਦੇ ਇਕੱਠੇ ਹੋਣ ਤੋਂ ਪਹਿਲਾਂ ਹੀ ਉਹ ਗਰਭਵਤੀ ਪਾਈ ਗਈ। ਉਸ ਦਾ ਪਤੀ ਯੂਸਫ ਜਿਹੜਾ ਬੜਾ ਧਰਮੀ ਪੁਰਖ ਸੀ, ਉਹ ਇਹ ਨਹੀਂ ਸੀ ਚਾਹੁੰਦਾ ਕਿ ਉਹ ਮਰੀਅਮ ਨੂੰ ਕਲੰਕਣ ਕਰੇ। ਯੂਸਫ ਨੇ ਮਰੀਅਮ ਨੂੰ ਚੁੱਪਚਾਪ ਛੱਡ ਦੇਣ ਦੀ ਦਲੀਲ ਬਣਾਈ। ਜਦੋਂ ਯੂਸਫ ਇਨ੍ਹਾਂ ਵਿਚਾਰਾਂ 'ਚ ਡੁੱਬਿਆ ਹੋਇਆ ਸੀ ਤਾਂ ਪ੍ਰਮੇਸ਼ਵਰ ਦੇ ਇਕ ਦੂਤ ਨੇ ਸੁਪਨੇ ਵਿਚ ਯੂਸਫ ਨੂੰ ਦਰਸ਼ਨ ਦੇ ਕੇ ਕਿਹਾ ਕਿ 'ਹੇ ਯੂਸਫ ਦਾਊਦ ਪੁੱਤਰ ਤੂੰ ਆਪਣੀ ਮੰਗੇਤਰ ਮਰੀਅਮ ਨੂੰ ਘਰ ਲਿਆਉਣ ਤੋਂ ਨਾ ਡਰ ਕਿਉਂਕਿ ਜਿਹੜਾ ਉਸ ਦੀ ਕੁੱਖ ਵਿਚ ਹੈ, ਉਹ ਪਵਿੱਤਰ ਆਤਮਾ ਹੈ, ਉਹ ਪੁੱਤਰ ਜਣੇਗੀ, ਤੂੰ ਉਸ ਦਾ ਨਾਂ ਯਿਸੂ ਰੱਖੀਂ, ਉਹ ਆਪਣੇ ਲੋਕਾਂ ਨੂੰ ਪਾਪਾਂ ਤੋਂ ਬਚਾਏਗਾ।' ਇਹ ਸਭ ਇਸ ਲਈ ਹੋਇਆ ਕਿ ਜਿਹੜਾ ਪ੍ਰਮੇਸ਼ਵਰ ਨੇ ਨਬੀ ਦੇ ਜ਼ੁਬਾਨੀ ਆਇਆ ਪੂਰਾ ਹੋਵੇ। (ਮੱਤੀ 1:1822) ਉਨ੍ਹੀਂ ਦਿਨੀਂ ਇੰਝ ਹੋਇਆ ਕਿ ਕੈਸਰ ਔਗਸਤੁਸ ਦੇ ਕੋਲੋਂ ਹੁਕਮ ਨਿਕਲਿਆ ਕਿ ਸਾਰੀ ਦੁਨੀਆ ਦੀ ਮਰਦਮਸ਼ੁਮਾਰੀ ਹੋਵੇ। ਇਹ ਪਹਿਲੀ ਮਰਦਮਸ਼ੁਮਾਰੀ ਸੀ, ਜੋ ਸੂਰੀਆ ਦੇ ਹਾਕਮ ਕੁਰੇਨੀਯਸ ਦੇ ਸਮੇਂ 'ਚ ਕੀਤੀ ਗਈ ਸੀ। ਯੂਸਫ ਵੀ ਇਸ ਲਈ, ਜੋ ਉਹ ਦਾਊਦ ਦੇ ਘਰਾਣੇ ਅਤੇ ਔਲਾਦ ਵਿਚੋਂ ਸੀ, ਗਲੀਲ ਦੇ ਨਾਸਰਤ ਨਗਰੋਂ ਯਹੂਦੀਆਂ 'ਚ ਦਾਊਦ ਦੇ ਨਗਰ ਨੂੰ ਜੋ ਬੈਤਲਹਮ ਕਹਾਉਂਦਾ ਹੈ ਗਿਆ, ਭਈ ਆਪਣੀ ਮੰਗ ਮਰੀਅਮ ਸਣੇ, ਜੋ ਗਰਭਵਤੀ ਸੀ, ਆਪਣਾ ਨਾਉਂ ਲਿਖਾਵੇ ਅਤੇ ਇਉਂ ਹੋਇਆ ਕਿ ਉਨ੍ਹਾਂ ਦੇ ਉੱਥੇ ਹੁੰਦਿਆਂ ਮਰੀਅਮ ਦੇ ਜਣਨ ਦੇ ਦਿਨ ਪੂਰੇ ਹੋ ਗਏ ਅਤੇ ਉਸ ਨੇ ਆਪਣਾ ਜੇਠਾ ਪੁੱਤਰ ਕੱਪੜੇ ਵਿਚ ਵਲ੍ਹੇਟ ਕੇ ਖੁਰਲੀ ਵਿਚ ਰੱਖਿਆ ਕਿਉਂ ਜੋ ਉਨ੍ਹਾਂ ਨੂੰ ਸਰਾਂ ਵਿਚ ਥਾਂ ਨਾ ਮਿਲੀ। (ਲੂਕਾ 2:17) ਜਦੋਂ ਮਸੀਹ ਦਾ ਜਨਮ ਹੋਇਆ ਤਾਂ ਆਸਮਾਨ 'ਤੇ ਇਕ ਨੂਰਾਨੀ ਸਿਤਾਰਾ ਵਿਖਾਈ ਦਿੱਤਾ, ਜਿਸ ਦੀ ਰੌਸ਼ਨੀ ਨਾਲ ਸਾਰਾ ਸੰਸਾਰ ਜਗਮਗਾ ਉੱਠਿਆ। ਇਹ ਅਦਭੁਤ ਸਿਤਾਰਾ ਉਦੋਂ ਵਿਖਾਈ ਦਿੰਦਾ ਸੀ, ਜਦੋਂ ਸੰਸਾਰ 'ਤੇ ਕਿਸੇ ਮਹਾਨ ਵਿਅਕਤੀ ਦੀ ਆਮਦ ਹੁੰਦੀ ਸੀ। ਇਸ ਰੂਹਾਨੀ ਸਿਤਾਰੇ ਦੀ ਚਕਾਚੌਂਧ ਰੌਸ਼ਨੀ ਨੂੰ ਦੇਖ ਕੇ ਦੁਨੀਆ ਦੇ ਚਾਰੇ ਕੋਨਿਆਂ ਦੇ ਜੋਤਿਸ਼ੀ ਉਸ ਦੇ ਦਰਸ਼ਨਾਂ ਲਈ ਗਏ ਅਤੇ ਉਨ੍ਹਾਂ ਦੇ ਸੋਨਾ, ਮੁਰ ਲੁਬਾਨ ਚੜ੍ਹਾ ਕੇ ਮੱਥਾ ਟੇਕਿਆ।
ਪ੍ਰਭੂ ਯਿਸੂ ਮਸੀਹ ਨੇ ਆਪਣੇ 33 ਸਾਲ ਦੇ ਜੀਵਨ ਕਾਲ ਵਿਚ ਸਾਢੇ ਤਿੰਨ ਸਾਲ ਮਨੁੱਖਤਾ ਦੀ ਕੀਤੀ ਰੂਹਾਨੀ ਸੇਵਾ ਦੌਰਾਨ ਰੂਹਾਨੀ ਸ਼ਕਤੀ ਨਾਲ ਕਈ ਮੁਅੱਜਜੇ ਕੀਤੇ। ਬੀਮਾਰਾਂ ਨੂੰ ਚੰਗਾ ਕੀਤਾ, ਦੋ ਮੱਛੀਆਂ ਅਤੇ 5 ਰੋਟੀਆਂ ਨਾਲ 5 