ਇਕ ਬੱਚਾ ਆਪਣੀ ਮਾਂ ਨਾਲ ਦੁਕਾਨ 'ਤੇ ਖਰੀਦਦਾਰੀ ਕਰਨ ਗਿਆ ਤਾਂ ਦੁਕਾਨਦਾਰ ਨੇ ਉਸ ਦੀ ਮਾਸੂਮੀਅਤ ਦੇਖ ਕੇ ਉਸ ਨੂੰ ਟੌਫੀਆਂ ਦੇ ਸਾਰੇ ਡੱਬੇ ਖੋਲ੍ਹ ਕੇ ਕਿਹਾ ਕਿ ਲੈ ਬੇਟਾ, ਟੌਫੀਆਂ ਲੈ ਲੈ ਪਰ ਉਸ ਬੱਚੇ ਨੇ ਵੀ ਬੜੇ ਪਿਆਰ ਨਾਲ ਉਸ ਨੂੰ ਮਨ੍ਹਾ ਕਰ ਦਿੱਤਾ। ਇਸ ਦੇ ਬਾਵਜੂਦ ਉਸ ਦੁਕਾਨਦਾਰ ਤੇ ਉਸ ਦੀ ਮਾਂ ਨੇ ਵੀ ਉਸ ਨੂੰ ਬਹੁਤ ਕਿਹਾ ਪਰ ਉਹ ਮਨ੍ਹਾ ਕਰਦਾ ਰਿਹਾ। ਹਾਰ ਕੇ ਦੁਕਾਨਦਾਰ ਨੇ ਖੁਦ ਹੀ ਆਪਣੇ ਹੱਥ ਨਾਲ ਟੌਫੀਆਂ ਕੱਢ ਕੇ ਉਸ ਨੂੰ ਦਿੱਤੀਆਂ ਤਾਂ ਬੱਚੇ ਨੇ ਲੈ ਲਈਆਂ ਅਤੇ ਆਪਣੀ ਜੇਬ ਵਿਚ ਪਾ ਲਈਆਂ। ਵਾਪਸ ਆਉਂਦਿਆਂ ਉਸ ਦੀ ਮਾਂ ਨੇ ਪੁੱਛਿਆ,''ਜਦੋਂ ਅੰਕਲ ਤੇਰੇ ਸਾਹਮਣੇ ਡੱਬਾ ਖੋਲ੍ਹ ਕੇ ਟੌਫੀਆਂ ਦੇ ਰਹੇ ਸੀ ਤਾਂ ਤੂੰ ਨਹੀਂ ਲਈਆਂ ਪਰ ਜਦੋਂ ਉਨ੍ਹਾਂ ਨੇ ਆਪਣੇ ਹੱਥਾਂ ਨਾਲ ਦਿੱਤੀਆਂ ਤਾਂ ਲੈ ਲਈਆਂ, ਅਜਿਹਾ ਕਿਉਂ?'' ਇਸ 'ਤੇ ਬੱਚੇ ਨੇ ਬੜਾ ਖੂਬਸੂਰਤ ਜਵਾਬ ਦਿੱਤਾ,''ਮਾਂ, ਮੇਰੇ ਹੱਥ ਛੋਟੇ-ਛੋਟੇ ਹਨ। ਜੇ ਮੈਂ ਟੌਫੀਆਂ ਲੈਂਦਾ ਤਾਂ 2-3 ਟੌਫੀਆਂ ਹੀ ਆਉਂਦੀਆਂ, ਜਦੋਂਕਿ ਅੰਕਲ ਦੇ ਹੱਥ ਵੱਡੇ ਹਨ, ਇਸ ਲਈ ਜ਼ਿਆਦਾ ਟੌਫੀਆਂ ਮਿਲ ਗਈਆਂ।'' ਬਿਲਕੁਲ ਇਸੇ ਤਰ੍ਹਾਂ ਜਦੋਂ ਰੱਬ ਸਾਨੂੰ ਦਿੰਦਾ ਹੈ ਤਾਂ ਆਪਣੀ ਮਰਜ਼ੀ ਨਾਲ ਦਿੰਦਾ ਹੈ ਅਤੇ ਉਹ ਸਾਡੀ ਸੋਚ ਤੋਂ ਪਰੇ ਹੁੰਦਾ ਹੈ। ਸਾਨੂੰ ਹਮੇਸ਼ਾ ਉਸ ਦੀ ਮਰਜ਼ੀ ਵਿਚ ਖੁਸ਼ ਰਹਿਣਾ ਚਾਹੀਦਾ ਹੈ। ਕੀ ਪਤਾ ਉਹ ਕਿਸੇ ਦਿਨ ਸਾਨੂੰ ਪੂਰਾ ਸਮੁੰਦਰ ਦੇਣਾ ਚਾਹੁੰਦਾ ਹੋਵੇ ਅਤੇ ਅਸੀਂ ਹੱਥ ਵਿਚ ਚਮਚ ਲੈ ਕੇ ਖੜ੍ਹੇ ਹੋਈਏ।
ਇਹ ਸੰਸਾਰ ਕੀ ਹੈ?
NEXT STORY 
