''ਭਗਵਾਨ, ਜੇ ਇਹ ਸਬੰਧ ਤੁਹਾਡੀ ਆਗਿਆ ਨਾਲ ਹੋ ਜਾਏ ਤਾਂ ਇਸ ਨਾਲ ਮੇਰੀ ਪਰਜਾ 'ਤੇ ਬਹੁਤ ਵਧੀਆ ਪ੍ਰਭਾਵ ਪਏਗਾ ਅਤੇ ਨਾਲ ਹੀ ਇਹ ਗੱਲ ਵੀ ਹੈ ਕਿ ਪ੍ਰਭਾ ਅਤੇ ਕੁਮਾਰ.....।''
''ਉਹ ਤਾਂ ਮੈਂ ਵੀ ਦੇਖ ਰਿਹਾ ਹਾਂ, ਪਰ ਜਦੋਂ ਪਿਤਾ ਜੀ ਇਥੇ ਹਨ, ਤਾਂ ਉਨ੍ਹਾਂ ਦੀ ਆਗਿਆ ਹੀ ਜ਼ਰੂਰੀ ਹੈ।'' ਸ਼੍ਰੀ ਕ੍ਰਿਸ਼ਨ ਜੀ ਨੇ ਕਿਹਾ।
''ਤੁਹਾਡੇ ਪਰਮ ਪੂਜਨੀਕ ਪਿਤਾ ਜੀ ਦੀ ਆਗਿਆ ਮੈਂ ਲੈ ਚੁੱਕਾ ਹਾਂ ਅਤੇ ਉਨ੍ਹਾਂ ਨੇ ਸਾਰੀ ਗੱਲ ਤੁਹਾਡੇ 'ਤੇ ਛੱਡ ਦਿੱਤੀ ਹੈ।''
''ਚੰਗਾ ਫਿਰ ਮੈਂ ਸਾਰੀ ਗੱਲ ਦਾ ਫੈਸਲਾ ਪਰਦੁਮਨ ਅਤੇ ਤੁਹਾਡੀ ਕੰਨਿਆ 'ਤੇ ਛੱਡਦਾ ਹਾਂ।''
ਮਲੇਛ ਰਾਜਾ ਸ਼ਾਲਵ ਦੇ ਮਾਰੇ ਜਾਣ ਦੇ ਪਿੱਛੋਂ ਸ਼੍ਰੀ ਕ੍ਰਿਸ਼ਨ ਜੀ ਨਵੇਂ ਰਾਜਾ ਵਜਰਨਾਭ ਦਾ ਕਹਿਣਾ ਮੰਨ ਕੇ ਕੁਝ ਦਿਨਾਂ ਲਈ ਉਸਦੀ ਰਾਜਧਾਨੀ 'ਚ ਠਹਿਰ ਗਏ। ਇਕ ਪਾਸੇ ਮਗ-ਦੁਰਗ 'ਚ ਪਰਦੁਮਨ ਜੀ ਅਤੇ ਵਜਰਨਾਭ ਦੀ ਪੁੱਤਰੀ ਪ੍ਰਭਾਵਤੀ ਦੀ ਪ੍ਰੇਮਲੀਲਾ ਪੂਰੇ ਸਿਖਰ 'ਤੇ ਸੀ, ਦੂਜੇ ਪਾਸੇ ਰਾਜ ਦੁਰਗ 'ਚ ਵਜਰਨਾਭ ਨੇ ਸ਼੍ਰੀ ਕ੍ਰਿਸ਼ਨ ਜੀ ਦੀ ਸਲਾਹ ਨਾਲ ਮਲੇਛ ਸੰਸਕ੍ਰਿਤੀ ਸਮਾਪਤ ਕਰਕੇ ਆਰੀਆ ਸੰਸਕ੍ਰਿਤੀ ਪ੍ਰਚਲਿਤ ਕਰਨ ਦੀ ਯੋਜਨਾ ਤਿਆਰ ਕਰ ਲਈ। ਮਲੇਛ ਸੰਸਕ੍ਰਿਤੀ 'ਚ ਹਰ ਤਰ੍ਹਾਂ ਪਸ਼ੂਆਂ ਅਤੇ ਪੰਛੀਆਂ ਦਾ ਮਾਸ ਖਾਣ, ਸ਼ਰਾਬ ਪੀਣ, ਪਸ਼ੂ ਬਲੀ ਅਤੇ ਮਾਨਵ ਬਲੀ ਦੀ ਖੁੱਲ੍ਹੀ ਛੁੱਟੀ ਸੀ। ਮਾਨਵ ਬਲੀ ਦੇ ਮਾਮਲੇ 'ਚ ਇੰਨੀ ਪਾਬੰਦੀ ਜ਼ਰੂਰ ਸੀ ਕਿ ਬਲੀ ਲਈ ਆਪਣੇ ਪ੍ਰਦੇਸ਼ ਦਾ ਕੋਈ ਪੁਰਸ਼ ਕਦੇ ਨਾ ਫੜਿਆ ਜਾਏ, ਸਗੋਂ ਦੂਜੇ ਪ੍ਰਦੇਸ਼ਾਂ ਜਾਂ ਆਰੀਆਂ ਦੇ ਰਾਜਾਂ ਤੋਂ ਜਿਹੜਾ ਪੁਰਸ਼ ਫੜ ਕੇ ਲਿਆਂਦਾ ਜਾਏ, ਉਸਦੀ ਬਲੀ ਦੇਵਤਾ ਨੂੰ ਦਿੱਤੀ ਜਾਏ।