ਹਜ਼ਾਰ ਦੀ ਭੀੜ ਨੂੰ ਰਜਾਇਆ। ਇਥੋਂ ਤਕ ਕਿ ਮੁਰਦਿਆਂ ਨੂੰ ਜੀਵਤ ਕੀਤਾ। ਜੇ ਪ੍ਰਭੂ ਯਿਸੂ ਦੀਆਂ ਸਿੱਖਿਆਵਾਂ ਵੱਲ ਝਾਤੀ ਮਾਰੀਏ ਤਾਂ ਉਹ ਇੰਨੀਆਂ ਸਰਲ ਤੇ ਸਾਦੀਆਂ ਹਨ ਕਿ ਆਮ ਆਦਮੀ ਉਨ੍ਹਾਂ ਨੂੰ ਸਮਝ ਕੇ ਗ੍ਰਹਿਣ ਕਰ ਸਕਦਾ ਹੈ। ਪ੍ਰਭੂ ਯਿਸੂ ਮਸੀਹ ਹਰ ਗੱਲ ਨੂੰ ਦ੍ਰਿਸ਼ਟਾਂਤਾਂ ਰਾਹੀਂ ਕਹਿੰਦੇ ਹਨ। ਉਨ੍ਹਾਂ ਨੇ ਬਦਲੇ ਦੀ ਭਾਵਨਾ ਨੂੰ ਨਕਾਰਦਿਆਂ ਆਪਣੇ ਨਾਲੋਂ ਆਪਣੇ ਗੁਆਂਢੀ, ਇਥੋਂ ਤਕ ਕਿ ਆਪਣੇ ਦੁਸ਼ਮਣਾਂ ਨਾਲ ਵੀ ਪਿਆਰ ਕਰਨ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਦਾ ਉਪਦੇਸ਼ ਕਿਸੇ ਇਕ ਧਰਮ ਜਾਂ ਜਾਤੀ ਲਈ ਨਹੀਂ, ਸਗੋਂ ਸਾਰੀ ਦੁਨੀਆ 'ਤੇ ਰਹਿਣ ਵਾਲੇ ਹਰ ਬਸ਼ਰ ਲਈ ਹੈ। ਜਿਥੋਂ ਤਕ ਯਿਸੂ ਮਸੀਹ ਦੀ ਜਨਮ ਤਰੀਕ 25 ਦਸੰਬਰ ਦਾ ਸੁਆਲ ਹੈ, ਤਿੰਨ ਸੌ ਸਾਲ ਮਸੀਹ ਦੇ ਜਨਮ ਤੋਂ ਬਾਅਦ ਉਸ ਵੇਲੇ ਦੇ ਬਜ਼ੁਰਗਾਂ ਨੇ ਪਵਿੱਤਰ ਬਾਈਬਲ ਵਿਚ ਦਰਜ ਪ੍ਰਭੂ ਯਿਸੂ ਮਸੀਹ ਦੇ ਜਨਮ ਵੇਲੇ ਮੌਸਮ ਅਤੇ ਦ੍ਰਿਸ਼ਾਂ ਅਨੁਸਾਰ ਤੈਅ ਕੀਤਾ। ਕ੍ਰਿਸਮਸ ਦਾ ਪਵਿੱਤਰ ਦਿਹਾੜਾ ਸਾਰੀ ਦੁਨੀਆ ਵਿਚ ਸਿਰਫ ਮਸੀਹ ਭਾਈਚਾਰਾ ਹੀ ਨਹੀਂ ਸਗੋਂ ਸਾਰੇ ਧਰਮਾਂ-ਵਰਗਾਂ ਦੇ ਲੋਕ ਬੜੀ ਸ਼ਰਧਾ ਤੇ ਧੂਮਧਾਮ ਨਾਲ ਮਨਾਉਂਦੇ ਹਨ।
- ਐਲਬਰਟ ਗਿੱਲ
